Kpojiemɔ 2:17 - ŊMALƐ KRƆŊKRƆŊ LƐ

¹⁷ Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ. Mɔ ni yeɔ kunim lɛ, mahã lɛ mana ni akɛtee lɛ eko, ni mahã lɛ tɛ yɛŋ, ni tɛ lɛ nɔ lɛ aŋma gbɛi hee ni mɔ ko leee akɛ ja mɔ ni náa lɛ.”

Ṅmãle̱ Kroṅkroṅ Le̱

¹⁷ Moni yo̱ toi le̱, hã ní enu noni Mumo̱ le̱ kē̱o̱ asafoi le̱. Moni yeo̱ kũ-nim le̱, mahãle̱ mána ní aṅõ-tē le̱ eko eye, ni mahãle̱ te̱ ye̱ṅ, ni te̱ le̱ no̱ le̱ aṅmã *gbe̱i hē ní moko lee ake̱ dša moni náa le̱. *3,12.

Kpojiemɔ 2:17 ပူးပေါင်းရင်းမြစ်များ

Lalai 25:14

Mɛi ni sheɔ Yehowa gbeyei lɛ, amɛ ekɛbɔɔ naanyo, ni ehãa amɛleɔ ekpãŋmɔ lɛ.

Lalai 36:8

Amɛyeɔ owe lɛŋ nii babaoo amɛtɔrɔɔ naakpa; ni amɛnuɔ omlihilɛ lɛ tamɔ faa ni hoɔ.

2 Mose 16:33

Kɛkɛ ni Mose kɛɛ Aaron akɛ, “Wo kpulu ni osusu mana tsenesa kome falɛ owo mli, ni okɛyama Yehowa hiɛ koni akɛto ahã nyɛshwiei yɛ yinɔi fɛɛ mli.”

Abe̱i 14:10

Tsui pɛ ni le enidɔɔnii; ni nɔ ni ji emiishɛɛ lɛ ekɛ mɔ ko mɔ ko ejaaa.

Abe̱i 3:32

ejaakɛ Yehowa miihi nɔfɔŋfeelɔ, shi jalɔi lɛ eheɔ amɛ eyeɔ.

Yesaia 56:4

Osaii ni yeɔ hejɔɔmɔ gbi lɛ, ni amɛfeɔ nii ni sa mihiɛ, ni amɛhiɛɔ mikpãŋmɔ lɛ mli tswɛ lɛ,

Yesaia 56:5

maha amɛna gbɛi yɛ miSɔlemɔ we lɛ kɛ mimaŋbii lɛ ateŋ, gbɛi ni hi fe bihii kɛ biyei. Maha amɛna gbɛi ni baahi shi kɛya naanɔ fɛɛ, ni agbeŋ kɔkɔɔkɔ.

Yesaia 62:2

Jeŋ maji lɛ aaana obemyeli lɛ, ni maŋtsɛmɛi fɛɛ aaana onunyam; ni akɛ gbɛi hei ni Yehowa aaawo bo lɛ aaatsɛ bo.

Yesaia 65:13

No hewɔ lɛ, bɔ ni Nuŋtsɔ Nyɔŋmɔ kɛɔ nɛ. Naa, mitsuji lɛ aaaye nii atɔ, shi nyɛ lɛ hɔmɔ baaye nyɛ. Naa, mitsuji lɛ aaana nu amɛnu, shi nyɛ lɛ kumai aaaye nyɛ Naa mitsuji lɛ aaanya, shi nyɛ lɛ nyɛhiɛ aaagboi.

Yesaia 65:15

Mihalamɔbii lɛ aaatsi nyɛtã amɛkɛlomɔ, ni Nuŋtsɔ Nyɔŋmɔ aaagbe nyɛ. Shi etsuji lɛ eeewo amɛ gbɛi kroko.

Mateo 13:11

Shi ehere nɔ ekɛɛ amɛ akɛ, “Ejaakɛ nyɛ lɛ akɛhã nyɛ akɛ nyɛle ŋwɛi maŋtsɛyeli lɛ mli teemɔ saji lɛ, shi amɛ lɛ akɛ hãko amɛ.

Marko 7:16

Kɛ mɔ ko yɛ toi ni akɛnuɔ nii lɛ, enu.”]

Yohane 4:32

Ni ekɛɛ amɛ akɛ, “Miyɛ ŋmaa ni miyeɔ, ni nyɛleee.”

1 Korintobii 2:14

Shi gbɔmɔ su ni akɛfɔ lɛ lɛ heee Nyɔŋmɔ Mumɔ lɛ nii lɛ; ejaakɛ ebuɔ lɛ kwashiai asane, ni enyɛɛɛ naa ena, ejaakɛ mumɔ akɛtaoɔ naa.

Kolosebii 3:3

Ejaakɛ nyɛgboi, ni akɛ nyɛwala lɛ kɛ Kristo etee yɛ Nyɔŋmɔ mli.

Kpojiemɔ 14:3

Ni amɛlaa lala hee ko yɛ maŋtsɛ sɛ̃i lɛ hiɛ kɛ hiɛkãalɔi ejwɛ lɛ kɛ onukpai lɛ ahiɛ; ni mɔ ko nyɛɛɛ lala lɛ akase, akɛ ja mɛi akpei oha kɛ nyɔŋmai ejwɛ kɛ ejwɛ lɛ ni akpɔ̃ kɛjɛ shikpɔŋ lɛ nɔ lɛ kɛkɛ.

Kpojiemɔ 19:16

Ni aŋma gbɛi ko yɛ etade kɛ egboŋ nɔ akɛ, “Maŋtsɛmɛi aMaŋtsɛ kɛ Nuŋtsɔmɛi aNuŋtsɔ.”

Kpojiemɔ 2:11

Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ. Kunimyelɔ lɛ, gbele ni ji enyɔ lɛ efeŋ lɛ efɔŋ ko.’ ”

Kpojiemɔ 2:7

Mɔ ni yɔɔ toi ni akɛ nuɔ nii lɛ, enu nɔ ni Mumɔ lɛ kɛɔ asafoi lɛ. Mɔ ni yeɔ kunim lɛ, mahã lɛ hegbɛ ni eye walatso lɛ ni yɔɔ miNyɔŋmɔ lɛ Paradeiso lɛ mli lɛ nɔ yibii lɛ eko.’ ”

Kpojiemɔ 3:22

“Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ.”

Kpojiemɔ 3:6

“Mɔ ni yɔɔ toi ni akɛnuɔ nii lɛ, enu nɔ ni Mumɔ lɛ kɛɔ asafoi lɛ.”