Sɔlɔmɔn Edwɛne 3:4 - BAEBOLO ANZƐƐ BULUKU NWUANZANWUANZA

⁴ Mevi bɛ nwo ɛkɛ ne ala la, menwunle me kulovolɛ ne. Menzɔle ye kɛ menrɛmaa ɔnrɛhɔ, kɔkpula kɛ me nee ye ɛhɔ ɔmɔ sua nu, ekpumgbunli ne mɔɔ bɛwole me nu la anu.

Sɔlɔmɔn Edwɛne 3:4 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 32:26

Akee ɔzele Gyekɔbo kɛ, “Gyakyi me maa mengɔ, na aleɛ ɛlɛkye.” Gyekɔbo hanle kɛ, “Menrɛgyakyi wɔ menrɛmaa ɛnrɛhɔ, kyesɛ ɛyila me.”

Mrɛlɛbulɛ Buluku ne 4:13

Sɔ folɛdulɛ nu boɛ, mmagyakyi nuhua, sie ye boɛ, ɔluakɛ yemɔ azo yɛɛ wɔ ngoane gyi a.

Mrɛlɛbulɛ Buluku ne 8:17

Mekulo bɛdabɛ mɔɔ bɛkulo me la, yɛɛ bɛdabɛ mɔɔ bɛ nye bolo bɛkpondɛ me la nwu me.

Sɔlɔmɔn Edwɛne 1:7

Me kulovolɛ, ka kile me, nienwu a ɛbava wɔ nyɛmoa wɔahɔ adidi a? Ɔdwu sɛnzɛnegyinla a nienwu a bɛbalie bɛ ɛnwomenle a? Duzu ati a ɔwɔ kɛ mekpɔsa mekpondɛ wɔ wɔ ɛ gɔnwo mɔ nyɛmoa avinli a?

Sɔlɔmɔn Edwɛne 6:12

Me nye zo katete me la ɛnee ɛhulolɛ ngome ɛmaa meyɛ kɛ mede belemgbunli ehwili nu wɔ ɔ nwo ɛkɛ.

Sɔlɔmɔn Edwɛne 7:5

Ɛ ti kɛnlɛma le kɛ Kamɛle Boka. Ɛ ti mɔɔ bɛnwa la ta kɛ selekye; ye kɛnlɛma maa debie tɔ belemgbunli nwo zo.

Sɔlɔmɔn Edwɛne 8:2

Anrɛɛ me nee wɔ kɛhɔ ɔmɔ mɔɔ nrenzɛle wole me la sua nu, na wɔahile me ɛhulolɛ deɛ holɛ. Anrɛɛ menwɔmaa ɛkɛnlo nwanye mɔɔ ninyɛne evuanlɛ wɔ nu la, me ma ne mɔɔ le kɛ akutue la anu nza.

Ayezaya Buluku ne 45:19

Meanga ye fealera nu, wɔ awozinli azɛlɛ bie azo; meanga meangile Gyekɔbo abo zo amra kɛ, ‘Bɛva basabasayɛlɛ bɛkpondɛ me bo zo.’ Medame Ɛdɛnkɛma, meka nɔhalɛ ne, meka mɔɔ le nɔhalɛ la meto gua.”

Gyɛlɛmaya Buluku ne 29:13

Bɛbakpondɛ me, na bɛbanwu me. Saa bɛfa bɛ ahonle muala bɛkpondɛ me a, bɛbanwu me.

Gyɛlɛmaya Awolɛyelɛ 3:25

Ɛdɛnkɛma le kpalɛ maa bɛdabɛ mɔɔ bɛsonle ye la, ɔle kpalɛ ɔmaa ɛkɛla mɔɔ kpondɛ ye la.

Edwɛkpa ne kɛmɔ Mateyu hɛlɛle la 28:9

Arɛlevilɛ nu ala Gyisɛse nee bɛ yiale adenle ne anu na ɔzele bɛ kɛ, “Anzonudwolɛ ɛha bɛ.” Bɛrale ɔ nwo ɛkɛ ne, bɛzɔle ɔ gyakɛ na bɛzonlenle ye.

Edwɛkpa ne kɛmɔ Mateyu hɛlɛle la 7:7

“Bɛbiza na bɛ sa kɛha ye; bɛkpondɛ na bɛkɛnwu ye; bɛbɔ nu na bɛkɛbuke bɛ.

Wulo 8:35

Nwane a kɛhola kɛhwe yɛ kɛvi Kelaese ɛhulolɛ ne anwo a? Amaneɛnwunlɛ anzɛɛ anwongyelelɛ, kpɔdekpɔdeyɛlɛ anzɛɛ ɛhɔne, ehyia, anwubɛnyunlu anzɛɛ ewule?

Wulo 8:39

yɛɛ tumi anzɛɛ debie biala ɛnle ewiade ye anu, anwuma anzɛɛ azɛlɛ ti anu, anzɛɛ ewiade ye anu debie biala ɛnle ɛkɛ mɔɔ kɛhola kɛkpɔkye yɛ kɛvi Nyamenle ɛhulolɛ ne mɔɔ ɔlua yɛ Awulae Kelaese Gyisɛse anwo zo yɛnyia ye la anwo.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 4:26

Na suakpole Gyɛlusalɛm kpalɛ ne mɔɔ wɔ anwuma la ɛnle akɛlɛ ɛzonlenlɛ bo. Yemɔ ɔle dehelɛ, na ɔle yɛ sua zo kpalɛ nee yɛ nli.