१ तिमोथी 5:5 - नेवाः बाइबल

⁵ हाःनाः मदुम्‍ह भाःत मदय्‌ धुंकूपिं मिसां परमेश्‍वरयाके भरोसा तयाच्‍वनी। अले चां न्‍हिं परमेश्‍वरयात प्रार्थना यानाच्‍वनी।

१ तिमोथी 5:5 ပူးပေါင်းရင်းမြစ်များ

भजनसंग्रहया सफू 91:4

वय्‌कलं छन्‍त थःगु पपुतिं त्‍वपुयादी, अले छन्‍त वय्‌कःया शरणय् बांलाक च्‍वने दइ। वय्‌कःया विश्‍वास याये बहःगु बचं छंगु ढाल व सुरक्षा खः।

यशैया 12:2

परमेश्‍वर धात्‍थें जितः उद्धार याइम्‍ह खः, जिं वय्‌कःयात विश्‍वास याये अले जि छति नं ग्‍याये मखु। परमप्रभु जिगु शक्ति व भजन खः, वय्‌कः हे जिगु निंतिं छुत्‍कारा बीम्‍ह जुयादीगु दु।”

यशैया 3:26

सियोनया मू ध्‍वाखा ध्‍वाखाय् ख्‍वःसः जक जुइ अले मनू सीगुलिं नुगः मछिंका बँय् फेतुनाच्‍वम्‍ह मिसा थें फुक्‍क शहर झिजांमिजां दनी।

यशैया 49:21

अनंलि छं थःगु नुगलय् थथे धाइ, ‘सुनां जिगु निंतिं थुपिं मस्‍त बुइकल? जि मस्‍त मदय्‌क च्‍वनेमाल अले मेपिं बुइके मफुत। जितः मेगु देशय् ज्‍वनाः यंकल, जि याकःचा त्‍वःताब्‍यूगु खः, अय्‌नं थुपिं फुक्‍क मस्‍त गनं वल? सुनां थुमित ब्‍वलंकल?’”

यशैया 50:10

छिपिं मध्‍ये सुनां परमप्रभुया भय काइ, अले वय्‌कःया दासया खँ मानय् याइ? जः मदय्‌क खिउँथाय् जुइपिं, परमप्रभुया नामय् भलसा ति अले थः परमेश्‍वरयाके हे भलसा या।

यशैया 54:1

“हे यरूशलेम, थारिम्‍ह मिसा, म्‍ये हा गुबलें मचा बुइके मनंम्‍ह मिसा, मचाबू ब्‍यथाय् गुबलें मलाःम्‍ह, लय्‌लय्‌तातां हाला जु। छाय्‌धाःसा भाःतनाप च्‍वनाच्‍वंम्‍ह मिसाया स्‍वयाः भाःतं त्‍वःतूम्‍ह मिसायागु हे मस्‍त यक्‍व दु,” परमप्रभुं धयादी।

विलाप 1:13

“वय्‌कलं स्‍वर्गं जिगु क्‍वँय् दुने मि कुर्का दिल, व मि जिगु दुने छ्वल। वय्‌कलं जिगु तुतिया लागि जाः तयादिल, अले जितः लितछ्वयादिल। वय्‌कलं जितः सुनसान यानाः त्‍वःतादिल अले न्‍हिच्‍छि हे बम्‍लाकादिल।

लूका 18:1

अले येशूं चेलातय्‌सं न्‍ह्याबलें प्रार्थना यानाच्‍वनेमा, अले प्रार्थना यायेगु मत्‍वःतेमा धकाः ध्‍वाथुइकेत छगू उखान कनादिल।

लूका 18:7

अले छु, परमेश्‍वरं जक चान्‍हि थःके ग्‍वाहालि फ्‍वनाच्‍वंपिं थःम्‍हं हे ल्‍ययातःपिं मनूतय्‌त स्‍वयामदी ला? छु वय्‌कलं थः मनूतय्‌त ग्‍वाहालि यायेत लिबाकादी ला?

लूका 2:37

व चयप्‍यदँ दुबलय् तक भाःत मदय्‌कः हे च्‍वन। वं यक्‍व हे अपसं च्‍वनाः प्रार्थना यानाः परमेश्‍वरया सेवा यानाच्‍वंगु दु।

प्रेरित 26:7

थ्‍व हे खँ झी झिंनिगू कुलं नं जुइतिनि धकाः आशा यानाः दुनुगलंनिसें चां न्‍हिं परमेश्‍वरयागु आराधना याना जुल। थ्‍व हे आशां यानाः जितः थौं ज्‍वना हल, महाराज।

प्रेरित 6:1

उगु इलय् चेलात अप्‍वः ददं वन। न्‍हियान्‍हिथं नसा इनाबीबलय् ग्रीक भाय् ल्‍हाइपिं यहूदीतय्‌सं इमि भाःत मदुपिं मिसातय्‌त वास्‍ता मयाः धकाः हिब्रू भाय् ल्‍हाइपिं यहूदीत नाप कचकच याना हल।

प्रेरित 9:39

पत्रुस इपिं नाप वन। अन थ्‍यनेवं इमिसं वयात तले क्‍वथाय् ब्‍वनायंकल। भाःत मदुपिं मिसातय्‌सं ख्‍वख्‍वं तबीता मसीनिबलय् वं इमिगु लागि दय्‌कातःगु वसः क्‍यन।

प्रेरित 9:41

पत्रुसं वयात ल्‍हाः ज्‍वनाः थन। अले फुक्‍क चेलात व भाःत मदुपिं मिसातय्‌त सःताः तबीतायात इमित लःल्‍हाना बिल।

रोमी 1:12

थथे झीनाप च्‍वनेबलय् जिं छिमित जक मखु, छिमिसं नं जितः आत्‍माय् बल्‍लाके फइ धयागु जिगु इच्‍छा दु।

रोमी 1:5

वय्‌कःयागु नां दक्‍व जात जातिया मनूतय्‌त न्‍यंकाः विश्‍वास याःपिन्‍सं वय्‌कःयात मानय् यायेमाः धकाः धया बीत वय्‌कलं हे जिमित दया माया यानाः प्रेरित दय्‌कादिल।

१ कोरिन्‍थी 7:32

छिमित दुःखकष्‍ट मजुइमा धकाः जिं थ्‍व खँ धयाच्‍वनागु खः। ब्‍याहा मयाःम्‍ह मनुखं प्रभुयात गय् यानाः लय्‌ताय्‌केगु धकाः प्रभुयागु ज्‍या मन तयाः यायेगु कुतः याइ।

१ कोरिन्‍थी 7:34

अय्‌जूगुलिं थज्‍याःम्‍ह मनूयागु मन निखे लानाच्‍वनी। अथे हे ब्‍याहा मजूनिम्‍ह मिसां नं प्रभुयागु ज्‍या मन तयाः याइ, छाय्‌धाःसा वं थःगु म्‍हं व आत्‍मां नं पवित्र जुइगु कुतः याइ। अले ब्‍याहा जुइ धुंकूम्‍ह मिसां संसारयागु ज्‍याखँय् मन तयाच्‍वनी, छाय्‌धाःसा वं थः भाःतयात लय्‌ताय्‌केगु कुतः यानाच्‍वनी।

एफिसी 6:18

न्‍ह्याबलें छिमिसं पवित्र आत्‍मायागु शक्ति कयाः प्रार्थना या, अले परमेश्‍वरयागु ग्‍वाहालि फ्‍वँ। होशियार जु, अले न्‍ह्याथासय् च्‍वंपिं विश्‍वासीतय्‌गु निंतिं मदिक्‍क प्रार्थना या।

फिलिप्‍पी 4:6

छुं खँय् नं पीर काये मते। छिमित माःगु खँ प्रार्थना यानाः सुभाय् बियाः परमेश्‍वरयात बिन्‍ति या।

१ तिमोथी 2:1

अय्‌जूगुलिं दक्‍वसिबय् न्‍हापां मण्‍डलीयापिन्‍त जिं धाये – फुक्‍क मनूतय्‌गु निंतिं प्रार्थना व बिन्‍ति यायेगु व सुभाय् बीगु या।

१ तिमोथी 5:16

सुं विश्‍वासी मिसायाथाय् थथे भाःत मदय्‌ धुंकूपिं मिसात दुसा वं हे इमित स्‍वयेमाः। थथे याःसा मण्‍डलीयात थाकुइ मखु। अले जक मण्‍डलीं भाःत मदय्‌ धुंकूपिं हाःनाः मदुपिं मिसातय्‌त बांलाक ग्‍वाहालि याये फइ।

१ तिमोथी 5:3

हाःनाः मदुपिं भाःत मदय्‌ धुंकूपिं मिसातय्‌त हनाबना तयेगु या।

२ तिमोथी 1:3

जिं जिमि तापाःबाज्‍यापिन्‍सं थें दुनुगलंनिसें परमेश्‍वरयागु ज्‍या यानाच्‍वनागु दु। प्रार्थना यायेबलय् जिं छन्‍त लुमंकाः चान्‍हिं परमेश्‍वरयात सुभाय् बियाच्‍वनागु दु।

१ पत्रुस 3:5

परमेश्‍वरयात विश्‍वास याइपिं न्‍हापायापिं मिसातय्‌सं नं भाःतं धाःथें च्‍वनाः थःत थुकथं हे बांलाका जूगु खः।

रुथया सफू 2:12

छंगु ज्‍याया सिरपाः परमेश्‍वरं छन्‍त बियादीमा। छ शरण काःवःम्‍ह इस्राएलया परमप्रभु परमेश्‍वरं छन्‍त यक्‍व इनाम बियादीमा।”