Mosisi Buluku ne mɔɔ lumua mɔɔ bɛfɛlɛ ye Mɔlebɛbo 1:1 - BAEBOLO ANZƐƐ BULUKU NWUANZANWUANZA

¹ Mɔlebɛbo ne Nyamenle bɔle anwuma nee aze.

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 1:1 ပူးပေါင်းရင်းမြစ်များ

2 Arl 19:15

Na ɔzɛlɛle kɛ, “O Ɛdɛnkɛma, Yizilayɛ Nyamenle mɔɔ ɛde wɔ Belemgbunli ebia nu wɔ abɔdeɛ ne mɔ mɔɔ lɛ ndɛbalɛ la azo anwuma a, ɛdawɔ ala a, ɛle Nyamenle mɔɔ sie arelemgbunli maanle maanle mɔɔ wɔ aleɛabo la a. Ɛdawɔ a ɛbɔle azɛlɛ ye nee anwuma a.

1 Edk 16:26

Maanle maanle kɔsɔɔti nyamenle ne mɔ le mmonle, noko Ɛdɛnkɛma a bɔle anwumaneamra a.

2 Edk 2:11

Taya Belemgbunli Helam hɛlɛle kɛlata hɔbuale Sɔlɔmɔn kɛ, “Kɛmɔ Ɛdɛnkɛma kulo ye menli ne la ati, yezie wɔ belemgbunli kɛ ɛnlea bɛ nwo zo.

Nihɛmaya Buluku ne 9:6

Na Yizilayɛma amuala yɛle nzɛlɛlɛ ɛhye: “Wɔmɔ Ɛdɛnkɛma, ɛ ngomekye ala yɛɛ ɛle Ɛdɛnkɛma a; wɔmɔ yɛɛ ɛbɔle anwuma nee anwomanyunlu nwɔlɔra a. Wɔmɔ yɛɛ ɛbɔle azɛlɛ nee zolɛ ninyɛne, nyevile nee nuhua ninyɛne a; wɔmɔ yɛɛ ɛmanle bɛ kɔsɔɔti ngoane a. Anwuma tumivolɛma kɔsɔɔti bɔ bɛ ti aze sonle wɔ.

Dwobu Buluku ne 26:13

Ɔvale ye ɛnwomenle ɔmanle anwomanyunlu dele wienyi; ɔvale ye tumi ne ɔhunle nyevile nu nane anwo ɛzulolɛ ne.

Dwobu Buluku ne 38:4

Mɔɔ mewula azɛlɛ ye adiabo aze la ɛnee ɛwɔ ni? Saa ɛse wɔ adwenle ɛdi, ɛlɛ ndelebɛbo a, ka kile me.

Dwobu Buluku ne 9:8

Ɔdaye ɔ ngome a ɔbɔle anwomanyunlu tɛtɛlɛ ye, na ɔtietiale nyevile azɛlɛkye zo a.

Edwɛndolɛ Buluku ne 102:25

Mɔmoane yɛɛ ɛwulale azɛlɛ ye adiabo aze a, yɛɛ anwumaneamra le ɛ sa anloa gyima.

Edwɛndolɛ Buluku ne 104:24

O Ɛdɛnkɛma, wɔ gyima ne mɔ zonle! Ɛvale nrɛlɛbɛ yɛɛ ɛbɔle bɛ muala a; wɔ abɔdeɛ ɛyi azɛlɛ ye tɛkɛɛ.

Edwɛndolɛ Buluku ne 104:30

Saa ɛmaa bɛ ɛnwomenle a, bɛlɛ ngoane; na ɛkakyi azɛlɛ ne anye fofolɛ.

Edwɛndolɛ Buluku ne 115:15

Ɛdɛnkɛma ɛyila bɛ, yemɔ mɔɔ ɔbɔle anwuma nee aze.

Edwɛndolɛ Buluku ne 121:2

Me moalɛ vi Ɛdɛnkɛma, mɔɔ bɔle anwuma nee aze la.

Edwɛndolɛ Buluku ne 124:8

Yɛ moalɛ vi Ɛdɛnkɛma mɔɔ bɔle anwuma nee aze la.

Edwɛndolɛ Buluku ne 134:3

Ɛdɛnkɛma ɛyila bɛ ɛvi Zayɔn, yemɔ mɔɔ ɔbɔle anwuma nee aze la!

Edwɛndolɛ Buluku ne 136:5

Yemɔ mɔɔ ɔvale ye nrɛlɛbɛ ɔbɔle anwuma la; ɔluakɛ ye ɛhulolɛ kpundii ne wɔ ɛkɛ dahuu.

Edwɛndolɛ Buluku ne 146:6

yemɔ mɔɔ ɔbɔle anwuma nee aze, nyevile nee mɔɔ wɔ nu la amuala la. Ɔdi ye ɛwɔkɛ zo dahuu.

Edwɛndolɛ Buluku ne 33:6

Ɛdɛnkɛma vale ɔ nloa bɔle anwuma, ɔvale ɔ nloa a ɔbɔle anwumaneamra a.

Edwɛndolɛ Buluku ne 33:9

Ɔluakɛ ɔdendɛle, na ɔyɛle zɔ; ɔzele, na ɔyɛle zɔ.

Edwɛndolɛ Buluku ne 8:3

Saa meto me nye anwomanyunlu, menwu ɛ sa anloa gyima, siane nee nwɔlɔra mɔɔ wɔhyehyɛ;

Edwɛndolɛ Buluku ne 8:4

ɛnee sonla le duzu mɔɔ ɛdwenle ɔ nwo a; sonla dasanli mɔɔ ɛ nye kuku ɔ nwo zɛhae a?

Edwɛndolɛ Buluku ne 90:2

Mekɛ mɔɔ ɛkabɔ awoka, anzɛɛ azɛlɛ ye nee ewiade ye la, ɔvi tete, mɔɔ kɔdwu mekɛ mɔɔ ɛnlɛ awieleɛ, ɛle Nyamenle.

Edwɛndolɛ Buluku ne 96:5

Ɔluakɛ maanle maanle nyamenle ne mɔ le mmonle; Ɛdɛnkɛma a bɔle anwumaneamra a.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 20:11

Ɔluakɛ medame Ɛdɛnkɛma, menvale kenle nsia a membɔle anwuma nee aze a, nyevile nee nuhua ninyɛne muala, na menliele me ɛnwomenle wɔ kenle nsuu ne azo. Yemɔti medame Ɛdɛnkɛma, menyilale Ɛnwomenlelielɛ Kenle ne na menyɛle ye nwuanzanwuanza.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 31:18

Mɔɔ Nyamenle wiele tendɛ kile Mosisi wɔ Saenae Boka ne azo la, ɔvale awolɛ ndɛbandɛba nwiɔ ne mɔɔ Nyamenle mumua ne ɛva ɔ sa ɛrɛlɛsɛka ɛhɛlɛ mɛla ne mɔ zolɛ la ɔmanle Mosisi.

Mrɛlɛbulɛ Buluku ne 16:4

Debie biala mɔɔ Ɛdɛnkɛma ɛyɛ la gyi kpɔkɛ zo; amumuyɛnli ne bɔbɔ, ye mekɛ dwu a bɛbazɛkye ye.

Mrɛlɛbulɛ Buluku ne 3:19

Ɛdɛnkɛma vale ye nrɛlɛbɛ a bɔle ewiade a; ɔvale ye ndelebɛbo a ɔbɔle anwumaneamra a.

Nolo 12:1

Eza mekɛ mɔɔ bɛle mgbavolɛ nee mbɛlɛra la, bɛhakye bɛ Bɔvolɛ ne kolaa na munzule mekɛ ne mɔɔ ɛnee bɛbikye mgbanyifoa la adwu, na bɛaha kɛ, “Me nye ɛnlie ɛbɛla nu.”

Ayezaya Buluku ne 37:16

“O Tumivolɛ Ɛdɛnkɛma, Yizilayɛ Nyamenle mɔɔ ɛde wɔ belemgbunli ebia nu wɔ abɔdeɛ ne mɔ mɔɔ lɛ ndɛbalɛ la azo anwuma a; ɛ ngomekye ala a ɛle Nyamenle mɔɔ sie arelemgbunli maanle maanle mɔɔ wɔ aleɛabo la a. Ɛdawɔ a ɛbɔle azɛlɛ ye nee anwuma a.

Ayezaya Buluku ne 40:21

Bɛnze ɔ? Bɛtɛtele ɔ? Bɛanga bɛangile bɛ wɔ mɔlebɛbo ne ɔ? Tete mɔɔ aloa bɔle la bɛtɛtele ɔ bo ɔ?

Ayezaya Buluku ne 40:26

Bɛdo bɛ nye anwuma na bɛnlea, nwane a bɔle ɛhye mɔ a? Yemɔ yɛɛ ɔbɔle bɛ kɔsɔɔti a, yɛɛ ɔfa ko biala duma ɔfɛlɛ ye. Ye tumi kpole ne ati, yɛɛ ɔlɛ tumi na ɔ nwo yɛ se la ati, ko bɔbɔ ɛmminli.

Ayezaya Buluku ne 40:28

Bɛnze ɔ? Bɛtɛtele ɔ? Ɛdɛnkɛma le damɛnlangoate Nyamenle, ewiade amuala Bɔvolɛ. Ɔnvɛ yɛɛ ɔ nwo ɛmbɛlɛ ye, ye ndelebɛbo ɛnlɛ nvedenvedenu.

Ayezaya Buluku ne 42:5

Ɛdɛnkɛma Nyamenle ne mɔɔ bɔle anwuma na ɔdɛlɛle ye, mɔɔ bɔle azɛlɛ ye nee zolɛ debie biala, na ɔmaa menli mɔɔ de azɛlɛ ye azo la ɛnwomenle nee sunsum la se,

Ayezaya Buluku ne 44:24

Ɛdɛnkɛma, bɛ Kpɔnevolɛ ne mɔɔ bɔle bɛ guale bɛ wɔ bɛ nli mɔ akunlu la se, “Medame a mele Ɛdɛnkɛma, mɔɔ bɔle ninyɛne kɔsɔɔti la, me ngome a membɔle anwuma a. Mɔɔ mebɔ azɛlɛ ye la, nwane a gyi me foa a?

Ayezaya Buluku ne 45:18

Ɛdɛnkɛma mɔɔ bɔle anwuma la, yemɔ a ɔle Nyamenle a! Yemɔ mɔɔ ɔhyehyɛle na ɔbɔle azɛlɛ ye la, ɔbɔle ɔmanle ɔlile munli, yeambɔ ye sesakaa biala yeanzie ɛkɛ; ɔbɔle ewiade, amaa sonla adɛnla nu. Ɔse, “Medame a mele Ɛdɛnkɛma a, bieko ɛnle ɛkɛ.

Ayezaya Buluku ne 51:13

Kɛmɔ bɛ kpɔvolɛ ne ɛwie ɛya fa, na yeva yezie ɔ nyunlu kɛ ɔsɛkye bɛ la ati, dahuu bɛwɔ ɛzulolɛ nu. na bɛ rɛle ɛvi Ɛdɛnkɛma, bɛ Bɔvolɛ ne mɔɔ bɔle anwuma, na ɔwulale azɛlɛ ye adiabo ne mɔ aze la, Na kpɔvolɛ ne ɛyavalɛ ne dwu nienwu?

Ayezaya Buluku ne 51:16

Meva me edwɛkɛ mewula ɛ nloa, yɛɛ meva wɔ mevea me ndɛba abo. Medame a membɔle anwuma, na menwulale azɛlɛ ye adiabo aze, na menzele Gyɛlusalɛmma kɛ, ‘Bɛle me menli’ a.”

Ayezaya Buluku ne 65:17

Ɛdɛnkɛma se, “Bɛnlea, mebɔ anwuma fofolɛ nee azɛlɛ fofolɛ; ninyɛne dɛba ne mɔ abo zo baminli mɔɔ awie ɛnrɛhakye bɛ bieko a.

Gyɛlɛmaya Buluku ne 10:12

Ɛdɛnkɛma vale ye tumi a bɔle azɛlɛ ye a, ɔvale ye nrɛlɛbɛ a ɔbɔle ewiade a, ɔvale ye ndelebɛbo a ɔbɔle anwomanyunlu a.

Gyɛlɛmaya Buluku ne 32:17

wɔmɔ yɛɛ wɔva wɔ tumi kpole ne nee wɔ anwosesebɛ wɔbɔ anwuma nee aze a!

Gyɛlɛmaya Buluku ne 51:15

Ɛdɛnkɛma vale ye tumi bɔle azɛlɛ ye, ye nrɛlɛbɛ a ɔvale ɔbɔle ewiade a, yɛɛ ye ndelebɛbo a ɔvale ɔbɔle anwomanyunlu a.

Zɛkalaya Buluku ne 12:1

Ɛdɛnkɛma nrɛlaleɛ mɔɔ fane Yizilayɛma anwo la ɛne: Ɛdɛnkɛma mɔɔ bɔle anwuma, ɔbɔle azɛlɛ, na ɔbɔle sonla sunsum mɔɔ wɔ ye nu la se,

Edwɛkpa ne kɛmɔ Mateyu hɛlɛle la 11:25

Mekɛ ne anu Gyisɛse zele kɛ, “Egya, anwuma nee aze Awulae, meyɛ wɔ mo kɛ ninyɛne mɔɔ wɔva wɔvea nrɛlɛbɛvolɛma nee nwomama la wɔye wɔhile menli mɔɔ ɛnze nwolɛ bie la.

Edwɛkpa ne kɛmɔ Maake hɛlɛle la 13:19

Ɔluakɛ mekɛ ne anu anwongyelelɛ ne bayɛ ɛzulolɛ kpalɛ mɔɔ sumunli kɛ Nyamenle bɔle ewiade toonwo mɔɔ yeradwu bekezɛ la, bie ɛtɛsile ɛlɛ, yɛɛ bie noko ɛnrɛzi ɛlɛ.

Ɛzoanvolɛma Gyima ne 14:15

“Ayi mɔ, duzu ati a bɛlɛyɛ ɛhye mɔ ɛ? Yɛdayɛ noko yɛle menli kɛ bɛdabɛ la. Yɛrale kɛ yɛbabɔ Edwɛkpa ne nolo yeahile bɛ, amaa bɛahwe bɛ nwo bɛavi ninyɛne mgbane mgbane ɛhye mɔ mɔɔ anwo ɛnlɛ nvasoɛ la anwo, na bɛazonle tease Nyamenle ne mɔɔ bɔle anwuma, azɛlɛ, nyevile nee mɔɔ wɔ nuhua la amuala la.

Ɛzoanvolɛma Gyima ne 17:24

Nyamenle ne, mɔɔ bɔle ewiade nee mɔɔ wɔ nuhua la amuala la le anwuma nee aze Awulae, na ɔndɛnla sua mɔɔ menli ɛva bɛ sa ɛzi la anu.

Ɛzoanvolɛma Gyima ne 4:24

Bɛdele edwɛkɛ ne la, bɛ muala bɛbɔle nu bɛzɛlɛle, “O Tumivolɛ Awulae mɔɔ bɔle anwuma nee azɛlɛ, nyevile nee mɔɔ wɔ nu la amuala,

Wulo 11:36

Ɔdaye a ɔbɔle ninyɛne kɔsɔɔti a, debie biala lua ɔ nwo zo, yɛɛ bɛwɔ ɛkɛ ne bɛmaa ye. Anyunlunyia ɛha Nyamenle dahuu! Amen.

1 Kɔl 8:6

yɛmɛ yɛze Nyamenle kokye ne ala, yemɔ a le Selɛ ne mɔɔ bɔle ninyɛne kɔsɔɔti na yɛde aze yɛmaa ye la; yɛɛ Awulae ko, Gyisɛse Kelaese, mɔɔ ɔlua ɔ nwo zo a bɛbɔle ninyɛne kɔsɔɔti na ɔlua ɔ nwo zo yɛde aze la.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 3:9

na memaa menli kɔsɔɔti ɛnwu kɛ nwanwane ngyehyɛlɛ ne mɔɔ vea la bazi ahɔ zolɛ la. Nyamenle mɔɔ yemɔ a ɔbɔle ninyɛne muala la vale ngyehyɛlɛ ɛhye veale mekɛ dɔɔnwo mɔɔ ɛraze ɛhɔ la,

Kɛlata mɔɔ bɛhɛlɛle bɛhɔmanle Hibuluma la 1:10

Eza ɔhanle kɛ, “Awulae, wɔmɔ yɛɛ mɔlebɛbo ne ɛbɔle ewiade a, yɛɛ ɛ sa anloa gyima a le anwumaneamra.

Kɛlata mɔɔ bɛhɛlɛle bɛhɔmanle Hibuluma la 1:2

na kenle nsa ye ɛdeɛ, yelua ɔ Ra ne anwo zo a yedendɛ yehile yɛ a. Ɔ Ra ne anwo zo a ɔluale ɔbɔle ewiade a, na yemɔ yɛɛ Nyamenle ɛkpa nu ɛye ye kɛ awieleɛ ne debie biala le ye ɛdeɛ a.

Kɛlata mɔɔ bɛhɛlɛle bɛhɔmanle Hibuluma la 11:3

Ɔlua diedi zo yɛɛ yɛnyia ndelebɛbo kɛ Nyamenle vale ɔ nloa edwɛkɛ ala a bɔle ewiade a, na mɔɔ ɛnɛ yɛnwu ye la vi mɔɔ yɛnnwu ye la anu a rale a.

Kɛlata mɔɔ bɛhɛlɛle bɛhɔmanle Hibuluma la 3:4

Sonla ala a si sua a, yɛɛ Nyamenle noko a ɛyɛ ninyɛne muala a.

2 Pit 3:5

Menli zɛhae mɔ anye fuu yɛɛ bɛyɛ kɛ asɛɛ bɛnze kɛ aloa kabɔ la Nyamenle vale ɔ nloa edwɛkɛ ala a manle anwuma rale, na azɛlɛ resee ye noko yele ɔ nwo vile nzule nu rale dɛbadɛba ne, na nzule ɛbɔ ye ɛyia a,

1 Dw 1:1

Yɛlɛkɛlɛ bɛ wɔ ngoane Edwɛkɛ ne mɔɔ mɔlebɛbo ne ɛnee ɔwɔ ɛkɛ ne na yɛde, yɛnwu ye yɛ nye zo, yɛnlea ye kpalɛ, na yɛva yɛ sa yɛha ye la anwo.

Yekile 10:6

na ɔvuale ɔhilele tease Nyamenle ne mɔɔ bɔle anwuma nee nuhua debie biala, azɛlɛ nee zolɛ debie biala, nee nyevile nee nuhua ninyɛne muala la kɛ, “Aze ɛzilɛ bieko ɛnle ɛkɛ!

Yekile 14:7

Na ɔdeanle nu ɔhanle kɛ, “Bɛzulo Nyamenle, na bɛye ye ayɛlɛ. Ɔluakɛ mekɛ ne ɛdwu mɔɔ ɔbabua aleɛabo amra ndɛne a. Bɛzonle Nyamenle mɔɔ bɔle anwuma, azɛlɛ, nyevile, nee azule muala la.”

Yekile 21:6

Na ɔzele me kɛ, “Bɛwie debie biala yɛ! Mame a mele ‘Alefa’ nee ‘Omiga’ ne a, mɔlebɛbo ne nee awieleɛ ne. Awie mɔɔ nzuhɔne ɛlɛku ye la mebamaa ye nzubula ne mɔɔ maa ngoane la anu nzule ne bie yeanlo mɔɔ ɔndua ɛhwee a.

Yekile 22:13

Mame a mele ‘Alefa’ nee ‘Omiga’ ne a, mɔlebɛbo ne nee awieleɛ ne.”

Yekile 3:14

“Kɛlɛ ɛhye kɔmaa Lawɔdesia asɔne ne Nyamenle soanvolɛ ne. “Nrɛlaleɛ ɛhye vi Amen, nɔhalɛnli ne mɔɔ yɛkola yɛfa yɛ rɛle yɛto ɔ nwo zo, nɔhalɛ dasevolɛ ne, mɔɔ le ninyɛne mɔɔ Nyamenle ɛbɔ la amuala abobɔlɛ la ɛkɛ.

Yekile 4:11

“Yɛ Awulae nee yɛ Nyamenle! Ɛfɛta anyunlunyia, enililɛ, nee tumi. Ɔluakɛ ɛdawɔ a ɛbɔle ninyɛne kɔsɔɔti a. Wɔ ɛhulolɛ zo yɛɛ ɛbɔle bɛ a. Wɔ ɛhulolɛ zo yɛɛ bɛwɔ ɛkɛ a.”