एफिसी 6:6 - नेवाः बाइबल

⁶ मालिकतय्‌त लय्‌ताय्‌केत इमिगु न्‍ह्यःने जक ज्‍या याना क्‍यनेगु याये मते, बरु परमेश्‍वरया इच्‍छा कथं ख्रीष्‍टया हे दास थें जुयाः दुनुगलंनिसें ज्‍या यायेगु या।

एफिसी 6:6 ပူးပေါင်းရင်းမြစ်များ

यर्मिया 24:7

जि हे परमप्रभु खः धकाः म्‍हसीगु नुगः जिं इमित बी। अले इपिं जि प्रजा जुइ। जि इमि परमेश्‍वर जुये, छाय्‌धाःसा इपिं दुनुगलंनिसें जिथाय् लिहां वइ।

यर्मिया 3:10

थुलि जूसां नं वया विश्‍वासघाती केहेँ यहूदा दुनुगलंनिसें जिथाय् लिहां मवः। तर ख्‍यालं जक लिहां वल,” परमप्रभुं धयादी।

मत्ती 12:50

छाय्‌धाःसा सुनां स्‍वर्गय् च्‍वनादीम्‍ह जिमि बाःनं धाःथें याना जुइ व हे जिमि किजा, जिमि केहेँ व जिमि मां खः।”

मत्ती 7:21

“जितः ‘प्रभु, प्रभु’ जक धयाजुइपिं मनूत परमेश्‍वरयागु राज्‍यय् दुहां वने फइ मखु। स्‍वर्गय् च्‍वनादीम्‍ह जिमि बाःयात लय्‌तायेक ज्‍या याना जूपिं जक वय्‌कःयागु राज्‍यय् दुहां वने फइ।

मर्कूस 3:35

छाय्‌धाःसा सुनां परमेश्‍वरं धाःथें याना जुइ, व हे जिमि किजा, जिमि केहेँ, व जिमि मां खः।”

रोमी 6:17

छिमिसं दुनुगलंनिसें छिमित स्‍यना थकूगु तःधंगु खँयात मानय् याःगुलिं न्‍हापा थें छिपिं आः पापया दास मखुत। उकिं परमेश्‍वरयागु जय जुइमा।

१ कोरिन्‍थी 7:22

दास जुयाच्‍वंपिन्‍त प्रभुं सःतादीगु खःसा थुपिं दास थें मजुसे प्रभुया मनूत जुइ, अथे हे दासमखुपिं मनूतय्‌त प्रभुं सःतादीगु खःसा थुपिं प्रभुया दास जुइ।

गलाती 1:10

जिं थथे धयाच्‍वनागु छु मनूतय्‌त लय्‌ताय्‌केत खः ला? मखु! जिं ला परमेश्‍वरयात हे लय्‌ताय्‌केत थथे यानाच्‍वनागु खः। जिं मनूतय्‌त लय्‌ताय्‌केत यानागु जूसा जि येशू ख्रीष्‍टया सेवा याइम्‍ह दास हे जुइ फइ मखु।

एफिसी 5:17

उकिं मूर्ख जुइ मते, बरु प्रभुयात यःकथं ज्‍याखँ याना जु।

फिलिप्‍पी 2:12

यःपिं दाजुकिजापिं, जि छिपिंनाप दुबलय् छिमिसं जिगु फुक्‍क खँ न्‍यना का। अथे हे जि मदइबलय् नं झन छिमिसं जिगु खँ न्‍यनेमाः। अले भय कयाः मुक्तिया ज्‍या क्‍वचाय्‌केत मेहनत या।

कलस्‍सी 1:9

थ्‍व खँ न्‍यंसांनिसें पवित्र आत्‍मायागु बुद्धिं छिमिसं परमेश्‍वरयागु इच्‍छा बांलाक सीके थुइके फयेमा धकाः जिमिसं प्रार्थना याना वयाच्‍वनागु दु।

कलस्‍सी 4:12

छिमिथाय् हे च्‍वंम्‍ह ख्रीष्‍ट येशूया मेम्‍ह दास इपाफ्रासं नं छिमित ज्‍वजलपा धयाहःगु दु। छिमिसं क्‍वात्तुक विश्‍वास यानाः परमेश्‍वरयात यःकथं जक यानाच्‍वने फयेमा धकाः वं छिमिगु निंतिं न्‍ह्याबलें प्रार्थना यानाच्‍वंगु दु।

१ थेसलोनिकी 2:4

परमेश्‍वरं हे जिमित विश्‍वास यानाः भिंगु खँ न्‍यंकेगु ज्‍या लःल्‍हानादीगु खः। जिमिसं मनूतय्‌त मखु, बरु जिमित जाँचय् यानादीम्‍ह परमेश्‍वरयात लय्‌ताय्‌केत नवानाच्‍वनागु खः।

१ थेसलोनिकी 4:3

छिपिं पवित्र जुयाच्‍वनेमा धयागु हे परमेश्‍वरया इच्‍छा खः, उकिं छिपिं व्‍यभिचारं तापाक च्‍वँ।

हिब्रू 10:36

परमेश्‍वरयात यःगु ज्‍या यायेत व वय्‌कलं बियादी धकाः धयादीगु कायेत छिमिसं नुगः क्‍वात्तुका च्‍वँ।

हिब्रू 13:21

थ्‍व हे परमेश्‍वरं छिमित वय्‌कःयात लय्‌ताय्‌केत माक्‍व भिंगु बांलाःगु फुक्‍कं बियादीमा। थुकथं येशू ख्रीष्‍टपाखें झीपिं वय्‌कःयात यय्‌क म्‍वानाच्‍वने फयेमा। वय्‌कः सदां तःधना च्‍वनेमा। आमेन।

१ पत्रुस 2:15

छिमिसं थथे भिंगु ज्‍या याना हे छुं मस्‍यूपिं मूर्खतय्‌गु म्‍हुतुप्‍वाः तिके फयेमा धयागु परमेश्‍वरयागु इच्‍छा खः।

१ पत्रुस 4:2

अथे जूगुलिं आवंलि छिपिं शरीरय् म्‍वाना च्‍वंतले परमेश्‍वरं धाःथें च्‍वँ। छिमिसं गुबलें थः यःथें याना जुइ मते।

१ यूहन्‍ना 2:17

थ्‍व संसार व थ्‍व संसारय् च्‍वंगु मनूतय्‌सं यय्‌का जुइगु नं फुक्‍कं मदया वनीतिनि। तर परमेश्‍वरयागु इच्‍छा कथं जुइम्‍ह मनू न्‍ह्याबलें दयाच्‍वनी।