२ शमूएल 17:11 - नेवाः बाइबल

¹¹ अथे जुयाः जिगु थ्‍व सल्‍लाह दु, दानंनिसें दच्‍छिनया बेर्शेबाया सिथय् तक दुपिं फुक्‍क इस्राएलीतय्‌त छथाय् मुंकि। इपिं समुद्रया सिथय् च्‍वंगु फि थें अल्‍याख दइ, अले छि थः हे लडाइँलय् इमिगु न्‍ह्यलुवाः जुयाः यंकी।

२ शमूएल 17:11 ပူးပေါင်းရင်းမြစ်များ

उत्‍पत्ति 13:16

जिं छिमि सन्‍तानयात पृथ्‍वीया धू थें यक्‍व दय्‌काबी। पृथ्‍वीया धू ल्‍याः खाये फुम्‍हय्‌सिनं जक छिमि सन्‍तान ल्‍याः खाये फइ।

उत्‍पत्ति 21:14

कन्‍हय् खुन्‍हु सुथ न्‍हापां अब्राहामं लः दुगु छेंगूया छगः थल व मरि हयाः हागारया ब्‍वहलय् तयाबिल। अले काय्‌म्‍हनापं वयात अनं छ्वयाबिल। इपिं बेर्शेबाया मरुभूमिइ उखेंथुखें जुयाः जुल।

उत्‍पत्ति 22:17

जिं छन्‍त आकाशय् च्‍वंगु नगु व फिसलय् च्‍वंगु फि थें यक्‍व सन्‍तान दय्‌काबी। इमिसं थः शत्रुतय्‌त बुकाः इमिगु शहर त्‍याकाकाइ।

२ शमूएल 12:28

छिगु ल्‍यंदुपिं सिपाइँत छथाय् मुंकाः थःम्‍हं हे शहरयात घेरय् यानाः त्‍याका का। मखुसा जिं हे व शहरयात त्‍याकाकाये अले अन जिगु नां न्‍ह्याबलें दयाच्‍वनी।”

२ शमूएल 24:2

अथे जुयाः दाऊदं योआब व थः सेनाया कप्‍तानतय्‌त थथे धाल, “फुक्‍क इस्राएल देशय् दच्‍छिनय् च्‍वंगु बेर्शेबा शहरंनिसें उत्तरय् दान तक हुँ, लडाइँ यायेफुपिं मनूत ल्‍याः खानाः जितः धा। अले इपिं ग्‍वःम्‍ह दु धकाः जिं सीके फइ।”

२ शमूएल 3:10

जिं शाऊलया घरानायात क्‍वफायेगु अले दाऊदयात दानंनिसें बेर्शेबा तक इस्राएल व यहूदायात सिंहासनय् तयेगु ज्‍या याये।”

१ राजा 20:10

अले बेन-हददं आहाबयात मेगु खबर छ्वल, “सामरीयायागु ल्‍यं दुगु धू जिमि छम्‍ह छम्‍ह सिपाइँयात छम्‍हु छम्‍हु बीत जक गाःसां द्यःतय्‌सं जितः बांमलाक्‍क सजाँय बियादीमा।”

१ राजा 4:20

यहूदा व इस्राएलयापिं मनूत समुद्र सिथय् च्‍वंगु फि थें हे यक्‍व दु। इपिं सकसिके नयेत्‍वनेत माक्‍व दु, अले इपिं लय्‌ताः।

भजनसंग्रहया सफू 9:16

परमप्रभुयात वय्‌कःया न्‍यायया हुनिं म्‍हसीकी। दुष्‍टत धाःसा थःगु हे जालय् तक्‍यनाच्‍वनी। हिग्‍गायेन सेला

यहोशू 11:4

इपिं थःपिनि सेना ज्‍वनाः वल। इमिगु ल्‍याः यक्‍व अप्‍वः दु, समुद्र सिथया फि थें इमिके यक्‍व सल व रथ नं दु।

न्‍यायकर्ता 20:1

अले उत्तरय् दानंनिसें दच्‍छिनय् बेर्शेबातक व पुर्बय् गिलादंनिसें सकलें इस्राएलीत पिहां वल। इपिं छप्‍पँ जुयाः परमप्रभुया न्‍ह्यःने मिस्‍पाय् मुन।

१ शमूएल 13:5

अले पलिश्‍तीत इस्राएलीतनापं लडाइँ यायेत छथाय् मुन। इमिके स्‍वद्वः रथ व खुद्वः रथ चले याइपिं व समुद्रया सिथय्‌या फि ति हे अल्‍याख न्‍यासि वनीपिं सिपाइँत दु। इपिं थाहां वनाः बेथ-आवनया पुर्बय् मिकमाशय् छाउनी तल।

१ शमूएल 3:20

अनंलि उत्तरय् दानंनिसें बेर्शेबा तकयापिं फुक्‍क इस्राएलीतय्‌सं शमूएल परमप्रभु पाखेंयाम्‍ह अगमवक्ता खः धकाः म्‍हसिल।