Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:17 - BAEBOLO ANZƐƐ BULUKU NWUANZANWUANZA

¹⁷ Zɔhane ati, bɛmmayɛ bɛ nwo ahɔnwɔne, na bɛbɔ mɔdenle kɛ bɛkɛnwu mɔɔ Awulae kpondɛ kɛ bɛyɛ la.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:17 ပူးပေါင်းရင်းမြစ်များ

Dwobu Buluku ne 28:28

“Na ɔzele sonla kɛ, ‘Nrɛlɛbɛ a le kɛ ɛkɛzulo Awulae; yɛɛ ndelebɛbo a le kɛ ɛkɛhwe ɛ nwo ɛkɛvi ɛtane nwo!’ ”

Edwɛndolɛ Buluku ne 111:10

Ɛdɛnkɛma ɛzulolɛ le nrɛlɛbɛ bo ɛbɔlɛ; bɛdabɛ mɔɔ bɛlɛ ndelebɛbo kpalɛ la a le bɛdabɛ mɔɔ bɛyɛ tieyɛ la. Ye ayɛlɛyelɛ wɔ ɛkɛ ne dahuu.

Edwɛndolɛ Buluku ne 119:27

Maa mende wɔ mɛla ne mɔ abo, na mebadwenledwenle wɔ nwanwane gyima ne mɔ anwo.

Mrɛlɛbulɛ Buluku ne 14:8

Badwemafo nrɛlɛbɛ maa ɔnwu ye adenle nu boɛ, na ahoasea nrɛlɛbɛ le mɛlɛbɛla.

Mrɛlɛbulɛ Buluku ne 2:5

ɛbade Ɛdɛnkɛma ɛzulolɛ ne abo na wɔanyia Nyamenle anwo adwenlenubukelɛ,

Mrɛlɛbulɛ Buluku ne 23:23

Su ezukoa tɔ nɔhalɛ, nrɛlɛbɛ, ngilehilelɛ, yɛɛ ndelebɛbo; mmatɔne bie.

Gyɛlɛmaya Buluku ne 4:22

Ɛdɛnkɛma se, “Me menli ne le ahɔnwɔne; bɛnze me. Bɛle ngakula ahoasea; bɛnlɛ ndelebɛbo. Bɛbe ɛtaneyɛlɛ nu, na kpalɛ, bɛnze ye yɛ.”

Dw 7:17

Mɔɔ kɛboɔboa ɔ nwo kɛ ɔyɛ mɔɔ Nyamenle kpondɛ la banwu kɛ mɔɔ melɛkilehile la vi Nyamenle ɛkɛ anzɛɛ medame me ti anwo ngilehilelɛ ɔ.

Wulo 12:2

Bɛmmamaa ewiade amaamuo di bɛ adwenle. Bɛmaa Nyamenle ɛhakyi bɛ adwenle bɔkɔɔ, na bɛahola bɛanwu Nyamenle ɛhulolɛdeɛ kpalɛ ne mɔɔ le kpalɛ, ɔsɔ ɛnyelɛ, na ɔdi munli la.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:15

Zɔhane ati bɛnlea bɛ nwo boɛ wɔ bɛ ɛbɛlabɔlɛ nu. Bɛmmayɛ bɛ nwo kɛ menli mɔɔ ɛnze debie la; bɛbɔ bɛ ɛbɛla kɛ bɛle nrɛlɛbɛvolɛma.

Mɛla 4:6

Bɛva bɛzie na bɛli zolɛ, ɔluakɛ yemɔ yɛɛ ɔbahile bɛ nrɛlɛbɛ nee ndelebɛbo mɔɔ bɛlɛ ye wɔ menli ne anyunlu a. Ɔboalekɛ saa bɛte mɛla ɛhye mɔ amuala a, bɛbaha kɛ, ‘Amgba, maanle kpole ɛhye anu amra ze nrɛlɛbɛ, bɛlɛ ndelebɛbo.’

Kɔlɔ 1:9

Ɔlua ɛhye ati, sumunli kɛ yɛdele bɛ nganeɛ la, dahuu yɛsɛlɛ yɛmaa bɛ. Yɛsɛlɛ Nyamenle kɛ ɔva sunsum nu nrɛlɛbɛ nee ndelebɛbo muala ɔyi bɛ tɛkɛɛ, amaa bɛanyia Nyamenle ɛhulolɛdeɛ ne anwo ndelebɛbo,

Kɔlɔ 4:5

Bɛdabɛ mɔɔ bɛnlɛ diedi la, bɛ nee bɛ ɛzia nrɛlɛbɛ nu, na bɛdendɛ bɛhile bɛ wɔ mekɛ biala mɔɔ bɛkɛnyia nuhua adenle la.

1 Tɛs 5:18

na bɛyɛ Nyamenle mo wɔ gyinlabelɛ biala anu. Mɔɔ Nyamenle kpondɛ kɛ bɛdabɛ mɔɔ bɛ nee Kelaese Gyisɛse lua la yɛ la ɛne.

1 Pit 4:2

Na ɔvi mekɛ ne anu mɔɔ kɔ la, ɔmaa Nyamenle ɛhulolɛ ne dielie ye wɔ ye ɛbɛlabɔlɛ mɔɔ ɛha amozi la anu na ɔgyakyi ye atiakunluwɔzo nzi ɛlilɛ.