Edwɛkpa ne kɛmɔ Mateyu hɛlɛle la 10:18 - BAEBOLO ANZƐƐ BULUKU NWUANZANWUANZA

¹⁸ yɛɛ eza bɛbahwe bɛ bɛahɔ maanle mgbanyima nee arelemgbunli nyunlu wɔ me ti, na bɛabɔ Edwɛkpa ne nolo bɛahile bɛ nee bɛdabɛ mɔɔ bɛnle Dwuuma la.

Edwɛkpa ne kɛmɔ Mateyu hɛlɛle la 10:18 ပူးပေါင်းရင်းမြစ်များ

Edwɛndolɛ Buluku ne 119:46

Mebabɔ wɔ mɛla ne mɔ nolo meahile arelemgbunli, menrɛze nwolɛ nyiane,

Edwɛkpa ne kɛmɔ Mateyu hɛlɛle la 10:17

Bɛnlea bɛ nwo boɛ wɔ menli sa nu, ɔluakɛ bɛbahye bɛ bɛ nee bɛ ahɔ kɔɔto; bɛbabila bɛ empele wɔ bɛ nyianu azua ne mɔ anu,

Edwɛkpa ne kɛmɔ Mateyu hɛlɛle la 10:19

Saa bɛfa bɛ bɛkɔ kɛ bɛli bɛ edwɛkɛ a, bɛmmadwenle mɔɔ bɛbaha la anwo anzɛɛ kɛ bɛbazi bɛaha ye la anwo; saa mekɛ ne dwu a, bɛbava mɔɔ bɛbaha la bɛamaa bɛ.

Edwɛkpa ne kɛmɔ Mateyu hɛlɛle la 8:4

Na Gyisɛse bɔle ɔ nloa kɛ, “Nea, mmabɔ zo ɛkile awie biala. Kɔ na kɔva ɛ nwo kile sɛlɛvolɛ ne maa ɔnleɛnlea ɛ nwo, na bɔ azu ne mɔɔ Mosisi hyehyɛle dole ɛkɛ ne la maa awie biala ɛnwu kɛ ɛ nwo ɛza.”

Edwɛkpa ne kɛmɔ Maake hɛlɛle la 13:9

“Na bɛmɛ, bɛnlea bɛ nwo boɛ kpalɛ. Bɛbahye bɛ bɛahɔ kɔɔto. Bɛbabo bɛ wɔ nyianu azua ne mɔ anu; ɔlua me ti, bɛbagyinla mgbanyima nee arelemgbunli nyunlu na bɛaha Edwɛkpa ne bɛahile bɛ.

2 Tem 1:8

Mmamaa Awulae anwo daselɛlilɛ yɛ wɔ nyiane; yɛɛ mmamaa medame noko mɔɔ Kelaese ati mela efiade la me nwo yɛ wɔ nyiane. Ɛdawɔ dua anwosesebɛ ne mɔɔ Nyamenle ɛva ɛmaa wɔ la azo nwu Edwɛkpa ne anwo amaneɛ ne bie.

Yekile 1:9

Mame a mele bɛ diema Dwɔn. Kelaese ati yɛ muala yɛle ko na yɛlɛ abotane yɛlɛnwu amaneɛ mɔɔ kile kɛ yɛ nwo fɛta ye Belemgbunlililɛ ne a. Bɛvale me bɛradole bɔra ye mɔɔ bɛfɛlɛ ye Patemɔso la azo, ɔluakɛ membɔle Nyamenle edwɛkɛ ne nee nɔhalɛ ne mɔɔ Gyisɛse yele hilele la nolo.

Yekile 11:7

Saa bɛwie nrɛlaleɛ ne ka a, nane ne mɔɔ vi azɛlɛ kuma ne mɔɔ ɛnlɛ ɔ bo la anu la bavinde na ɔ nee bɛ araho. Ɔbali bɛ nwo zo konim na yeahu bɛ,

Yekile 6:9

Boaneralɛ ne eza wayele ɛyɛlɛ ne mɔɔ tɔ zolɛ nnu la. Na menwunle kɛ bɛdabɛ mɔɔ Nyamenle edwɛkɛ ne ati, nee bɛdabɛ mɔɔ bɛlile daselɛ nɔhalɛ nu la ati bɛhu bɛ la ɛkɛla ne mɔ dede azukponle ne abo.