Emɔzo Buluku ne 9:8 - BAEBOLO ANZƐƐ BULUKU NWUANZANWUANZA

⁸ Medame, Awulae Nyamenle, melɛnea ɛtane belemgbunli maanle Yizilayɛ, na mebazɛkye ye, meaye ye meavi azɛlɛ ye azo. Noko menrɛzɛkye Gyekɔbo abo zo amra ne amuala.

Emɔzo Buluku ne 9:8 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 6:7

na ɔhanle kɛ, “Mebɔ sonla mɔɔ mebɔ la abo zo bɔkɔɔ wɔ azɛlɛ ye azo. Mesɛkye debie biala mɔɔ mebɔ la, sonla, nane, ninyɛne mɔɔ twenle bɛ nwo aze la, yɛɛ nloma muala. Menlu me nwo bɔbɔ kɛ mebɔ bɛ a.”

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 7:4

Ɔluakɛ ɛnɛ anwo zo kenle nsuu, mebamaa ezule kpole bie adɔ nɔɔzo nee ewiazo kenle abulanla, azɛkye ninyɛne mɔɔ mebɔ la amuala.”

1 Arl 13:34

Ɛtane ɛhye mɔɔ Gyɛlɔbowam yɛle la manle nzinlii ye ebialilɛ ne bɔle aze na ɔ bo zo bɔle bɔkɔɔ.

Mrɛlɛbulɛ Buluku ne 15:3

Ɛdɛnkɛma anye wɔ ɛleka biala, ɔnwu mɔɔ le kpalɛ nee mɔɔ le ɛtane la amuala.

Mrɛlɛbulɛ Buluku ne 5:21

Ɔluakɛ sonla nrenya biala ɛbɛlabɔlɛ la Ɛdɛnkɛma anyunlu, yɛɛ ɔneɛnlea sonla ndenle kɔsɔɔti anu.

Gyɛlɛmaya Buluku ne 30:11

Ɔluakɛ me nee bɛ lua kɛ medie bɛ ngoane; mebazɛkye maanle maanle mɔɔ memkpondenle bɛ zo la kɔsɔɔti, na bɛmɛ, menrɛbɔ bɛ bo zo; bɛnrɛva bɛ nwo dwɔɔ ɛdeɛ, noko mebazuzu meadea bɛ. Medame Ɛdɛnkɛma a mese a.”

Gyɛlɛmaya Buluku ne 44:27

Bɛnlea, bɛnrɛkpazi ɛlɛ, munzule ala a bado bɛ a. Bɛdabɛ Dwudama mɔɔ bɛpɛ bɛli Yigyibiti la amuala bawu konle nee ɛhɔne nu kɔkpula kɛ bɛ bo zo kɛbɔ bɔkɔɔ la.

Gyɛlɛmaya Buluku ne 46:28

O me akɛlɛ Gyekɔbo, mmasulo, me nee wɔ lua. Mebazɛkye maanle maanle mɔɔ menvoanle wɔ memanle ɛhɔle nu la kɔsɔɔti, na wɔmɔ, menrɛzɛkye wɔ. Mebazuzu meadea wɔ, ɛnrɛva ɛ nwo dwɔɔ. Medame, Ɛdɛnkɛma a mese a.”

Gyɛlɛmaya Buluku ne 5:10

Bɛhɔzɛkye ye vanye ɛya ne, na bɛmmasɛkye bɛ bɔkɔɔ; bɛpepɛ ye ngane ne mɔ bɛgua, ɔluakɛ bɛnle Ɛdɛnkɛma ɛdeɛ.

Hozia Buluku ne 1:4

Ɛdɛnkɛma zele Hozia kɛ, “To ye ‘Gyɛzelii’ ɔboalekɛ ɔnrɛhyɛ biala na meadea Yizilayɛ belemgbunli ne wɔ mogya mɔɔ ɔ nlenya Gyɛhu hanle guale wɔ Gyɛzelii la anwo. Mefa Gyɛhu belemgbunlililɛ ne meara awieleɛ.

Hozia Buluku ne 1:6

Gomɛ nrenzɛle bieko na ɔwole ralɛ raalɛ. Ɛdɛnkɛma zele Hozia kɛ, “To ye ‘Bɛnzeyeanwunvɔne,’ ɔluakɛ menrɛze Yizilayɛma anwunvɔne bieko, yɛɛ menrɛva bɛ ɛtane ne mɔ menrɛhyɛ bɛ fee.

Dwowɛle Buluku ne 2:32

Na ɔbara kɛ bɛdabɛ mɔɔ bɛkɛvɛlɛ Ɛdɛnkɛma la bɛbalie bɛ ngoane, ɔluakɛ wɔ Zayɔn Boka nee Gyɛlusalɛm, bie mɔ bavi ɛsalɛ, kɛmɔ Ɛdɛnkɛma ɛha la, na bɛdabɛ mɔɔ bɛbaha la anu yɛɛ bɛdabɛ mɔɔ Ɛdɛnkɛma bavɛlɛ bɛ la wɔ a.”

Emɔzo Buluku ne 3:12

Ɛdɛnkɛma se, “Kɛmɔ awenade kye boane na mboaneneavolɛ ne kɔ ye ɛlielɛ a debie mɔɔ ɔnwu ye ala la a le ye ndwɛlɛ nwiɔ anzɛɛ ɔ nzo ko la, zɔhane ala yɛɛ Yizilayɛma mɔɔ de Samɛlea la ɛlielɛ bayɛ a; bɛbanwu ebia mɔɔ bɛda nu la ebule na bɛanwu ɛkpa sinli.

Emɔzo Buluku ne 7:17

Yemɔti, Amazaya, Ɛdɛnkɛma se menga mengile wɔ kɛ, ‘Ɛ ye bayɛ tuutuu ala suakpole ye azo, yɛɛ ɛ mra mrenya nee ɛ mra mraalɛ badɔ dadeɛ nloa. Bɛbahyɛ wɔ azɛlɛ ne bɛamaa awie mɔ, yɛɛ ɛdawɔ mumua ne ɛbawu menli mɔɔ ɛnze Nyamenle la maanle nu. Na Yizilayɛma ɛdeɛ, bɛbahye bɛ bɛ nee bɛ avi bɛ maanle ye anu ahɔ nlɔnu.’ ”

Emɔzo Buluku ne 9:10

Bɛdabɛ ɛtanevolɛma mɔɔ bɛwɔ me menli ne avinli mɔɔ bɛka kɛ, ‘Nyamenle ɛnrɛmaa munzule biala ɛnrɛdo yɛ’ la badɔ dadeɛ nloa.”

Emɔzo Buluku ne 9:4

Saa bɛ kpɔvolɛma kye bɛ nuokɛ a, mebamaa bɛahu bɛ. Mezi pi kɛ mesɛkye bɛ, tɛ kɛ meboa bɛ ɔ.”

Mɛla 4:31

ɔluakɛ Ɛdɛnkɛma bɛ Nyamenle ne le Nyamenle mɔɔ se anwunvɔne a. Ɔnrɛye bɛ anrinli ɔnrɛdo bɛ sa nu, ɔnrɛzɛkye bɛ, yɛɛ ɔ rɛle ɛnrɛvi ngyekyeleɛ ne mɔɔ ɔ nee bɛ ze mɔ yɛle na ɔhanle ndane ɔdole zolɛ la.

Mɛla 6:15

ɔluakɛ Ɛdɛnkɛma bɛ Nyamenle ne mɔɔ wɔ bɛ avinli la le Nyamenle mɔɔ twe nungule a. Saa bɛyɛ ye zɔhane a, Ɛdɛnkɛma bɛ Nyamenle ne bava bɛ nwo ɛya na yeazɛkye bɛ, yeaminli bɛ bo zo bɔkɔɔ wɔ azɛlɛ ye azo.