Saa bɛlɛdielie ngyɛnu bulu ɛkpɔ ngoko ne mɔ a, ɔwɔ kɛ sɛlɛvolɛma mɔɔ le Aalɔn abo zo amra la nee Livaema dua nwolɛ, yɛɛ ɔwɔ kɛ Livaema fa Ɛzonlenlɛ Sua ne anu ngyɛnu bulu ɛkpɔ ko ne kɔsie Ɛzonlenlɛ sua ne ninyɛnezielɛ ɛleka ne.
Ɛhye le kpɔkɛ mɔɔ mebɔ mɔɔ menrɛhakyi ye ɛlɛ a. Saa me menli ne fa anzonudwolɛ azubɔdeɛ ne mɔ ba a, bɛ kɛnrazo ne nee bɛ ɛzɔlɛ ne mɔ le sɛlɛvolɛma ne mɔ ɛdeɛ. Ɔle menli ne ahyɛlɛdeɛ ɔmaa medame, Ɛdɛnkɛma.
Ma ngakyile mɔɔ bɛkɛlumua bɛkɛde anzɛɛ bɛkɛbu, yɛɛ menli ne azubɔdeɛ ngakyile ne mɔ amuala le sɛlɛvolɛma ne ɛdeɛ. Eza ɔwɔ kɛ bɛfa bɛ mɛtɛkɛ mɔɔ lumua la bɛbɛlɛ sɛlɛvolɛma ne, amaa nyilalɛ aha bɛ awuke ne mɔ.
Mekɛ ne anu ɔnle kɛ bɛdi kpanwo anzɛɛ ma ngyehye, ma amolɛ anzɛɛ ma ndondo, kɔkpula mekɛ mɔɔ bɛkɛva bɛ azubɔdeɛ ne mɔ bɛkɛrɛlɛ Ɛdɛnkɛma la. Ɛhye le mɛla maa bɛ wɔ awolɛndoazo kɔsɔɔti anu wɔ ɛleka biala mɔɔ bɛwɔ la.
“Ka kile Livaema kɛ saa bɛ sa ka Yizilayɛma ngyɛnu bulu ɛkpɔ ngoko ne mɔ mɔɔ Ɛdɛnkɛma se ɔle bɛ ɛdeɛ la a, bɛdabɛ noko bɛhyɛ nu bulu bɛdu ɛkpɔ ko bɛyɛ azubɔdeɛ bɛmaa Ɛdɛnkɛma kɛ ahyɛlɛdeɛ mɔɔ sonle bolɛ la.