यशैया 20:2 - नेवाः बाइबल

² उगु हे दँय् परमप्रभुं आमोजया काय् यशैयालिसें न्‍ववानादिल। वय्‌कलं वयात थथे धयादिल, “हुँ, छंगु म्‍हय् च्‍वंगु भांग्रा त्‍वःति अले छंगु तुतिइ च्‍वंगु लाकां नं त्‍वः।” अले वं अथे हे यात, अले व पचिंनांगा व लाकां मदय्‌क हे न्‍यासि जुल।

यशैया 20:2 ပူးပေါင်းရင်းမြစ်များ

२ शमूएल 15:30

तर दाऊद थःगु छ्यं त्‍वपुयाः खालि तुतिं ख्‍वख्‍वं जैतून डाँडाय् थहां वन। वनापं दुपिं फुक्‍क मनूत नं थथःगु छ्यं त्‍वपुयाः ख्‍वख्‍वं च्‍वय् थहां वन।

२ शमूएल 6:20

दाऊदं थः परिवारयात सुवाः बीत वःबलय् शाऊलया म्‍ह्याय् मीकल वयात नापलायेत पिहां वयाः थथे धाल, “थौं इस्राएलया जुजुया निंतिं गज्‍याःगु गौरवया दिं! व थः दासीतय्‌गु न्‍ह्यःने पचिनांगा जुयाः वँय् थें जुल।”

२ राजा 1:8

दूततय्‌सं अहज्‍याहयात धाल, “वं सँयागु वसः फिनातःगु दु, वं थःगु जँय् छेंगूयागु हे जनी चिनातःगु दु।” अले वं धाल, “व ला तिश्‍बी एलिया खः।”

भजनसंग्रहया सफू 30:11

जिगु दुःखयात छिं लसताया प्‍याखनय् हिलादिल। जिगु दुःखयात न्‍हंकाः छिं लसतां जाय्‌कादिल।

प्रस्‍थान 3:5

परमेश्‍वरं धयादिल, “थुखे लिक्‍क वये मते। थःगु लाकां त्‍वः, छाय्‌धाःसा छ दनाच्‍वंगु थाय् पवित्रगु खः।”

यशैया 1:1

यहूदाया जुजुपिं उज्‍जियाह, योताम, आहाज व हिजकियां शासन यानाच्‍वंबलय् आमोजया काय् यशैयां यहूदा व यरूशलेमया बारे खंगु दर्शन।

यशैया 13:1

आमोजया काय् यशैयां बेबिलोनया बारे दर्शनय् खंगु अगमवाणी थ्‍व हे खः–

यशैया 37:2

वं दरबारया प्रशासक एल्‍याकीम, छ्यान्‍जे शेब्‍ना व मू मू पुजाहारीतय्‌त आमोजया काय् यशैया अगमवक्तायाथाय् छ्वल। उपिं सकसिनं भांग्रा हिनातःगु दु।

यर्मिया 48:37

इपिं सकसिनं सँ खाःगु दु, दारी खाःगु दु। सकसिगु ल्‍हाः चिरिबाःगु दु। सकसिनं भांग्रां जँ त्‍वपूगु दु।

इजकिएल 24:17

चिसल्‍लं जक उंउं हा। सीम्‍हय्‌सिगु निंतिं दुखं च्‍वने मते। छेनय् फेटा हिं अले तुतिइ लाकां न्‍ह्या, छंगु म्‍हुतुसि त्‍वपुइ मते, दुखं च्‍वनीपिन्‍सं नइगु मरि नये मते।”

इजकिएल 24:23

छिमिगु फेटा छिमिगु हे छेनय् दइ, अले छिमिगु लाकां छिमिगु हे तुतिइ। छिपिं दुखं च्‍वनी मखु, छिपिं ख्‍वइ मखु, तर छिपिं थःगु पापं यानाः सुकूचिन वनी, अले थः हे नुगः मछिंकाच्‍वनी।

इजकिएल 4:1

“आः अय् सीमानिम्‍ह मनू, छपा अप्‍पा कयाः उकियात थःगु न्‍ह्यःने ति, अले उकी यरूशलेम शहरयागु नक्‍सा च्‍व।

इजकिएल 4:5

छाय्‌धाःसा जिं छंगु लागि इमिगु पापया दँ ति हे दिं क्‍वःछिनागु दु। उकिं स्‍वसः व गुइन्‍हु (३९०) तक छं इस्राएलया घरानायागु पाप भोगे याइ।

मीका 1:11

हे शाफीरय् च्‍वंपिं मनूत, नांगा जुयाः लज्‍या चायाः पिहां वा। सानानय् च्‍वंपिं पिहां वइ मखु। बेथ-एजेल ख्‍वयाच्‍वंगु दु, वयागु शरण कायेगु थाय् छिमिगुपाखें यंकूगु दु।

मीका 1:8

अथे जुयाः जिं ख्‍वख्‍वं विलाप याये। जि खालि तुति व नांगा जुयाः थुखे उखे जुये। जि ध्‍वंचा थें हाले अले न्‍हिकांझंगः थें ख्‍वये।

जकरिया 13:4

“उखुन्‍हु हे छम्‍ह छम्‍ह अगमवक्ता थःगु अगमवाणीया दर्शनं लज्‍या चाइ। अले ध्‍वंलाइम्‍ह अगमवक्तां फीगु सँयागु वसः फी मखु।

मत्ती 16:24

अले वय्‌कलं चेलातय्‌त धयादिल – “जि नाप वयेगु जूसा छिपिं सुनानं थःगु खँय् छुं हे च्‍यूताः तये मते। अले थःगु क्रूस थःम्‍हं हे क्‍वबिया सीत तकं लिमच्‍युसे जिगु ल्‍यूल्‍यू वा।

मत्ती 3:4

थ्‍व यूहन्‍नां उँटयागु सं थानातःगु वसः पुनातःगु दु। अले जँय् छेंगूयागु जनी चिनातःगु दु। वयागु नसा क्‍वःबुइँचा व गुँ कस्‍ति खः।

यूहन्‍ना 21:7

वय्‌कलं माया यानातःम्‍ह चेलां पत्रुसयात धाल – “वय्‌कः प्रभु हे खः।” वय्‌कः प्रभु हे खः धकाः सिमोन पत्रुसं ताःगुलिं काचाकाचां लं फिनाः समुद्रय् तिन्‍हुल, छाय्‌धाःसा उबलय् वं लं त्‍वयातःगु खः।

प्रेरित 19:16

थथे धयाः भूत दुब्‍यूम्‍ह मनुखं इमित छक्‍कलं हय्‌क्‍का वन, अले फुक्‍कसितं कसाः यात। अले इपिं म्‍हय् घाःया घाः जुइकाः पचिनांगां अनं बिस्‍युं वन।

प्रेरित 21:11

वं पावलयागु जनी कयाः थःगु ल्‍हाःतुति चिनाः थथे धाल – “पवित्र आत्‍मां थथे धयादीगु दु – ‘थ्‍व जनीया थुवाःयात यरूशलेमय् वन धाःसा यहूदीतय् नायःतय्‌सं थथे हे यानाः चिनाबी, अले यहूदीमखुपिन्‍त लःल्‍हानाबी।’”

यहोशू 5:15

परमप्रभुया सेनाया कप्‍तानं यहोशूयात धाल, “थःगु तुतिं लाकां त्‍व, छाय्‌धाःसा छ दनाच्‍वंगु थाय् पवित्र खः।” अले यहोशूं अथे हे यात।

प्रकाश 11:3

अले जिं जिमि निम्‍ह साक्षी बीपिन्‍त भांग्रायागु वसतं पुंकाः द्वःछि व निसः व खुइन्‍हु तक अगमवाणी कनेगु शक्ति बी।”

१ शमूएल 19:24

वं अन थःगु लं त्‍वःतल अले शमूएलया न्‍ह्यःने अगमवाणी धाधां उखुन्‍हु न्‍हिच्‍छि चच्‍छि पचिनांगां हे बँय् ग्‍वारातुलाच्‍वन। अथे जुयाः मनूतय्‌सं थथे धयाहल, “छु शाऊल नं अगमवक्तातय्‌गु पुचःयाम्‍ह हे जुल ला?”