१ पत्रुस 5:6 - नेवाः बाइबल

⁶ उकिं छिपिं दकलय् तःधंम्‍ह परमेश्‍वरयागु न्‍ह्यःने चिधंपिं जुयाः च्‍वँ। अले वय्‌कलं छन्‍हु छिमित तःधंकादी।

१ पत्रुस 5:6 ပူးပေါင်းရင်းမြစ်များ

१ राजा 21:29

“आहाब जिगु न्‍ह्यःने क्‍वमिलु जूगु छु छं खं ला? वं थःत क्‍वमिलु याःगुलिं जिं व म्‍वानाच्‍वंतले वया परिवारयात सजाँय बी मखु। वया काय्‌या पालय् जिं आहाबया परिवारयात सजाँय बी।”

२ राजा 22:19

थ्‍व शहर व थनच्‍वंपिं मनूतय्‌त सराः लाइ अले उजाड जुइ धकाः देश व व थनच्‍वंपिं मनूतय्‌गु विरोधय् जिं धयागु खँ न्‍यनाः परमप्रभुया न्‍ह्यःने छ नुगः मछिंकाः क्‍वमिलु जुल। अले छं परमप्रभुया न्‍ह्यःने पस्‍ताय् चायाः ख्‍वख्‍वं, थःगु जामालं खुल। अथे जुयाः जिं छंगु प्रार्थना न्‍यनागु दु धकाः परमप्रभुं धयादी।

२ इतिहास 12:12

रहबामं थःत क्‍वमिलु याःगुलिं परमप्रभुया तं वपाखें चिला वन। उकिं वय्‌कलं वयात भज्‍यंक नाश यानामदी। यहूदाया अवस्‍था बांलाना हे च्‍वन।

२ इतिहास 30:11

अय्‌नं आशेर, मनश्‍शे व जबूलूनया छुं मनूत क्‍वमिलु जुयाः यरूशलेमय् वन।

२ इतिहास 32:26

अय्‌नं लिपातय् हिजकिया व यरूशलेमयापिं मनूतय्‌सं थःगु नुगःया घमण्‍डया निंतिं पश्‍चाताप यात। उकिं हिजकिया मसीतले परमप्रभुया तं इमिके मलाः।

२ इतिहास 33:12

तर आपत जूबलय् वं परमप्रभु थः परमेश्‍वरयाके ग्‍वाहालि फ्‍वन, अले व वया पुर्खातय् परमेश्‍वरया न्‍ह्यःने क्‍वमिलु जुल।

२ इतिहास 33:19

जुजुया प्रार्थना व परमप्रभुया लिसः, पश्‍चाताप याये न्‍ह्यः वं याःगु पाप, वयागु विश्‍वासघात, वं दय्‌कूगु मूर्ति पुजा याइगु थाय् व अशेरा द्यःमय्‌जुया थांत व पुजा याःपिं द्यःतय्‌गु खँ अगमवक्तातय्‌गु सफुलिइ च्‍वयातःगु दु।

२ इतिहास 33:23

तर थः अबु थें व परमप्रभुया न्‍ह्यःने क्‍वमिलु मजू। व थः अबु स्‍वयाः झन पापी जुल।

२ इतिहास 36:12

वं परमप्रभु थः परमेश्‍वरया मिखाय् मभिंगु ज्‍या यात। परमप्रभुया वचन न्‍वंवाइम्‍ह यर्मिया अगमवक्ताया न्‍ह्यःने वं थःत क्‍वमिलु मयाः।

अय्‍यूब 36:22

“परमेश्‍वरया शक्ति ला तसकं तःधं, वय्‌कः थें ज्‍याःम्‍ह स्‍यनीम्‍ह सु दु?

भजनसंग्रहया सफू 75:10

परमेश्‍वरं धयादी, “दुष्‍टतय्‌गु शक्ति जिं न्‍हंकाबी। अले धर्मीतय्‌गु शक्ति अप्‍वय्‌काबी।”

भजनसंग्रहया सफू 89:13

छि गुलि बल्‍लाःम्‍ह खः! छिगु बल गुलि तःधं!

प्रस्‍थान 10:3

उकिं मोशा व हारूनं वनाः फारोयात धाल, “हिब्रूतय् परमप्रभु परमेश्‍वरं थथे धयादी, ‘गुबलय् तक छ जिगु खँ मन्‍यंसे च्‍वनेगु? जिमि मनूतय्‌त जिगु आराधना यायेत वनेब्‍यु।

प्रस्‍थान 3:19

मिश्रयाम्‍ह जुजुं गुबलय् तक करं काइ मखु उबले तक छिमित वनेबी मखु धकाः जिं स्‍यू।

प्रस्‍थान 32:11

मोशां परमप्रभु थः परमेश्‍वरयात इनाप यानाः धाल, “हे परमप्रभु, छिगु तःधंगु शक्तिं व बल्‍लाःगु ल्‍हातं मिश्रं पित हयादीपिं थः मनूतपाखे छाय् मि थें च्‍याःगु तं पिकयादियागु?

हितोपदेश 29:23

घमण्‍डं मनूतय्‌त पतन यानाबी। क्‍वमिलु जुयाः जुइपिन्‍सं हनाबना काइ।

यशैया 2:11

परमप्रभुया दिं वयाः मनूतय्‌गु फुइँ व तःधंछु नाश जुयावनी। थ्‍व दिंखुन्‍हु परमप्रभुयात जक तःधंकेगु जुइ।

यशैया 40:4

फुक्‍क ब्‍यासित तःजाय्‌की, फुक्‍क पर्वत व डाँडात माथंवंकी। बेक्‍वःगु ख्‍यःत तप्‍यंकी अले गाः वंगु बुँत माथंवंकी।

यशैया 57:15

छाय्‌धाःसा सदां म्‍वानाच्‍वनादीम्‍ह, तच्‍वकं मानय् याये बहःम्‍ह, गुम्‍हय्‌सिगु नां पवित्र खः, वय्‌कलं धयादी, “जि दक्‍वसिबय् च्‍वय् पवित्रगु थासय् च्‍वनीम्‍ह खः, तर जि पश्‍चातापी व क्‍वमिलुपिंनापं नं च्‍वनीम्‍ह खः, अले जिं क्‍वमिलुया आत्‍मां छिमित बल्‍लाकाबी, अले पश्‍चातापयागु नुगःयात नं बल्‍लाकाबी।

यर्मिया 13:18

जुजु व राजमातायात धा, “सिंहासनं कुहां वा, छाय्‌धाःसा छिमिगु छेनं गौरवं जाःगु मुकुट कुतुं वनी।”

यर्मिया 44:10

छिपिं थौं तक नं क्‍वमिलु जूगु मदुनि, छिमिसं जितः हनाबना तःगु नं मदु, जिं छिपिं व छिमि पुर्खातय्‌गु न्‍ह्यःने तयागु जिगु व्‍यवस्‍था व विधि छिमिसं पालन याःगु मदु।

इजकिएल 17:21

वया सकलें बिस्‍युं वंपिं दक्‍वसिबय् बांलाःपिं सिपाइँतय्‌त तरवारं स्‍याइ, म्‍वानाच्‍वंपिं प्‍यखें छ्यालब्‍याल जुइ। अले छिमिसं जि परमप्रभुं हे थ्‍व खँ धाःगु खः धकाः सी।’

इजकिएल 21:6

“अय् सीमानिम्‍ह मनू, झसुका ति! ख्‍वःगु नुगलय् तसकं दुःख चायाः इमिगु न्‍ह्यःने झसुका ति!

दानिएल 5:22

“हे बेलसजर, छःपिं वय्‌कःया थासय् जुजु जूम्‍ह खः। थ्‍व फुक्‍क खँ छःपिन्‍सं स्‍यूसां छःपिनिगु मन क्‍वमिलु मजू।

लेवी 26:41

इमिगु विरोधय् वनाः जिं इमित शत्रुतय्‌गु देशय् हःगु खः धकाः इमिसं छाःगु नुगःयात क्‍वमिलु यानाः पापया मू पुल धाःसा

मीका 6:8

हे मनू, बांलाःगु अले भिंगु खँ वय्‌कलं छन्‍त क्‍यनादीगु दु। छपाखें परमप्रभुं छु यय्‌कादी? खःकथं ज्‍या यायेगु, मायायात यय्‌केगु, थः परमेश्‍वरलिसें क्‍वमिलु जुयाः जुयेगु।

मत्ती 23:12

सुनां थःत थःम्‍हं तःधंकी व चिधंनी। अले सुनां थःत थःम्‍हं चिधं ताय्‌की व तःधंनी।”

लूका 1:52

वय्‌कलं बल्‍लाःपिं जुजुपिन्‍त सिंहासनं क्‍वकयादिल, अले चिधंपिन्‍त च्‍वय् छ्वयादिल।

लूका 14:11

सुनां थःत थःम्‍हं तःधंकी व चिधनी। अले सुनां थःत थःम्‍हं चिधं ताय्‌की व तःधनी।”

लूका 18:14

वय्‌कलं धयादिल – “जिं छिकपिन्‍त धाये – व फरिसी स्‍वयाः थ्‍व मनू हे परमेश्‍वरया न्‍ह्यःने धर्मी ठहरय् जुयाः लिहां वन। सुनां थःत थःम्‍हं तःधंकी व चिधनी। अले सुनां थःत थःम्‍हं चिधं ताय्‌की व तःधनी।”

रोमी 5:6

झीसं थःम्‍हं थःगु मुक्तिया लागि छुं याये मफुबलय् ख्रीष्‍ट पापीतय्‌गु निंतिं पाय्‌छि इलय् सिनादिल।

१ कोरिन्‍थी 10:22

थज्‍याःगु ज्‍याखँ यानाच्‍वन धाःसा झीपिं खनाः प्रभु लय्‌तायादी मखु। छु झीपिं प्रभु स्‍वयाः बल्‍ला ला?

व्‍यवस्‍था 32:35

जिं थम्‍हं हे इमित बदला काये, जिं इमित सजाँय बी। इपिं भज्‍यंक नाश जुइगु ई वयेत्‍यंगु दु। याकनं हे इपिं खने मदयावनी।”

१ तिमोथी 2:6

वय्‌कः फुक्‍क मनूतय्‌गु पलेसाय् सिनादिल। न्‍हापांनिसें हे क्‍वःछिना तःकथं वय्‌कः पाय्‌छि इलय् सिनादिल।

तीतस 1:3

झीत मुक्ति बियादीम्‍ह परमेश्‍वरं हे जितः न्‍यंके बियाः पाय्‌छि इलय् फुक्‍कसितं वय्‌कःयागु भिंगु खँ सीके बियादिल।

याकूब 4:10

परमेश्‍वरया न्‍ह्यःने चिधं जु। अले जक छिमित वय्‌कलं तःधंकादी।

याकूब 4:7

उकिं छिमिसं वय्‌कलं धयादीगु खँ मानय् याना च्‍वँ। शैतानं धाःगु खँ मानय् याये मते, अले वं छिमित थी फइ मखु।

याकूब 5:10

दाजुकिजापिं, वचन न्‍यंकेत प्रभुं छ्वयाहयादीपिं अगमवक्तातय्‌गु खँ लुमंकी। इमित गुलि दुःखकष्‍ट जुल, अय्‌नं इमिसं सह यानाच्‍वन।