दानिएल 8:3 - नेवाः बाइबल

³ जिं स्‍वयाबलय्, अन खुसिया सिथय् निपु ततःपुगु नेकू दुम्‍ह छम्‍ह भ्‍याःचा दनाच्‍वंगु खना। वयागु छपु नेकू मेगु स्‍वयाः ताहाक। व ताहाःगु नेकू लिपा बुयावःगु खः।

दानिएल 8:3 ပူးပေါင်းရင်းမြစ်များ

१ इतिहास 21:16

च्‍वय् स्‍वःबलय् दाऊदं परमप्रभुया स्‍वर्गदूतयात स्‍वर्ग व पृथ्‍वीया दथुइ थःगु नांगा तरवार ज्‍वनाः यरूशलेमयात नाश यायेत तयार जुयाच्‍वंगु खन। अले दाऊद व थकालित भांग्रा फिनाः बँय् भ्‍वसुल।

एज्रा 1:2

“फारसयाम्‍ह जुजु कोरेसं थथे धयादी– ‘परमप्रभु स्‍वर्गयाम्‍ह परमेश्‍वरं पृथ्‍वीयागु फुक्‍क राज्‍य जितः बियादीगु दु। वय्‌कलं हे जितः यहूदाया यरूशलेमय् वय्‌कःया निंतिं छगू देगः दय्‌केत उजं बियादीगु दु।

एज्रा 4:5

यहूदीतय्‌गु योजना स्‍यंकाबीत इमिसं फारसया सरकारी हाकिमतय्‌त घुस नकल। फारसयाम्‍ह जुजु कोरेस जुजुया जिवंकाछि व फारसयाम्‍ह जुजु दाराया पालय् तक इमिसं अथे याना हे च्‍वन।

एस्‍तर 1:3

वं शासन याःगु स्‍वदँ दुबलय् थः फुक्‍क भारदारत व हाकिमतय्‌त सःताः तःधंगु भ्‍वय् न्‍याय्‌कल। राजकुमारपिं, फारसी व मादी सेनातय् मू नायःत व प्रान्‍त प्रान्‍तया बडा-हाकिमत नं लाय्‌कुलिइ थ्‍यंकः वल।

यशैया 13:17

स्‍व, परमप्रभुं धयादी, जिं मादीतय्‌त बेबिलोनय् हमला यायेत थने। इमिसं वहःयात वास्‍ता याइ मखु अले लुँया लोभ याइ मखु।

यशैया 21:2

जिं तसकं ग्‍यानापुगु दर्शन खनागु दु तसकं धोखा बीम्‍हं धोखा बी, लुतय् याइम्‍हय्‌सिनं लुतय् याइ। अय् एलाम, हमला या, अय् मादी, शहरयात घेरा लगय् या! बेबिलोनं ब्‍यूगु दुःखकष्‍ट परमप्रभुं दिकादी।

यशैया 44:28

गुम्‍हय्‌सिनं कोरेसया बारे धाइ, ‘व जिमि जवाः खः, अले जिगु फुक्‍क इच्‍छा वं पूवंकी। यरूशलेमया बारे वं धाइ, “व हाकनं दय्‌केमा,” अले देगःया बारे, “थुकियात हाकनं दय्‌की।”’

यर्मिया 51:11

“वाण च्‍वामुकि! ढालत का! परमप्रभुं मादीतय् जुजुपिन्‍त ग्‍वाकादीगु दु, छाय्‌धाःसा बेबिलोनयात नाश यायेगु हे वय्‌कःया बिचाः खः। परमप्रभुं बदला कयादी, थःगु देगःया निंतिं बदला।

दानिएल 10:5

जिं च्‍वय्‌पाखे स्‍वया, जिगु न्‍ह्यःने सुतियागु वसः फिनातःम्‍ह व जँय् भिंगु लुँया जनी चिनातःम्‍ह मनूयात खना।

दानिएल 2:39

“छःपिं लिपा मेगु साम्राज्‍य दइ तर उलि बल्‍लाइ मखु। अले वया लिपा मेगु स्‍वंगूगु कँय्‌यागु साम्राज्‍यं पृथ्‍वी न्‍यंक शासन याइ।

दानिएल 5:31

अले खुइनिदँ दुम्‍ह मादी दारां व देश त्‍याका काल।

दानिएल 6:28

थुकथं दारा जुजुया पालय् व फारसी कोरेस जुजुया पालय् दानिएलयात बांलात।

दानिएल 7:5

“अले भालू थें च्‍वम्‍ह निम्‍हम्‍ह जन्‍तु खना। व छखेपाखें दनाच्‍वंगु दु। वयागु म्‍हुतुया वायागु दथुइ स्‍वपु बपिक्‍वँय् दु। छगू सलं वयात धाल, ‘दनाः प्‍वाः जाय्‌क ला न।’

दानिएल 8:2

दर्शनय् जिं थःत एलाम प्रान्‍तया राजधानी शूशन शहरय् खना। शूशन शहरया प्‍यखेरं पःखाः ग्‍वयातःगु दु। दर्शनय् जि ऊलै खुसिया सिथय् दनाच्‍वनागु दु।

दानिएल 8:20

छं खंम्‍ह निपु नेकू दुम्‍ह भ्‍याःचा मादी व फारसया जुजुत खः।

जकरिया 1:18

जिं च्‍वय् थस्‍वयाबलय् प्‍यपु नेकू खना।

जकरिया 2:1

हाकनं जिं थस्‍वया, अले जिं ल्‍हातय् दाना स्‍वयेगु खिपः छपु ज्‍वनातःम्‍ह छम्‍ह मनू खना।

जकरिया 5:1

हाकनं जिं थस्‍वयाबलय् छगू भ्‍वंया थु ब्‍वयाच्‍वंगु खना।

जकरिया 5:5

हाकनं जिलिसें खँ ल्‍हाःम्‍ह स्‍वर्गदूतं न्‍ह्यःने वयाः जितः धाल, “च्‍वय् स्‍व, छु वयाच्‍वंगु स्‍व।”

जकरिया 5:9

अले जिं थस्‍वयाबलय् निम्‍ह मिसा जिपाखे ब्‍वया वयाच्‍वंगु खना। उमिगु पपुलिइ फय् दु। उमिके सल्‍याँत्‍याः झंगःयागु थें पपू दु। इमिसं व पिचा कयाः आकाश व पृथ्‍वीया दथुइ ब्‍वय्‌का यंकल।

जकरिया 6:1

हाकनं जि थस्‍वयाः थुबलय् जिं कँय्‌यागु निगू पहाडया दथुं प्‍यंगः रथ वयाच्‍वंगु खना।

गन्‍ती 24:2

वं इस्राएलीतय्‌त कुल कुल जुयाः च्‍वनाच्‍वंगु खन। अले परमेश्‍वरयागु आत्‍मा वयाके वल।

यहोशू 5:13

यहोशू यरीहोया न्‍ह्यःने दुबलय् वं थःगु न्‍ह्यःने छम्‍ह मनू ल्‍हातय् तरवार ज्‍वनाः दनाच्‍वंगु खन। यहोशूं वयागु न्‍ह्यःने वनाः न्‍यन, “छि जिमि पाखेयाम्‍ह खः कि शत्रु पाखेयाम्‍ह?”

प्रकाश 13:11

जिं हानं पृथ्‍वीं पिहां वयाच्‍वंम्‍ह छम्‍ह मेम्‍ह पशुयात खना। चीधिकःम्‍ह भ्‍याःचायागु थें वयाके निपु नेकू दु। वं नवाःगु अजिङ्गरं नवाःगु थें च्‍वं।

प्रकाश 5:6

अले जिं सिंहासन, प्‍यम्‍ह जीवात्‍मा व थकालिपिनिगु दथुइ स्‍याना तये धुंकूम्‍ह थें च्‍वंम्‍ह छम्‍ह चीधिकःम्‍ह भ्‍याःचा दनाच्‍वंगु खना। थ्‍व चीधिकःम्‍ह भ्‍याःचायाके न्‍हय्‌पु नेकू व न्‍हय्‌गः मिखा दु। थ्‍व फुक्‍क पृथ्‍वीइ छ्वयाहःपिं परमेश्‍वरया न्‍हय्‌म्‍ह आत्‍मा खः।