Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:2 - BAEBOLO ANZƐƐ BULUKU NWUANZANWUANZA

² Bɛha ko ɛhye bɛmaa mendie, asoo mɛla ne mɔɔ bɛlile zo la ati a Nyamenle vale ye Sunsum ne manle bɛ a, anzɛɛ bɛdiele Edwɛkpa ne na bɛliele bɛlile la ati ɔ?

Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:2 ပူးပေါင်းရင်းမြစ်များ

Ɛzoanvolɛma Gyima ne 15:8

Na Nyamenle mɔɔ ze sonla ahonle nu la hilele kɛ yelie bɛdabɛ mɔɔ bɛnle Dwuuma la noko, na ɔmanle bɛ Sunsum Nwuanzanwuanza ne bie, kɛmɔ ɔvale ɔmanle yɛdayɛ ala la.

Ɛzoanvolɛma Gyima ne 2:38

Pita zele bɛ kɛ, “Bɛnlu bɛ nwo na bɛgyakyi ɛtane ɛyɛlɛ, na bɛmaa bɛzɔne bɛ wɔ Gyisɛse Kelaese duma nu, amaa bɛava bɛ ɛtane bɛahyɛ bɛ na bɛanyia Nyamenle ahyɛlɛdeɛ ne, mɔɔ le Sunsum Nwuanzanwuanza ne.

Ɛzoanvolɛma Gyima ne 8:15

Bɛhɔle la bɛzɛlɛle Sunsum Nwuanzanwuanza ne bɛmanle diedima ne mɔ.

Wulo 1:17

Ɔluakɛ ɔvi mɔlebɛbo ne kɔdwu awieleɛ ne amuala, Nyamenle dua diedi zo a maa menli sɔ ɔ nye a. Nyamenle Edwɛkɛ ne se, “Mɔɔ bɛkɛlua ye diedi zo bɛkɛmaa ɔkɛzɔ Nyamenle anye la banyia ngoane.”

1 Kɔl 9:21

Zɔhane ala yɛɛ meyɛ ye wɔ mekɛ mɔɔ mewɔ bɛdabɛ mɔɔ bɛnle Dwuuma la avinli a; meyɛ me nwo kɛ asɛɛ menle mɛla ne abo, amaa me sa aha bɛdabɛ noko. Ɛhye ɛngile kɛ menli Nyamenle mɛla ne azo; nɔhalɛ ne a le kɛ mewɔ Kelaese mɛla bo.

2 Kɔl 11:4

Ɔluakɛ bɛ nye die awie biala mɔɔ ba bɛ nwo nehane na ɔbabɔ Gyisɛse fofolɛ bie, mɔɔ tɛ yemɔ a ɔle Gyisɛse ne mɔɔ yɛbɔle ye nolo yɛhilele bɛ la anwo edwɛkɛ la anwo. Eza bɛdie sunsum nee edwɛkpa bie mɔɔ asolo bɛ na tɛ Nyamenle Sunsum ne nee Kelaese anwo Edwɛkpa ne mɔɔ bɛnyianle ye bɛvile yɛ lɔ la bɛto nu.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:14

Bɛhendanle Kelaese wɔ baka zo wɔ yɛmɛ yɛ ti, amaa ɔlua ɔ nwo zo bɛdabɛ mɔɔ bɛnle Dwuuma la bɛanyia nyilalɛ ne mɔɔ Nyamenle vale bɔle Ebileham ɛwɔkɛ la bie, na kɛmɔ yɛdie Kelaese yɛdi la ati yɛ muala yɛ sa aha ye Sunsum ne mɔɔ ɔvale ɔbɔle yɛ ɛwɔkɛ la.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:3

Duzu ati a bɛde bɛ nwo bɛdo zɛhae ɛ? Bɛbɔle ɔ bo kɛnlɛma wɔ Nyamenle Sunsum ne anu, na kɛ ɔyɛle mɔɔ bɛlɛwie ye nwonane nu ɛ?

Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:5

Yemɔti bɛdwenle kɛ Nyamenle fa ye Sunsum ne amaa bɛ, yeava bɛ yeayɛ nwanwane ninyɛne yeahile kɛ bɛlile mɛla ne azo, anzɛɛ bɛdie Edwɛkpa ne na bɛlie bɛli la ati ɔ?

Kɛlata mɔɔ bɛhɛlɛle bɛhɔmanle Hibuluma la 2:4

Mekɛ ko ne ala Nyamenle ɔdaye ɔlile daselɛ ɔvoale bɛ ɛdeɛ ne azo, na ɔvale Sunsum Nwuanzanwuanza nu ahyɛlɛdeɛ ɔmanle bɛ, ɔmanle bɛyɛle nwanwane ninyɛne, kɛmɔ ye ɛhulolɛdeɛ ne de la.

Kɛlata mɔɔ bɛhɛlɛle bɛhɔmanle Hibuluma la 4:2

Ɔluakɛ yɛdayɛ noko yɛde Edwɛkpa ne, kɛmɔ bɛdele la. Bɛdele edwɛkɛ ne, na kɛmɔ bɛanlie bɛanli la ati, yeanyɛ nvasoɛ yeammaa bɛ.

Kɛlata mɔɔ bɛhɛlɛle bɛhɔmanle Hibuluma la 6:4

Ɔluakɛ ɔyɛ se ɔmaa bɛdabɛ mɔɔ anrɛɛ bɛlɛ diedi na bɛgyakyi nu la kɛ bɛkɛzia bɛkɛnlu bɛ nwo bieko. Ɛnee anrɛɛ bɛwɔ Nyamenle wienyi ne anu, bɛnyia Nyamenle nu ahyɛlɛdeɛ, na bɛnyia Sunsum Nwuanzanwuanza ne bie;

1 Pit 1:12

Nyamenle yele hilele ye kpɔmanvolɛma mɔɔ luale Sunsum Nwuanzanwuanza ne mɔɔ bɛzoanle ye vi anwuma rale la azo bɔle Edwɛkpa ɛhye nolo hilele bɛ, kɛ tɛ bɛdabɛ kpɔmanvolɛma bɛ ti yɛɛ bɛyɛle zɔhane gyima ne a, na bɛmɛ Kelaese ɛdoavolɛma bɛ ti ɔ. Ɛhye mɔ le ninyɛne mɔɔ Nyamenle soanvolɛma akunlu a anrɛɛ bɛde ɔ bo a.