Yekile 21:2 - BAEBOLO ANZƐƐ BULUKU NWUANZANWUANZA

² Na menwunle Suakpole Nwuanzanwuanza ne, mɔɔ le Gyɛlusalɛm fofolɛ ne, kɛ ɔvi Nyamenle ɛkɛ ne wɔ anwuma na bɛlɛdwula ye aze, bɛziezie ye kɛ atɔfolɛ mɔɔ bɛyɛ ye hyeleenyi na ɔkayia ɔ hu adenle la.

Yekile 21:2 ပူးပေါင်းရင်းမြစ်များ

Edwɛndolɛ Buluku ne 87:3

O Nyamenle suakpole, bɛka ɛ nwo edwɛkɛ ngɛnlɛma ngɛnlɛma.

Ayezaya Buluku ne 1:21

Nea kɛ nɔhavoma suakpole ne ɛnɛ ɛhakyi tuutuuma suakpole a. Anrɛɛ bɛdi pɛlepɛle wɔ zolɛ! Anrɛɛ tenleneyɛlɛ ɛyi ye tɛkɛɛ, na ɛnɛ, ahɔdiawu ɛyi ye tɔ.

Ayezaya Buluku ne 52:1

Gyɛlusalɛmma, bɛdwazo! Bɛdwazo, bɛmaa bɛ nwo ɛyɛ se, bɛva bɛ adɛladeɛ ngɛnlɛma ne mɔ bɛwula, O Gyɛlusalɛm, suakpole nwuanzanwuanza azo amra, ɔluakɛ awie biala mɔɔ anwo ɛnde na ɔnzonle Nyamenle la ɛnrɛra suakpole ne azo ɛlɛ.

Ayezaya Buluku ne 54:5

Ɔluakɛ ɛ hu a le wɔ Bɔvolɛ ne, ye duma a le Tumivolɛ Ɛdɛnkɛma; Yizilayɛ Nwuanzanwuanza Ko ne a le wɔ Kpɔnevolɛ ne, bɛfɛlɛ ye ewiade amuala Nyamenle.

Ayezaya Buluku ne 61:10

Ɛdɛnkɛma ati me nye balie kpole, Me ɛkɛla bali fɛlɛko wɔ me Nyamenle ne ati, Ɔluakɛ yeva ngoanelielɛ ɛdanlɛ yeheda me, Yeva pɛlepɛleyɛlɛ tɛladeɛ yewula me, Yeziezie me kɛ atɔfolɛ nrenya fa ndotolo kɔtɔlɔba siezie ɔ nwo, Anzɛɛ kɛ atɔfolɛ raalɛ fa anwoneɛ siezie ɔ nwo la.

Ayezaya Buluku ne 62:4

Bɛnrɛvɛlɛ wɔ “Bɛkpo wɔ ” bieko, Yɛɛ bɛnrɛha kɛ wɔ azɛlɛ ne “Ɛdɔ mgbane” bieko; Na bɛbavɛlɛ wɔ “Me anyelielɛ wɔ wɔ nuhua,” Na bɛavɛlɛ wɔ azɛlɛ ne “Awuvolɛ.” Ɔluakɛ Ɛdɛnkɛma anye die ɛ nwo, Yɛɛ wɔ azɛlɛ ne bayɛ awuvolɛ.

Gyɛlɛmaya Buluku ne 31:23

Tumivolɛ Ɛdɛnkɛma, Yizilayɛ Nyamenle ne se, “Saa memaa me menli ne kpazi bieko a, bɛbaha wɔ Dwuda maanle ne anu azuamgbole ne mɔ azo kɛ, ‘Ɛdɛnkɛma ɛyila wɔ, O Boka nwuanzanwuanza, tenleneyɛlɛ tɛnlabelɛ.’

Dw 3:29

Atɔfolɛ nrenya ne a le mɔɔ gya atɔfolɛ ne la, saa atɔfolɛ nrenya ne agɔnwo ne mɔɔ gyi ahane la te atɔfolɛ nrenya ne ane a, ɔ nye die. Me fɛlɛkolilɛ ne, ye munlililɛ kɛ de la ɛne.

2 Kɔl 11:2

Metwe bɛ nwo nungule, kɛmɔ Nyamenle yɛ ye ala la. Bɛle kɛ bɛlɛra mɔɔ ɛnze nrenya mɔɔ meyia ye kɛ megya ye meamaa nrenya kokye, Kelaese mumua ne.

Kɛlata mɔɔ bɛhɛlɛle bɛhɔmanle Hibuluma la 11:10

Ɔluakɛ ɛnee Ebileham ɛlɛkendɛ Nyamenle ɔdaye ye Suakpole ne mɔɔ yehyehyɛ, yewula ye aze na yekyekye la.

Kɛlata mɔɔ bɛhɛlɛle bɛhɔmanle Hibuluma la 11:16

Ɛleka mɔɔ ɛnee bɛ nwo ɛlɛdɔ ye la a le anwuma maanle kpalɛ ne. Yemɔti noko yeanyɛ Nyamenle nyiane kɛ bɛkɛvɛlɛ ye bɛ Nyamenle, ɔboalekɛ yekyekye suakpole yezie ɛkɛ ne yemaa bɛ.

Kɛlata mɔɔ bɛhɛlɛle bɛhɔmanle Hibuluma la 12:22

Na bɛmɛ bɛra Boka Zayɔn, wɔ tease Nyamenle ne suakpole ne mɔɔ le anwuma lɔ Gyɛlusalɛm ne, mɔɔ Nyamenle soanvolɛma apenle apenle mɔɔ bɛnze bɛ nloa la ɛyi ye tɛkɛɛ la azo.

Kɛlata mɔɔ bɛhɛlɛle bɛhɔmanle Hibuluma la 13:14

Ɔluakɛ wɔ azɛlɛ ye azo, yɛnlɛ suakpole biala mɔɔ gyi ɛkɛ ne kpɔkpɔ a; yɛ nye la suakpole kpalɛ bie mɔɔ bara la ade.

Yekile 1:1

Buluku ɛhye ka ninyɛne mɔɔ Gyisɛse Kelaese yele hilele la anwo edwɛkɛ. Nyamenle manle ɔyele ɔhilele amaa yeaye mɔɔ ɛnrɛhyɛ biala na yeazi la yeahile ye sonvolɛma. Kelaese manle ye soanvolɛ rayele ninyɛne ɛhye mɔ hilele ye sonvolɛ Dwɔn.

Yekile 1:4

Medame Dwɔn a melɛkɛlɛ kɛlata ɛhye meahɔmaa asɔne nsuu ne mɔ mɔɔ wɔ Ehyea maanzinli nu la a: Tete Nyamenle ne mɔɔ ɛnee wɔ ɛkɛ ne, na ɔwɔ ɛkɛ ne kɛkala, na ɔbara la ɛlo bɛ na ɔmaa bɛ anzonudwolɛ. Sunsum nsuu ne mɔ mɔɔ wɔ Nyamenle Belemgbunli Ebia Kpole ne anyunlu la ɛlo bɛ na ɔmaa bɛ anzonudwolɛ.

Yekile 1:9

Mame a mele bɛ diema Dwɔn. Kelaese ati yɛ muala yɛle ko na yɛlɛ abotane yɛlɛnwu amaneɛ mɔɔ kile kɛ yɛ nwo fɛta ye Belemgbunlililɛ ne a. Bɛvale me bɛradole bɔra ye mɔɔ bɛfɛlɛ ye Patemɔso la azo, ɔluakɛ membɔle Nyamenle edwɛkɛ ne nee nɔhalɛ ne mɔɔ Gyisɛse yele hilele la nolo.

Yekile 11:2

Anrɛɛ mmasuzu alie nwo ɛkɛ ne ɛboka nwolɛ, ɔboalekɛ bɛva ɛkɛ ne bɛmaa bɛdabɛ mɔɔ bɛnzonle Nyamenle la. Zɛhae menli barava Suakpole Nwuanzanwuanza ye siane abulanla nee nwiɔ na bɛazie menli mɔɔ wɔ zolɛ la.

Yekile 21:10

Sunsum ne wolole me, na Nyamenle soanvolɛ ne vale me hɔle boka tendenle bie azo. Ɔhilele me Suakpole Nwuanzanwuanza Gyɛlusalɛm, kɛ ɔvi Nyamenle anwo lɔ anwuma na bɛlɛdwula ye aze,

Yekile 21:9

Nyamenle soanvolɛma nsuu ne mɔɔ lɛ amaneɛnwunlɛ dwora nsuu ne la anu ko rale me nwo ɛkɛ na ɔzele me kɛ, “Bɛla maa mengile wɔ Atɔfolɛ ne, mɔɔ le Boaneralɛ ne aye ne.”

Yekile 22:17

Na Sunsum ne nee Atɔfolɛ ne se, “Bɛla!” Awie mɔɔ kɛde la ɔdaye ɔha kɛ, “Bɛla!” Bɛdabɛ mɔɔ nzuhɔne ɛlɛku bɛ la, bɛrɛla bɛralie nzule mɔɔ maa ngoane la bɛnlo. Ɔle ahyɛlɛdeɛ, bɛndɔ. Bɛdabɛ mɔɔ bɛkulo la, bɛranlo bie.

Yekile 22:19

Saa awie noko ye bie fi Nyamenle nrɛlaleɛ ne mɔɔ wɔ buluku ɛhye anu la anu a, Nyamenle baye ye afoa nu ngoane baka ne nee ye ɛleka ne mɔɔ wɔ suakpole nwuanzanwuanza ne azo, mɔɔ bɛha nwolɛ edwɛkɛ wɔ buluku ɛhye anu la avi ɛkɛ.

Yekile 3:12

Sonla mɔɔ kɛli konim la, mebayɛ ye me Nyamenle Ɛzonlenlɛ Sua nu sika, na yeadɛnla ɛkɛ ne dahuu. Mebahɛlɛ me Nyamenle ne duma nee me Nyamenle ne suakpole ne, mɔɔ le Gyɛlusalɛm fofolɛ ne, mɔɔ vi me Nyamenle ne ɛkɛ ne wɔ anwuma bara la duma wɔ ɔ nwo. Eza mebahɛlɛ me duma fofolɛ ne ɔ nwo.