१ यूहन्‍ना 2:20 - नेवाः बाइबल

²⁰ ख्रीष्‍टं छिमित पवित्र आत्‍मा बियादीगु दु, उकिं छिपिं थुपिं थें मखु। अय्‌जूगुलिं सत्‍य छु खः धयागु छिमिसं स्‍यू।

१ यूहन्‍ना 2:20 ပူးပေါင်းရင်းမြစ်များ

भजनसंग्रहया सफू 16:10

छाय्‌धाःसा छिं जिगु आत्‍मायात सीपिनिगु दथुइ त्‍वःतादी मखु। अले छितः विश्‍वास याःम्‍हय्‌सित छिं सीगालय् ध्‍वगिकेबी मखु।

भजनसंग्रहया सफू 23:5

जिमि शत्रुतय् न्‍ह्यःने छिं जिगु निंतिं भ्‍वय् ज्‍वरय् यानादी, छिं जिगु छ्यं चिकनं अभिषेक यानादीगु दु, जिगु ख्‍वला जायाः भय्‌बी।

भजनसंग्रहया सफू 45:7

छिं भिंगु खँ यय्‌कादी, मभिंगु खँयात छिं यय्‌कादी मखु, उकिं परमेश्‍वर, छिकपिनि परमेश्‍वरं छितः ल्‍ययादीगु दु अले छिकपिनि पासापिन्‍त स्‍वयाः अप्‍वः लय्‌ता बियादीगु दु।

भजनसंग्रहया सफू 71:22

हे जिम्‍ह परमेश्‍वर, जिं वीणा थानाः छि विश्‍वास याये बहःम्‍ह खः धकाः प्रशंसा याये। हे इस्राएलया पवित्र परमेश्‍वर, सारंगी थानाः जिं छिगु प्रशंसाया म्‍ये हाले।

भजनसंग्रहया सफू 92:10

छिं जितः गुँयाम्‍ह द्वहं थें बल्‍लाकादीगु दु, छिं जितः लसताया चिकनं अभिषेक यानादीगु दु।

हितोपदेश 28:5

दुष्‍ट मनूतय्‌सं न्‍याय धयागु छु धकाः सी मखु, परमप्रभुयात मानय् याइपिन्‍सं थ्‍व खँ बांलाक सी।

यशैया 43:3

छाय्‌धाःसा जि परमप्रभु छिमि परमेश्‍वर खः, इस्राएलया पवित्र परमेश्‍वर, छिमि मुक्तिदाता। छन्‍त त्‍वतकेत मिश्र देश अले छंगु पलेसा कूश व सेबा जिं बी।

यशैया 61:1

मगाःमचाःपिन्‍त भिंगु खँ न्‍यंकेत परमप्रभुं जितः ल्‍ययादीगुलिं परमप्रभु परमेश्‍वरया आत्‍मा जिके दु। नुगः क्‍वतुंवंपिन्‍त लाय्‌काबीत, चिना तःपिन्‍त त्‍वःताबीत व कुनातःपिन्‍त छुत्‍काराया घोषणा यायेत वय्‌कलं जितः छ्वयाहयादीगु खः।

यर्मिया 31:34

‘प्रभुयात म्‍हसीकी’ धकाः इमिसं थः जःलाखःलापिन्‍त व दाजुकिजापिन्‍त नं स्‍यना जुइ माली मखु, छाय्‌धाःसा चिधिकःपिन्‍संनिसें कयाः तःधिकःपिन्‍सं तकं जितः म्‍हसी। इमिसं याःगु मभिंगु बांमलाःगु ज्‍याखँ फुक्‍कं जिं क्षमा यानाबी। अले इमिगु पाप नं जिं लुमंके मखु,” परमप्रभुं धयादी।

लेवी 7:35

गुखुन्‍हु हारून व वया काय्‌पिं पुजाहारी पदय् अभिषेक जुयाः परमप्रभुया न्‍ह्यःने सेवाया निंतिं दनी, उखुन्‍हुनिसें परमप्रभुया निंतिं विशेष देछाया ब्‍व इमिगु खः।

मत्ती 13:11

वय्‌कलं धयादिल – “स्‍वर्गयागु राज्‍ययागु गुप्‍ति खँ छिमित जक सीके ब्‍यूगु दु। इमित सीके मब्‍यू।

मर्कूस 1:24

“हे नासरतयाम्‍ह येशू, छि जिमिथाय् झायेमाःगु हे छाय्? छि जिमित नाश यायेत झायागु ला? जिं छितः म्‍हस्‍यू, छि परमेश्‍वरया पवित्रम्‍ह मनू खः।”

लूका 4:18

“मगाःमचाःपिन्‍त भिंगु खँ न्‍यंकेत परमप्रभुं जितः ल्‍ययादीगुलिं परमप्रभुयागु आत्‍मा जिके च्‍वनादीगु दु। परमप्रभुं चिना तःपिन्‍त त्‍वःताबीत, कांपिन्‍त मिखां खंका बीत, अले न्‍हुत्तुन्‍हुया तःपिन्‍त थना बीत,

लूका 4:34

“हे नासरतय् च्‍वंम्‍ह येशू, छि जिमिथाय् छाय् झायेमाःगु? छि जिमित स्‍यंकेत झायागु ला? जिं छितः म्‍हस्‍यू, छि परमेश्‍वरया पवित्रम्‍ह मनू खः।”

यूहन्‍ना 14:26

छिमित ग्‍वाहालि याइम्‍ह पवित्र आत्‍मायात जिगु नामय् बाःनं छ्वयाहयादी। वय्‌कलं हे छिमित माक्‍व खँ स्‍यनादी। अले जिं धयागु फुक्‍क खँ छिमित लुमंकाबी।

यूहन्‍ना 16:13

गुबलय् सत्‍य आत्‍मा झायादी, अबलय् छिमित फुक्‍क सत्‍य खँ सीके फय्‌के बी। वय्‌कलं थःगु हे जक खँ कनादी मखु, बरु छु छु न्‍यनादिल व हे जक कनादी। वय्‌कलं लिपा जूवइतिनिगु खँ नं कनादी।

प्रेरित 10:38

अले हानं गथे परमेश्‍वरं थ्‍व हे नासरतयाम्‍ह येशूयात पवित्र आत्‍मां जाय्‌काः यक्‍व शक्ति बियादिल। अले येशूं फुक्‍कसितं भिंकाः शैतानं दुःखकष्‍ट बियातःपिन्‍त लाय्‌कादिल। छाय्‌धाःसा परमेश्‍वर वय्‌कः नाप दीगु खः धकाः छिकपिन्‍सं नं स्‍यू।

प्रेरित 3:14

थथे छिकपिन्‍सं पवित्रम्‍ह व धर्मीम्‍ह मनूयात मयय्‌काः छम्‍ह ज्‍यानमारायात त्‍वःतके बिल।

१ कोरिन्‍थी 2:15

पवित्र आत्‍मा दुम्‍ह मनुखं न्‍ह्यागुं नं जाँचय् याये फइ। थज्‍याःम्‍ह मनूयात धाःसा सुनानं जाँचय् याये फइ मखु।

हिब्रू 1:9

छितः भिंगु ज्‍याखँ जक यः, अले मभिं ज्‍याखँ छितः मयः। अय्‌जूगुलिं हे खः, परमेश्‍वरं, छिम्‍ह हे परमेश्‍वरं, छितः ल्‍ययाः मेपिं फुक्‍कसित स्‍वयाः तःधंकाः लय्‌ताय्‌कादीगु।”

हिब्रू 8:11

‘प्रभुयात म्‍हसीकी’ धकाः इमिसं थः जःलाखःलापिन्‍त व दाजुकिजापिन्‍त नं स्‍यना जुइ माली मखु, छाय्‌धाःसा चिधिकःपिन्‍संनिसें कयाः तःधिकःपिन्‍सं तकं जितः म्‍हसी।

१ यूहन्‍ना 2:27

अय्‌नं ख्रीष्‍टं छिमिगु नुगलय् पवित्र आत्‍मायात तयादीगु दु, उकिं सुनानं छिमित स्‍यने माःगु मदु। पवित्र आत्‍मां छिमित फुक्‍कं स्‍यनादी। वय्‌कः सत्‍य खः, गुबलें मखुगु खँ ल्‍हानादी मखु। पवित्र आत्‍मां गथे स्‍यनादिल, अथे हे यानाः छिपिं ख्रीष्‍टनाप च्‍वनाच्‍वँ।

१ यूहन्‍ना 4:13

वय्‌कलं झीगु नुगलय् आत्‍मा तयादीगुलिं वय्‌कः झीगु नुगलय् च्‍वनादीगु दु धकाः झीसं सी। अले झी वय्‌कःयाके दु धकाः नं सी।

यहूदा 1:5

परमेश्‍वरं इस्राएलीतय्‌त मिश्र देशं लिगना हयादिल। अय्‌नं लिपा वय्‌कःयात विश्‍वास मयाःपिं मनूतय्‌त नाश यानादिल। थ्‍व खँ छिमिसं बांलाक सि हे स्‍यू। अथेसां छिमित थ्‍व खँ लुमंकाबी मास्‍ति वल।

प्रकाश 3:7

“फिलाडेल्‍फियाय् च्‍वंगु मण्‍डलीयाम्‍ह दूतयात थथे धकाः च्‍वया छ्व – “पवित्रम्‍ह, धात्‍थेंयाम्‍ह, दाऊदयागु ताःचा दुम्‍हय्‌सिनं थथे धयादी – गुम्‍हय्‌सिनं चाय्‌कूगु खापा सुनानं ति फइ मखु, अले तिनाब्‍यूगु खापा चाय्‌के फइ नं मखु।

प्रकाश 4:8

थ्‍व प्‍यम्‍ह जीवात्‍मातय्‌के खुपा खुपा पपू दु, अले दुनेपिने फुक्‍कभनं मिखाया मिखा दु। थुमिसं चच्‍छि न्‍हिच्‍छिं मदिक्‍क थथे म्‍ये हालाच्‍वनी। “पवित्र, पवित्र, पवित्रम्‍ह दक्‍वसिबय् तःधंम्‍ह व शक्ति दुम्‍ह परमप्रभु परमेश्‍वर। वय्‌कः न्‍हापांनिसें दीम्‍ह, आः नं दीम्‍ह, अले लिपा नं दीम्‍ह खः।”