यशैया 41:25 - नेवाः बाइबल

²⁵ “जिं सुं छम्‍हय्‌सित उत्तरपाखें ल्‍ययागु दु अले व वइ। पुर्बं वयाः वं जिगु नां काइ। भ्‍यातनाःयात न्‍हुतुन्‍हू थें अले कुमालं चा न्‍हुतुन्‍हू थें वं शासकतय्‌त न्‍हुइ।

यशैया 41:25 ပူးပေါင်းရင်းမြစ်များ

२ शमूएल 22:43

जिं इमित धू जुइक दाया। मनूतय्‌सं लँय् ध्‍याचःयात न्‍हुत्तुन्‍हुगु थें जिं इमित न्‍हुत्तुन्‍हुया।

यशैया 10:6

जितः तंम्‍वय्‌किपिं परमेश्‍वरयात मानय् याइ मखुपिनिगु देशय् हमला यायेत जिं अश्‍शूरीतय्‌त छ्वयाहयागु दु। लँय् च्‍वंगु धूयात तुतिं न्‍हुतुन्‍हू थें मनूतय्‌त न्‍हुत्तुन्‍हुयेत व लुतय् यानाकायेत जिं अश्‍शूरीतय्‌त छ्वयाहयागु दु।”

यशैया 21:2

जिं तसकं ग्‍यानापुगु दर्शन खनागु दु तसकं धोखा बीम्‍हं धोखा बी, लुतय् याइम्‍हय्‌सिनं लुतय् याइ। अय् एलाम, हमला या, अय् मादी, शहरयात घेरा लगय् या! बेबिलोनं ब्‍यूगु दुःखकष्‍ट परमप्रभुं दिकादी।

यशैया 41:2

“सुनां पुर्बं सुं छम्‍हय्‌सित वय्‌कःया सेवा यायेत धार्मिकताय् सःता ग्‍वाकूगु दु? वय्‌कलं जात जातितय्‌त थःगु अधीनय् हयादी, अले जुजुतय्‌त इमिगु न्‍ह्यःने थःगु अधिकारय् हयादी। वं इमित थःगु तरवारं धू थें अले थःगु धनुष वाणं ब्‍वय्‌का यंकीगु छ्वस थें यानादी।

यशैया 44:28

गुम्‍हय्‌सिनं कोरेसया बारे धाइ, ‘व जिमि जवाः खः, अले जिगु फुक्‍क इच्‍छा वं पूवंकी। यरूशलेमया बारे वं धाइ, “व हाकनं दय्‌केमा,” अले देगःया बारे, “थुकियात हाकनं दय्‌की।”’

यशैया 45:1

“परमप्रभुं थम्‍हं अभिषेक यानादीम्‍ह कोरेसयात धयादी, जात जातितय्‌त त्‍याकेत, जुजुतय्‌गु ल्‍हातं अधिकार लाकाकायेत, शहर शहरया मू ध्‍वाखात चाय्‌केत व ध्‍वाखात वयागु विरोधय् गुबलें तीमफय्‌मा धकाः जिं वयात शक्ति बियागु दु, जि परमप्रभुं जुजु कोरेसयात थथे धाये,

यशैया 45:13

कोरेसयात जिगु धार्मिकताया निंतिं थनागु दु। जिं वयागु फुक्‍क लँपु तप्‍यंकाबी। वं जिगु शहर हाकनं दय्‌की, अले ज्‍वनायंकूपिं फुक्‍कसित छुत्‍कारा यानाबी। धिबा वा छुं कोसेलि मकासें हे थथे याइ।” दक्‍व शक्ति दुम्‍ह परमप्रभुं धयादी।

यर्मिया 1:14

वय्‌कलं जितः धयादिल, “थ्‍व देशय् च्‍वंपिं सकसिथाय् उत्तरपाखें विपत्ति वइ।

यर्मिया 50:3

छाय्‌धाःसा उत्तरपाखें छगू जातिं वयात हमला याइ, अले वयागु देशयात झिजांमिजां दंगुथाय् यानाबी। अन सुं च्‍वनी मखु, मनूत व पशुत निथिं बिस्‍युं वनी।”

मीका 7:10

“जितः परमप्रभु छिमि परमेश्‍वर गन दु?” धकाः धाइम्‍ह जि शत्रु थ्‍व खनाः तसकं मछाली। अले जिगु मिखां व क्‍वःदःगु खनी। वयात गल्‍लि गल्‍लिइ ध्‍याचःयात थें न्‍हुत्तुन्‍हुइ।

जकरिया 10:5

इपिं लडाइँलय् थः शत्रुतय्‌त लँया धुलय् न्‍हुत्तु न्‍हुइपिं बल्‍लाःपिं सिपाइँत थें जुइ। परमप्रभु इपिं लिसे दीगुलिं इमिसं सल गयाः वइपिं सिपाइँतय्‌त नं बुकी।

प्रकाश 16:12

खुम्‍हम्‍ह स्‍वर्गदूतं थःगु ख्‍वल्‍चा तःधंगु यूफ्रेटिस खुसिइ प्‍वंकल। अले पुर्बयापिं जुजुपिं वये जीक खुसिया लः सुनावन, लँ दत।