एफिसी 4:13 - नेवाः बाइबल

¹³ थुकथं थ्‍व वरदानयागु ज्‍यां झीत विश्‍वासय् छप्‍पँ जुइत व परमेश्‍वरया काय्‌यात म्‍हसीकाः न्‍ह्यज्‍यायेत ग्‍वाहालि बियाच्‍वनी। अले छन्‍हु झीपिं सिद्ध मनू जुयाः ख्रीष्‍ट थें जुइ फइ।

एफिसी 4:13 ပူးပေါင်းရင်းမြစ်များ

यशैया 53:11

वं थःगु प्राणं तसकं सास्‍ती नये धुंकाः वं जीवनया जः खनी अले थः लुधनी। थःगु ज्ञानं यानाः जिमि धर्मीम्‍ह दासं यक्‍वसित धर्मी यानाबी, वं हे इमिगु अधर्म क्‍वबिइ।

सपन्‍याह 3:9

“उबले देश देशयापिं मनूतय्‌गु म्‍हुतुसि शुद्ध यानाबी, गुकिं यानाः इपिं फुक्‍कसिनं परमप्रभुया नां कयाः छगू हे मन जुयाः वय्‌कःयागु सेवा यायेमा।

जकरिया 14:9

उखुन्‍हु हे परमप्रभु फुक्‍क पृथ्‍वीयाम्‍ह जुजु जुयादी। सकल मनूतय्‌सं वय्‌कःयात परमप्रभु धकाः आराधना याइ अले व हे नामं वय्‌कःयात म्‍हसीकी।

मत्ती 11:27

“बाःनं हे फुक्‍क जिगु ल्‍हातय् तयादीगु खः। काय्‌यात सुनानं म्‍हमस्‍यू, बाःनं जक काय्‌यात म्‍हस्‍यू। अले बाःयात नं सुनानं म्‍हमस्‍यू, काय्‌नं जक स्‍यू। काय्‌नं म्‍हसीका ब्‍यूपिन्‍सं जक बाःयात म्‍हसी।”

यूहन्‍ना 1:16

वय्‌कःयागु गुबलें मसुइगु दया मायायागु धुकुतिं झीसं यक्‍व दया माया काये खंगु दु।

यूहन्‍ना 16:3

बाःयात व जितः म्‍हमस्‍यूगुलिं हे इमिसं थथे याइ।

यूहन्‍ना 17:21

इपिं नं छप्‍पँ जुयाच्‍वनेमा। यःम्‍ह बाः, गथे छि जिके, अले जि छिके दु, अथे हे इपिं नं झीके छप्‍पँ जुयाच्‍वनेमा। थुकथं जूसा जक छिं जितः छ्वयाहःगु खः धकाः संसारं विश्‍वास याइ।

यूहन्‍ना 17:3

छि छम्‍ह हे जक सत्‍य परमेश्‍वरयात व छिं छ्वयाहयादीम्‍ह येशू ख्रीष्‍टयात म्‍हसीकेगु हे अनन्‍त जीवन खः।

यूहन्‍ना 6:69

उकिं जिमिसं विश्‍वास यानाः परमेश्‍वरं छ्वयाहयादीम्‍ह पवित्रम्‍ह मनू छि हे खः धकाः नं सीके धुन।”

प्रेरित 4:32

फुक्‍क विश्‍वासीतय्‌गु मन व नुगः छगू थें जू। अथे जूगुलिं सुनानं थ्‍व जिगु व छंगु धकाः मधासे फुक्‍कं मंकाः याना तल।

१ कोरिन्‍थी 1:10

यःपिं दाजुकिजापिं, झी प्रभु येशू ख्रीष्‍टया नामय् छिमित जिगु बिन्‍ति दु – छिपिं सकसिनं छगू हे खँ ल्‍हायेगु या। छिमिगु दथुइ ल्‍वापु मजुइमा बरु छिपिं फुक्‍कं मिलय् जुयाः छगू हे बिचाः व छगू हे मन जुयाच्‍वनेगु त्‍वःते मते।

१ कोरिन्‍थी 14:20

यःपिं दाजुकिजापिं, थुइकेगु सीकेगु खँय् छिपिं मस्‍त थें जुइ मते। मभिंगु खँय् धाःसा छिपिं मस्‍त थें जु। थुइकेगु व सीकेगु खँय् छिपिं तःधिपिं थें जु।

१ कोरिन्‍थी 2:6

अय्‌नं परमेश्‍वरयागु खँ बांलाक सीके थुइके धुंकूपिन्‍त धाःसा जिं ज्ञानयागु खँ ल्‍हाना च्‍वना। थ्‍व खँ धाःसा संसारय् च्‍वंपिनिगु मखु, शासन याना च्‍वंपिनिगु नं मखु। इपिं याकनं नाश जुयावनी।

२ कोरिन्‍थी 4:6

“खिउँथासं जः थिनावइ” धकाः धयादीम्‍ह परमेश्‍वरं हे जिमिगु मनय् नं जः खय्‌कादिल। उकिं येशू ख्रीष्‍टया न्‍ह्यःने झीत परमेश्‍वरया महिमा व ज्ञान गुलि तःधं धकाः ध्‍वाथुइक क्‍यनेत थथे यानादीगु खः।

गलाती 4:19

छिपिं ख्रीष्‍ट थें मजुतले जितः मचाबू ब्‍यथा थें दुःख जुयाच्‍वनी।

एफिसी 1:17

ज्ञान बीम्‍ह व परमेश्‍वरयात म्‍हसीका बीम्‍ह पवित्र आत्‍मा छिमित बियादीमा धकाः जिं दकलय् तःधंम्‍ह व येशू ख्रीष्‍टया बाः परमेश्‍वरयाके फ्‍वनाच्‍वना।

एफिसी 1:23

मण्‍डली ख्रीष्‍टयागु म्‍ह खः। थ्‍व हे म्‍ह न्‍ह्याथाय् दीम्‍ह व न्‍ह्यागु खं पूवंकादीम्‍ह वय्‌कःयागु पूवंगु रूप खः।

एफिसी 2:15

थथे यायेत वय्‌कलं यहूदीतय्‌गु व्‍यवस्‍थाय् च्‍वंगु आज्ञा व नियम त्‍वथुलादिल। अले यहूदीतय्‌त नं यहूदीमखुपिन्‍त नं थःत विश्‍वास याकाः मिलय् यानाः छम्‍ह हे यानादिल। थुकथं वय्‌कलं झीत शान्‍ति बियादिल।

एफिसी 4:12

परमेश्‍वरया मनूतय्‌त ख्रीष्‍टयागु ज्‍या याये फयेमा धकाः व वय्‌कःयागु म्‍ह मण्‍डलीयात ब्‍वलंकेत वय्‌कलं थुकथं ल्‍ययादिल।

एफिसी 4:3

पवित्र आत्‍मायागु ग्‍वाहालिं छिपिं फुक्‍कं छम्‍ह थें जुयाच्‍वनेगु कुतः या। अले छिमित शान्‍ति दइ।

एफिसी 4:5

अथे हे प्रभु नं छम्‍ह हे जक, विश्‍वास नं छगू हे जक, अले बप्‍तिस्‍मा नं छगू हे जक दु।

फिलिप्‍पी 3:10

आः ला जिं ख्रीष्‍टयात म्‍हसीकेगु, वय्‌कः हानं म्‍वाना वइगु शक्तियात सीकेगु व वय्‌कलं थें दुःखकष्‍ट सियाः वय्‌कः थें जुयाः सिनावनेगु हे जक मनंतुनागु दु।

फिलिप्‍पी 3:8

थुलि जक मखु, ख्रीष्‍ट येशू जिम्‍ह प्रभुयात म्‍हसीकेगु हे तःधंगु खँ खः धकाः थुइकाः जिं मेगु फुक्‍कं ज्‍यालगय् मजू धकाः ताय्‌का। वय्‌कःयागु हे निंतिं जिं फुक्‍कं त्‍वःता, अले वय्‌कःयात लुइके फयेमा धकाः जिं अज्‍याःगु फुक्‍कं ज्‍यालगय् मजू धकाः ताय्‌कागु दु।

कलस्‍सी 1:28

उकिं जिमिसं फुक्‍कसितं ख्रीष्‍टयागु खँ न्‍यंका जुयागु खः। फुक्‍कसितं ख्रीष्‍टयात क्‍वात्तुक विश्‍वास याकाः परमेश्‍वरया न्‍ह्यःने यंकेत जिमिसं ख्‍याच्‍वः बिया अले स्‍यनेकने यानाः वयाच्‍वनागु दु।

कलस्‍सी 2:2

छिमित साहस दयेमा, अले थःथवय् माया यानाच्‍वनेमा धकाः जिं थथे यानाच्‍वनागु खः। अले छिमिसं फुक्‍क खँ ध्‍वाथुइके फइ। थुकथं छिमिसं परमेश्‍वरयागु गुप्‍ति खँ ख्रीष्‍टयात नं बांलाक म्‍हसीके फइ।

हिब्रू 5:14

दुधंगु नसा ला तःधिकःपिनिगु निंतिं खः। इमिसं थःगु अनुभवं भिंगु छु खः, मभिंगु छु खः धकाः बांलाक ल्‍यये फइ।

२ पत्रुस 1:4

थथे वय्‌कलं झीत तःधंगु व तःजिगु आशिष बियादी धकाः बचं बियादीगु दु। वय्‌कलं हे धयादीकथं झीपिं परमेश्‍वर थें जुइ फइ, अले संसारयागु लोभ लालचं यानाः स्‍यनीगुपाखें बचय् जुइ फइ।

२ पत्रुस 3:18

झी प्रभु व मुक्तिदाता येशू ख्रीष्‍टयागु दया माया अप्‍वः दयावनेमा। अले छिमिसं वय्‌कःयात अझ नं बांलाक म्‍हसीका वने फयेमा। वय्‌कःयागु नां आः व सदां तःधना च्‍वनेमा। आमेन।

१ यूहन्‍ना 5:20

परमेश्‍वरया काय् झायाः झीत धात्‍थेंयाम्‍ह परमेश्‍वर म्‍हसीकादिल। थ्‍व खँ झीसं स्‍यू। धात्‍थेंयाम्‍ह परमेश्‍वरया काय् येशू ख्रीष्‍टनाप झीगु जीवन नं प्‍यपुनाच्‍वंगु दु। थ्‍व हे सत्‍य परमेश्‍वर खः, अले हानं थ्‍व हे परमेश्‍वर अनन्‍त जीवन नं खः।