Sɔlɔmɔn Edwɛne 5:15 - BAEBOLO ANZƐƐ BULUKU NWUANZANWUANZA

¹⁵ Ye ɛzɔlɛ le kɛ alabaseta adoba mɔɔ gyigyi ezukoa nvutuke zo. Ɔgyi zo sengɔɔnwo kɛ Lɛbanɔn awoka nee sida mbaka.

Sɔlɔmɔn Edwɛne 5:15 ပူးပေါင်းရင်းမြစ်များ

1 Arl 4:33

Ɔhanle mbaka nwo edwɛkɛ, ɔvi Lɛbanɔn sida baka nwo zo ɔkɔkpula nyinlanyinla mɔɔ fifi bane nwo la anwo edwɛkɛ. Ɔhanle nane, nloma, nee nane mɔɔ twenle bɛ nwo aze la nee fɛlɛ nwo edwɛkɛ.

Edwɛndolɛ Buluku ne 80:10

Ye alubo hedale awoka ne mɔ azo, ɔvale ye ngane ɔguale sida mbaka mgbole zo;

Edwɛndolɛ Buluku ne 92:12

Tenlenema bakpazi kɛ mrɛlɛ, na bɛanyi kɛ Lɛbanɔn sida mbaka.

Edwɛndolɛ Buluku ne 92:13

Bɛlua bɛ wɔ Ɛdɛnkɛma awuke nu, bɛnyi buzubuzu wɔ Nyamenle alienwo ɛkɛ.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 26:19

fa dwɛtɛ fufule yɛ adiabo abulanla na fa felɛmo ne mɔ siezie zolɛ, felɛmo ko biala ɛdeɛ nwiɔ, na maa bɛsosɔ felɛmo ne mɔ asa ne mɔ.

Sɔlɔmɔn Edwɛne 2:14

Ɛle kɛ abubule mɔɔ vea bodane mɔɔ ɛkpuke la avinli. Maa menwu ɛ nyunlu kɛnlɛma ne, na mende ɛ ne fɛlɛko ne, ɔluakɛ ɛ ne yɛ fɛ, yɛɛ ɛ nyunlu le kɛnlɛma.

Sɔlɔmɔn Edwɛne 4:11

Me atɔfolɛ raalɛ, ɛ nloa anwo fɛlɛko le kɛ ndotolo nu nzule fɛlɛko, wolɛ nee meleke wɔ ɛ tafinlima abo; wɔ adɛladeɛ nu evuanlɛ le kɛ evuanlɛ mɔɔ vi Lɛbanɔn.

Sɔlɔmɔn Edwɛne 7:4

Ɛ kɔme le kɛ ɛzɛlɛ tawa. Ɛ nye le kɛ suakpole Hɛhyebɔn nzubula ne mɔ mɔɔ zua suakpole ne anlenkɛ kpole ne la. Ɛ bonyi le hwɛɛnye kɛ Lɛbanɔn tawa mɔɔ ɛ gyi zo a ɛnwu Dɛmasekɛse la.

Gyɛlɛmaya Awolɛyelɛ 4:7

Ɛnee yɛ arelemgbunli anwo te tɛla ezukɔtweaba nee nyɛfonzule, bɛnyi ngɛnlɛma, bɛ nwo yɛ se; bɛ ngɛnlɛma le kɛ ezukoa bolɛ safaya.

Yizikeɛle Buluku ne 17:23

wɔ Yizilayɛ awoka ndendenle ne mɔ anu. Ɔbakpakye ngane na yeazo ma, na yeayɛ sida baka kɛnlɛma kpalɛ. Nane ngakyile kɔsɔɔti baradɛnla ɔ bo; nloma ngakyile kɔsɔɔti baradɛnla ye ngane ne mɔ anu, na bɛayɛ bɛ sane wɔ ɛkɛ.

Yizikeɛle Buluku ne 31:8

Sida mbaka mɔɔ wɔ Nyamenle tola ne anu la nee ye ɛnzu kɛnlɛma, yɛɛ bolonyia baka nee ye ngane mgbole ɛnzɛ. Baka biala ngane nee ye ɛdeɛ ne ɛnzɛ, yɛɛ baka biala ɛnle Nyamenle tola ne anu mɔɔ nee ye sɛ kɛnlɛma a.

Hozia Buluku ne 14:7

Bɛbazia bɛaradɛnla me alubo ne anu. Bɛbakpazi kɛ tola nu aleɛ; bɛbabua kɛ vanye mbaka, na bɛ evuanlɛ bayɛ kɛ Lɛbanɔn nwanye evuanlɛ la.

Zɛkalaya Buluku ne 9:17

Ɛhɛe, azɛlɛ ne bayɛ kpalɛ, ayɛ kɛnlɛma! Zolɛ abɛlɛ nee nwanye fofolɛ bamaa zolɛ mgbavolɛ nee mbɛlɛra anyia anwosesebɛ.

Edwɛkpa ne kɛmɔ Mateyu hɛlɛle la 17:2

Na Gyisɛse hakyile wɔ bɛ nye zo; ɔ nyunlu dale kɛ sɛnzɛne na ye tɛladeɛ ne yɛle fufule nwohyee na ɔdale kɛ neanleɛ.

Edwɛkpa ne kɛmɔ Mateyu hɛlɛle la 28:3

Ye ɛralɛ ne yɛle kɛ ɛsɛnlɛmanye mɔɔ ɛkpakye la, na ye tɛladeɛ ne dale nwohyee kɛ ezukɔtweaba.

Ɛzoanvolɛma Gyima ne 2:28

Wɔhile me ngoane adenle ne, na medi fɛlɛko kɛ ɛ nee me lua.’

1 Tem 3:16

Yɛka yɛto gua kɛ nɔhalɛ, awozinli nu debie mɔɔ wɔ yɛ nyamenlezonlenlɛ ne anu la yɛ nwanwane: Ɔrale ewiade kɛ sonla, noko Sunsum nu a ɔle saanwu. Nyamenle soanvolɛma nwunle ye, bɛbɔle ɔ nwo nolo wɔ maanle maanle kɔsɔɔti anu. Ewiade amra amuala liele ye lile, na bɛvale ye bɛhɔle anwuma anyu

Maanlebuvolɛma Buluku ne 13:6

Raalɛ ne rabɔle ɔ hu amaneɛ kɛ, “Nyamenle sonla ɛye ɔ nwo ɛhile me. Ɔ nwo yɛ ɛzulolɛ na ɔ nyunlu zɔho Nyamenle soanvolɛ. Meambiza ye ɛleka mɔɔ ɔvi la, yɛɛ ɔdaye noko yeambɔ ye duma yeangile me.