Yekile 1:17 - BAEBOLO ANZƐƐ BULUKU NWUANZANWUANZA

¹⁷ Menwunle ye la, mempɛle menfinle ɔ gyakɛ anu kɛ asɛɛ mewu la. Na ɔvale ɔ sa fema ne ɔdole me nwo zo na ɔzele me kɛ, “Mmasulo! Mame a mele alumua ne nee awieleɛ ne a.

Yekile 1:17 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 15:1

Ɛhye mɔ anzi, Ebilam dele Ɛdɛnkɛma edwɛkɛ ne wɔ ɛnyelɛzodeɛnwunlɛ nu kɛ, “Ebilam, mmasulo, na mebabɔ ɛ nwo bane. Wɔ ahatualɛ bayɛ kpole kpalɛ.”

Edwɛndolɛ Buluku ne 139:5

Ɛwɔ me nyunlu, ɛwɔ me nzi, na ɛfa ɛ sa ɛto me nwo zo.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 14:13

Na Mosisi zele menli ne kɛ, “Bɛmmasulo, bɛgyinla kpundii na bɛnlea kɛ ɛnɛ Ɛdɛnkɛma bazi alie bɛ la. Ɔluakɛ Yigyibitima mɔɔ bɛnwu bɛ ɛnɛ la, bɛnrɛnwu bɛ bieko ɛlɛ.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 20:20

Na Mosisi hanle hilele menli ne kɛ, “Bɛmmasulo, ɔluakɛ Nyamenle ɛra kɛ ɔbazɔ bɛ yeanlea, amaa bɛazulo ye dahuu na bɛanyɛ ɛtane.”

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 3:6

Eza ɔzele kɛ, “Mame a mele ɛ ze mɔ Nyamenle ne, Ebileham Nyamenle ne, Ayezeke Nyamenle ne, nee Gyekɔbo Nyamenle ne.” Na Mosisi hedale ɔ ti zo, ɔluakɛ ɔsulo kɛ ɔkɛnlea Nyamenle.

Ayezaya Buluku ne 41:10

Bɛmmasulo, ɔluakɛ me nee bɛ lua; bɛmmamaa bɛ ahonle tu, medame a mele bɛ Nyamenle a. Mebamaa bɛ anwosesebɛ, mebaboa bɛ, mebava me konimlilɛ tumi ɛsalɛ ne meazɔ bɛ.

Ayezaya Buluku ne 41:4

Ɔvi tete, wɔ awolɛndoazo muala anu, nwane a ɛyɛ ɛhye a? Medame Ɛdɛnkɛma ɔ, mele mɔlebɛbo, mele awieleɛ. Medame mumua ne ɛne.

Ayezaya Buluku ne 44:6

Ɛdɛnkɛma, Yizilayɛ Belemgbunli nee Kpɔnevolɛ, Tumivolɛ Ɛdɛnkɛma se, “Medame a mele mɔlebɛbo ne, yɛɛ medame a mele awieleɛ ne; ɛye me a nyamenle bieko ɛnle ɛkɛ.

Ayezaya Buluku ne 48:12

Ɛdɛnkɛma se, “O Gyekɔbo abo zo amra, bɛdie me! Yizilayɛma mɔɔ medame mevɛlɛ bɛ, bɛdie me! Medame a mele Nyamenle a, medame a mele mɔlebɛbo ne nee awieleɛ ne a.

Gyɛlɛmaya Awolɛyelɛ 3:57

Menvɛlɛle wɔ la ɛbikyele me, ɛzele me kɛ, ‘Mmasulo!’

Yizikeɛle Buluku ne 1:28

Wienyi ne le kɛ ezule mɔɔ ɛmunla la nyangondonle ne mɔɔ kɛdo la. Kɛ Ɛdɛnkɛma anyunlunyia ne sɔhovolɛ de la ɛne. Mɔɔ menwunle ɛhye la, membutule me nye aze, na mendele awie ane kɛ ɔlɛtendɛ.

Daneɛle Buluku ne 10:12

Ɔhanle ɔhilele me kɛ “Daneɛle, mmasulo, ɔluakɛ ɔvi kenle ko ne mɔɔ ɛnyianle adwenle kɛ ɛbɛlɛ ɛ nwo aze wɔamaa Nyamenle, wɔakpondɛ ndelebɛbo la yɛɛ wɔ ɛbizalɛdeɛ ne dwule Nyamenle anyunlu a, na mɔɔ wɔbiza la ati yɛɛ mera a.

Daneɛle Buluku ne 10:15

Ɔhanle edwɛkɛ ɛhye ɔhilele me la, membutule me nye aze, na mendɔle mumule.

Habakɛke Buluku ne 3:16

Mete na me nwo wozo me, ɔ ne maa me nloa babonle wozo; me nwo golo me, me gyakɛ to bɛka nu. Mebayɛ koonwu meahendɛ amaneɛnwunlɛ kenle ne mɔɔ Nyamenle bava adea menli mɔɔ ko fa yɛ la.

Edwɛkpa ne kɛmɔ Mateyu hɛlɛle la 14:27

Na ɛkɛ ne ala Gyisɛse zele bɛ kɛ, “Bɛmmasulo, bɛha bɛ ahonle bɛdo azule nu na medame ɔ.”

Edwɛkpa ne kɛmɔ Mateyu hɛlɛle la 28:4

Sinzavolɛma ne zulole kpole, bɛ nwo wozole bɛ na bɛyɛle kɛ menli mɔɔ ɛwu la.

Edwɛkpa ne kɛmɔ Mateyu hɛlɛle la 28:5

Na Nyamenle soanvolɛ ne zele mraalɛ ne mɔ kɛ, “Bɛmmasulo, meze kɛ bɛkpondɛ Gyisɛse mɔɔ bɛbɔle ye meanubaka nu la.

Dw 13:23

Ɛnee ɛdoavolɛ ne mɔɔ Gyisɛse kulo ye edwɛkɛ la de Gyisɛse anwo ɛkɛ ne.

Dw 21:20

Pita hakyile ɔ nwo na ɔnwunle kɛ ɛdoavolɛ ko ne mɔɔ Gyisɛse kulo ye edwɛkɛ la doa bɛ. Ɛdoavolɛ ɛhye ala a mekɛ mɔɔ bɛdi aleɛ ne la, ɔhwenle ɔbikyele Gyisɛse na ɔbizale ye kɛ, “Awulae, nwane a baye wɔ amaa?” la.

Yekile 1:11

Ɔse, “Kɛlɛ mɔɔ ɛkɛnwu ye la wɔ buluku nu na fa buluku ne kɔmaa asɔne nsuu ne mɔ mɔɔ wɔ azuamgbole ɛhye mɔ azo la: Ɛfɛsɛse, Semɛna, Pɛgamɛm, Tayataela, Saadese, Feladɛlefea, yɛɛ Lawɔdesia.”

Yekile 1:4

Medame Dwɔn a melɛkɛlɛ kɛlata ɛhye meahɔmaa asɔne nsuu ne mɔ mɔɔ wɔ Ehyea maanzinli nu la a: Tete Nyamenle ne mɔɔ ɛnee wɔ ɛkɛ ne, na ɔwɔ ɛkɛ ne kɛkala, na ɔbara la ɛlo bɛ na ɔmaa bɛ anzonudwolɛ. Sunsum nsuu ne mɔ mɔɔ wɔ Nyamenle Belemgbunli Ebia Kpole ne anyunlu la ɛlo bɛ na ɔmaa bɛ anzonudwolɛ.

Yekile 1:8

Kɛ tete Awulae Nyamenle Bedevinli ne mɔɔ ɛnee wɔ ɛkɛ, na ɔwɔ ɛkɛ ne kɛkala, na ɔbara la se la ɛne, “Medame a mele ‘Alefa’ ne nee ‘Omiga’ ne a.”

Yekile 2:8

“Kɛlɛ ɛhye kɔmaa Semɛna asɔne ne Nyamenle soanvolɛ ne. “Nrɛlaleɛ ɛhye vi alumua ne nee awieleɛ ne, mɔɔ wule na ɔziale ɔrale ngoane nu bieko la ɛkɛ.

Yekile 22:13

Mame a mele ‘Alefa’ nee ‘Omiga’ ne a, mɔlebɛbo ne nee awieleɛ ne.”