१ यूहन्‍ना 3:21 - नेवाः बाइबल

²¹ अय्‌जूगुलिं यःपिं दाजुकिजापिं, झीगु मनं झीत दोषी ठहरय् मयाःसा झीपिं परमेश्‍वरया न्‍ह्यःने ग्‍याये माली मखु।

१ यूहन्‍ना 3:21 ပူးပေါင်းရင်းမြစ်များ

अय्‍यूब 22:26

अले छितः दक्‍व शक्ति दुम्‍ह परमेश्‍वरपाखें सुख दइ। छिं थःगु मिखा परमेश्‍वरपाखे ल्‍ह्वनी।

अय्‍यूब 27:6

जिं थःगु धार्मिकतायात तयातये, जि म्‍वानाच्‍वंतले जिगु विवेकं जितः दोष बी मखु।

भजनसंग्रहया सफू 101:2

जिगु पहःचहः द्वं मदुगु जुइ छि जिथाय् गुबलय् झायेगु? जिं थःगु छेँय् शुद्ध जीवन हने।

रोमी 14:22

थ्‍व खँय् छिमिसं छु बिचाः यानाः परमेश्‍वर व छंगु दथुइ जक ति। थःम्‍हं भिं ताय्‌कूगु खँय् संका मयाइम्‍ह मनू हे धन्‍यम्‍ह खः।

१ कोरिन्‍थी 4:4

जिगु नुगः यचुसे च्‍वं। अथे धकाः जि द्वं मदुम्‍ह मनू खः धयागु मखु, जिगु न्‍याय याइम्‍ह ला प्रभु खः।

२ कोरिन्‍थी 1:12

जिमिसं मछाः मजुसे धायेफु – थ्‍व संसारय् जक मखु छिमिगु न्‍ह्यःने नं जिमिसं मभिंगु मतिइ मतसे ज्‍याखँ याना जुया। जिमिसं थथे थःगु हे ज्ञानं मखु, बरु परमेश्‍वरं बियादीगु दया मायां दया याये फुगु खः।

एफिसी 3:12

ख्रीष्‍टयात विश्‍वास यानागुलिं झीपिं मग्‍यासे हे परमेश्‍वरया न्‍ह्यःने वने फु।

१ तिमोथी 2:8

मिजंतय्‌सं न्‍ह्याथाय् नं तं मचासे व जवाःसवाः मयासें दुनुगलंनिसें पवित्र ल्‍हाः ल्‍ह्वनाः प्रार्थना यायेमाः।

हिब्रू 10:22

पवित्रगु लखं म्‍ह शुद्ध यानाः बांमलाःगु व मभिंगु खँ मतिइ मतसे, नुगः यचुकाः व विश्‍वासय् बल्‍लानाः झीपिं परमेश्‍वरया न्‍ह्यःने वनेनु।

हिब्रू 4:16

अय्‌जूगुलिं झीपिं भचा हे मग्‍यासे परमेश्‍वरया सिंहासनया न्‍ह्यःने वनेनु। अले वय्‌कलं झीत दया यानाः माःबलय् माःकथं झीत ग्‍वाहालि यानादी।

१ यूहन्‍ना 2:28

अय् जि यःपिं मस्‍त, ख्रीष्‍टनाप च्‍वनाच्‍वँ। अले जक ख्रीष्‍ट हानं थन झायादीबलय् झीपिं ग्‍याये माली मखु, अले वय्‌कः खनाः लज्‍या चाये माली मखु।

१ यूहन्‍ना 2:7

यःपिं दाजुकिजापिं, जिं छिमित च्‍वयाच्‍वनागु थ्‍व आज्ञा न्‍हूगु मखु, पुलांगु हे खः। थ्‍व आज्ञा परमेश्‍वरयात विश्‍वास याःबलय् निसें छिमित न्‍यंकूगु खः, आः नं न्‍यनाच्‍वंगु हे दु।

१ यूहन्‍ना 3:2

अय् जि यःपिं मस्‍त, आः ला झीपिं परमेश्‍वरया सन्‍तान खः धकाः झीसं स्‍यू। अय्‌नं लिपा झीपिं गज्‍याःपिं जुइ धयागु खँ झीत कना मदीनि। अय्‌सां ख्रीष्‍ट झायादीबलय् झीपिं वय्‌कः थें हे जुइतिनि धकाः झीसं स्‍यू। अले तिनि वय्‌कः गथे च्‍वं धकाः झीसं खनी।

१ यूहन्‍ना 3:20

झीत झीगु हे नुगलं दोषी ठहरय् याइ धाःसा परमेश्‍वर ला झीगु नुगः स्‍वयाः नं तःधं। वय्‌कलं मस्‍यूगु छुं नं मदु।

१ यूहन्‍ना 4:17

थुकथं झी मायां जाये धुंकाः न्‍याय याइबलय् मग्‍यासे परमेश्‍वरया न्‍ह्यःने वने फइ, छाय्‌धाःसा वय्‌कः गथे खः थ्‍व संसारय् झी नं अथे हे खः।

१ यूहन्‍ना 5:14

वय्‌कःया इच्‍छा कथं झीसं न्‍ह्यागु फ्‍वंसां वय्‌कलं बियादी धकाः झीसं स्‍यू। उकिं झीपिं वय्‌कःया न्‍ह्यःने वनेत ग्‍याये माःगु मदु।