यशैया 40:26 - नेवाः बाइबल

²⁶ च्‍वय् आकाशय् मिखा ब्‍वयाः स्‍व, अनयागु फुक्‍क नगुत सुनां दय्‌कूगु खः? वय्‌कलं हे मखु ला? वय्‌कलं उपिं फुक्‍क नगु व नक्षत्रतय्‌त नां कयाः सःतादी, वय्‌कःया तःधंगु शक्तिया कारणं उपिं छगू नं तनावनी मखु।

यशैया 40:26 ပူးပေါင်းရင်းမြစ်များ

उत्‍पत्ति 1:14

अले परमेश्‍वरं धयादिल, “न्‍हि व चा छुटे यायेत आकाशय् जः दयेमा। अले थ्‍व दिं, दँ व नखःचखः सीकेगु चिं जुइ।

उत्‍पत्ति 1:16

परमेश्‍वरं ततःधंगु निगू जः दय्‌कादिल – तःधंगु जः न्‍हिनय् थीत व चिधंगु जः चान्‍हय् थीत खः। वय्‌कलं नगुत नं दय्‌कादिल।

भजनसंग्रहया सफू 102:25

दकलय् न्‍हापां छिं पृथ्‍वी सृष्‍टि यानादिल, अले थःगु हे ल्‍हातं आकाश दय्‌कादिल।

भजनसंग्रहया सफू 119:91

छिगु विधि थौं तक नं दयाच्‍वंगु दु, छाय्‌धाःसा फुक्‍क सृष्‍टिं छिगु सेवा याइ।

भजनसंग्रहया सफू 121:1

गुँच्‍वकाय् च्‍वकाय् जिं मिखा ब्‍वये, गनं जितः ग्‍वाहालि वइ?

भजनसंग्रहया सफू 19:1

आकाशं गुलि बांलाक परमेश्‍वरया महिमा कनाच्‍वंगु दु! गुलि अःपुक आकाशं वय्‌कःया ल्‍हाःया कलाः क्‍यनाच्‍वंगु दु।

भजनसंग्रहया सफू 66:3

परमेश्‍वरयात धा, “छिं यानादीगु ज्‍या गपाय्‌सकं अजू चायापु। छिगु शक्ति नं थुलि तःधं, शत्रुत छिगु न्‍ह्यःने ग्‍यानाः कय्‌कुनी।

यशैया 34:16

परमप्रभुया भ्‍वंथू स्‍व अले ब्‍वँ! उकी छम्‍ह नं तनावनी मखु। सुयातं निम्‍ह तिपुया निंतिं मगाःमचाः जुइ मखु, छाय्‌धाःसा वय्‌कःया म्‍हुतुं थथे धयादीगु दु, वय्‌कःया आत्‍मां इपिं सकसितं छथाय् मुंकादी,

यशैया 42:5

परमप्रभु परमेश्‍वरं आकाश दय्‌काः उकियात चकंकादिल, अले पृथ्‍वी व उकी दुगु फुक्‍कयात न्‍यनावंकादिल, अले वय्‌कलं अन दुपिं मनूतय्‌त सासः व थुखे उखे जुइपिन्‍त जीवन बियादी। परमप्रभु परमेश्‍वरं थथे धयादी –

यशैया 44:24

“परमप्रभुं थथे धयादी, छन्‍त उद्धार यानादीम्‍ह अले छन्‍त गर्भय् दय्‌कादीम्‍ह, “जि हे परमप्रभु खः, गुम्‍हय्‌सिनं फुक्‍कं दय्‌कादिल, गुम्‍हय्‌सिनं याकःचां हे आकाशयात चकंकादिल, गुम्‍हय्‌सिनं थम्‍हं हे पृथ्‍वीयात न्‍यनावंकादिल,

यशैया 45:12

पृथ्‍वी जिं हे दय्‌काःगु खः, अले उकी दुपिं मनूत नं जिं हे सृष्‍टि यानागु खः। जिगु हे ल्‍हाःया ज्‍यां आकाशयात चक्‍कंकागु खः। अले उकी दुगु नक्षत्र व नगुत पाय्‌छिकथं मिलय् यानातयागु दु।

यशैया 45:7

जिं जः दय्‌का, अले खिउँगुयात नं सृष्‍टि याना। जिं आशिष व विपत्ति निगुलिं हया। जि परमप्रभुं हे थुपिं फुक्‍क ज्‍या याना।

यशैया 48:12

“हे याकूबया सन्‍तान, जिं ल्‍ययाम्‍ह इस्राएल, जिगु खँ ध्‍यान बियाः न्‍यँ! जि परमेश्‍वर खः, जि हे शुरु व अन्‍त खः।

यशैया 48:13

जिं थःगु हे ल्‍हातं पृथ्‍वीया जग स्‍वनागु दु, जिगु जव ल्‍हातं आकाशयात चक्‍कंकागु दु। गुबलय् जिं इमित सःते अले इपिं फुक्‍क छथाय् मुं वइ।

यशैया 51:6

छिमिसं च्‍वय् आकाशय् मिखा ब्‍व, अले क्‍वय् पृथ्‍वीइ स्‍व! आकाश कुँ थें खने मदयावनी, अले पृथ्‍वी पुलांगु कापः थें गनावनी। पृथ्‍वीइ च्‍वंपिं मनूत भुजिं थें सी। तर जिगु उद्धार न्‍ह्याबलें दयाच्‍वनी। जिगु धार्मिकता गुबलें अन्‍त जुइ मखु।

यशैया 66:2

छु थःगु हे ल्‍हातं जिं आकाश व पृथ्‍वी दय्‌कागु मखु ला? अले फुक्‍कं थथे जू वःगु मखु ला? परमप्रभुं घोषणा यानादी। “आत्‍माय् चीमि खनीपिं व नुगः ख्‍वःपिन्‍त अले जिगु वचनय् थरथर खाइपिन्‍त जिं दयां स्‍वये।

व्‍यवस्‍था 4:19

छिमिसं आकाशपाखे थस्‍वइबलय् अन दुगु सूर्य, तिमिला, नगुत व फुक्‍क ग्रह नक्षत्रतय्‌त खनाः उमित भागियाये मते, पुजा नं याये मते। उपिं परमप्रभुं पृथ्‍वीया फुक्‍क जातितय्‌गु निंतिं बियादीगु खः।