यशैया 13:8 - नेवाः बाइबल

⁸ मिसातय्‌त मचाबू ब्‍यथा जू थें इमित कष्‍ट व भय जुइ। ग्‍यानाः इपिं छम्‍हय्‌सिनं मेम्‍हय्‌सित छक्‍क जुया स्‍वइ अले इमिगु ख्‍वाः मि च्‍याःथें ह्याउँसे च्‍वनी।

यशैया 13:8 ပူးပေါင်းရင်းမြစ်များ

२ राजा 19:26

उकिं अन च्‍वंपिं कमजोर जूगु दु। इपिं निराश जुयाः लज्‍या चाःगु दु। इपिं ख्‍यःया घाँय् थें, क्‍यातूगु घाँय् थें, छेँया पलिइ बुयावःगु ताहाक जुइ न्‍ह्यः हे गनावनीगु घाँय् थें जूगु दु।

भजनसंग्रहया सफू 48:7

पुर्बयागु फसं तर्शीशया जहाजत कुचा कुचा दः थें छिं इमित नाश यानादिल।

यशैया 26:17

हे परमप्रभु, गथे मचाबू बेथा जूम्‍ह मिसा सास्‍ती जुयाः तसकं हाला हइ, जिपिं नं छिगु न्‍ह्यःने अथे हे खः।

यर्मिया 13:21

वय्‌कलं छं थःम्‍हं हे स्‍यंपिं छिमि न्‍हापायापिं पासापिन्‍त हे छंगु च्‍वय्‌यागु थासय् तयादीबलय् छं छु धायेगु? मचा बुइकेत्‍यंम्‍ह मिसायात मचाबू ब्‍यथा जूगु थें छन्‍त मजुइ ला?

यर्मिया 30:6

छकः न्‍यनाः ला स्‍व! सुं मिजंम्‍हय्‌सिनं मचा बुइके फइ ला? छाय् जिं सकलें मिजंतय्‌सं मचाबू ब्‍यथा जूम्‍ह मिसां थें थःगु प्‍वाथय् ल्‍हाः तःगु खना? छाय् सकसिगु ख्‍वाः सीम्‍ह थें म्‍हासुसे च्‍वंगु?

यर्मिया 4:31

मचाबू ब्‍यथा जूम्‍ह मिसायागु थें हाःसः, न्‍हापांम्‍ह मचा बुइकूम्‍ह मिसायागु थें ख्‍वःसः जिं ताल। स्‍वाँ स्‍वाँ यानाः थःगु ल्‍हाः फयाः बांलाःम्‍ह यरूशलेमं थथे धयाच्‍वंगु जिं ताल, “जि बेहोश जुयाच्‍वंगु दु, आः जि गथे याये! इपिं जितः स्‍यायेत वयाच्‍वंगु दु।”

यर्मिया 46:5

तर जिं छु खनाच्‍वना? इपिं ला ग्‍यानाच्‍वंगु दु। इपिं लिचिलाच्‍वंगु दु। इमि सिपाइँत बुत। इपिं हथाय् पथासं बिस्‍युं वनाच्‍वंगु दु। इमिसं लिफः मस्‍वः, प्‍यखेरं आतंक हे आतंक दु,” परमप्रभुं धयादी।

यर्मिया 48:41

किर्योतयात कब्‍जा याइ, अले किल्‍लात अधिकार याइ। उखुन्‍हु मोआबया सिपाइँतय्‌गु नुगः मचाबू ब्‍यथा जूम्‍ह मिसाया नुगः थें जुइ।

यर्मिया 49:22

स्‍व! छम्‍ह इमा हथासं ब्‍वयावइ, बोज्राया च्‍वय् वं थःगु पपू चक्‍कंकी। उखुन्‍हु एदोमया सिपाइँतय्‌गु मन मचाबू ब्‍यथा जूम्‍ह मिसायागु थें जुइ।

यर्मिया 49:24

दमस्‍कस कमजोर जूगु दु। व बिस्‍युं वनेत्‍यंगु दु। भयनं वयात ज्‍वंगु दु। मचाबू ब्‍यथा जूम्‍ह मिसायात थें च्‍यूताः व सास्‍तीं वयात ज्‍वंगु दु।

यर्मिया 50:43

बेबिलोनयाम्‍ह जुजुं इमिगु बारे न्‍यन, वयागु ल्‍हाः याग्‍लाप्‍याग्‍ला जुल। मचाबू ब्‍यथा जूम्‍ह मिसा थें वयात धन्‍दा जुल।

यर्मिया 51:30

बेबिलोनया सिपाइँतय्‌सं लडाइँ यायेगु त्‍वःतूगु दु। इपिं ला थथःगु किल्‍ला दुने हे च्‍वनीगु। इमिगु बल कम जुइ धुंकल। इपिं मिस्‍त थें जूगु दु। इमिगु च्‍वनीगु थाय् मिं नकाबी धुंकल, उकिया ध्‍वाखाया गजबारत त्‍वथुलाबी धुंकल।

इजकिएल 20:47

झाः दुगु दच्‍छिनया देशयात धा, ‘परमप्रभु परमेश्‍वरया थ्‍व वचन न्‍यँ! वय्‌कलं थथे धयादी – जिं छंके मि तयाबी। उकिं छंगु फुक्‍क वाउँगु सिमा व गंगु सिमायात भस्‍म यानाबी। उकिया ह्वाना ह्वाना च्‍यानाच्‍वंगु मि सी मखु तर दच्‍छिनंनिसें उत्तर तकया फुक्‍क लागायात भस्‍म यानाबी।

होशे 13:13

मचा बुइकीबलय् मिसायात जूगु थें कष्‍ट वयाके वइ, व बुद्धि मदुम्‍ह मचा थें खः, गुम्‍ह बुइत मानय् जुइ मखु, बुइगु ई जुइ धुंकल तर व कोखय् च्‍वनाच्‍वनी।

योएल 2:6

इमित खनीबलय् जाति जातित ग्‍यानाः थुरथुर खाइ, इमित खनाः सकसिगु ख्‍वाः वँचुसे च्‍वनावनी।

नहूम 2:10

निनवे शहरयात लुतय् याःगु दु, अन झिजांमिजां दंगु दु व तहसनहस जूगु दु। मनूतय्‌गु नुगः ग्‍यानाः न्‍यले धुंकल, इमिगु तुति थुरथुर खानाच्‍वंगु दु, म्‍ह छम्‍हं खानाच्‍वंगु दु, इमिगु ख्‍वाः ग्‍यानाः म्‍हासुइ धुंकल।

यूहन्‍ना 16:21

प्‍वाथय् दुम्‍ह मिसायात ब्‍यथा जुइबलय् तसकं दुःख जुइ, तर मचा बुइधुंकाः मचां यानाः वं थःत जूगु दुःख फुक्‍कं ल्‍वःमंका छ्वइ।

१ थेसलोनिकी 5:3

मनूतय्‌सं प्‍यखें “शान्‍ति दु, ग्‍याये माःगु मदु” धया च्‍वनीबलय् लाक्‍क हे इमिके प्‍वाथय् दुम्‍ह मिसायात मचाबुइ ब्‍यथा जू थें आकाझाकां विनाश जू वइ। अले इपिं छुं यानाः नं बचय् जुइ फइ मखु।