Wulo 13:12 - BAEBOLO ANZƐƐ BULUKU NWUANZANWUANZA

¹² Aledwolɛ ne asɛɛ ɛze, alehyenlɛ ɛbikye; zɔhane ati bɛmaa yɛgyakyi awozinli nu nyɛleɛ ne mɔ, na yɛva wienyi nu konle tɛladeɛ mɔɔ bamaa yɛahola ko la yɛwula.

Wulo 13:12 ပူးပေါင်းရင်းမြစ်များ

Sɔlɔmɔn Edwɛne 2:17

Sia ɛ nzi, me kulovokpa, maa ɛ nwo ɛyɛ ndɛ kɛ Bitɛ awoka zo kɛtɛboɛ anzɛɛ weɛlɛ, kolaa na mangyee ne azi, na maanle nu atete.

Ayezaya Buluku ne 2:20

Mekɛ ne anu menli bavuandi bɛ dwɛtɛ fufule nee ezukoa nvutuke mmonle ne mɔ mɔɔ bɛyɛ bɛmaa bɛ nwo na bɛsonle bɛ la agua. Bɛbagyakyi bɛ bɛamaa abotokila nee akpanlɛ ne mɔ.

Ayezaya Buluku ne 30:22

Akee bɛbazɛkye bɛ dwɛtɛ fufule nee bɛ ezukoa nvutuke ananze ne mɔ. Bɛbavuandi bɛ bɛagua kɛ bɛle ninyɛne mɔɔ nwolɛ ɛnde a, na bɛaha ye kɛ, “Bɛhɔ.”

Wulo 13:14

Na bɛva Awulae Kelaese bɛyɛ konle tɛladeɛ bɛwula, na bɛzi nwonane nu adwenle ɛvalɛ nee ye atiakunluwɔzo aze.

1 Kɔl 10:11

Ninyɛne ɛhye mɔ sisile bɛ nwo zo, amaa yeayɛ kɔkɔbɔlɛ yeamaa awie mɔ, yɛɛ bɛhɛlɛle kɛ bɛfa bɛahilehile yɛ, ɔluakɛ ewiade ne awieleɛ mekɛ a yɛwɔ nu la.

1 Kɔl 7:29

Mediema, mɔɔ mekpondɛ meaha la a le ɛhye: mekɛ ne ɛwie, na ɔvi ɛnɛ mɔɔ kɔ la, kunlima ɛdɛnla kɛ bɛngya mraalɛ;

2 Kɔl 10:4

Tɛ ewiade konle ninyɛne a yɛfa yɛko a; Nyamenle konle ninyɛne mɔɔ tumi wɔ nu la a yɛfa yɛbubu aranemgbole ne mɔ a. Yɛsɛkye kpolerazulɛ mgbane mgbane;

2 Kɔl 6:7

yɛ nɔhalɛ nrɛlaleɛ ne, nee Nyamenle tumi ne azo yɛla yɛ nwo ali yɛhile kɛ yɛle Nyamenle sonvolɛma. Pɛlepɛlelilɛ a le yɛ konle dadeɛ mɔɔ yɛfa yɛko na yɛfa yɛpepɛ yɛdie yɛ nwo a.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 4:22

Zɔhane ati, bɛdu bɛ su dɛba ne mɔɔ manle bɛbɔle ɛbɛla mɔɔ bɛdabɛ bɛkulo na ɔvale ye atiakunluwɔzo ɛtane ne ɔzɛkyele bɛ la bɛgua.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:11

Bɛmmayɛ awozinli nu nyɛleɛ mgbane mgbane ne mɔ mɔɔ menli yɛ na nvasoɛ ɛnle zolɛ la bie. Bɛnwu bie a anrɛɛ bɛha bɛdo gua.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:8

Dɛba ne ɛnee bɛwɔ awozinli nu, na ɛnɛ bɛyɛ Awulae menli; ɛhye ati bɛwɔ wienyi nu. Ɔwɔ kɛ bɛbɔ bɛ ɛbɛla kɛ menli mɔɔ wɔ wienyi nu la.

Kɛlata mɔɔ bɛhɛlɛle bɛhɔmanle Hibuluma la 10:25

Bɛmmamaa yɛgyakyi kɛ yɛkɛhɔ yɛ nyianu ne, kɛmɔ bie mɔ yɛ la. Bɛdabɛ bɛkola bɛnwu kɛ Awulae Kenle ne ɛbikye, yemɔti bɛmaa yɛsosɔ yɛ nwo ngoko ngoko.

Kɛlata mɔɔ bɛhɛlɛle bɛhɔmanle Hibuluma la 12:1

Zɔhane ati, kɛmɔ yɛlɛ dasevolɛma pemgbenleamgbe ɛhye mɔ mɔɔ ɛbɔ yɛ nwo mgbɔlɔka ɛyia la, bɛmaa yɛye debie biala mɔɔ si yɛ aze, nee ɛtane mɔɔ ɛgya yɛ la ali, na yɛmia yɛ nwo kpalɛ yɛnlea ɛnriandilɛ ne mɔɔ gyi yɛ nyunlu la.

Gyemise Kɛlata ne 1:21

Yemɔti bɛvuandi subane ɛtane nee nyɛleɛ ɛtane kɔsɔɔti bɛgua na bɛdo bɛ nwo aze bɛmaa Nyamenle, bɛlie edwɛkɛ ne mɔɔ yelua ye wɔ bɛ ahonle nu la bɛdo nu, na yemɔ yɛɛ ɔkola ɔdie bɛ ngoane a.

Gyemise Kɛlata ne 5:8

Bɛdabɛ noko ɔwɔ kɛ bɛsi abotane. Bɛmaa bɛ nye ɛla, ɔluakɛ Awulae ɛralɛ ne ɛbikye.

1 Pit 2:1

Zɔhane ati, bɛhwe bɛ nwo bɛvi ɛtane muala anwo; bɛmmabɔ adalɛ, bɛmmayɛ ngunzi, bɛmmatwe nungule, bɛmmayɛ aholoba.

1 Pit 4:7

Ninyɛne kɔsɔɔti awieleɛ ɛbikye. Ɛhye ati bɛzɔ bɛ nwo kpalɛ na bɛyɛ bɛ nye gyɛlɛmgbɛɛnye, na bɛahola bɛayɛ nzɛlɛlɛ.

2 Pit 3:11

Na saa bɛbazɛkye ewiade ye amuala wɔ adenle zɛhae anu a, ɛnee bɛdabɛ bɛnea a duzu menli a ɔwɔ kɛ bɛyɛ a? Ɔwɔ kɛ bɛyɛ menli mɔɔ bɛ ɛbɛla nwo te saanwu na bɛtu bɛ nwo bɛmaa Nyamenle,

2 Pit 3:9

Tɛ kɛ Awulae ɛngola ye ɛwɔkɛ mɔɔ yebɔ la azo di, kɛmɔ bɛ bie mɔ dwenle kɛ ɔde la, na yemɔ a le kɛ Awulae lɛ bɛ nwo abotane, ɔluakɛ ɔngulo kɛ bɛsɛkye awie biala. Ɔkpondɛ kɛ awie biala nu ɔ nwo na ɔtwe ɔ nwo ɔfi ye ɛtane ne mɔ anwo.

1 Dw 2:18

Me mra ngakula, awieleɛ mekɛ ne ɛbikye! Bɛde ye dɛba kɛ Kelaese Kpɔvolɛ ne mɔɔ bayɛ ɔ nwo kɛ yemɔ a ɔle Kelaese ne la bara, na kɛkala bɔbɔ, Kelaese kpɔvolɛma dɔɔnwo ɛye bɛ nyunlu, yemɔti yɛnwu kɛ awieleɛ mekɛ ne ala ɛne.

Yekile 1:3

Nyilalɛ ɛha sonla ne mɔɔ kɛkpogya ɔ ne zo kɛgenga Nyamenle nrɛlaleɛ ɛhye kɛhile awie mɔ la, yɛɛ nyilalɛ ɛha bɛdabɛ noko mɔɔ bɛkɛdie na bɛkɛva mɔɔ wɔ nu la bɛkɛzie na bɛkɛli zolɛ la! Ɔluakɛ mekɛ mɔɔ ɛhye mɔ basisi la ɛbikye.

Yekile 22:10

Eza ɔzele me kɛ, “Mmafa Nyamenle edwɛkɛ ne mɔɔ wɔ buluku ɛhye anu la ɛfea, ɔluakɛ mekɛ mɔɔ ɛha na ɛhye azi la le ekyi.