Sɛlɛ 4:32 - BAEBOLO ANZƐƐ BULUKU NWUANZANWUANZA

³² “Saa ahenle fa boane ralɛ ara kɛ ɛtane azubɔdeɛ a, ɔwɔ kɛ ɔfa belɛ mɔɔ anwo ɛnlɛ dɛne la.

Sɛlɛ 4:32 ပူးပေါင်းရင်းမြစ်များ

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 12:3

Ka kile Yizilayɛma ɛlɔne ne amuala kɛ siane ɛhye, ye kenle mɔɔ tɔ zolɛ bulu la, nrenya biala nee ye awuke nu amra ɛva boane anzɛɛ abɔnkye ralɛ ko.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 12:5

Ɔwɔ kɛ boane ne anzɛɛ abɔnkye ne yɛ nyinli mɔɔ anwo ɛnlɛ dɛne na yeli ɛvolɛ ko ala la.

Ayezaya Buluku ne 53:7

Bɛsisile ye, na bɛhilele ye nyane, noko yeambuke ɔ nloa; ɔle kɛ boane ralɛ mɔɔ bɛ nee ye ɛlɛkɔ ahunleɛ, yɛɛ ɔle kɛ boane mɔɔ bɛhye ye bɛlɛpepɛ ɔ nwo enrinli la. Ɔdɔle mumule, yeambuke ɔ nloa.

Sɛlɛ 1:3

Saa ɔfa ɛnlankɛ yeabɔ ɛyelalɛ azu a, ɔwɔ kɛ ɔfa nyinli mɔɔ anwo ɛnlɛ dɛne la. Ɔwɔ kɛ ɔfa ɔbagyinla Ɛdɛnkɛma Ndanlɛ Sua ne anuhɔlɛ ne, amaa Ɛdɛnkɛma alie ɔdaye mumua ne ado nu.

Sɛlɛ 4:28

na saa bɛmaa ɔnwu ye ɛtane ne mɔɔ yeyɛ la a, ɔwɔ kɛ ɔfa abɔnkye belɛ mɔɔ anwo ɛnlɛ dɛne la ɔbabɔ azu wɔ ye ɛtane ne mɔɔ yeyɛ la anwo.

Sɛlɛ 5:6

na ɔfa fɔlɛlilɛ azubɔdeɛ ɔbɛlɛ Ɛdɛnkɛma wɔ ɛtane ne mɔɔ yeyɛ la anwo. Ɔwɔ kɛ ɔfa boane ralɛ belɛ anzɛɛ abɔnkye belɛ ɔyɛ ɛtane azubɔdeɛ, na sɛlɛvolɛ ne yɛ nzɛlɛlɛ di ɔ ti mgbɔdalɛ wɔ ye ɛtane ne anwo.

Edwɛkpa ne kɛmɔ Luku hɛlɛle la 1:35

Nyamenle soanvolɛ ne buale ye kɛ, “Sunsum Nwuanzanwuanza ne bara ɛ nwo zo, na Nyamenle tumi ne baheda ɛ nwo zo. Ɛhye ati bɛbavɛlɛ kakula ne Nwuanzanwuanza, yɛɛ Nyamenle Ara.

Dw 1:29

Aleɛ hyenle la Dwɔn nwunle kɛ Gyisɛse ɛlɛba ɛleka mɔɔ ɔwɔ la na ɔhanle kɛ, “Bɛnlea, Nyamenle Boaneralɛ ne mɔɔ ɔbava yeabɔ azu yeaye ewiade amra ɛtane yeahɔ la ɛne!

Dw 1:36

na bɛnwunle kɛ Gyisɛse ɛlɛse. Na Dwɔn hanle kɛ, “Bɛnlea, Nyamenle Boaneralɛ ne ɛne!”

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:27

amaa yeava asɔne ne kɛnlɛma gyɛlɛɛnye yeamaa ɔ nwo, mɔɔ nwolɛ ɛtɛkpɔdele, evinli biala ɛnle nwolɛ, yɛɛ nvonleɛ biala ɛnle nwolɛ na nwolɛ te nwuanzaanwu a.

Kɛlata mɔɔ bɛhɛlɛle bɛhɔmanle Hibuluma la 7:26

Sɛlɛvolɛ Kpanyinli mɔɔ le zɛhae la yɛɛ kola sɔ yɛ wɔ yɛ ɛhyianlɛ biala anu a, ɔluakɛ ɔle nwuanzanwuanza; ɛtane biala ɛnle ɔ nwo anzɛɛ ye nu. Bɛye ye bɛzie ahane bɛvi ɛtanevolɛma anu na bɛmaa ye zo bɛhɔ anwuma.

Kɛlata mɔɔ bɛhɛlɛle bɛhɔmanle Hibuluma la 9:14

Kɛmɔ ɛhye le nɔhalɛ la, ɛnee ɛnea a ɛkɛnwu kɛ Kelaese mogya ne kola di gyima kpole maa ɔbo zolɛ. Yelua Sunsum ne mɔɔ ɛnwu ɛlɛ la azo yeva ɔ nwo yebɔ azu mɔɔ di munli la yemaa Nyamenle. Ye mogya ne bade yɛ adwenle nu avi nyɛleɛ mgbane mgbane mɔɔ fa yɛ kɔ ewule nu la anwo na yɛazonle tease Nyamenle ne.

1 Pit 2:22

Yeanyɛ ɛtane biala, yɛɛ yeambɔ adalɛ yeangile awie biala.

1 Pit 2:24

Kelaese ɔdaye mumua ne ɔliele yɛ ɛtane ne mɔ wɔ ye sonlabaka ne anu ɔhɔle meanubaka ne azo, amaa yɛawu yɛamaa ɛtane na yɛadɛnla yɛamaa pɛlepɛlelilɛ. Bɛlua ye ɛbodalɛ nganlɛ ne mɔ azo a bɛyɛ bɛ ayile a.

1 Pit 3:18

Ɔluakɛ Kelaese mumua ne wule kokye wɔ awie biala ɛtane ti. Ɔle sonlakpalɛ, noko ɔwule ɔmanle ɛtanevolɛma, amaa yealie yɛ yeahɔmaa Nyamenle. Bɛhunle ye wɔ nwonane nu, noko bɛdwazole ye wɔ sunsum nu,

Yekile 5:6

Na menwunle kɛ Boaneralɛ ne gyi belemgbunli ebia ne mɔɔ tease abɔdeɛ nna ne nee mgbanyima ne mɔ ɛbɔ ɛyia ye la anyunlu. Ɔzɔho Boaneralɛ ne mɔɔ bɛhu ye la. Ɔlɛ mɛne nsuu yɛɛ ɛnyelɛ nsuu, mɔɔ le Nyamenle Sunsum nsuu ne, mɔɔ bɛzoanle bɛ wɔ ewiade ye amuala anu la.