उपदेशक 7:2 - नेवाः बाइबल

² भ्‍वय् नयेगु छेँ वनेगु स्‍वयाः दुखं च्‍वनाच्‍वंगु छेँ वनेगु हे बांलाः। सीगु धयागु हे मनूतय्‌गु निंतिं अन्‍त खः, अथे जुयाः म्‍वानाच्‍वंपिन्‍सं थ्‍व खँ नुगलय् तयातयेमा।

उपदेशक 7:2 ပူးပေါင်းရင်းမြစ်များ

भजनसंग्रहया सफू 90:12

जिपिं बुद्धि दुपिं जुइत जिमित थःगु दिं ल्‍याः खायेगु स्‍यनादिसँ।

उपदेशक 2:14

बुद्धि दुम्‍ह मनूया मिखा वया छेनय् दइ, तर मूर्खम्‍ह धाःसा खिउँथाय् जुइ। तर जिं खनागु दु थुपिं निम्‍हय्‌सित नं छगू हे दशा वइतिनि।

उपदेशक 2:16

छाय्‌धाःसा मूर्खम्‍ह मनूयात थें बुद्धि दुम्‍ह मनूयात नं ताःई तक लुमंका तइ मखु। वइगु दिंनय् निम्‍हय्‌सित नं ल्‍वःमंकाछ्वइ। छाय्‌धाःसा मूर्खम्‍ह थें बुद्धि दुम्‍ह नं सी हे मानि।

उपदेशक 3:19

मनूतय्‌गु भाग्‍य पशुया थें खः। इपिं निम्‍हय्‌सिगु नं छगू हे भाग्‍य पिया च्‍वनाच्‍वनी। गथे छम्‍ह सी अले मेम्‍ह नं सिनावनी। फुक्‍कसिया छगू हे सासः खः। पशुतय्‌त स्‍वयाः अप्‍वः फाइदा मनूतय्‌त दइ मखु। थुपिं फुक्‍कं सितिं वंगु खँ खः।

उपदेशक 3:20

फुक्‍क छगू हे थासय् वनी छाय्‌धाःसा फुक्‍क धुलं वःपिं खः अले फुक्‍क धुलय् हे मिलय् जूवनितिनि।

उपदेशक 6:6

छुं जुयाः व मनू निद्वः दँ तक म्‍वात धाःसा नं थःगु बांलाःगु अवस्‍थापाखें वयागु आत्‍मा लय्‌मताःसा, वयात छु आराम दइ धकाः? लिपतय् फुक्‍कं छथाय् हे वनेगु मखु ला?

उपदेशक 9:2

धर्मी व दुष्‍ट, भिंम्‍ह व मभिंम्‍ह, शुद्ध व अशुद्ध, बलि छाइपिं व बलि मछाइपिं फुक्‍कसिया अन्‍त्‍य छगूकथं हे जुइ। भिंपिं मनूतय्‌त थें पापी मनूतय्‌त नं अथे हे जुइ। पाफइपिं मनूतय्‌त थें पाफय्‌त ग्‍याइपिं मनूतय्‌त नं अथे हे जुइ।

उपदेशक 9:3

थ्‍व संसारय् याइगु फुक्‍क ज्‍याय् मभिंगु दु। फुक्‍कसिगु छगू हे कथं नाश जुइ। जिवंकाछि हे मनूतय्‌गु नुगलय् मभिंगु व वँय्‌यागु खँ जायाच्‍वनी। अले इपिं सी धुंकूपिंनापं हे मिलय् जू वनी।

उपदेशक 9:5

थःपिं सी मानि धकाः म्‍वानाच्‍वंपिन्‍सं स्‍यू, सी धुंकूपिन्‍सं धाःसा छु नं मस्‍यू। इमिगु निंतिं छुं नं सिरपाः धइगु हे दइ मखु। इमिगु लुमन्‍ति नं तनावनी।

यशैया 47:7

छं धाल, ‘जि सदांया निंतिंया रानी जुयाच्‍वने।’ तर छं थुपिं खँय् बिचाः मयाः, अले लिपा छु जुइ धकाः नं बिचाः मयाः।

यर्मिया 16:8

“भ्‍वय् जुयाच्‍वंगु छेँय् छ दुहां वने मते अले इपिंलिसें नये त्‍वनेत फेतुये मते।

हाग्‍गै 1:5

दक्‍व शक्ति दुम्‍ह परमप्रभुं थथे धयादी, “छिमित छु जुयाच्‍वन धयागु खँय् बांलाक बिचाः या।

मलाकी 2:2

छिमिसं जिगु खँय् न्‍हाय्‌पं मबिल धाःसा, छिमिसं जिगु खँ मन्‍यंसा, जिगु नांयात हनाबना मतःसा जिं छिमिथाय् सराः छ्वयाहये। छिमित दइगु सुवाःयात सराः बी। छिमिसं जिगु आज्ञाय् ध्‍यान मब्‍यूगुलिं उमित सराः लाये धुंकूगु दु,” दक्‍व शक्ति दुम्‍ह परमप्रभुं धयादी।

गन्‍ती 23:10

याकूबया धू थें ग्‍वाः ग्‍वाः दुपिं सन्‍तानयात सुनां ल्‍याः खाये फइ? प्‍यब्‍वय् छब्‍व जक इस्राएलीतय्‌त नं सुनां ल्‍याः खाये फइ? जि धर्मीम्‍ह मनू थें सिनावने दयेमा! जिगु जीवन नं इमिगु थें फुनावने मा!”

मत्ती 5:4

नुगः मछिंका जुइपिं मनूत धन्‍यपिं खः, परमेश्‍वरं हे इमित ह्यय्‌कादी।

व्‍यवस्‍था 32:29

इपिं बुद्धि दुपिं जूगु जूसा थ्‍व खँ थुइके फइगु खः। थःपिन्‍त छु जुइ धकाः इमिसं सीकेफइगु खः।

व्‍यवस्‍था 32:46

वं इमित धाल, “छिमिसं थः मचाखाचातय्‌त थ्‍व नियमया फुक्‍क वचन बांलाक मानय् यायेगु आज्ञा बी फयेमाः धकाः जिं थौं छिमित बियागु आज्ञा थःगु मनय् ति।

फिलिप्‍पी 3:19

थज्‍याःपिं मनूत नाश जुयावनी। छाय्‌धाःसा प्‍वाः हे थुमिगु द्यः खः, लज्‍या चायेमाःगु खँय् नं थुमिसं घमण्‍ड याना जुइ। अले थुमिसं थ्‍व संसारयागु ज्‍याखँय् जक मन तया जुइ।

हिब्रू 9:27

मनू छकः सी, अले सीधुंकाः वयागु न्‍याय जुइ।