२ तिमोथी 2:15 - नेवाः बाइबल

¹⁵ परमेश्‍वरयागु सत्‍य वचनयात खःकथं छ्यलेगु या। ज्‍या यायेत लज्‍या चाये म्‍वाः। अले परमेश्‍वरया विश्‍वास याये बहःम्‍ह मनू जुइत कुतः या।

२ तिमोथी 2:15 ပူးပေါင်းရင်းမြစ်များ

मत्ती 13:52

वय्‌कलं हानं धयादिल – “व्‍यवस्‍था स्‍यनीपिं व थुइकीपिं शास्‍त्रीत स्‍वर्गयागु राज्‍यय् चेला जूवल धाःसा इपिं छेँ थुवाः थें जुइ। छेँ थुवालं थःगु धुकुतिं न्‍हूगु व पुलांगु न्‍ह्यागुं लिकाये फइ।”

मर्कूस 4:33

थुकथं वय्‌कलं इमिसं थुइके फक्‍व उखान छुनाः वचन न्‍यंकादिल।

लूका 12:42

अले वय्‌कलं धयादिल – “भिंम्‍ह व विश्‍वास याये बहःम्‍ह च्‍यः सु जुइ? गुम्‍हय्‌सित वया मालिकं मेपिं च्‍यःतय्‌त ठीक ठीक इलय् नके त्‍वंकेगु ज्‍या बियाः इमि नायः याना तइ, व हे जुइ।

प्रेरित 2:22

“अय् इस्राएली दाजुकिजापिं, जिं धायेत्‍यनागु खँ न्‍यनादिसँ – परमेश्‍वरं हे छिकपिनिगु न्‍ह्यःने नासरतयाम्‍ह येशूयात ततःधंगु व अजू चायापुगु ज्‍या व चिं याकाः छिकपिन्‍त नं क्‍यनादिल। थ्‍व खँ ला छिकपिन्‍सं सि हे स्‍यू।

प्रेरित 20:27

छाय्‌धाःसा परमेश्‍वरयागु खँ छुं नं मल्‍यंकुसे जिं छिकपिन्‍त न्‍यंकागु हे दु।

रोमी 14:18

थुकथं ख्रीष्‍टयागु सेवा यानाजुइम्‍ह मनूयात परमेश्‍वरं स्‍याबास बियादी, अले वं थथे याना जूगु खनाः मनूतय्‌सं नं थ्‍व भिंम्‍ह मनू खः धकाः धाइ।

रोमी 16:10

ख्रीष्‍टयागु ज्‍या बांलाक याइम्‍ह धकाः म्‍हसीका तये धुंकूम्‍ह अपेल्‍लेसयात ज्‍वजलपा दु धकाः न्‍यंकाब्‍यु। अरिस्‍तोबुलसया जहानपिन्‍त नं ज्‍वजलपा दु धकाः न्‍यंकाब्‍यु।

रोमी 6:13

शरीरय् च्‍वंगु छुनं म्‍हब्‍वयात छिमिसं पापी ज्‍या यायेगु ज्‍याभः याये मते। सिनाः हानं म्‍वाके धुंकूपिं मनूत जूगुलिं छिपिं थथःम्‍ह हे परमेश्‍वरं धाःथें मानय् जुयाच्‍वनेमाः। अले छिमिगु शरीरया म्‍हब्‍वत भिंगु ज्‍याखँ यायेगु ज्‍याभःकथं परमेश्‍वरयात देछाया ब्‍यु।

१ कोरिन्‍थी 2:6

अय्‌नं परमेश्‍वरयागु खँ बांलाक सीके थुइके धुंकूपिन्‍त धाःसा जिं ज्ञानयागु खँ ल्‍हाना च्‍वना। थ्‍व खँ धाःसा संसारय् च्‍वंपिनिगु मखु, शासन याना च्‍वंपिनिगु नं मखु। इपिं याकनं नाश जुयावनी।

२ कोरिन्‍थी 10:18

प्रभुं तःधं धाःम्‍ह मनू जक तःधंम्‍ह जुइ, थःत थःम्‍हं तःधं धकाः धया जुइवं व तःधं जुइ मखु।

२ कोरिन्‍थी 3:6

उकिं जिमित न्‍हूगु बाचा न्‍यंके फय्‌कादीम्‍ह परमेश्‍वर हे खः। थ्‍व न्‍हूगु बाचा च्‍वयातःगु नियम मखु, बरु थ्‍व आत्‍मां बियादीगु खः। च्‍वयातःगु नियमं मनूतय्‌त स्‍याइ, तर आत्‍मां जीवन बी।

२ कोरिन्‍थी 4:2

जिमिसं मछालापुसे च्‍वंगु ज्‍या मयाना। जिमिसं सुयातं झंगः लानाः मनया। परमेश्‍वरयागु वचनयात जिमिसं बांमलाका मजुया। जिपिं सत्‍यया जलय् परमेश्‍वरया न्‍ह्यःने म्‍वानाच्‍वना। अले सकसिनं खंक मनूतय्‌गु मिखा न्‍ह्यःने थःपिन्‍त न्‍ह्यब्‍वयाच्‍वना।

२ कोरिन्‍थी 5:9

थन च्‍वंसां स्‍वर्गय् च्‍वंसां प्रभुयात यःथें जक यानाच्‍वनेगु जिमिगु छगू हे जक आजु खः।

गलाती 1:10

जिं थथे धयाच्‍वनागु छु मनूतय्‌त लय्‌ताय्‌केत खः ला? मखु! जिं ला परमेश्‍वरयात हे लय्‌ताय्‌केत थथे यानाच्‍वनागु खः। जिं मनूतय्‌त लय्‌ताय्‌केत यानागु जूसा जि येशू ख्रीष्‍टया सेवा याइम्‍ह दास हे जुइ फइ मखु।

एफिसी 1:13

अथे हे छिमिसं नं थ्‍व मुक्ति बीगु सत्‍य व भिंगु खँ न्‍यनाः ख्रीष्‍टयात विश्‍वास यात। अले थःम्‍हं बाचा चिना तःकथं पवित्र आत्‍मा बैना बियाः परमेश्‍वरं छिमित थः मनू यानादिल।

१ थेसलोनिकी 2:4

परमेश्‍वरं हे जिमित विश्‍वास यानाः भिंगु खँ न्‍यंकेगु ज्‍या लःल्‍हानादीगु खः। जिमिसं मनूतय्‌त मखु, बरु जिमित जाँचय् यानादीम्‍ह परमेश्‍वरयात लय्‌ताय्‌केत नवानाच्‍वनागु खः।

१ थेसलोनिकी 5:14

जिं छिमित हानं धाये – अल्‍छीतय्‌त ब्‍वःब्‍यु, नुगः क्‍वतुंपिन्‍त हःपा ब्‍यु, बमलाःपिन्‍त ग्‍वाहालि या, अले न्‍ह्याम्‍हय्‌सिनं न्‍ह्यागु धाःसां सह यानाच्‍वँ।

१ तिमोथी 4:6

फुक्‍क दाजुकिजापिन्‍त थ्‍व खँ थुइकाबिल धाःसा छ येशू ख्रीष्‍टया भिंम्‍ह च्‍यः जुइ। अले थुकिं हे विश्‍वासयागु वचन व छं मानय् यानाच्‍वंगु खँय् छ गुलि तक बल्‍लानाच्‍वंगु दु धकाः सी दइ।

हिब्रू 4:11

थथे जूगुलिं झीसं नं फक्‍व कुतः यानाः झासु लने थाय् वनेगु स्‍वये माल। तापाःबाज्‍यापिन्‍सं वय्‌कःयात मानय् मयाःगुलिं वय्‌कः नाप झासु लने मखन, उकिं झीसं नं इमिसं थें याये मज्‍यू।

याकूब 1:12

दुःखकष्‍ट जुयाच्‍वंबलय् नं परमेश्‍वरयाके भरोसा तयाच्‍वंम्‍ह मनू धन्‍यम्‍ह खः। अथे दुःखकष्‍ट सीधुंकाः वयात परमेश्‍वरं वय्‌कःयात माया याःपिन्‍त बी धकाः धयादीगु जीवनयागु श्रीपेच बियादी।

याकूब 1:18

वय्‌कलं सृष्‍टि यानादीगु मध्‍ये न्‍हापांगु फल झीपिं जुइ फयेमा धकाः सत्‍य वचनपाखें झीत थःम्‍हं ल्‍ययादीगु खः।

२ पत्रुस 1:10

अय्‌जूगुलिं यःपिं दाजुकिजापिं, छिमित परमेश्‍वरं हे सःताः ल्‍ययादीगु खः धकाः क्‍यनेत कुतः या। थथे यात धाःसा छिपिं गुबलें हे क्‍वदली मखु।

२ पत्रुस 1:15

जि सिनावने धुंकाः नं छिमिसं थ्‍व फुक्‍क खँ न्‍ह्याबलें लुमंकातये फयेमा धयागु जिगु आशा खः।

२ पत्रुस 3:14

अय्‌जूगुलिं यःपिं दाजुकिजापिं, थथे गुबलय् जुइ धकाः पिया च्‍वनीपिं जुयाः छिमिसं प्रभुयात लय्‌ताय्‌केत कुतः याना च्‍वँ। पापी ज्‍या याना मजुसे पवित्र जुयाच्‍वँ। थुकथं छिपिं परमेश्‍वर नाप मिलय् जुयाच्‍वँ।