Kɔlɔ 2:18 - BAEBOLO ANZƐƐ BULUKU NWUANZANWUANZA

¹⁸ Menli bie wɔ ɛkɛ mɔɔ bɛdie bɛdabɛ bɛ ngome bɛ nwo bɛdi, bɛdwenle anwoazehanlɛ nee anwuma soanvolɛma ɛzonlenlɛ nwo, na bɛfa ye kɛ ɛnyelɛzodeɛnwunlɛ le debie mɔɔ hyia tɛla zolɛ; menli zɛhae mɔ fa bɛ ewiade adwenle ne tu bɛ nwo mɔɔ ndelebɛbo biala ɛnle nu a. Bɛmmamaa menli zɛhae mɔ adenle bɛmaa bɛsɛkye bɛ adwenle, kɛ asɛɛ mɔɔ bɛmɛ bɛlɛyɛ la bɛnyɛ ye boɛ.

Kɔlɔ 2:18 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 3:13

Ɛdɛnkɛma Nyamenle bizale raalɛ ne kɛ, “Duzu debie a wɔyɛ la?” Raalɛ ne buale kɛ, “Ɛwɔlɛ ne bɛlɛbɛlale me, lile me adwenle yɛɛ menlile bie a.”

Dwobu Buluku ne 38:2

Ɔse, “Nwane noko a ɔdaye ɔlɛfa edwɛkɛ mgbane mgbane yeazɛkye adwenle la?

Ayezaya Buluku ne 57:9

Bɛvale anatele evuanlɛ kpalɛ bɛguale bɛ nwo bɛhɔzonlenle bɛ bozonle Molɛke, bɛzoanle menli bɛmanle bɛhɔle moa moa, na bɛmanle bɛhɔle toonwo bɛhɔle Ɛbolɔ.

Yizikeɛle Buluku ne 13:3

“Ka kile bɛ kɛ, Ɛdɛnkɛma se, ‘Munzule ɛha Nyamenle kpɔmanvolɛ ahoasea ne mɔ, mɔɔ ɛnnwu ɛhwee na bɛbɔ bɛ ti anu bɛka Nyamenle nrɛlaleɛ la.

Daneɛle Buluku ne 11:38

Ɔbazonle aranemgbole nyamenle ɛdeɛ ne yeagyakyi ɛhye mɔ. Ɔbazonle nyamenle mɔɔ ɔ nlenya mɔ ɛnze ye la; ɔbava ezukoa nvutuke nee dwɛtɛ fufule, awolɛ mɔɔ sonle bolɛ nee ahyɛlɛ ninyɛne mɔɔ bɛ awolɛ yɛ se la yeazonle ye.

Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 25:18

ɔboalekɛ bɛyɛle wɔ ɛtane kɛ bɛbɛlɛbɛlale wɔ wɔ Piyɔ, yɛɛ Kɔzobae, Medean belemgbunli ne ara raalɛ ne mɔɔ bɛhunle ye wɔ Piyɔ wɔ ewulenzane mekɛ ne anu la ati.”

Edwɛkpa ne kɛmɔ Mateyu hɛlɛle la 24:24

Ɔluakɛ Mɛzayama adalɛ nee Nyamenle kpɔmanvolɛma alane dɔɔnwo bara; bɛbayɛ nwanwane ninyɛne mgbole mɔɔ yɛ ɛzulolɛ la dɔɔnwo, na saa bɛyɛ na ɔkɛyɛ boɛ a, bɛava bɛabɛlɛbɛla Nyamenle menli ne mɔɔ di munli bɔbɔ la na bɛaminli menli dɔɔnwo diedi.

Wulo 1:25

Bɛgyakyile kɛ bɛkɛlie nɔhalɛ ne mɔɔ fane Nyamenle anwo la bɛkɛli. Zɔhane ati bɛdie adalɛ ne bɛdi na bɛsonle ninyɛne mɔɔ Nyamenle ɛbɔ bɛ la, na bɛgyakyi Bɔvolɛ Nyamenle mumua ne, yemɔ yɛɛ ayɛlɛyelɛ ɛha ye dahuu a. Amen.

Wulo 16:18

Ɔluakɛ menli mɔɔ di zɛhae gyima la ɛnzonle yɛ Awulae Kelaese. Bɛsonle bɛdabɛ bɛ ngome bɛ atiakunluwɔzo ala. Bɛfa bɛ nloa anu fɛlɛko nee ɛsoabɔlɛ bɛsɛkye menli mɔɔ ɛnze nwolɛ bie la adwenle.

1 Kɔl 13:4

Ɛhulolɛ lɛ abotane, ɔ ti akunlu le kɛnlɛma; ɛhulolɛ ɛnle anyebolo, ɔmbu ɔ nwo, yɛɛ ɔmmemaa ɔ nwo zo;

1 Kɔl 3:3

ɔluakɛ bɛtɛgua zolɛ bɛtɛbɔ bɛ ɛbɛla kɛ ewiade ɛhye anu amra la. Asoo mɔɔ nungule ɛhwenlɛ nee butulelilɛ ɛnzea bɛ adenle la, ɛnee ɛhye ɛngile kɛ bɛ nee ewiade ɛhye anu amra bɔ bɛ ɛbɛla ko?

1 Kɔl 4:18

Bɛ nuhua bie mɔ ɛlɛtu bɛ nloa anu na bɛdwenle kɛ menrɛra lɔ bieko.

1 Kɔl 4:6

Me mediema, ɔlua bɛ ti yɛɛ meva Apɔlɔso nee medame mumua ne medo edwɛkɛ nwo meha a, amaa bɛazukoa yɛ na bɛanyɛ bɛammaa yeandɛla mɔɔ bɛhɛlɛ bɛdo ɛkɛ ne la. Bɛ nuhua biala mmafa awie ko pɛ ɔ gɔnwo anye zo.

1 Kɔl 8:1

Akee meka aleɛ mɔɔ bɛva bɛzɔ amonle la anwo edwɛkɛ. “Yɛ muala yɛlɛ adwenle, yɛze deɛ,” ɔle nɔhalɛ kɛmɔ bɛka la; noko akee bɛ deɛnwunlɛ zɛhae sɛkye bɛ; ɛhulolɛ a maa ngɔzo a.

1 Kɔl 9:24

Bɛze ye wienyi kɛ menli dɔɔnwo a su ɛnriandilɛ a, noko bɛ nuhua ko ala yɛɛ asa ka nwolɛ ahyɛlɛdeɛ ne a. Ɛhye ati bɛnriandi kpalɛ kɛ bɛkɛnyia nwolɛ ahyɛlɛdeɛ ne.

2 Kɔl 11:3

Noko mesulo kɛ, kɛmɔ ɛwɔlɛ ne vale adalɛ nrɛlɛbɛ bɛlɛbɛlale Yivi la, zɔhane ala yɛɛ bɛbazɛkye bɛ adwenle a, amaa bɛahwe bɛ nwo bɛavi Kelaese ɛzonlenlɛ kpalɛ ne mɔɔ di munli la anwo.

2 Kɔl 12:20

Mesulo ɔ nzi kɛ meba a menwɔrado bɛ wɔ adenle bie anu mɔɔ menrɛhulo a, anzɛɛ bɛdabɛ noko bɛkɛnwu me wɔ adenle bie anu mɔɔ bɛnrɛhulo a. Mesulo kɛ mebarado bɛ nee butulelilɛ, nungule ɛhwenlɛ, ɛya mgbole ɛvalɛ, angomedi, aholoba ɛbɔlɛ, nzekuebɔlɛ, mgbanyizonle ɛyɛlɛ, yɛɛ basabasayɛlɛ nu.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 4:17

Mekakye bɛ wɔ Awulae duma nu; bɛmmabɔ bɛ ɛbɛla kɛ awozonle ɛzonlenlɛma la bieko mɔɔ bɛndwenle adwenle kpalɛ a.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:6

Bɛmmamaa awie fa adubɛnloanu bɛlɛbɛla bɛ; ɔboalekɛ ɔlua ninyɛne zɛhae mɔ ati yɛɛ Nyamenle ɛya ne ba menli mɔɔ ɛndie ye edwɛkɛ la anwo zo a.

Mɛla 29:29

“Ninyɛne mɔɔ vea la le Ɛdɛnkɛma yɛ Nyamenle ne ɛdeɛ; na mɔɔ bɛye bɛhile la le yɛ nee yɛ mra ɛdeɛ dahuu, amaa yɛayɛ mɔɔ mɛla ne kpondɛ la amuala.

Pɔɔlo Kɛlata mɔɔ ɔhɛlɛle ɔhɔmanle Felepaema la 3:14

Yemɔti memia me nwo kɛ menriandi meahɔ awieleɛ, amaa me sa aha ahyɛlɛdeɛ ne mɔɔ le anwuma ngoane ne mɔɔ Nyamenle lua Kelaese anwo zo ɛlɛfɛlɛ yɛ ahɔ nu la.

Kɔlɔ 2:23

Ngyehyɛlɛ zɛhae mɔ ɔyɛ a zɔho kɛ gyi nrɛlɛbɛ zo wɔ bɛ anwuma soanvolɛma ɛzonlenlɛ nu, bɛ adalɛ anyelielɛ ne mɔɔ bɛnyia ye wɔ bɛ ngome bɛ nwo, nee nwonane ne nyanehilelɛ nwo la anu; na ɔmboa sonla ɔmmaa ɔngomo ɔ nwo zo. Bɛ nwonane nu atiakunluwɔzo ne bɔbɔ akee yɛ kpole.

Kɔlɔ 2:4

Meka ɛhye meahile bɛ: bɛmmamaa awie fa ɔ nloa anu menlemenle yɛ bɛ koasea.

Kɔlɔ 2:8

Bɛnlea boɛ na awie anva mɛlɛbɛla nee adalɛ nrɛlɛbɛ mɔɔ bɛlua ewiade amaamuo zo bɛhyehyɛ, nee mɔɔ vi awozinli ewiade ye sunsum nu tumima ɛkɛ ne na ɔnvi Kelaese ɛkɛ ne la anyɛ bɛ ngɛkɛlɛ.

1 Tem 1:7

Bɛkpondɛ kɛ bɛkilehile Nyamenle mɛla ne anu, noko bɛdabɛ mumua ne bɛ edwɛkɛ mɔɔ bɛka la bɛnde ɔ bo na bɛade ninyɛne mɔɔ bɛka nwolɛ mgbole la abo.

1 Tem 4:1

Nyamenle Sunsum ne ka ye wienyi kɛ menli ne bie mɔ bakpo bɛ diedi ne kenle bie; bɛbadie sunsum adalɛma edwɛkɛ na bɛali mbɔnsam ngilehilelɛ ne mɔ azo.

2 Pit 2:14

Adwɔmanebɔlɛ ɛnzea bɛ adenle yɛɛ bɛnze ɛtane nwo nyiane nretee zɛhae. Bɛbɛlɛbɛla bɛdabɛ mɔɔ bɛtɛtinle sunsum nu la. Anyebolo ɛwie bɛ ku! Abule ɛbu bɛ!

1 Dw 2:26

Melɛkɛlɛ bɛ ɛhye wɔ bɛdabɛ mɔɔ bɛlɛbɔ mɔdenle bɛabɛlɛbɛla bɛ la anwo.

Yekile 12:9

Bɛvuandinle nane anwo ɛzulolɛ ne mɔɔ le kɛ ɛlɛnrɛne la bɛdole azɛlɛ ye azo. Yemɔ a le mɔmoane ɛwɔlɛ ne mɔɔ bɛfɛlɛ ye Abɔnsam anzɛɛ Seetan, mɔɔ ɛbɛlɛbɛla ewiade amra amuala la. Bɛvuandinle ye soanvolɛma ne mɔ noko bɛguale azɛlɛ ye azo.

Yekile 13:14

Ɔluale ngonyia ɛhye mɔ mɔɔ bɛmanle ye adenle bɛmanle ɔluale alumua nane ne anwo zo ɔyele la azo ɔbɛlɛbɛlale menli mɔɔ wɔ ewiade la amuala. Nane ɛhye mɔɔ tɔ zolɛ nwiɔ la zele menli kɔsɔɔti kɛ bɛyɛ ananze mɔɔ zɔho nane ne mɔɔ bɛbɔle ye hanlɛ kpole noko ɔtɛte ngoane nu la.

Yekile 13:8

Menli mɔɔ wɔ ewiade la amuala bazonle ye. Bɛdabɛ mɔɔ bɛangɛlɛ bɛ aluma wɔ Boaneralɛ ne mɔɔ bɛhunle ye la ngoane buluku ne anu kolaa na bɛabɔ ewiade la a bazonle ye a.

Yekile 19:10

Ɛhye ati mendule mendɔle ɔ gyakɛ anu kɛ mesonle ye, na ɔzele me kɛ, “Mmayɛ! Medame mele sonvolɛ kɛ ɛdawɔ nee ɛ mediema mɔɔ zɔle nɔhalɛ ne mɔɔ Gyisɛse yele hilele bɛ la anu la. Sonle Nyamenle, mmasonle me!” Ɔluakɛ nɔhalɛ ne mɔɔ Gyisɛse yele hilele la a le Nyamenle kpɔmanvolɛma anwosesebɛ ne a.

Yekile 3:11

Ɔnrɛhyɛ na meara. Mɔɔ ɛlɛ la sɔ nu boɛ, amaa awie amkpodi wɔ konim ahyɛlɛdeɛ ne anvi ɛ sa nu.