यशैया 12:5 - नेवाः बाइबल

⁵ परमप्रभुं यानादीगु अजू चायापुगु ज्‍याया निंतिं वय्‌कःया भजन हाः। पृथ्‍वीइ च्‍वंपिं सकसिनं थ्‍व खँ न्‍यनेमा!

यशैया 12:5 ပူးပေါင်းရင်းမြစ်များ

भजनसंग्रहया सफू 105:2

वय्‌कःया निंतिं भजन हा, वय्‌कःया प्रशंसाया म्‍ये हा, वय्‌कःया फुक्‍क अजू चायापुगु ज्‍याया बारे कं।

भजनसंग्रहया सफू 72:19

वय्‌कःयागु महिमां जाःगु नांया सदां प्रशंसा जुयाच्‍वनेमा। पृथ्‍वी न्‍यंक वय्‌कःयागु महिमां जायेमा। आमेन! आमेन!

भजनसंग्रहया सफू 98:1

परमप्रभुया निंतिं छपु न्‍हूगु भजन हा, वय्‌कलं अजू चायापुगु ज्‍या यानादीगु दु, थःगु शक्ति व पवित्र बलं वय्‌कः त्‍याःगु दु।

प्रस्‍थान 15:1

अले मोशा व इस्राएलीतय्‌सं परमप्रभुया निंतिं थ्‍व म्‍ये हाल, जिं परमप्रभुया म्‍ये हाले छाय्‌धाःसा वय्‌कलं तःधंगु ज्‍या यानादीगु दु। अले सल व सल गयावःपिन्‍त वय्‌कलं समुद्रय् वांछ्वयादीगु खः।

प्रस्‍थान 15:21

मिरियमं थथे धकाः म्‍ये हाल, “परमप्रभुयागु म्‍ये हा छाय्‌धाःसा वय्‌कलं तःधंगु ज्‍या यानादीगु दु, सल व सल गयावःपिन्‍त वय्‌कलं समुद्रय् वांछ्वयादीगु दु।”

यशैया 24:14

बचय्‌जूपिं लसतां म्‍ये हालाच्‍वनी। पच्‍छिमय् च्‍वनीपिन्‍सं परमप्रभुया तःधंगु महिमाया जयजय याइ!

यशैया 40:9

हे भिंगु खँ हइम्‍ह सियोन, तज्‍जाःगु पर्वतय् थाहां हुँ, अले थ्‍व भिंगु खँ न्‍यंकि! हे भिंगु खँ हइम्‍ह यरूशलेम, ततःसलं हा, मग्‍यासें ततःसलं हा! अले यहूदाया शहरयात धा, “छिमि परमेश्‍वर झायाच्‍वंगु दु।”

यशैया 42:10

परमप्रभुया निंतिं छपु न्‍हूगु भजन हा, पृथ्‍वीया ताताःपाःगु थासं वय्‌कःया प्रशंसा या। हे समुद्रय् यात्रा याइपिं अले उकी दुगु फुक्‍क जीवजन्‍तुं, हे टापुत अले अन च्‍वंपिं फुक्‍क मनूत!

यशैया 42:11

मरुभूमि व अन च्‍वंगु शहरत परमेश्‍वया प्रशंसा या! हे केदार च्‍वनाच्‍वंगु बस्‍तीत वय्‌कःया प्रशंसा या! सेलाय् च्‍वंपिं मनूत पर्वतया च्‍वका च्‍वकां ततःसलं लसताया म्‍ये हा!

यशैया 44:23

हे आकाश, लसताया म्‍ये हा। परमप्रभुं थथे यानादीगु दु। हे क्‍वय्‌यागु पृथ्‍वी, तःसलं हा! हे पर्वतत, गुँ व अन च्‍वंगु फुक्‍क सिमात, तःसलं म्‍ये हा, छाय्‌धाःसा परमप्रभुं मू पुलाः याकूबयात त्‍वःतकादीगु दु। वय्‌कलं थःम्‍हं इस्राएलयात बचय् यानाः थःगु महिमा क्‍यनादी।

हबकूक 2:14

छाय्‌धाःसा समुद्र लखं जाः थें पृथ्‍वी परमप्रभुया महिमाया ज्ञानं जाइ।

मलाकी 1:11

“सूर्य लुया वइगु थासंनिसें सूर्य बिनावनीगु थाय् तक जात जातितय्‌गु दथुइ जिगु नां तःधनी। फुक्‍क थासय् जिगु नामय् धुपाँय् च्‍याकी अले नाले बहःगु देछा छाइ, छाय्‌धाःसा जाति जातितय् दथुइ जिगु नां तःधनी,” दक्‍व शक्ति दुम्‍ह परमप्रभुं धयादी।

प्रकाश 15:3

परमेश्‍वरया दास मोशां च्‍वयातःगु म्‍ये व चीधिकःम्‍ह भ्‍याःचायागु छपु म्‍ये इमिसं थुकथं हाल – “दक्‍वसिबय् तःधंम्‍ह व शक्ति दुम्‍ह परमप्रभु परमेश्‍वर, छिं यानादीगु ज्‍या तसकं तःधं व अजू चायापु। जाति जातिया जुजु, छिगु लँपु सत्‍य व पाय्‌छि जु।