Wulo 13:8 - BAEBOLO ANZƐƐ BULUKU NWUANZANWUANZA

⁸ Bɛmmadi awie biala anwo ɛzonle, ɛzonle mɔɔ yɛdi la a le kɛ yɛkɛhulo yɛ nwo ngoko ngoko. Mɔɔ kulo ɔ gɔnwo dasanli la ɛli Mosisi mɛla ne azo ɛwie.

Wulo 13:8 ပူးပေါင်းရင်းမြစ်များ

Edwɛkpa ne kɛmɔ Mateyu hɛlɛle la 7:12

“Zɔhane ati mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ. Mosisi mɛla ne nee Nyamenle kpɔmanvolɛma ngilehilelɛ ne kɛ kɔ ye la ɛne.

Dw 13:34

Memaa bɛ mɛla fofolɛ: Bɛhulo bɛ nwo ngoko ngoko. Kɛ mezi mehulo bɛ la, zɔhane ala yɛɛ bɛhulo bɛ nwo ngoko ngoko a.

Wulo 13:10

Saa ɛlɛ ɛhulolɛ a, ɛnrɛyɛ ɛ gɔnwo ɛtane. Yemɔti ɛhulolɛ a sɔ Mosisi mɛla ne amuala anloa a.

Wulo 13:7

Yemɔti, mɔɔ ɔwɔ kɛ bɛtua la, bɛdua; bɛdua bɛ maanle adwule ngakyile ne mɔ amuala, bɛbu mgbanyima ne mɔ na bɛli bɛ muala eni.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 5:14

Ɔluakɛ mɛla ne amuala, bɛbɔ ye kpɔkɛ ko bɛmaa yɛ kɛ, “Kulo ɛ gɔnwo kɛ ɛdawɔ mumua ne ɛ nwo.”

Kɔlɔ 3:14

Na bɛva ɛhulolɛ bɛboka ɛhye mɔ anwo, na yemɔ yɛɛ kɛmaa bɛkɛli munli a.

1 Tem 1:5

Bodane mɔɔ yɛ ngilehilelɛ ɛdeɛ ne gyi zolɛ la a le ɛhulolɛ mɔɔ vi ahonle mɔɔ ɛtane ɛnle nu, adwenle mɔɔ nuhua te wienyi, nee diedi mɔɔ di munli la.

Gyemise Kɛlata ne 2:8

Saa bɛdi Belemgbunlililɛ ne anwo mɛla ne, mɔɔ Nyamenle Edwɛkɛ ne se la kɛ, “Kulo ɛ gɔnwo kɛ ɛdawɔ ɛ nwo” la azo a, ɛnee bɛlua nɔhalɛ adenle ne anu.

1 Dw 3:10

Ngakyile mɔɔ wɔ bɛdabɛ mɔɔ bɛle Nyamenle amra nee bɛdabɛ mɔɔ bɛle Abɔnsam amra la avinli la ɛne: awie biala mɔɔ ɛmbɔ ɛbɛla kpalɛ anzɛɛ ɛngulo ɔ diema la ɛnle Nyamenle ara.