Edwɛkpa ne kɛmɔ Luku hɛlɛle la 1:8 - BAEBOLO ANZƐƐ BULUKU NWUANZANWUANZA

⁸ Kenle ko bie, ɛnee Zɛkalaya sɛlɛvolɛ ekpunli ne a yɛ gyima a, na eza yedwu Zɛkalaya anwo zo wɔ bɛ dahudahu ɛzonlenlɛ gyima ne anu, na ɔlɛyɛ ye sɛlɛvolɛ gyima ne wɔ Nyamenle anyunlu.

Edwɛkpa ne kɛmɔ Luku hɛlɛle la 1:8 ပူးပေါင်းရင်းမြစ်များ

1 Edk 24:19

Bɛhɛlɛle ekpunli ɛhye mɔ ko biala duma nee nuhua menli ne aluma bɛwulale buluku nu na bɛhilele mekɛ mɔɔ ɔfa ɔkɔ gyima wɔ Ɛzonlenlɛ Sua ne anu ɔkɔyɛ ye ɛzonlenlɛ gyima ne, kɛmɔ bɛ nlenya Aalɔn luale Yizilayɛ Ɛdɛnkɛma Nyamenle ne mɛla zo hyehyɛle la.

1 Edk 24:2

Needabe nee Abaehu wule kolaa na bɛ ze awu, yɛɛ bɛangyakyi mralɛ nee nlɔnra. Yemɔti bɛ mediema Ɛlieza nee Yetamaa yɛle sɛlɛvolɛma.

2 Edk 11:14

Livaema vile ɛleka mɔɔ bɛdede la na bɛgyakyile bɛ nwo ninyɛne bɛrale Dwuda nee Gyɛlusalɛm, ɔboalekɛ Yizilayɛ Belemgbunli Gyɛlɔbowam nee ɔ bo zo amra yele bɛ gyima nu kɛ bɛnle Ɛdɛnkɛma sɛlɛvolɛma bieko.

2 Edk 31:19

Akee menli wɔ azuamgbole ne mɔ mɔɔ Aalɔn abo zo amra nee sɛlɛvolɛma ne bie mɔ dede zolɛ la azo; bɛmɛ a bɛnea na bɛfa aleɛ bɛkɔmaa nrenya biala mɔɔ boka sɛlɛvolɛma abusua ne nee awie biala mɔɔ bɛhɛlɛ ye duma bɛboka Livae mbusua ne mɔ anwo la a.

2 Edk 31:2

Belemgbunli Hɛzikaya ziale hyɛle sɛlɛvolɛma nee Livaema anu ekpunli ekpunli, yɛɛ ekpunli ko biala nee ye gyima. Bɛmɛ a le sɛlɛvolɛma nee Livaema mɔɔ nea ɛyelalɛ nee anzonudwolɛ azubɔlɛ ninyɛne zo, bɛdabɛ mɔɔ bɛsinza Ɛzonlenlɛ Sua ne nlenkɛ mgbole ne mɔ, yɛɛ bɛdabɛ mɔɔ bɛyɛ Nyamenle mo bɛaye ye ayɛlɛ la.

2 Edk 8:14

Kɛmɔ ɔ ze Devidi hyehyɛle la, Sɔlɔmɔn hyɛle sɛlɛvolɛma gyima ne manle bɛ. Eza ɔhyɛle Livaema ne mɔ mɔɔ bado ayɛlɛyelɛ edwɛne aboa sɛlɛvolɛma ne la gyima ne ɔmanle bɛ, kɛmɔ kenle ko biala gyima ne si de la. Ɔhyɛle nlenkɛ mgbole sinzavolɛma ɔmanle ekpunli ko biala nwunle nlenkɛ mgbole mɔɔ bɛbazinza la, kɛmɔ Nyamenle sonla Devidi hyehyɛle dole ɛkɛ ne la.

Ɛzela Buluku ne 6:18

Akee bɛhyɛle sɛlɛvolɛma gyima ne bɛmanle bɛ. Bɛhyɛle bɛ nu ekpunli ekpunli. Bɛyɛle Livaema noko zɔhane ala, kɛmɔ bɛhɛlɛ ye wɔ Mosisi buluku ne anu mɔɔ fane Nyamenle ɛzonlenlɛ gyima ne mɔɔ wɔ Gyɛlusalɛm la anwo la.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 28:1

“Akee maa ɛ diema Aalɔn nee ɔ mra mrenya ne mɔ, Needabe, Abaehu, Ɛlieza, yɛɛ Yetamaa ɛbikye wɔ na ye bɛ fi Yizilayɛma avinli sie ahane, amaa bɛanyia adenle bɛazonle me kɛ me sɛlɛvolɛma.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 28:41

Fa adɛladeɛ ɛhye mɔ kɔsɔɔti wulowula ɛ diema Aalɔn nee ɔ mra mrenya ne mɔ. Akee kpokpa bɛ nwole, wula bɛ sɛlɛvolɛ, tu bɛ maa medame Ɛdɛnkɛma maa bɛzonle me kɛ me sɛlɛvolɛma.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 29:1

“Akee mɔɔ ɛbayɛ wɔamaa Aalɔn nee ɔ mra mrenya ne mɔ na wɔadu bɛ wɔazie ahane wɔamaa me, wɔamaa bɛayɛ me sɛlɛvolɛma la ɛne: fa ɛnlankɛ nyinli edonraa ko nee mboane nyinli nwiɔ mɔɔ bɛ nwo ɛnlɛ dɛne la,

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 29:44

Mebade Ndanlɛ Sua ne nee azukponle ne anwo na meadu Aalɔn nee ɔ mra mrenya meazie ahane kɛ bɛle me sɛlɛvolɛma.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 29:9

wɔava akyeso ne mɔ wɔahye bɛ nze zo na wɔazoa bɛ ahyɛlɛ. Ɛnee kɛ ɛbazi wɔawula Aalɔn nee ɔ mra mrenya ne mɔ sɛlɛvolɛ la ɛne. Ɔwɔ kɛ bɛdabɛ nee bɛ bo zo amra sonle me kɛ sɛlɛvolɛma wɔ mekɛ mɔɔ ɛnlɛ awieleɛ.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 30:30

Kpokpa Aalɔn nee ɔ mra mrenya ne mɔ nwole na tu bɛ sie ɛkɛ maa me maa bɛzonle me kɛ bɛle me sɛlɛvolɛma.

Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 18:7

Na ɛdawɔ nee ɛ mra mrenya noko bayɛ bɛ sɛlɛvolɛ gyima ne mɔɔ fane azukponle ne nee Nwuanzanwuanza Nu Nwuanzaanwu ɛleka ne anwo la. Ɛhye mɔ le bɛ gyima, ɔboalekɛ meva sɛlɛvolɛlilɛ ne kɛ ahyɛlɛdeɛ la memaa bɛ. Awie gyɛne biala mɔɔ kɛbikye ninyɛne nwuanzanwuanza ne mɔ la, ɔwɔ kɛ bɛku ye.”

Edwɛkpa ne kɛmɔ Luku hɛlɛle la 1:5

Mekɛ mɔɔ Hɛlɔdo di belemgbunli wɔ Dwudiya maanle ne anu la, ɛnee sɛlɛvolɛ bie wɔ ɛkɛ, bɛfɛlɛ ye Zɛkalaya. Sɛlɛvolɛ ɛhye vi Abaegya sɛlɛvolɛma ekpunli ne anu. Bɛfɛlɛ ɔ ye Ɛlezabɛte. Ɔdaye noko ɔvi Sɛlɛvolɛ Kpanyinli ne mɔɔ lumua, mɔɔ bɛfɛlɛ ye Aalɔn la abusua nu.

Edwɛkpa ne kɛmɔ Luku hɛlɛle la 1:7

Bɛnlɛ ralɛ, ɔluakɛ ɛnee Ɛlezabɛte le mota, yɛɛ bɛ mu nwiɔ bɛwie mrelera yɛ.