प्रेरित 15:3 - नेवाः बाइबल

³ एन्‍टिओखियाय् च्‍वंगु मण्‍डलीयापिन्‍सं इमित अनं बिदा बिल। अले इपिं फोनिके व सामरिया जुयाः वन। अन च्‍वंपिं विश्‍वासीतय्‌त इमिसं यहूदीमखुपिं मनूतय्‌सं नं विश्‍वास याःगु खँ कन। थ्‍व खँ न्‍यनाः इपिं तसकं लय्‌ताल।

प्रेरित 15:3 ပူးပေါင်းရင်းမြစ်များ

लूका 15:32

थौं ला भ्‍वय् न्‍याय्‌काः लय्‌ताय् माःगु दिं खः, छाय्‌धाःसा छं किजा सी धुंकूम्‍ह हानं म्‍वानावल, तने धुंकूम्‍ह हानं लुल।’”

प्रेरित 1:15

लिपा अन सछि व निइम्‍ह चेलात मुनाच्‍वंथाय् पत्रुसं दनाः थथे नवात –

प्रेरित 13:48

थ्‍व न्‍यनाः यहूदीमखुपिं तसकं लय्‌लय्‌ताल। इमिसं परमेश्‍वरयागु वचनयात तःधंकल। अले अनन्‍त जीवन बीत ल्‍ययातःपिं मनूतय्‌सं विश्‍वास यात।

प्रेरित 13:52

एन्‍टिओखियाय् च्‍वंपिं चेलात पवित्र आत्‍मां जायाः लय्‌तायाच्‍वन।

प्रेरित 14:27

एन्‍टिओखियाय् थ्‍यंकाः इमिसं मण्‍डलीइ च्‍वंपिं विश्‍वासीत मुंकाः परमेश्‍वरं इपिं नाप च्‍वनादियाः गुलि ज्‍या यानादिल, अले यहूदीमखुपिन्‍त नं विश्‍वास यायेगु लँ क्‍यनादिल धकाः फुक्‍क खँ कन।

प्रेरित 15:1

अबलय् यहूदियां सुं विश्‍वासीतय्‌सं एन्‍टिओखियाय् वयाः मण्‍डलीइ च्‍वंपिन्‍त थथे धकाः स्‍यन – “मोशां ब्‍यूगु व्‍यवस्‍थाय् च्‍वया तः थें म्‍हय् चिं मतय्‌कूसा छिमिगु उद्धार जुइ फइ मखु।”

प्रेरित 15:12

अले फुक्‍कं सुम्‍क च्‍वन। परमेश्‍वरं यहूदीमखुपिन्‍थाय् अजू चायापुगु चिं व ज्‍या यानादिल धकाः पावल व बारनाबासं कंगु खँ नं इमिसं ध्‍यान बियाः न्‍यनाच्‍वन।

प्रेरित 15:22

अले प्रेरितत, थकालिपिं व मण्‍डलीयापिं फुक्‍कसिनं जानाः यहूदा धाःम्‍ह बारसाबास व सिलासयात ल्‍ययाः इमित पावल व बारनाबास नाप एन्‍टिओखियाय् छ्वयेगु क्‍वःछित।

प्रेरित 15:32

हानं यहूदा व सिलास थः हे अगमवक्तात जूगुलिं इमिसं अन च्‍वंपिं विश्‍वासीतय्‌त यक्‍व खँ धयाः साहस बियाः बल्‍लाकल।

प्रेरित 15:4

यरूशलेमय् थ्‍यंबलय् अन च्‍वंगु मण्‍डलीयापिन्‍सं, प्रेरिततय्‌सं व थकालिपिन्‍सं इमित लसकुस यात। अले इमित परमेश्‍वरं यानादीगु फुक्‍क खँ कन।

प्रेरित 17:15

पावलयात तःवंपिं मनूतय्‌सं वयात एथेन्‍स थ्‍यंक हे तया वल। वं इमित हे सिलास व तिमोथीयात फतिंफतले याकनं छ्वया हजि धकाः धया छ्वल।

प्रेरित 20:38

पावलं आः हानं इमिसं वयात खनी मखुत धाःगुलिं इपिं थथे नुगः मछिंकाः ख्‍वःगु खः। इमिसं वयात लःजहाजय् तक तये यन।

प्रेरित 21:5

न्‍हय्‌न्‍हु तक च्‍वने धुंकाः अन च्‍वंपिं फुक्‍क विश्‍वासीत थः कलाः व मचाखाचातनापं ज्‍वनाः जिमित शहरं पिने तक तः वल। जिमिसं समुद्र सिथय् पुलिं चुयाः प्रार्थना याना।

प्रेरित 28:15

रोमय् च्‍वंपिं विश्‍वासी दाजुकिजापिन्‍सं जिपिं वइगु खँ न्‍यनाः गुलिं “स्‍वंगू सतः” धाःथाय् तक, अले गुलिं “अप्‍पियस” धाःगु बजारय् थ्‍यंक लँ स्‍वः वल। इमित खनाः पावलं लय्‌तायाः परमेश्‍वरयात सुभाय् बिल।

प्रेरित 8:14

यरूशलेमय् च्‍वंपिं प्रेरिततय्‌सं सामरियाय् च्‍वंपिं मनूतय्‌सं नं परमेश्‍वरयागु वचन न्‍यन धकाः सीवं यूहन्‍ना व पत्रुसयात इमिथाय् छ्वयाहल।

रोमी 15:24

स्‍पेनय् वनेत वयेबलय् लँपु लाकाः छिमित नापलाः वये। छन्‍हु निन्‍हु जि छिमिथाय् हे च्‍वनेगु इच्‍छा दु, नापं स्‍पेनय् वनेत जितः छिमिसं छुं भचा ग्‍वाहालि बी धकाः जिं आशा यानागु दु।

१ कोरिन्‍थी 16:11

छिपिं सुनानं वयात हेपय् याये मते, बरु छिमिसं वयात जिथाय् वयेत ग्‍वाहालि या। मेपिं दाजुकिजापिं नाप जिं वयागु लँ स्‍वयाच्‍वना।

१ कोरिन्‍थी 16:6

छिमिथाय् वयाः जि छन्‍हु निन्‍हु च्‍वनेगु मतिइ दु, फुसा चिकुला ज्‍वःछि हे च्‍वने। अनं लिपा जि न्‍ह्याथाय् वंसां छिमिसं जितः ग्‍वाहालि ब्‍यु।

२ कोरिन्‍थी 1:16

जि माकेडोनियाय् वनेबलय् छिमिथाय् छकः दुस्‍वयाः जक वनेगु मतिइ तयागु खः। अले माकेडोनियां लिहां वयेबलय् नं छकः छिमित नापलाः वयेगु मतिइ दु। अय्‌जुइबलय् जिं यहूदियाय् वनेत छिमिगुपाखें छुं भचा ग्‍वाहालि नं काये फइ।

तीतस 3:13

जेनास धाःम्‍ह वकील व अपोल्‍लोसयात छं फक्‍व ग्‍वाहालि बियाः याकनं छ्वयाहिँ। इमित छुं मगाः मजुइमा।