यशैया 41:14 - नेवाः बाइबल

¹⁴ हे कीचा याकूब, ग्‍याये मते! हे चिधंगु इस्राएल, जिं हे छन्‍त ग्‍वाहालि याये।” परमप्रभु, छन्‍त उद्धार यानादीम्‍ह इस्राएलया दक्‍वसिबय् तःधंम्‍ह पवित्र परमेश्‍वरं थथे धयादी।

यशैया 41:14 ပူးပေါင်းရင်းမြစ်များ

अय्‍यूब 19:25

तर जिं स्‍यू, जितः उद्धार यानादीम्‍ह म्‍वानाच्‍वंगु दु। दकलय् लिपांगु इलय् वय्‌कः पृथ्‍वीइ दनादी।

अय्‍यूब 25:6

थुकथं हे परमेश्‍वया मिखाय् मनूत की थें खः, झीपिं सीमानिपिं मनूत किमि थें जक खः।”

भजनसंग्रहया सफू 19:14

हे परमप्रभु! जितः बचय् यानादीम्‍ह, जितः शरण बीम्‍ह! जिगु म्‍हुतुं पिहांवइगु खँग्‍वः व जिगु नुगःया प्रार्थना छितः ययेमा!

भजनसंग्रहया सफू 22:6

जि ला छम्‍ह की जक खः, मनू मखु, सकसिनं क्‍वह्यंकाः व हेपंख्‍याकाच्‍वने माःम्‍ह!

भजनसंग्रहया सफू 46:5

परमेश्‍वर व शहरय् च्‍वनादीगु दु व गुबलें नाश जुइ फइ मखु। सुथ न्‍हापां हे परमेश्‍वरं उकियात ग्‍वाहालि बियादी।

भजनसंग्रहया सफू 78:35

अले तिनि परमेश्‍वर थःपिनि ल्‍वहंधी खः, थः मनूतय्‌त मू पुलाः त्‍वःतकादीम्‍ह दक्‍वसिबय् तःधंम्‍ह परमेश्‍वर खः धकाः इमि लुमन।

यशैया 35:10

अले परमप्रभुं मू पुलाः छुत्‍कारा यानादीपिं लिहां वइ। इपिं सियोनय् म्‍ये हा हां दुहां वनी। न्‍ह्याबलेंया लसता इमिगु छ्यंया श्रीपेच जुइ। इमिसं लसता व खुशी लुइकी, अले दुःखकष्‍ट व झसुका इपिंपाखें तापाक्‍क हे जुइ।

यशैया 37:4

अश्‍शूरयाम्‍ह जुजुं म्‍वाःम्‍ह परमेश्‍वरयात हेस्‍यायेत थः छम्‍ह सेनापति छ्वयाहःगु दु। परमप्रभु छिकपिनि परमेश्‍वरं वं धाःगु खँ न्‍यनादीमा अले न्‍यनादीगु खँया लागि वयात सजाँय बियादीमा। उकिं झी गुलि मनूत म्‍वानाच्‍वंगु दु, इमिगु निंतिं प्रार्थना यानाब्‍यु।”

यशैया 41:10

अथे जुयाः ग्‍याये मते, छाय्‌धाःसा जि छनापं हे दु। नुगः क्‍वतुंके मते, छाय्‌धाःसा जि हे छिमि परमेश्‍वर खः। जिं छन्‍त बल्‍लाके। जिं छन्‍त ग्‍वाहालि याये। जिगु धार्मिकताया जव ल्‍हातं जिं छन्‍त तिबः बी।

यशैया 43:14

परमप्रभु छिमित उद्धार याइम्‍ह खः। इस्राएलया पवित्र परमेश्‍वरं थथे धयादी, “छिमिगु लागिं हे जिं बेबिलोनया विरोधय् सेना छ्वये। इमिसं हमला याइ अले बेबिलोनीत थःगु जीवन बचय् यायेत बिस्‍युं वनी। इमित इमिसं घमण्‍ड यानाच्‍वंगु इमिगु जहाजय् जबरजस्‍ती बिसिकेछ्वइ।

यशैया 43:3

छाय्‌धाःसा जि परमप्रभु छिमि परमेश्‍वर खः, इस्राएलया पवित्र परमेश्‍वर, छिमि मुक्तिदाता। छन्‍त त्‍वतकेत मिश्र देश अले छंगु पलेसा कूश व सेबा जिं बी।

यशैया 44:22

जिं छंगु अपराधत सुपाँय् थें अले छंगु पाप सुथय्‌या खसु थें चीकाछ्वयागु दु। जिथाय् लिहां वा, छाय्‌धाःसा जिं छन्‍त उद्धार यानागु दु।”

यशैया 44:24

“परमप्रभुं थथे धयादी, छन्‍त उद्धार यानादीम्‍ह अले छन्‍त गर्भय् दय्‌कादीम्‍ह, “जि हे परमप्रभु खः, गुम्‍हय्‌सिनं फुक्‍कं दय्‌कादिल, गुम्‍हय्‌सिनं याकःचां हे आकाशयात चकंकादिल, गुम्‍हय्‌सिनं थम्‍हं हे पृथ्‍वीयात न्‍यनावंकादिल,

यशैया 44:6

इस्राएलया जुजु व उद्धार यानादीम्‍ह, दक्‍व शक्ति दुम्‍ह परमप्रभुं थथे धयादी – “जि हे शुरु व अन्‍त खः। जि बाहेक मेपिं सुं नं परमेश्‍वर मदु।

यशैया 47:4

झीत उद्धार याइम्‍ह दक्‍व शक्ति दुम्‍ह परमप्रभु हे वय्‌कःया नां खः! वय्‌कः इस्राएलया पवित्र परमेश्‍वर खः।

यशैया 48:17

परमप्रभु, छन्‍त उद्धार यानादीम्‍ह व इस्राएलया पवित्र परमेश्‍वरं थथे धयादी, “जि परमप्रभु छिमि परमेश्‍वर खः, सुनां छंगु भिंया निंतिं छन्‍त स्‍यनादी, सुनां छ वनेमाःगु लँय् छन्‍त ब्‍वना यंकी।

यशैया 49:26

छिमित दुःखकष्‍ट ब्‍यूपिन्‍त जिं इमिगु थःगु हे ला नके। दाखमद्यं का थें इपिं थःगु हे हिं काइतिनि। अनंलि फुक्‍क मनूतय्‌सं थ्‍व खँ सी जि, परमप्रभु छन्‍त मुक्ति बीम्‍ह खः, अले छन्‍त उद्धार याइम्‍ह, याकूबया तसकं बल्‍लाःम्‍ह खः।”

यशैया 49:7

शासकतय् दासयात, सुयात जाति जातितय्‌सं तसकं घृणा याइ, परमप्रभु, उद्धार यानादीम्‍ह व इस्राएलया पवित्र परमेश्‍वरं थथे धयादी, “जुजुतय्‌सं छन्‍त खनी अले इपिं छन्‍थाय् न्‍ह्यःने दं वइ। छन्‍त शासकतय्‌सं नं खनी अले छंगु न्‍ह्यःने भ्‍वसू वइ। छाय्‌धाःसा परमप्रभु विश्‍वास याये बहःम्‍ह इस्राएलया पवित्र परमेश्‍वरं छन्‍त ल्‍ययादीगु दु।”

यशैया 54:5

छाय्‌धाःसा छन्‍त सृष्‍टि यानादीम्‍ह छिमि भाःत खः, वय्‌कःया नां दक्‍व शक्ति दुम्‍ह परमप्रभु खः। इस्राएलया पवित्र परमेश्‍वर छन्‍त उद्धार यानादीम्‍ह खः। वय्‌कःयात फुक्‍क पृथ्‍वीया परमेश्‍वर धकाः धाइ।

यशैया 54:8

तमं जिं छन्‍त छुं ईया निंतिं जक जिगु ख्‍वाः छपाखें सुचुकागु खः। जिगु सदां दइगु दया मायां जिं छन्‍त दया याये,” छन्‍त उद्धार यानादीम्‍ह परमप्रभु परमेश्‍वरं थथे धयादी।

यशैया 59:20

“थःगु पापया पश्‍चाताप याइपिं याकूबया सन्‍तानतय्‌गु निंतिं मुक्ति बीम्‍ह सियोनय् झायादी।” परमप्रभुं घोषणा यानादी।

यशैया 60:16

माम्‍हं थः मस्‍तय्‌त बिचाःसंचाः याःथें जाति जाति व जुजुपिन्‍सं छन्‍त बिचाः संचा याइ, उबलय् छं परमप्रभु थःत मुक्ति बीम्‍ह, उद्धार याइम्‍ह व याकूबया दक्‍व शक्ति दुम्‍ह खः धकाः थुइकी।

यशैया 63:16

तर छि ला जिमि अबु खः। अब्राहामं जिमित म्‍हमस्‍यूसां अले इस्राएलं जिमित नाला मकाःसां, छि, हे परमप्रभु, जिमि अबु खः। छिगु नां न्‍हापांनिसें हे जिमित उद्धार याइम्‍ह खः।

यर्मिया 46:27

“हे जिम्‍ह दास याकूब, छ ग्‍याये मते। हे इस्राएलयापिं मनूत, नुगः क्‍वतुंके मते। जिं थःम्‍हं हे छिमित तापाःगु देशं व छिमि सन्‍तानयात ज्‍वनाः यंकातःगु देशं त्‍वःतकाहये। याकूबया सन्‍तानतय्‌त हाकनं शान्‍ति व सुरक्षा दइ। सुनानं वयात ख्‍याये फइ मखु।

यर्मिया 50:34

अय्‌नं इमित उद्धार याइम्‍ह बल्‍लाः, वय्‌कःया नां दक्‍व शक्ति दुम्‍ह परमप्रभु खः। वय्‌कलं इमिगु मुद्दा म्‍हितादी अले देशय् शान्‍ति हयादी, तर बेबिलोनय् च्‍वंपिन्‍के धाःसा अशान्‍ति हयादी।

विलाप 3:57

जिं छिके बिन्‍ति यानाबलय् छि जिगु न्‍ह्यःने झायादिल, अले छिं जितः धयादिल, “ग्‍याये मते।”

दानिएल 10:12

हानं वं जितः धाल, “हे दानिएल, ग्‍याये मते, छं दुग्‍यां कायेगु क्‍वछ्यूगु न्‍हापांगु दिंनिसें व छिमि परमेश्‍वरया न्‍ह्यःने थःत क्‍वमिलु याःबलय् निसें छंगु प्रार्थना न्‍यनादीगु दु। जि व हे लिसः बीत वयाम्‍ह खः।

होशे 11:9

जिं जिगु तच्‍वकं च्‍याःगु तमं छुं नं याये मखुत, जिं एफ्राइमयात हाकनं भज्‍यंक नाश याये मखुत। छाय्‌धाःसा जि परमेश्‍वर खः, मनू मखु, जि परमपवित्र छिपिंनापं हे दु, जि तःच्‍वगु तमं छिमिथाय् वये मखु।

मत्ती 7:14

जीवनयागु ध्‍वाखा धाःसा चिब्‍या, अले लँ चिब्‍या। उकिं थनं जुइपिं मनूत यक्‍व दइ मखु।

लूका 12:32

“परमेश्‍वर लय्‌तायादीगुलिं छिमित वय्‌कलं थःगु राज्‍य बियादी। उकिं छिमिगु पुचः चिधं धकाः छिपिं ग्‍याये माःगु मदु।

रोमी 9:27

इस्राएलयात कयाः यशैयां थथे धाःगु दु – “इस्राएलया सन्‍तान समुद्रय् च्‍वंगु फि थें यक्‍व दुसां ल्‍यंदुपिं जक बचय् जुइ,

गलाती 3:13

येशू ख्रीष्‍टं व्‍यवस्‍थाया सरापं झीत मू पुलाः त्‍वःतकादिल। वय्‌कलं क्रूसय् यग्‍गानाः झीगु सराः थःम्‍हं फयादीगु दु। व्‍यवस्‍थाय् धयातःगु दु “सिँयागु थामय् यख्‍खाइम्‍हय्‌सित सराः लाइ।”

व्‍यवस्‍था 7:7

छिपिं ल्‍याखय् मेगु जाति स्‍वयाः अप्‍वः दयाः परमप्रभुं छिमित माया यानादीगु वा ल्‍ययादीगु मखु, छिपिं ला ल्‍याखय् मेगु जातित स्‍वयाः कम दु।

तीतस 2:14

झीत झीगु पापं छुतय् यायेत वय्‌कः थः हे सिनादिल। थुकथं वय्‌कलं झीत थः मनू यानाः पवित्र यानादिल, अले भिंगु ज्‍या यायेत साहस बियादिल।

यहोशू 17:18

पहाडी देशयागु गुँ नं छिमिगु हे जुइ। उकियागु सिमा पा, अले अन जःखःयागु इलाका नं छिमिगु हे जुइ। उपिं कनानीतय्‌के नयागु रथत दुगुलिं इपिं बल्‍लाः अय्‌नं छिमिसं इमित लिनाछ्वये फइ।”

प्रकाश 5:9

इमिसं थथे धकाः छपु न्‍हूगु म्‍ये हाल – “थ्‍व भ्‍वंथुइ च्‍वंगु छाप तछ्यानाः छिं हे जक फ्‍यनादी फु, छाय्‌धाःसा छितः स्‍याये धुंकल, अले छिगु हिं परमेश्‍वरया लागि फुक्‍क कुलयापिं, फुक्‍क भाषां नवाइपिं, फुक्‍क देशयापिं व फुक्‍क जात जातियापिन्‍त न्‍यानादिल।