२ पत्रुस 1:16 - नेवाः बाइबल

¹⁶ जिमिसं येशू ख्रीष्‍टयागु तःधंगु शक्ति व वय्‌कः हानं झायादी तिनि धकाः छिमित धयागु खँ मनूतय्‌सं कंगु बाखं मखु। वय्‌कः गुलि तःधं धकाः जिमिगु मिखां हे खनागु दु।

२ पत्रुस 1:16 ပူးပေါင်းရင်းမြစ်များ

मलाकी 3:2

वय्‌कः झाइबलय् सुनां सह याये फइ? वय्‌कः खने दइबलय् सु दनाच्‍वने फइ? छाय्‌धाःसा वय्‌कः लुँकःमितय्‌गु मि व ध्‍वब्‍यातय्‌गु साबुं थें खः।

मलाकी 4:5

“स्‍व! परमप्रभुयागु व तःधंगु व ग्‍यानापुसे च्‍वंगु दिं वये न्‍ह्यः जिं छिमिथाय् एलिया अगमवक्तायात छ्वयाहये।

मत्ती 16:27

आः याकनं हे परमेश्‍वरं मनूया काय्‌यात झःझः धाय्‌क स्‍वर्गदूतत नाप छ्वयाहयादी। अले वय्‌कलं छम्‍ह छम्‍ह मनूयात इमिगु ज्‍या स्‍वयाः सिरपाः बियादी।

मत्ती 16:28

जिं छिमित खःगु खँ धाये – थन दनाच्‍वंपिं मध्‍ये गुलिखय्‌ मनूत मनूया काय् जुजु जुयाः थःगु राज्‍यय् वःगु मखंतले ला सी तकं मखुनि।”

मत्ती 17:1

खुन्‍हु लिपा येशू पत्रुस, याकूब व याकूबया किजा यूहन्‍नायात ब्‍वनाः तज्‍जाःगु पर्वतय् झाल।

मत्ती 24:27

छाय्‌धाःसा पुर्बय् हावलासा त्‍वइबलय् पच्‍छिमय् थ्‍यंक खने दइ थें मनूया काय् वइबलय् नं फुक्‍कसिनं खनी।

मत्ती 24:3

येशू जैतून डाँडाय् फ्‍यतुना च्‍वनादीबलय् चेलातय्‌सं सुतुक्‍क वयाः धाल – “छिं धयादी थें गुबलय् जुइ? अले छि झायादीगु व संसार नाश जुया वनीगु खँ जिमिसं गथे याना सीकेगु?”

मत्ती 28:18

वय्‌कलं इमिगु न्‍ह्यःने वयाः थथे धयादिल – “संसार व स्‍वर्गयागु फुक्‍क अधिकार जितः बियातःगु दु।

मर्कूस 13:26

“अबलय् मनूया काय् तःधंगु शक्ति ज्‍वनाः झःझः धाय्‌क सुपाँचय् खनेदय्‌कः वइ।

मर्कूस 14:62

वय्‌कलं धयादिल – “खः, जि हे खः, छिकपिन्‍सं हे मनूया काय् परमेश्‍वरया जवय् च्‍वनाच्‍वंगु व आकाशय् च्‍वंगु सुपाँचय् वयाच्‍वंगु खनी।”

लूका 1:2

शुरु शुरुंनिसें थ्‍व खँ खंपिन्‍सं व न्‍यंका जूपिन्‍सं जिमित कना थकूगु गथे खः अथे हे च्‍वयाच्‍वना।

लूका 9:43

अन च्‍वंपिं फुक्‍क परमेश्‍वरयागु तःधंगु शक्ति खनाः अजू चाल। वय्‌कलं यानादीगु ज्‍या खनाः मनूत अजू चाया च्‍वंबलय् हे वय्‌कलं चेलातय्‌त धयादिल –

यूहन्‍ना 1:14

वचन मनू जुयाः झीपिं नाप च्‍वं झाल। वय्‌कः दया माया, अले सत्‍यं जाःम्‍ह खः। जिमिसं वय्‌कःया महिमा खना, गुगु महिमा बाःया याकः काय्‌या थें च्‍वं।

यूहन्‍ना 17:2

छिं काय्‌यात बियादिक्‍व मनूतय्‌त अनन्‍त जीवन बीत फुक्‍क मनूतय्‌त वयागु ल्‍हातय् तयादीगु दु।

रोमी 1:4

अले पवित्र आत्‍मायागु शक्तिं वय्‌कः म्‍वाना तुं वयाः परमेश्‍वरया काय् खः धकाः क्‍यनादिल।

१ कोरिन्‍थी 1:17

ख्रीष्‍टं जितः बप्‍तिस्‍मा बीत छ्वयाहयादीगु मखु, बरु भिंगु खँ न्‍यंकेत छ्वयाहयादीगु खः। थथे भिंगु खँ थःगु बुद्धिं न्‍यंकागु मखु। मखुसा ख्रीष्‍ट क्रूसय् सिनाः शक्ति क्‍यनादीगु सितिं वनी।

१ कोरिन्‍थी 1:23

जिमिसं धाःसा क्रूसय् सीम्‍ह ख्रीष्‍टयागु खँ न्‍यंका जुया। यहूदीतय्‌गु निंतिं थ्‍व पंगः जुल, अले ग्रीकतय्‌गु निंतिं थ्‍व मूर्ख खँ जुल।

१ कोरिन्‍थी 1:7

अय्‌जूगुलिं येशू ख्रीष्‍ट झायादी तिनि धकाः छिपिं पियाच्‍वंगुलिं छिमित छुं नं आत्‍मिक वरदान मगाःमचाः जुइ मखु।

१ कोरिन्‍थी 2:1

यःपिं दाजुकिजापिं, परमेश्‍वरयागु भिंगु खँ न्‍यंकेत छिमिथाय् वयाबलय् जिं यक्‍व ब्‍वना तयागु दु धकाः मक्‍यना, अले हानं ततःहाकय्‌क नवानाः ह्यय्‌केत मस्‍वया।

१ कोरिन्‍थी 2:4

भिंगु खँ न्‍यंका च्‍वनाबलय् जिगु म्‍हुतुं थःगु ज्ञान व चलाखि खँ पिहां मवः। पवित्र आत्‍मायागु शक्तिं जक जिं नवानागु खः।

१ कोरिन्‍थी 5:4

छिपिं विश्‍वासीत फुक्‍कं छथाय् मुनीबलय् जिगु आत्‍मा नं छिपिंनाप हे दइ। झी प्रभु येशूं झीत बियादीगु शक्तिं

२ कोरिन्‍थी 2:17

व्‍यापार याये थें जिमिसं परमेश्‍वरयागु भिंगु खँ न्‍यंकाच्‍वनागु मखु। जिमित परमेश्‍वरं हे छ्वया हयादीगुलिं ख्रीष्‍टया च्‍यःतय्‌सं थें जिमिसं खःगु खँ जक नवानाजुयागु दु।

२ कोरिन्‍थी 4:2

जिमिसं मछालापुसे च्‍वंगु ज्‍या मयाना। जिमिसं सुयातं झंगः लानाः मनया। परमेश्‍वरयागु वचनयात जिमिसं बांमलाका मजुया। जिपिं सत्‍यया जलय् परमेश्‍वरया न्‍ह्यःने म्‍वानाच्‍वना। अले सकसिनं खंक मनूतय्‌गु मिखा न्‍ह्यःने थःपिन्‍त न्‍ह्यब्‍वयाच्‍वना।

एफिसी 4:14

अले झीपिं मखुगु खँ स्‍यना जुइपिं मनूतय्‌गु फय्‌गं खँय् जुइपिं मस्‍त जुइ मखु। इमिगु खं मनूतय्‌त मखुगु लँय् यंकी।

फिलिप्‍पी 3:21

वय्‌कलं फुक्‍कयात थःगु ल्‍हातय् कयादी फु। थ्‍व हे शक्तिं वय्‌कलं झीगु थ्‍व बमलाःगु व सिनावनीगु म्‍हयात वय्‌कःयागु थें सिना मवनीगु यानादी।

१ थेसलोनिकी 2:19

जिमिगु आशा धाःसां, जिमिगु लय्‌ताः धाःसां, अले झी प्रभु येशू ख्रीष्‍ट झाइबलय् जिमि छ्यं धस्‍वाकेगु श्रीपेच धाःसां छिपिं हे, मखु ला?

२ थेसलोनिकी 2:9

दुष्‍टयाके शैतानयागु शक्ति दइ। वं तःतामछि अजू चायापुगु ज्‍या व चिं यानाक्‍यनी।

१ तिमोथी 1:4

जिं धया थें इमित मनय् वः थें बाखं कनेगु व तापाःबाज्‍यापिनिगु धक्‍कु त्‍वःतेगु ज्‍या याके मते। थुकिं विश्‍वास यानाः जक थुइगु परमेश्‍वरयागु ग्‍वसाःयात स्‍वयाः अप्‍वः जवाःसवाः यायेगुयात तिबः बी।

१ तिमोथी 4:7

म्‍वाःमदुगु मनय् वः थें बाखं कनाजुइपिंपाखें तापाक हे च्‍वँ। बरु परमेश्‍वरयात यय्‌क जक जुयाच्‍वँ।

तीतस 1:14

अले इमिसं यहूदीतय्‌गु पुलां पुलांगु बाखं व सत्‍ययागु लं लिचिकीगु खँय् न्‍हाय्‌पं तकं बी मखु।

२ पत्रुस 2:3

अज्‍याःपिं मनूतय्‌सं लोभलालचय् लानाः छिमिके हेय्‌का कायेत मखुगु खँ दय्‌काः स्‍यनी। न्‍हापांनिसें हे अज्‍याःपिं मनूत दोषी खः धकाः परमेश्‍वरं धयादीगु दु। अय्‌जूगुलिं अज्‍याःपिं मनूत याकनं हे हासनास जुयावनी।

१ यूहन्‍ना 4:14

थ्‍व संसारयापिं मनूतय्‌त मुक्ति बीत परमेश्‍वर बाःनं थःकाय्‌यात छ्वयाहयादीगु जिमिसं खना। थ्‍व हे खँ जिमिसं कनावयाच्‍वनागु खः।

यहूदा 1:14

आदमया न्‍हय्‌गू पुस्‍ता लिपायाम्‍ह हनोकं नं लिपा जुइगु थ्‍व हे खँ धयावंगु खः – “सीकाति, द्वलंद्वः पवित्रपिं स्‍वर्गदूततय्‌त ब्‍वनाः प्रभु झायादी।”

प्रकाश 1:7

“स्‍व, वय्‌कः सुपाँचय् झायादी तिनि, फुक्‍कसिगु मिखां खनीतिनि, वय्‌कःयात भालां सूपिन्‍सं नं खनी। अले संसारय् च्‍वंपिं फुक्‍क जातियापिं मनूत वय्‌कःयात खनाः नुगः दादां ख्‍वये मालीतिनि। थथे ला जु हे जुइ। आमेन!”