Kɔlɔ 2:16 - BAEBOLO ANZƐƐ BULUKU NWUANZANWUANZA

¹⁶ Yemɔti bɛmmamaa awie bua bɛ ndɛne wɔ mɔɔ bɛdi nee mɔɔ bɛno, anzɛɛ ɛvoyialilɛ nwo, anzɛɛ Siane Fofolɛ nee Ɛnwomenlelielɛ Kenle nwo.

Kɔlɔ 2:16 ပူးပေါင်းရင်းမြစ်များ

2 Arl 4:23

Ɔ hu bizale ye kɛ, “Duzu ati a ɛkɔ Nyamenle sonla ne ɛkɛ ne ɛnɛ ɛ? Ɛnɛ ɛnle ɛnwomenlelielɛ kenle yɛɛ siane ɛtɛfile.” Raalɛ ne buale kɛ, “Tɛ debie ɔ.”

1 Edk 23:31

nee mekɛ biala mɔɔ bɛlɛyela nane bɛabɔ azu bɛamaa Ɛdɛnkɛma wɔ Ɛnwomenlelielɛ Kenle, Siane Fofolɛ Ɛvoyialilɛ, nee ɛvoyia mɔɔ ɛha la ɛlilɛ nu la. Bɛyɛle ngyehyɛlɛ mɔɔ kile Livaema dodo mɔɔ ɔwɔ kɛ yɛ gyima wɔ Ɛdɛnkɛma ɛzonlenlɛ nu mekɛ biala a.

2 Edk 31:3

Belemgbunli afoa nu ɛdeɛ a le kɛ, ɔvale nane ɔmanle bɛvale bɛbɔle nwonlomɔ nee nɔsolɛ ɛyelalɛ azu ne mɔ, nee Ɛnwomenlelielɛ Kenle ɛyelalɛ azu ne mɔ, Siane Fofolɛ Ɛvoyialilɛ azu ne mɔ, nee ɛvoyia mɔɔ ɛha la azu ne mɔ, kɛmɔ bɛhɛlɛ bɛ wɔ Ɛdɛnkɛma Mɛla Buluku ne anu la.

Nihɛmaya Buluku ne 10:31

Saa menli zɔhane mɔ bie fa bɛ ninyɛne adɔne ba gua wɔ Ɛnwomenlelielɛ Kenle ne anzɛɛ kenle nwuanzanwuanza nu a, yɛnrɛdɔ. Ɛvolɛ mɔɔ tɔ zolɛ nsuu la biala yɛnrɛzo ɛya wɔ azɛlɛ ye azo, yɛɛ yɛbapɛ kakɛ biala mɔɔ wɔ ɛkɛ ne la anu.

Nihɛmaya Buluku ne 10:33

Yɛbava ninyɛne yɛara yɛamaa bɛava bɛayɛ ɛhye mɔ wɔ Ɛzonlenlɛ Sua ne anu bɛamaa Nyamenle: kpanwo nwuanzanwuanza ne, dahuu aleɛ ma azubɔdeɛ ne, nane mɔɔ kenle ko biala bɛbayela bɛabɔ azu la, Ɛnwomenlelielɛ Kenle ne azubɔlɛ ninyɛne, Siane Fofolɛ ɛvoyialilɛ ninyɛne, yɛɛ azubɔlɛ nwuanzanwuanza mɔɔ ɛha la anwo ninyɛne, azubɔlɛ mɔɔ bɛfa bɛanrinzi Yizilayɛma ɛtane ne mɔ la anwo ninyɛne, yɛɛ debie biala mɔɔ bɛhyia nwolɛ wɔ Ɛzonlenlɛ Sua ne anu la.

Nihɛmaya Buluku ne 8:9

Mɔɔ menli ne dele mɔɔ Mɛla ne se la, debie hwenle bɛ nu na bɛzunle. Na Sɛlɛvolɛ Nihɛmaya, mɔɔ le amɛnlado ne, nee mɛla kilehilevolɛ Ɛzela, nee Livaema mɔɔ hilehilele menli ne la zele bɛ kɛ, “Ɛnɛ kenle ye le nwuanzanwuanza maa Ɛdɛnkɛma bɛ Nyamenle ne. Bɛmmasu yɛɛ bɛmmadi nyane biala.”

Edwɛndolɛ Buluku ne 42:4

Meka me nyane edwɛkɛ a, mekakye ɛhye mɔ amuala; kɛ menzile me nee ɛlɔne ne luale, na menlile bɛ ti, yɛdole ɛlɔnwɔne, yɛdole moyɛlɛ edwɛne, yɛvale fɛlɛko yɛdeɛdeanle nu, yɛhɔle Nyamenle sua nu yɛlile ɛvoyia la.

Edwɛndolɛ Buluku ne 81:3

Siane ne fi fofolɛ a bɛwu aweɛne tendenle ne anu, siane ne yɛ mumua a bɛwu nu bɛli ɛvoyia ne.

Ayezaya Buluku ne 1:13

Bɛmmafa azubɔdeɛ mgbane biala bɛfinde me nyunlu; mekyi bɛ ɛyɛlɛ evuanlɛ ne. Memkpondɛ kɛ menwu Siane Fofolɛ Ɛvoyialilɛ ne nee bɛ Ɛnwomenlelielɛ Kenle ɛzonlenlɛ ne mɔ. Memkpondɛ kɛ menwu ɛtanema ayia biala.

Yizikeɛle Buluku ne 4:14

Na membuale kɛ, “Kyɛkyɛ, Awulae Nyamenle! Nɔhalɛ, ɔvi me ngakula nu toonwo mɔɔ yeradwu ɛnɛ la metɛdile debie mɔɔ ɔdaye ɔ ngome yewu anzɛɛ nane kpole bie ɛtete ye nu la, yɛɛ debie nvoanle biala ɛtɛkpulale me nloa na evinli aha me.”

Yizikeɛle Buluku ne 45:17

Ɔle belemgbunli ne gyima kɛ ɔwɔ kɛ ɔfa ɛyelalɛ azubɔdeɛ ne mɔ, ma azubɔdeɛ ne mɔ nee nza azubɔdeɛ ne mɔ ɔmaa, wɔ ɛvoyia ne mɔ ɛlilɛ nu. Ɛvoyia ne mɔ a le Siane fofolɛ nee Ɛnwomenlelielɛ Kenle ne mɔ, nee ɛvoyia mɔɔ ɛha mɔɔ Yizilayɛma di la. Ɔwɔ kɛ ɔfa ɛtane azubɔdeɛ ne mɔ, ma azubɔdeɛ ne mɔ, ɛyelalɛ azubɔdeɛ ne mɔ nee anzonudwolɛ azubɔdeɛ ne mɔ ɔmaa na bɛfa bɛyɛ Yizilayɛma ati mgbɔdalɛ nzɛlɛlɛ.”

Sɛlɛ 16:31

Ɔle Ɛnwomenlelielɛ Kenle mɔɔ hyia maa bɛ a, na ɔwɔ kɛ bɛkye ɛhɔne kenle zɔhane. Ɛhye le mɛla mɔɔ wɔ ɛkɛ ne dahuu a.

Emɔzo Buluku ne 8:5

na bɛka kɛ, “Kenlenzu a siane fofolɛ ɛvoyialilɛ ne kɛwie na yɛanyia adenle yɛadɔne yɛ abɛlɛ a? Kenlenzu yɛɛ Ɛnwomenlelielɛ Kenle ne kɛze na yɛanyia adenle yɛadɔne yɛ hwiiti, yɛanyia adenle yɛazi yɛ ‘yifa’ ɛzuzudeɛ ne abo na yɛawodo yɛ ‘hyikɛle’ ɛzuzudeɛ ne anu, na yɛawua mɔɔ yɛfa tone yɛazuzu la anu,

Mosisi Buluku ne mɔɔ tɔ zo nna mɔɔ bɛfɛlɛ ye Ɛdianlɛ 10:10

Wɔ fɛlɛkolilɛ nu noko, Siane Fofolɛ Ɛvoyia ne mɔ nee ɛvoyia ngakyile ne mɔ ɛlilɛ nu, bɛwu aweɛne ndendenle ne mɔ anu bɛgua ɛyelalɛ azubɔdeɛ ne mɔ azo, nee bɛ anzonudwolɛ azubɔdeɛ ne mɔ azo, na mebaboa bɛ. Medame a mele Ɛdɛnkɛma bɛ Nyamenle ne a.”

Edwɛkpa ne kɛmɔ Mateyu hɛlɛle la 15:11

Tɛ mɔɔ kɔ sonla nloa nu la a gua ɔ nwo evinli a, na mɔɔ vi ɔ nloa nu finde la a gua ɔ nwo evinli a.”

Edwɛkpa ne kɛmɔ Maake hɛlɛle la 7:19

ɔluakɛ ɔngɔ ye ahonle nu na ɔkɔgua ɔ kunlu na ɔfa ye aze ɔse.” (Ɛhye mɔɔ Gyisɛse hanle la kile kɛ aleɛ biala bɛdi.)

Ɛzoanvolɛma Gyima ne 15:20

Bɛmaa yɛhɛlɛ kɛlata yehɔmaa bɛ kɛ bɛhwe bɛ nwo bɛvi ninyɛne mɔɔ anwo ɛnde, mɔɔ le kɛ aleɛ mɔɔ bɛva bɛkpa munzule anzɛɛ bɛva bɛzɔ amonle la anwo, nee ninyɛne mɔɔ le kɛ adwɔmane ɛbɔlɛ nee nane mɔɔ bɛlofo ye bɛhu ye na bɛampɛ ɔ kɔme la ɛlilɛ nee mogya nwo.

Wulo 14:10

Saa ye zɔhane a ɛnee wɔmɔ, duzu ati a ɛkɛbua ɛ gɔnwo ndɛne a? Ɛdawɔ noko, duzu ati a ɛkɛtoto ɛ gɔnwo anwo nyɛlɛ ɛ? Yɛ muala yɛbagyinla Nyamenle ndɛnebualɛ ebia ne anyunlu.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 4:10

Bɛsie kenle, siane, ɛlobɔ, yɛɛ ɛvolɛ mɔɔ ko biala ɛvoyia dwu a bɛdi na bɛkyi ɔ nloa a.

Kɔlɔ 2:20

Saa bɛ nee Kelaese ɛwu na bɛnyia bɛ ti wɔ awozinli ewiade ye sunsum nu tumima ne mɔ asa anu a, ɛnee akee duzu ati a bɛbɔ bɛ ɛbɛla kɛ asɛɛ bɛde aze bɛmaa ewiade ɛ? Duzu ati a bɛdi mɛla anzɛɛ ngyehyɛlɛ mɔɔ le kɛ,

Kɛlata mɔɔ bɛhɛlɛle bɛhɔmanle Hibuluma la 13:9

Bɛmmamaa ngilehilelɛ ngakyile biala twe bɛ fi adenle kpalɛ ne mɔɔ bɛlua zo la azo. Ɔle kpalɛ kɛ yɛkɛmaa Nyamenle ɛlolɛ ne kɛmaa yɛ ɛkɛla nwo kɛyɛ se tɛla kɛ yɛkɛli aleɛ nwo ngyehyɛlɛ zo la, ɔluakɛ bɛdabɛ mɔɔ bɛlile ngyehyɛlɛ zɛhae mɔ anzi la, yeamboa bɛ.

Kɛlata mɔɔ bɛhɛlɛle bɛhɔmanle Hibuluma la 9:10

Aleɛ nee nza nee bɛ nwo ɛnluanlɛ ngakyile nwo nyɛleɛ yɛɛ bɛyɛ a. Na ɛhye noko le ɛnyelɛ zo debie mɔɔ wɔ ɛkɛ a, kɔkpula mekɛ mɔɔ Nyamenle kɛhakyi ninyɛne kɔsɔɔti fofolɛ la.

Gyemise Kɛlata ne 4:11

Mediema Keleseɛnema, bɛmmakeha bɛ gɔnwo mɔ anwo edwɛkɛ ɛtane ɛtane. Mɔɔ ka ɔ diema anwo edwɛkɛ ɛtane anzɛɛ bua ye ndɛne la tia mɛla ne na eza ɔbua mɛla ne ndɛne. Na saa ɛbua mɛla ne ndɛne a, ɛnee ɔkile kɛ ɛnli mɛla ne azo bieko, na ɛle ye ndɛnebuavolɛ.

1 Sam 20:18

Na Dwɔnatan zele ye kɛ, “Kɛmɔ ɛhyema le Siane Fofolɛ Ɛvoyia la, saa wɔamba ɛkponledolɛ ne bie a, awie biala banwu ye, ɔluakɛ wɔ ebia ne bagyinla ɛkɛ ne mgbane.

1 Sam 20:5

Devidi zele Dwɔnatan kɛ, “Ɛhyema le Siane Fofolɛ Ɛvoyia na ɔnle kɛ ɔkpa me ti. Ɔwɔ kɛ mekɔ belemgbunli sua nu me nee ye kɔkpula yɛ sa. Na saa ɔyɛ wɔ ɛhulolɛ a, ɛnee maa me adenle maa menriandi mengɔnvea fienemgbole ne anu lɔ toonwo kenle nsa ne azo nɔsolɛ nu.