उपदेशक 6:3 - नेवाः बाइबल

³ छम्‍ह मनूया सछिम्‍ह काय्‌पिं दयाः यक्‍व दँ तक म्‍वात, तर व यक्‍व दँ तक म्‍वानाः नं थःगु बांलाःगु अवस्‍थापाखें वयागु आत्‍मा लय्‌मताःसा अले वयात सीबलय् खःकथं मथुन धाःसा अज्‍याःम्‍ह मनू स्‍वयाः ला बूबलय् सीम्‍ह मचा हे बांलाः।

उपदेशक 6:3 ပူးပေါင်းရင်းမြစ်များ

उत्‍पत्ति 33:5

एसावं मिस्‍त व मस्‍त खनाः न्‍यन, “छलिसे वःपिं थुपिं सु खः?” याकूबं धाल, “परमेश्‍वरं छिम्‍ह दासयात दयामाया यानाः ब्‍यूगु जिमि मस्‍त खः।”

उत्‍पत्ति 47:9

याकूबं धाल, “जि आः उखेंथुखें जुयागु सच्‍छि व स्‍विदँ दत। जिगु थ्‍व उमेर आपाः मदुसां तसकं दुःखं जाः। जिमि बाः बाज्‍यापिं म्‍वानावंगु ति ला जिगु उमेर थ्‍यं हे मथ्‍यंनि।”

२ राजा 10:1

सामरियाय् आहाबया न्‍हयेम्‍ह काय्‌पिं दु। येहूं पौत च्‍वयाः सामरियाय्‌ यिजरेलया शासकत, नायःत व आहाबया काय्‌पिन्‍त लहिनाच्‍वंपिं मनूतय्‌थाय् छ्वल। पौलय् थथे च्‍वयातःगु दु,

२ राजा 9:35

इपिं वयात थुनेत क्‍वय् वंबलय् इमिसं वयागु छ्यंया क्‍वँय्, तुति व ल्‍हाः जक लुइकल।

१ इतिहास 28:5

वय्‌कलं जितः यक्‍व काय्‌पिं बियादिल अले वय्‌कलं इपिं मध्‍ये सोलोमनयात परमप्रभुया राज्‍य इस्राएलय् शासन यायेत ल्‍ययादिल।

२ इतिहास 11:21

रहबामं अब्‍शालोमया म्‍ह्याय् माकायात थः मेपिं कलाःपिन्‍त व मथ्‍याःपिं कलाःपिन्‍त स्‍वयाः अप्‍वः माया याइगु। वया मुक्‍क झिंच्‍याम्‍ह कलाः व खुइम्‍ह मथ्‍याःपिं कलाःपिं दु। व निइच्‍याम्‍ह काय् व खुइम्‍ह म्‍ह्याय्‌पिनि अबु खः।

एस्‍तर 5:11

अले हामानं इमित थःके धन-सम्‍पत्ति व काय्‌पिं यक्‍व दु धकाः धक्‍कु त्‍वःतल। जुजुं थःत तःधंगु पद ब्‍यूगु व मेपिं भारदारत व हाकिमत स्‍वयाः गुलि तःधं धकाः इमित धक्‍कु त्‍वःतल।

एस्‍तर 7:10

थुकथं मोर्दकैयात फांसि बीगु निंतिं थःम्‍हं हे दय्‌कातःगु सिँया थामय् हामानयात यख्‍खात। अनंलि जुजुयागु तं क्‍वलाना वन।

अय्‍यूब 3:11

जि बुइवं छाय् खतम मजुल? प्‍वाथं पिहां वयेसातकं जि छाय् मसित?

अय्‍यूब 3:16

वा ई मत्‍यवं बूम्‍ह मचा थें जितः थुनिगु जुइगु। न्‍हिनय्‌सिया जः गुबलें मखंम्‍ह ह्याँउमचा थें।

भजनसंग्रहया सफू 58:8

संखकी थें लँय् वँवं हे इपिं तनावनेमा। अले निभाः हे स्‍वये मखंम्‍ह बूबलय् हे सीम्‍ह मचा थें जुइमा।

हितोपदेश 17:6

छय्-छुइपिं बुराबुरितय्‌गु मुकुट खः, अले मांबौ मस्‍तय्‌गु न्‍हाय् खः।

उपदेशक 4:3

तर अझ थुपिं निम्‍ह स्‍वयाः सुखी ला व मनू खः सु बु हे मबुनी अले गुम्‍हय्‌सिनं थ्‍व संसारय् जूगु फुक्‍क मभिंगु ज्‍या खंगु नं मदु।

उपदेशक 6:4

व बूबलय् सीम्‍ह मचा सितिं वंक बुल अले खिउँथाय् हे मदयावन। अले खिउँगुलिं हे वयागु नांयात त्‍वपुयाबी।

यर्मिया 22:19

बरु वयात गधायात थें थुनी, वयात साला यंकाः यरूशलेमया ध्‍वाखाया पिने वांछ्वयाबी।”

यर्मिया 36:30

उकिं यहूदाया जुजु यहोयाकीमया बारे परमप्रभुं थथे धयादी – दाऊदया गद्दीइ च्‍वनीम्‍ह वया सुं सन्‍तान दइ मखु। वयागु सीम्‍ह पिने वांछ्वइ अले न्‍हिनय् निभालय् व चान्‍हय् सुतिलखय् लानाच्‍वनी।

यर्मिया 8:2

मनूतय्‌सं माया यानाः सेवा याःगु, सल्‍लाह काःगु व पुजा याःगु सूर्य, तिमिला व आकाशया नगुतय्‌गु न्‍ह्यःने उपिं क्‍वँय्‌त ब्‍वइ। मुनाः चिहानय् थुनीगु पलेसा उपिं क्‍वँय् बँय् साः थें लानाच्‍वनी।

मत्ती 26:24

धर्मशास्‍त्रय् च्‍वया तः थें मनूया काय् ला सिनावने हे माः। अय्‌नं वयात ज्‍वंका छ्वइम्‍ह मनूयात तसकं तसकं हे धिक्‍कार दु। व बु हे मबूगु जूसा तसकं बांलाइगु खः।”