२ कोरिन्‍थी 11:23 - नेवाः बाइबल

²³ इपिं ख्रीष्‍टया च्‍यः खःसा जि झन इपिं स्‍वयाः भिंम्‍ह च्‍यः खः। थथे धायेबलय् जि वें थें च्‍वने फु। तर जिं थाकुक्‍क ज्‍या यानागु दु, तःकः मछि झ्‍यालखानाय् नं च्‍वना। तःकः मछि हे जितः कोर्रां दाःगु दु, तःकः मछि जितः सितुपातु वंक दाःगु दु।

२ कोरिन्‍थी 11:23 ပူးပေါင်းရင်းမြစ်များ

यर्मिया 36:5

यर्मियां बारूकयात धाल, “जितः ला कुनातःगु दु, जि परमप्रभुया देगलय् वनेमफु।

प्रेरित 14:19

छन्‍हु यहूदीत एन्‍टिओखिया व आइकोनियनंनिसें अन वयाः अन च्‍वंपिं मनूतय्‌त ल्‍हातय् कयाः पावलयात ल्‍वहँतं कय्‌कल। अले सित जुइ धकाः शहरं पिने सालाः वांछ्वये यंकल।

प्रेरित 20:23

अथेसां पवित्र आत्‍मां जितः शहर पतिकं दुःखकष्‍ट सिया च्‍वनेमाली व झ्‍यालखानाय् वनेमाली धकाः सीके बियादीगु दु।

प्रेरित 21:11

वं पावलयागु जनी कयाः थःगु ल्‍हाःतुति चिनाः थथे धाल – “पवित्र आत्‍मां थथे धयादीगु दु – ‘थ्‍व जनीया थुवाःयात यरूशलेमय् वन धाःसा यहूदीतय् नायःतय्‌सं थथे हे यानाः चिनाबी, अले यहूदीमखुपिन्‍त लःल्‍हानाबी।’”

प्रेरित 25:14

इपिं अन छुं न्‍हि तक च्‍वने धुंकाः फेस्‍तसं जुजुयात पावलयागु फुक्‍क खँ कन – “थन फेलिक्‍सं कुनातःम्‍ह छम्‍ह मनू दु।

प्रेरित 27:1

जिमित लःजहाजं इटालियाय् छ्वयेगु क्‍वःछी धुंकाः पावल व मेपिं कुनातःपिन्‍त युलियस धाःम्‍ह जुजु अगस्‍तसया सिपाइँतय् कप्‍तानयागु ल्‍हातय् लःल्‍हाना बिल।

प्रेरित 28:16

जिपिं रोमय् थ्‍यंकाः पावलयात छम्‍ह सिपाइँ पाः तयाः वया यत्‍थे याकेबिल।

प्रेरित 28:30

थःम्‍हं हे बालं कयाच्‍वंगु छेँय् पावल निदँ तक च्‍वन। थःथाय् वक्‍वसित वं दुनुगलंनिसें लसकुस याइगु।

प्रेरित 9:16

अले हानं जिं वयात जिगु नांया निंतिं गुलि तक वं दुःखकष्‍ट सी मालीतिनि धकाः क्‍यनेतिनि।”

रोमी 8:36

थ्‍व हे खँ भजन सफुलिइ नं थथे च्‍वयातःगु दु – “अय्‌नं जिपिं छिगु लागि न्‍हियान्‍हिथं सी मालाच्‍वंगु दु। स्‍यायेत हःपिं फैचातय्‌त थें जिमित व्‍यवहार याइगु।”

१ कोरिन्‍थी 15:10

अथेसां परमेश्‍वरं जितः दया माया यानादीगुलिं जि थथे जुइ खन। वय्‌कलं जितः दया माया यानादीगु नं ला जिं सितिं मछ्वया। फुक्‍क प्रेरिततय्‌सं स्‍वयाः नं जिं यक्‍व दुःख सियाः ज्‍या यानाच्‍वनागु दु। जिं हे जक ला थथे ज्‍या यानाच्‍वनागु मखु, बरु जितः ज्‍या याकातःगु ला परमेश्‍वरयागु दया मायां खः।

१ कोरिन्‍थी 3:5

अपोल्‍लोस धाःम्‍ह सु खः धकाः? अथे हे पावल धाःम्‍ह सु खः धकाः? जिपिं निम्‍हं छिमित प्रभुयागु भिंगु खँ कनाः विश्‍वास याकापिं परमेश्‍वरया च्‍यःत जक खः। प्रभुं जिमित याकेबियादी थें जिमिसं यानाच्‍वनागु खः।

१ कोरिन्‍थी 4:1

जिपिं परमेश्‍वरयागु गुप्‍ति खँ लःल्‍हाना तःपिं ख्रीष्‍टया च्‍यःत खः धकाः छिमिसं भाःपीमाः।

१ कोरिन्‍थी 4:11

आः तक नं जिमिसं नयेत्‍वने मखं, भ्‍वाथःगु वसतं पुनाच्‍वनागु दु। अले जिमिसं कसाः नयाच्‍वनागु दु, अले छेँबुँ मदय्‌का च्‍वनागु दु।

१ कोरिन्‍थी 4:9

मनूतय्‌त स्‍याये यंकीबलय् तमासा क्‍यने थें जिमित नं परमेश्‍वरं प्रेरितत दय्‌कादिल। उकिं हे ला खः नि मनूतय्‌गु न्‍ह्यःने व स्‍वर्गदूततय्‌गु न्‍ह्यःने नं थ्‍व संसारय् जिपिं तमासा जुयाच्‍वंगु।

२ कोरिन्‍थी 10:7

पिनेयागु खनेदुगु खँय् जक छिमिसं मन तयाच्‍वन। छिमिथाय् “जि ख्रीष्‍टयाम्‍ह मनू खः” धया जुइम्‍ह सुं दुसा वं थ्‍व नं सीके माःगु खः – व गथे ख्रीष्‍टयाम्‍ह खः जिपिं नं अथे हे ख्रीष्‍टयापिं खः।

२ कोरिन्‍थी 11:5

थथःम्‍हं तःधना जुइपिं थुपिं प्रेरितत स्‍वयाः जि चिधं मजू थें च्‍वं।

२ कोरिन्‍थी 3:6

उकिं जिमित न्‍हूगु बाचा न्‍यंके फय्‌कादीम्‍ह परमेश्‍वर हे खः। थ्‍व न्‍हूगु बाचा च्‍वयातःगु नियम मखु, बरु थ्‍व आत्‍मां बियादीगु खः। च्‍वयातःगु नियमं मनूतय्‌त स्‍याइ, तर आत्‍मां जीवन बी।

२ कोरिन्‍थी 4:11

जिमिगु थ्‍व सीमाःगु म्‍हय् येशू ख्रीष्‍ट प्रकट जुइमा धकाः हे जिपिं थथे वय्‌कःया निंतिं न्‍हियान्‍हिथं म्‍वायेगु आशा त्‍वःताः जुयाच्‍वना।

२ कोरिन्‍थी 6:9

जिपिं म्‍हमस्‍यूपिं जूसां जिमित सकसिनं म्‍हस्‍यू। सी थें च्‍वंसां जिपिं आः तक म्‍वानाच्‍वना। जिमित बाम्‍हसिक्‍क दायाहल।

गलाती 6:17

आः थ्‍व खँय् सुनानं जितः दुःखकष्‍ट बी मते, छाय्‌धाःसा येशूया दास खः धकाः क्‍यनेगु घाःखू जिं थःगु म्‍हय् फये धुन।

एफिसी 3:1

छिपिं यहूदीमखुपिं मनूतय्‌त परमेश्‍वरयागु भिंगु खँ न्‍यंका जुयागुलिं जि ख्रीष्‍टया च्‍यः पावल थथे झ्‍यालखानाय् कुंका च्‍वनेमाल।

एफिसी 4:1

प्रभुयागु ज्‍या यानाः कुंका च्‍वनेमाःम्‍ह जिं छिमित प्रभुयात यःकथं ज्‍याखँ याना च्‍वँ धकाः दुनुगलंनिसें बिन्‍ति यानाच्‍वना।

एफिसी 6:20

थ्‍व हे भिंगु खँ न्‍यंकेत जितः परमेश्‍वरं छ्वयाहयादीगु खः। कुंका च्‍वनेमाःसां जिं गुकथं नवाये माःगु खः उकथं हे मग्‍यासे नवाये फयेमा धकाः नं छिमिसं प्रार्थना या।

फिलिप्‍पी 1:13

लाय्‌कुलिइ च्‍वंपिं सिपाइँतय्‌सं जक मखु, मेपिं फुक्‍कसिनं नं जितः ख्रीष्‍टयागु निंतिं झ्‍यालखानाय् कुनातःगु खः धकाः सी धुंकल।

फिलिप्‍पी 2:17

छिमिगु विश्‍वासयागु बलिदान व सेवाय् थःगु हि तकं हाय्‌के माःसां जि लय्‌ताः। अले जि छिपिंनापं लय्‌ताये।

कलस्‍सी 1:24

छिमिगु निंतिं थथे दुःखसिया च्‍वने दुगुलिं जितः तसकं लय्‌ता वः। ख्रीष्‍टयागु म्‍ह मण्‍डलीयागु निंतिं फये मानिगु वय्‌कःयागु दुःख जिं थःगु म्‍हय् फयाः पूवंके।

कलस्‍सी 1:29

ख्रीष्‍ट येशूं बियादीगु तःधंगु शक्तिं हे जिं थथे दुःख सियाः थ्‍व ज्‍या यानाच्‍वना।

१ थेसलोनिकी 3:2

छिमित साहस बीत व विश्‍वासय् बल्‍लाकेत जिपिं नाप भिंगु खँ न्‍यंका च्‍वंम्‍ह परमेश्‍वरया सेवा याइम्‍ह किजा तिमोथीयात छिमिथाय् छ्वयाहयागु खः।

१ तिमोथी 4:6

फुक्‍क दाजुकिजापिन्‍त थ्‍व खँ थुइकाबिल धाःसा छ येशू ख्रीष्‍टया भिंम्‍ह च्‍यः जुइ। अले थुकिं हे विश्‍वासयागु वचन व छं मानय् यानाच्‍वंगु खँय् छ गुलि तक बल्‍लानाच्‍वंगु दु धकाः सी दइ।

२ तिमोथी 1:16

ओनेसिफरसया जहानपिन्‍त परमेश्‍वरं दया यानादीमा, छाय्‌धाःसा वं जितः यक्‍व यक्‍व हे साहस ब्‍यूगु दु। जितः झ्‍यालखानाय् कुनातल धकाः व लज्‍या मचाः।

२ तिमोथी 1:8

उकिं झी प्रभुयागु भिंगु खँ न्‍यंका जुइत लज्‍या चाये मते, अले जितः कुनातःगुलिइ नं लज्‍या चाये मते, बरु परमेश्‍वरयागु शक्तिइ भरोसा तयाः छं नं जिं थें तुं भिंगु खँयागु निंतिं दुःखसिया जु।

२ तिमोथी 2:9

थ्‍व हे भिंगु खँ न्‍यंकाः जिं थथे अपराधीयात थें नेवलं चिकाः च्‍वनेमाली। तर परमेश्‍वरयागु वचनयात सुनानं चिनातये फइ मखु।

२ तिमोथी 3:11

जितः गुलि दुःखकष्‍ट बिल, जिं गुलि सास्‍ती नये माल, एन्‍टिओखियाय्, आइकोनियनय् अले लुस्‍त्राय् जितः छु छु जुल धयागु फुक्‍कं छं स्‍यू। गज्‍याः गज्‍याःगु दुःखकष्‍ट जिं फये माल अले प्रभुं फुक्‍क दुःखकष्‍टं जितः बचय् याना तयादिल।

फिलेमोन 1:9

अय्‌नं माया यानाः जिं छन्‍त बिन्‍ति यानाच्‍वना। आः ला जि बुरा नं जुइ धुंकल, अले ख्रीष्‍टया निंतिं थथे कुंका नं च्‍वनागु दु।

हिब्रू 10:34

झ्‍यालखानाय् लाःपिन्‍त छिमिसं दयामाया यानाः ग्‍वाहालि यात, अले हानं छिमिगु सम्‍पत्ति लुतय् यानाकाःसां छिपिं लय्‌ताया हे च्‍वन, छाय्‌धाःसा छिमिके सदां दयाच्‍वनीगु दक्‍वसिबय् तःधंगु सम्‍पत्ति दु धकाः छिमिसं स्‍यू।