आमोस 2:4 - नेवाः बाइबल

⁴ परमप्रभुं थथे धयादी – “यहूदाया मनूतय्‌सं तःक्‍व हे पापयात, जिं इमित सजाँय मब्‍यूसे त्‍वःते मखु। इमिसं परमप्रभुया व्‍यवस्‍थायात हेला यात, वय्‌कःया विधित पालन मयात। इमि पुर्खात ल्‍यूवंपिं द्यःतय्‌सं इमित मखुगु लँय् यंकल।

आमोस 2:4 ပူးပေါင်းရင်းမြစ်များ

२ राजा 17:19

यहूदायापिं मनूतय्‌सं नं परमेश्‍वरया आज्ञा पालन मयात। इपिं इस्राएलीतय्‌सं दय्‌कूगु नियमकथं जुल।

२ इतिहास 25:14

एदोमीतय्‌त त्‍याकाः अमस्‍याह लिहां वःबलय् वं थःनापं सेइरया मनूतय् द्यःयागु मूर्तित हयाः थः द्यः दय्‌कल। वं इमित पुजा यानाः इमिगु निंतिं होमबलि छाल।

२ इतिहास 30:7

छिपिं थः पुर्खा व छिमि थःथितिपिं थें जुइ मते। इमिसं ला परमप्रभु इमि पुर्खातलिसे विश्‍वासघात याःगु खः। परमेश्‍वरं इमित ग्‍याइगु कारण दय्‌कादिल। व छिमिसं थःपिन्‍सं हे खंगु दु।

नहेम्‍याह 1:7

छिं थः दास मोशापाखें बियादीगु आज्ञा, विधि व नियम मानय् मयानाः जिमिसं छिगु न्‍ह्यःने तःधंगु अपराध यानागु दु।

नहेम्‍याह 9:26

“अय्‌नं छिकपिनि प्रजातय्‌सं विद्रोह यात। अले इमिसं खँ मन्‍यन। छिगु व्‍यवस्‍थापाखें ख्‍वाः फस्‍वय्‌कल। छिपाखे लिहां वयेत ख्‍याच्‍वः बीपिं अगमवक्तातय्‌त इमिसं स्‍यानाबिल। इमिसं छितः गज्‍याःगु अपमान यात।

यशैया 28:15

छिमिसं थथे धयाः घमण्‍ड याइ, “जिमिसं मृत्‍युलिसें बाचा चिनागु दु, अले सीगाःलिसें सहलह यानागु दु। तसकं तःधंगु विपत्ति जिमिथाय् वःसां, उकिं जिमित थिइ फइ मखु। छाय्‌धाःसा जिमिसं मखुगु खँ ल्‍हाइपिन्‍थाय् शरण कयागु दु, अले असत्‍ययात सुपीगु थाय् दय्‌कागु दु।”

यशैया 44:20

वं पत्‍याः याःगु चिज नउ स्‍वया अप्‍वः छुं मखु। वयागु मभिंगु बिचालं हे वयात मखुगु लँय् यंकूगु दु, वं थःम्‍हय्‌सित बचय् याये फइ मखु, न वं थथे धाये फइ, “छु जिं थःगु जव ल्‍हातय् कयातयागु चिज मखुपिं द्यःतय्‌गु मूर्ति मखु ला?”

यर्मिया 16:11

अबलय् छं इमित थथे धा, ‘छिमि तापाःबाज्‍यापिन्‍सं जितः त्‍वःताः मेपिं द्यःतय्‌त पुजा यात अले सेवा यात,’ परमप्रभुं धयादी। ‘इमिसं जिगु व्‍यवस्‍था पालन मयाः।

यर्मिया 16:12

तर छिमिसं ला छिमि तापाःबाज्‍यापिन्‍सं स्‍वयाः यक्‍व मभिंगु ज्‍या याःगु दु। स्‍व, छिपिं सकलें जिगु आज्ञा पालन यायेगु स्‍वयाः जिराहा जुयाः मभिंगु इच्‍छाया ल्‍यू जूगु दु।

यर्मिया 17:27

तर विश्रामबारयात पवित्र मानय् या! अले विश्रामबार खुन्‍हु कु क्‍वबियाः यरूशलेमया ध्‍वाखा ध्‍वाखाय्‌ जुयाः दुहां वये मते धइगु जिगु खँ छिमिसं ध्‍यान बियाः मन्‍यन धाःसा जिं उकिया ध्‍वाखात मि तयाबी। अले थुकिं यरूशलेमया किल्‍लात भज्‍यंक नाश याइ।’”

यर्मिया 6:19

हे पृथ्‍वी न्‍यँ, स्‍व! जिं थुपिं मनूतय्‌थाय् विपत्ति हये, गुगु इमिगु थःगु हे बिचाःया लिच्‍वः खः। इमिसं जिगु वचनय् ध्‍यान मब्‍यू। अले जिगु व्‍यवस्‍थायात इमिसं त्‍वःतल।

यर्मिया 8:2

मनूतय्‌सं माया यानाः सेवा याःगु, सल्‍लाह काःगु व पुजा याःगु सूर्य, तिमिला व आकाशया नगुतय्‌गु न्‍ह्यःने उपिं क्‍वँय्‌त ब्‍वइ। मुनाः चिहानय् थुनीगु पलेसा उपिं क्‍वँय् बँय् साः थें लानाच्‍वनी।

यर्मिया 8:9

बुद्धि दुपिं मछालेमाली, इमिगु नुगः क्‍वतुनी, अले इमित ज्‍वनी। इमिसं परमप्रभुया वचनयात त्‍वःतूगु दु, इमिके गज्‍याःगु बुद्धि दु?

यर्मिया 9:14

उकिया पलेसा इपिं जिराहा जुयाः इमि पुर्खातय्‌सं स्‍यं थें बालद्यःया ल्‍यूल्‍यू वंगु दु।”

इजकिएल 13:22

छिमिसं मखुगु खँ ल्‍हानाः धर्मीतय्‌त निराश यात, तर जितः इपिं निराश जूगु मयः। छिमिसं दुष्‍टतय्‌त थःगु मभिंगु पहःचहः मत्‍वःतेत हःपाः बिल, इमिसं मभिंगु पहःचहः त्‍वःतूगु जूसा इमिगु प्राण बचय् जुइगु।

इजकिएल 20:13

“‘अय्‌नं इस्राएलयापिं मनूतय्‌सं मरुभूमिइ जिगु विरोधय् विद्रोह यात। इपिं जिगु विधिकथं व आज्ञा कथं मजू, तर इमिसं जिगु नियमयात हेला यात, खः ला उपिं पालन याइपिं मनूत उपिंपाखें हे म्‍वाइ। जिगु विश्रामबारत इमिसं पूरा अशुद्ध यानाबिल। उकिं जिं धया, “थ्‍व हे मरुभूमिइ इमिके जिगु तं प्‍वंकाः इमित नाश यानाबी।”

इजकिएल 20:16

छाय्‌धाःसा इमिसं जिगु नियमयात हेला यात, अले इपिं जिगु विधिकथं मजुल, जिगु विश्रामबारतय्‌त अपवित्र यात। छाय्‌धाःसा इमिगु मन इमिगु मूर्तितपाखे वनाच्‍वंगु खः।

इजकिएल 20:18

जिं मरुभूमिइ इमि काय् म्‍ह्याय्‌पिन्‍त धया, “छिपिं थः पुर्खातय्‌गु विधिकथं जुइ मते, इमिगु नियम मानय् याये मते, इमिगु मूर्तित पुजा यानाः थःत अशुद्ध याये मते।

इजकिएल 20:24

छाय्‌धाःसा इमिसं जिगु नियम मानय् मयात, जिगु विधितय्‌त हेला यात, अले जिगु विश्रामबारयात अशुद्ध यात। इमिगु मिखा थः पुर्खातय्‌गु मूर्तितपाखे वनाच्‍वन।

इजकिएल 20:30

“उकिं इस्राएलया घरानायात धा, ‘परमप्रभु परमेश्‍वरं थथे धयादी – छु! छिमिसं थः पुर्खातय्‌सं थें थःत अशुद्ध यायेगु ला? इमिगु घच्‍चाइपुगु ज्‍याकथं व्‍यभिचारी थें ज्‍या यायेगु ला?

इजकिएल 22:28

वया अगमवक्तातय्‌सं मखुगु दर्शन अले फताहा ज्‍वखना स्‍वयाः उपिं मभिंगु ज्‍यायात सख्‍वाः पाःगु थें त्‍वःपुइगु। परमप्रभुं छुं धयामदीसां ‘परमप्रभु परमेश्‍वरं थथे धयादिल’ धकाः इमिसं धाइगु।

इजकिएल 22:8

छं जिगु पवित्र वस्‍तुयात हेला याःगु दु अले जिगु विश्रामबारया दिंयात अपवित्र याःगु दु।

होशे 12:2

यहूदाया विरोधय् परमप्रभुयाके छगू द्वपं दु। अले याकूबयात वं याःगु व्‍यवहारया कारणं वय्‌कलं सजाँय बियादी, वं याःगु ज्‍याकथं वय्‌कलं वयात पलेसा बियादी।

होशे 12:3

मांयागु कोखय् हे याकूब थः दाजु एसावनापं ल्‍वात। तःधिक जुइ धुंकाः व परमेश्‍वरनापं ल्‍वात।

होशे 6:11

“अय् यहूदा, जिमि मनूतय्‌गु भिंगु दिं लित हयेबलय्, “छंगु निंतिं नं सजाँयया ई क्‍वःछिनातःगु दु।”

आमोस 1:3

परमप्रभुं थथे धयादीगु दु, “दमस्‍कसया मनूतय्‌सं तःक्‍व हे पापयात, जिं इमित सजाँय मब्‍यूसे त्‍वःते हे मखु। छाय्‌धाःसा नँयागु वा दुगु ज्‍याभलं अन्‍न दाथें हे इमिसं गिलादया मनूतय्‌त तसकं बांमलाःगु व्‍यवहार यात।

आमोस 3:2

“पृथ्‍वीइ च्‍वंपिं फुक्‍क परिवारतय्‌गु दथुइ जिं छिमित जक ल्‍ययागु दु। अथे जुयाः छिमिगु दक्‍व पाप व अधर्मया निंतिं जिं छिमित सजाँय बी।”

मीका 6:12

थनयापिं तःमिपिं मनूत ल्‍वापुख्‍यापुं जाःगु दु। थनच्‍वंपिं सकसिनं मखुगु खँ ल्‍हानाच्‍वंगु दु। इमिगु म्‍हुतुं छलया खँ ल्‍हानाच्‍वनी।

हबकूक 2:18

“मनूतय्‌सं कियाः दय्‌कातःगु मूर्तिया छु मू दु धकाः? वा मखुगु खँ ल्‍हायेगु स्‍यनीगु धातुया मूर्तिया छु मू दु धकाः? कारिगरं थःगु ल्‍हातं दय्‌कुम्‍हसिके भलसा तइ। वं ज्‍यालगे मजूगु मूर्तित दय्‌की, व मूर्तिं न्‍ववाये फइ मखु।

रोमी 1:25

परमेश्‍वरयागु सत्‍ययात इमिसं मखुगु खँनापं हिलाः सृष्‍टि यानादीम्‍ह परमेश्‍वरयात मानय् मयासें वय्‌कलं सृष्‍टि यानातःपिन्‍त पुजा व सेवा यानाच्‍वन। परमेश्‍वर न्‍ह्याबलें तःधनेमा। आमेन।

१ थेसलोनिकी 4:8

उकिं सुनां थ्‍व खँ न्‍यनी मखु वं मनूयागु मखु, बरु छिमित पवित्र आत्‍मा बियादीम्‍ह परमेश्‍वरयागु हे खँ मन्‍यंगु जुइ।

१ पत्रुस 1:18

छिमि तापाःबाज्‍यापिनिगु पालंनिसें याना वयाच्‍वंगु ज्‍यालगय् मजूगु थितिकुतिं छिमित छुतय् यायेत गुलि मू पुलेमाल, छिमिसं सि हे स्‍यू। थ्‍व लुँ वहः थें नाश जुया वनीगु मखु,

न्‍यायकर्ता 10:6

हाकनं इस्राएलीतय्‌सं अराम, सीदोन व मोआबयापिं अले अम्‍मोनीत व पलिश्‍तीतय् द्यःत अले बालद्यः व अश्‍तोरेत द्यःमय्‌जुयात पुजा यानाः परमप्रभुया मिखाय् मभिंगु ज्‍या यात। इमिसं परमप्रभुयात त्‍वःतल अले वय्‌कःया सेवा नं मयात।