Dwɔhyua Buluku ne 8:31 - BAEBOLO ANZƐƐ BULUKU NWUANZANWUANZA

³¹ Ɔyɛle ye kɛ mɔɔ Ɛdɛnkɛma sonvolɛ Mosisi hyehyɛle manle Yizilayɛma la. Ɔwɔ Mosisi mɛla ne anu kɛ ɔwɔ kɛ ɔyɛ “azukponle mɔɔ bɛva awolɛ mɔɔ bɛanva bulalɛ a bɛkpukekpukele la a bɛzile la.” Yemɔ azo yɛɛ bɛyelale nane ne bɛbɔle azu bɛmanle Ɛdɛnkɛma, na eza bɛbɔle anzonudwolɛ nwo azu a.

Dwɔhyua Buluku ne 8:31 ပူးပေါင်းရင်းမြစ်များ

2 Arl 14:6

Noko akee yeangu bɛ mra ne mɔ, na ɔlile Ɛdɛnkɛma mɛla ne mɔɔ ɔvale ɔmanle Mosisi la azo. Mɛla ne se; “Ɔnle kɛ awovolɛma ɛtane ti bɛku mralɛ; yɛɛ ɔnle kɛ mralɛ ɛtane ti bɛku awovolɛma. Awie biala ɔdaye ɔwɔ kɛ di ye ɛtane mɔɔ ɔkɛyɛ la anwo ɛzonle.”

2 Arl 22:8

Hyeefan vale belemgbunli ne nrɛlaleɛ ne hɔle na Helekaya hanle hilele Hyeefan kɛ, yenwu Mɛla Buluku ne wɔ Ɛzonlenlɛ Sua ne anu. Helekaya vale buluku ne manle Hyeefan gengale.

2 Edk 25:4

Noko yeanva ɔ sa yeanga bɛ mra ne mɔ, kɛmɔ bɛhɛlɛ ye wɔ Mosisi Mɛla Buluku ne anu la. Ɛdɛnkɛma zele kɛ, “Ɔnle kɛ selɛ biala wu wɔ ɔ ra ɛtane ti, anzɛɛ ralɛ wu wɔ ɔ ze ɛtane ti. Awie biala ɔwɔ kɛ wu wɔ ɔdaye ye ɛtane mɔɔ yeyɛ la ati.”

2 Edk 35:12

Akee bɛhyɛle nane ne mɔ mɔɔ bɛfa bɛabɔ ɛyelalɛ azu ne la bɛmanle menli ne, kɛmɔ bɛ mbusua ekpulike ekpulike ne mɔ de la, amaa bɛava bɛabɔ azu bɛamaa Ɛdɛnkɛma, kɛmɔ bɛhɛlɛ wɔ Mosisi Mɛla buluku ne anu la. Zɔhane ala noko yɛɛ bɛyɛle nlankɛ ne mɔ a.

Ɛzela Buluku ne 6:18

Akee bɛhyɛle sɛlɛvolɛma gyima ne bɛmanle bɛ. Bɛhyɛle bɛ nu ekpunli ekpunli. Bɛyɛle Livaema noko zɔhane ala, kɛmɔ bɛhɛlɛ ye wɔ Mosisi buluku ne anu mɔɔ fane Nyamenle ɛzonlenlɛ gyima ne mɔɔ wɔ Gyɛlusalɛm la anwo la.

Nihɛmaya Buluku ne 13:1

Kenle ko ne mɔɔ bɛlɛkenga Mosisi Mɛla ne bɛahile menli ne la, bɛradwule kpɔkɛ bie mɔɔ se ɔnle kɛ bɛmaa Amɔnonli anzɛɛ Mowabenli biala adenle bɛmaa ɔboka Nyamenle menli ne anwo la,

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 18:12

Na Mosisi aye ɔ ze Gyɛtulo bɔle ɛyelalɛ azu manle Ɛdɛnkɛma. Aalɔn nee Yizilayɛ mgbanyima ne mɔ amuala rale na bɛ nee Gyɛtulo ralile debie wɔ Nyamenle anyunlu.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 24:5

Na ɔzoanle Yizilayɛ mgbavolɛ ɔmanle bɛhɔbɔle ɛyelalɛ azu na bɛvale nlankɛ nyinli bɛbɔle anzonudwolɛ azu bɛmanle Ɛdɛnkɛma.

Edwɛkpa ne kɛmɔ Mateyu hɛlɛle la 12:26

Yemɔti saa Seetan ɔdaye noko ye belemgbunlililɛ ne anu ɛhyɛ nwiɔ, na bɛlɛko bɛatia bɛ nwo a, ɛnee ɔkile kɛ ɔnrɛgyinla.

Mɛla 27:2

Kenle mɔɔ bɛkɛpɛ bɛkɛhɔ Azule Dwɔdan ne anzi lɔ, azɛlɛ ne mɔɔ Ɛdɛnkɛma bɛ Nyamenle ne ɛlɛfa amaa bɛ la azo la, bɛva awolɛ mgbole, na bɛkokoa zolɛ bɛmaa ɔyɛ tonlotonlo.

Mɛla 27:8

Bɛhɛlɛ edwɛkɛ biala mɔɔ wɔ mɛla ne anu la wienyi bɛgua awolɛ ne mɔ azo.”

Dwɔhyua Buluku ne 1:8

Maa ɔyɛ wɔ gyima kɛ ɛkɛgenga Mɛla buluku ne dahuu wɔ bɛ ɛzonlenlɛ mekɛ biala anu. Dwenledwenle Mɛla ne anwo nɔɔzo nee ewiazo, na di mɔɔ bɛhɛlɛ ye nuhua la amuala azo. Ɛhye bamaa wɔ ɛbɛlabɔlɛ ne adenrɛ.