एफिसी 1:7 - नेवाः बाइबल

⁷ ख्रीष्‍ट येशूं हि हाय्‌कादीगुलिं झीगु पाप क्षमा जुल। अले झीत छुत्‍कारा बियादिल। परमेश्‍वरयागु दया माया गुलि तःधं!

एफिसी 1:7 ပူးပေါင်းရင်းမြစ်များ

अय्‍यूब 33:24

अले वं वयात दया यानाः परमेश्‍वरयात थथे धाल धाःसा, ‘वयात त्‍वःताब्‍यु! वयात मृत्‍यु लोकय् वनेबी मते! वयात त्‍वःतकेगु ध्‍यबा जिके दु।’

भजनसंग्रहया सफू 130:4

तर छि क्षमा बियादीम्‍ह खः, अथे जुयाः हे छिगु भय काइ।

भजनसंग्रहया सफू 130:7

हे इस्राएल, परमप्रभुयाके थःगु आशा तया च्‍वँ, छाय्‌धाःसा परमप्रभु सदां दयाच्‍वनीगु दया माया दुम्‍ह व उद्धार यानादीम्‍ह खः।

भजनसंग्रहया सफू 86:5

हे परमप्रभु, छि भिंम्‍ह व क्षमा बियादीम्‍ह खः। अले गुलिसिनं ग्‍वाहालिया लागि छितः इनाप याइ, इपिं सकसितं छिं सदां दया माया यानादी।

प्रस्‍थान 34:7

वय्‌कः द्वलंद्वःयात माया यानादीम्‍ह, अधर्म, अपराध व पाप क्षमा यानादीम्‍ह खः। अय्‌सां वय्‌कलं द्वंयाःम्‍हय्‌सित सजाँय मब्‍यूसे त्‍वःतादी मखु। वय्‌कः पुर्खाया अधर्मया सजाँय इमि छय् व छुइया पालय् तकं नं बियादीम्‍ह खः।”

यशैया 43:25

“जि, जि व हे खः, गुम्‍हय्‌सिनं छंगु अपराध थःगु हे लागिं क्षमा यानाबी, जिं छंगु पाप गुबलें लुमंके मखु।

यर्मिया 31:34

‘प्रभुयात म्‍हसीकी’ धकाः इमिसं थः जःलाखःलापिन्‍त व दाजुकिजापिन्‍त नं स्‍यना जुइ माली मखु, छाय्‌धाःसा चिधिकःपिन्‍संनिसें कयाः तःधिकःपिन्‍सं तकं जितः म्‍हसी। इमिसं याःगु मभिंगु बांमलाःगु ज्‍याखँ फुक्‍कं जिं क्षमा यानाबी। अले इमिगु पाप नं जिं लुमंके मखु,” परमप्रभुं धयादी।

दानिएल 9:19

“हे परमप्रभु न्‍यनादिसँ, हे प्रभु पाप क्षमा यानादिसँ, हे प्रभु जिमिगु बिन्‍ति न्‍यनाः वकथं ज्‍या यानादिसँ। छिगु नांया लागि आः लिबाकादी मते। थ्‍व शहर व छिकपिनि मनूतके छिगु हे नां दु।”

दानिएल 9:9

छिगु खँ मन्‍यंसे जिपिं विरोधी जुयागु दु। अथे जूसां परमप्रभु जिमि परमेश्‍वर, छि दयादुम्‍ह व क्षमा यानादीम्‍ह खः।

योना 4:2

वं परमप्रभुयात धाल, “प्रभु, जिं थःगु देश त्‍वःते न्‍ह्यः थ्‍व हे खँ धयागु मखु ला? उकिं हे ला जि तार्शीशपाखे बिस्‍युं वनेत्‍यनागु खः। छि दया माया दीम्‍ह, तंचायेत लिबाकादीम्‍ह, नुगः क्‍यातुम्‍ह व सजाँय बी मयःम्‍ह खः धकाः जिं स्‍यू।

मीका 7:18

छि थें ज्‍याःम्‍ह परमेश्‍वर सु दु? गुम्‍हय्‌सिनं अधर्म क्षमा यानादी, अले ल्‍यंदुपिं थःमनूतय्‌गु पाप क्षमा यानादी? छि सदां तंचायादी मखु, तर दयामाया यायेत छितः यः।

जकरिया 13:1

“उखुन्‍हु दाऊदया घराना व यरूशलेमया मनूतय्‌गु पाप व दोष चीकाछ्वयेत लःयागु छगू मुहान न्‍ह्याइ।

जकरिया 13:7

“दक्‍व शक्ति दुम्‍ह परमप्रभुं धयादी, हे तरवार, दनाः जिम्‍ह फैजवाःयात हमला या, जिनापं दनाच्‍वनीम्‍ह मनूयात हमला या। वयात स्‍या, अले फैत उखेलाः थुखेलाः जुइ। अले जिं थःगु ल्‍हाः चीधिकःपिं भ्‍याचातय्‌गु विरोधय् ल्‍ह्वने।”

जकरिया 9:11

छिपिंलिसे चिनागु हिया जिगु बाचाया कारणं जिं छिमि कैदीतय्‌त लः मदुगु गालं मुक्त यानाबी।

मत्ती 20:28

मनूया काय्‌नं सेवा याकेत मखु, बरु सेवा यायेत व यक्‍वसित मुक्ति बीत व सीत वःगु खः।”

मत्ती 26:28

“थ्‍व न्‍हूगु बाचायागु जिगु हि खः। थ्‍व हे हिं यक्‍वसिगु पाप क्षमा जुइ।

मत्ती 6:12

अले जिमिगु अपराध क्षमा यानादिसँ, गथे जिमिसं नं जिमि अपराधीतय्‌त क्षमा यानाबियागु दु।

मर्कूस 14:24

अले वय्‌कलं इमित धयादिल – “थ्‍व जिगु न्‍हूगु बाचायागु हि खः। थ्‍व हे हिं यक्‍वसिगु पाप क्षमा जुइ।

लूका 1:77

परमेश्‍वरया थःमनूतय्‌गु पाप क्षमा जुइ, अले हानं इपिं बचय् जुइ धकाः इमित धायेगु नं छंगु ज्‍या जुइ।

लूका 24:47

अले ख्रीष्‍टयागु हे नामं पश्‍चाताप यानाः पाप क्षमा जुइगु खँ यरूशलेमंनिसें फुक्‍क संसारय् न्‍यंकेमाः।

यूहन्‍ना 20:23

छिमिसं सुयागु पाप क्षमा यानाबी इमिगु पाप क्षमा जुइ। छिमिसं पाप क्षमा याना मब्‍यूसा इमिगु पाप क्षमा जुइ मखु।”

प्रेरित 10:43

न्‍हापायापिं अगमवक्तातय्‌सं नं येशूयात विश्‍वास याःपिं मनूतय्‌गु पाप वय्‌कःयागु नामं जक क्षमा जुइफु धकाः धयावंगु दु।”

प्रेरित 2:38

अले पत्रुसं इमित धाल – “पश्‍चाताप या, अले छिकपिं छम्‍ह छम्‍हय्‌सिनं थःगु पापया क्षमा या लागि येशू ख्रीष्‍टयागु नामं बप्‍तिस्‍मा कयादिसँ। अले छिकपिन्‍सं परमेश्‍वरयागु वरदान पवित्र आत्‍मा कायेखनी।

प्रेरित 20:28

“अथे जूगुलिं होश यानादिसँ, अले पवित्र आत्‍मां धाःथें छिकपिन्‍सं विश्‍वासीतय्‌गु हेरबिचार यानादिसँ, छाय्‌धाःसा प्रभुं थःगु हि हाय्‌काः इमित न्‍यानादीगु खः, अले छिकपिं इमि जवाः खः।

प्रेरित 3:19

अय्‌जूगुलिं पश्‍चाताप यानाः छिकपिं परमेश्‍वरयाथाय् लिहांझासँ, अले वय्‌कलं छिकपिनिगु पाप हुयाछ्‌वयादी।

रोमी 2:4

परमेश्‍वरया दया मायां छिमिसं पश्‍चाताप याकी धकाः थुइके मफया, छु छिमिसं वय्‌कःया दया, सह यायेगु शक्ति व पिया च्‍वनादी फुम्‍हय्‌सित हे हेपय् याये ज्‍यू ला?

रोमी 3:24

अय्‌नं परमेश्‍वर दयादुम्‍ह जूगुलिं वय्‌कलं ख्रीष्‍टयात छ्वयाहयाः झीत सितिकं धर्मी यानादिल।

रोमी 3:25

परमेश्‍वरं येशू ख्रीष्‍टयात प्रायश्‍चितया बलिदान याकाः वय्‌कःयागु हिं वय्‌कःयात विश्‍वास याक्‍वसिगु पाप क्षमा यानादिल। वय्‌कलं न्‍हापा न्‍हापायापिं मनूतय्‌गु पापया सजाँय मब्‍यूसे सह यानादिल।

रोमी 9:23

वय्‌कलं झीत वय्‌कःयागु दया मायायागु धुकू सीके बीत थथे दया माया यानादीगु खः। वय्‌कलं झीत न्‍हापांनिसें थःगु नां तःधंकेत ल्‍ययादीगु खः।

१ कोरिन्‍थी 1:30

परमेश्‍वरं छिमित ख्रीष्‍ट येशू नाप मिलय् यानादिल। वय्‌कलं झीत ख्रीष्‍टपाखें फुक्‍क खँ सीके थुइके फय्‌कादिल। ख्रीष्‍टं यानाः हे झीपिं परमेश्‍वर नाप मिलय् जुइ खन। ख्रीष्‍टं झीत पवित्र यानाः पापं मुक्त यानादिल।

२ कोरिन्‍थी 8:9

झी प्रभु येशू ख्रीष्‍ट गुलि ग्‍वाहालि यानादीम्‍ह प्रभु खः धकाः ला छिमिसं सि हे स्‍यू। वय्‌कः तःमि जुयाः नं छिमिगु निंतिं चीमि जुयादिल। थः चीमि जुयाः छिमित तःमि यायेत वय्‌कलं थथे यानादिल।

एफिसी 1:14

परमेश्‍वरं बी धकाः धयादीगु झीत नं दइ, अले वय्‌कःया थः मनूतय्‌त पापं छुतय् यानादी धयागु दसिकथं झीत पवित्र आत्‍मा बियातःगु खः। झीसं वय्‌कःयात तःधंके।

एफिसी 1:18

परमेश्‍वरयागु ज्‍याखँ फुक्‍कं थुइके फय्‌केत छिमिगु नुगः चाय्‌कादिसँ धकाः नं जिं प्रार्थना यानाच्‍वनागु दु। अले छु आशायागु निंतिं वय्‌कलं छिमित सःतादीगु खः व वय्‌कलं थः मनूतय्‌त छु छु आशिष बियादी धकाः धयादीगु खः, छिमिसं सी।

एफिसी 1:6

वय्‌कलं झीत थथे तःधंगु दया माया यानादीगुलिं झीसं वय्‌कःयात तःधंकेमाः। वय्‌कलं थः यःम्‍ह काय्‌पाखें झीत दया माया यानादिल।

एफिसी 1:8

वय्‌कलं फुक्‍क ज्ञान व बुद्धि बियाः झीत यक्‍व दया माया यानादिल।

एफिसी 2:4

अय्‌नं परमेश्‍वरं झीत तसकं तःधंगु दया माया क्‍यनादीगु दु।

एफिसी 2:7

झीत परमेश्‍वरं दया माया यानादी धकाः सीके बीत थथे यानादीगु खः। थ्‍व दया माया ख्रीष्‍ट येशूपाखें परमेश्‍वरं झीत न्‍ह्याबलेंया निंतिं क्‍यनादीगु दु।

एफिसी 3:16

वय्‌कःयागु तःधंगु आशिषं व वय्‌कःयागु आत्‍मापाखें छिमित शक्ति दयेमा, अले व हे शक्तिं छिपिं दुनुगलंनिसें बल्‍लाना च्‍वनेमा धकाः जिं प्रार्थना यानाच्‍वनागु दु।

एफिसी 3:8

परमेश्‍वरया चिधंम्‍ह स्‍वयाः नं अज्‍ज चिधंम्‍ह मनू जितः हे ख्रीष्‍टयागु तःजिगु भिंगु खँ यहूदीमखुपिन्‍त न्‍यंकः वनेगु ज्‍या परमेश्‍वरं लःल्‍हानादिल।

फिलिप्‍पी 4:19

जिमि परमेश्‍वरं छिमिगु मगाःमचाः स्‍वयादी। ख्रीष्‍ट येशूयाके दुगु वय्‌कःयागु गुबलें मसुइगु धुकुतिं छिमित माःगु बियादी।

कलस्‍सी 1:14

वय्‌कःया काय्‌नं हे झीत पाप क्षमा यानाः छुत्‍कारा बियादिल।

कलस्‍सी 1:27

थथे व गुप्‍ति खँ मनूतय्‌त ध्‍वाथुइकादीगु परमेश्‍वरया ग्‍वसाः खः। अले गुप्‍ति खँ थ्‍व हे खः – “ख्रीष्‍ट छिपिं यहूदीमखुपिन्‍के नं दी। अले परमेश्‍वरलिसे छिपिं नं तःधनी।”

कलस्‍सी 2:13

न्‍हापा पाप यानाच्‍वंगुलिं व व्‍यवस्‍था मानय् मयाइपिं यहूदीमखुपिं जूगुलिं छिपिं सीपिं थें जुयाच्‍वंगु खः। आः धाःसा परमेश्‍वरं छिमित ख्रीष्‍टनापं तुं म्‍वाकादीगु दु। अले छिमिगु पाप फुक्‍कं क्षमा यानादीगु दु।

कलस्‍सी 2:2

छिमित साहस दयेमा, अले थःथवय् माया यानाच्‍वनेमा धकाः जिं थथे यानाच्‍वनागु खः। अले छिमिसं फुक्‍क खँ ध्‍वाथुइके फइ। थुकथं छिमिसं परमेश्‍वरयागु गुप्‍ति खँ ख्रीष्‍टयात नं बांलाक म्‍हसीके फइ।

१ तिमोथी 2:6

वय्‌कः फुक्‍क मनूतय्‌गु पलेसाय् सिनादिल। न्‍हापांनिसें हे क्‍वःछिना तःकथं वय्‌कः पाय्‌छि इलय् सिनादिल।

तीतस 2:14

झीत झीगु पापं छुतय् यायेत वय्‌कः थः हे सिनादिल। थुकथं वय्‌कलं झीत थः मनू यानाः पवित्र यानादिल, अले भिंगु ज्‍या यायेत साहस बियादिल।

तीतस 3:6

येशू ख्रीष्‍टं यानाः परमेश्‍वरं झीत पवित्र आत्‍मां जाय्‌कादिल।

हिब्रू 9:22

धात्‍थें हे व्‍यवस्‍थायाकथं हिं फुक्‍कयात शुद्ध याइ, अले हि महाय्‌कं पाप क्षमा जुइ मखु।

१ पत्रुस 2:24

वय्‌कः थःम्‍हय्‌सिनं हे झीगु पाप क्‍वबिया क्रूसय् सिनादिल। अय्‌जूगुलिं झीसं पाप यायेगु मतिइ तकं मतसे परमेश्‍वरयात यय्‌क भिंगु बांलाःगु जक यानाच्‍वनेमाः। छिमित मुक्ति बीत ख्रीष्‍ट सिनादीगु खः।

१ पत्रुस 3:18

छाय्‌धाःसा झीत परमेश्‍वरयाथाय् हयेत ख्रीष्‍ट नं छकः सिनादिल। पाप हे मदय्‌कं पापीतय्‌गु निंतिं दुःख फयादिल। वय्‌कः पृथ्‍वीइ सिनादिल, अले आत्‍मां वय्‌कःयात हानं म्‍वाकादिल।

१ यूहन्‍ना 2:12

अय् जि यःपिं मस्‍त, ख्रीष्‍टयागु नामं यानाः छिमिसं याःगु फुक्‍क पाप परमेश्‍वरं क्षमा यानादिल।

१ यूहन्‍ना 2:2

झीगु पापयागु निंतिं जक मखु, संसारय् च्‍वंपिं फुक्‍क मनूतय्‌गु पापया निंतिं वय्‌कः बलिदान जुयादीगु खः।

१ यूहन्‍ना 4:10

झीसं परमेश्‍वरयात माया यानागु मखु, बरु वय्‌कलं हे झीत माया यानादीगुलिं झीगु पाप क्षमा यानाबीत थः हे काय्‌यात बलिदान यायेत छ्वयाहयादिल – माया धयागु थ्‍व हे खः।

प्रकाश 14:4

थुपिं मिस्‍तनापं लसपस मजूनिपिं च्‍वखपिं खः। थुपिं चीधिकःम्‍ह भ्‍याःचायागु जक ल्‍यूल्‍यू जुइपिं खः। परमेश्‍वर व चीधिकःम्‍ह भ्‍याःचायागु लागि संसारं लिफ्‍याना हःपिं दकलय् न्‍हापायापिं मनूत, थुपिं हे खः।

प्रकाश 5:9

इमिसं थथे धकाः छपु न्‍हूगु म्‍ये हाल – “थ्‍व भ्‍वंथुइ च्‍वंगु छाप तछ्यानाः छिं हे जक फ्‍यनादी फु, छाय्‌धाःसा छितः स्‍याये धुंकल, अले छिगु हिं परमेश्‍वरया लागि फुक्‍क कुलयापिं, फुक्‍क भाषां नवाइपिं, फुक्‍क देशयापिं व फुक्‍क जात जातियापिन्‍त न्‍यानादिल।