दानिएल 10:6 - नेवाः बाइबल

⁶ वयागु म्‍ह पुखराज थें च्‍वं, वयागु ख्‍वाः हावलासा त्‍वःगु थें च्‍वं अले वयागु मिखा मिप्‍वाः थें च्‍वं, वयागु ल्‍हाःतुति प्‍वाला प्‍वाला थीगु कँय् थें च्‍वं अले वयागु सः ग्‍वाः ग्‍वाः मनूतय्‌गु सः थें च्‍वं।

दानिएल 10:6 ပူးပေါင်းရင်းမြစ်များ

प्रस्‍थान 28:20

प्‍यंगूगु झ्‍वलय् पुखराज, कार्नेलेन व जास्‍पर दयेमाः। थ्‍व फुक्‍कयात लुँयागु फाकुनय् थुनेमाः।

श्रेष्‍ठगीत 5:14

वयागु ल्‍हाः पुखराजया जलप तयातःगु लुँयागु कथि थें च्‍वं। वयागु प्‍वाः नीलमं समाः यानातःगु व तसकं थीकाः तःगु किसिया दं थें च्‍वं।

इजकिएल 1:14

उपिं प्राणीत हाबलासा त्‍वःगु थें थुखें उखे व उखें थुखे हथासं वनाच्‍वंगु दु।

इजकिएल 1:16

उपिं घःचाःत प्‍वालप्‍वाल थियाच्‍वंगु पुखराज थें खनेदय्‌कः दय्‌कातःगु दु – उपिं फुक्‍कं उत्‍थें च्‍वं। उपिं घःचाः छगूया दुने मेगु दु थें खने दु।

इजकिएल 1:24

इपिं वंबलय् इमिगु पपूया सः यक्‍व लःया सः, दकलय् तःधंम्‍हय्‌सिगु सः, सेनाया हलचलयागु सः थें जिं ताया। इपिं झ्‍वातां दनीबलय् इमिसं थथःगु पपू क्‍वय् क्‍वकाइगु।

इजकिएल 1:7

इमिगु तुति तप्‍यं, इमिगु तुतिपालि साचायागु तुतिपालि थें च्‍वं। उपिं ज्‍वाल्‍ल थीकातःगु कँय् थें हे ज्‍वाल्‍ल थीगु।

इजकिएल 10:9

अले जिं स्‍वया, जिं करूबतय्‌गु लिक्‍क प्‍यचा घःचाः दुगु खना, छम्‍ह छम्‍ह करूबया लिक्‍क छचा छचा घःचाः दु। उपिं घःचाःत प्‍वालप्‍वाल थीगु पुखराज थें खने दु।

इजकिएल 40:3

वय्‌कलं जितः अन यंकादिल, जिं छम्‍ह मनूयात अन खना, वयागु ख्‍वाःपाः कँय्‌यागु थें च्‍वं। वयागु ल्‍हातय् छगू सुतिया खिपः व नापे यायेगु कथि दु, व मू ध्‍वाखाय् दनाच्‍वंगु जिं खना।

इजकिएल 8:2

जिं स्‍वया, मनू थें च्‍वंगु छगू आकार जिं खना। वयागु जँया क्‍वय् व मि थें च्‍वं, जँया च्‍वय् धाःसा प्‍वालप्‍वाल थीकातःगु धातु थें थी।

मत्ती 17:2

इमिसं स्‍वस्‍वं हे वय्‌कःयागु रूप हिला वन। वय्‌कःयागु ख्‍वाः निभाः थें थिनावल, अले वसः नं जः थें त्‍वइसे च्‍वना वल।

मत्ती 28:3

वयागु ख्‍वाः हावलासा च्‍याःगु थें थी, वसः नं च्‍वापु थें त्‍वइसे च्‍वं।

लूका 9:29

प्रार्थना यानाच्‍वनादीबलय् वय्‌कःयागु ख्‍वाः तसकं थिनावल, अले वय्‌कलं पुनातःगु वसः नं तसकं यचुसे त्‍वइसे च्‍वना वल।

प्रकाश 10:1

अले हानं सुपाँचं हिनातःम्‍ह, छेनय् इन्‍द्रेणी दुम्‍ह, सूर्ययागु थें ख्‍वाः दुम्‍ह, मियागु थां थें च्‍वंगु तुति दुम्‍ह तसकं बल्‍लाःम्‍ह छम्‍ह स्‍वर्गदूत स्‍वर्गं क्‍वहां वयाच्‍वंगु जिं खना।

प्रकाश 19:12

वय्‌कःयागु मिखा मित्‍याः थें च्‍वं। वय्‌कःयागु छेनय् यक्‍व हे श्रीपेच दु। वय्‌कःयागु म्‍हय् च्‍वयातःगु नां सुनानं हे मस्‍यू, वय्‌कलं जक स्‍यू।

प्रकाश 2:18

“थिआटीराय् च्‍वंगु मण्‍डलीयाम्‍ह दूतयात थथे धकाः च्‍वया छ्व – छ्वयाच्‍वंगु मि थें च्‍वंगु मिखा दुम्‍ह, अले थीगु ली थें च्‍वंगु तुति दुम्‍ह परमेश्‍वरया काय्‌नं थथे धयादी –

प्रकाश 21:20

न्‍यागूगु आनिक्‍सयागु, खुगूगु कार्नेलेनयागु, न्‍हय्‌गूगु गोमेडयागु, च्‍यागूगु पिरोजायागु, गुंगूगु पुष्‍पराजयागु, झिगूगु लसुनेयागु, झिंछगूगु यूयागु, झिंनिगूगु कटेलायागु खः।