Emɔzo Buluku ne 4:10 - BAEBOLO ANZƐƐ BULUKU NWUANZANWUANZA

¹⁰ “Memanle ewulenzane ne mɔɔ rale Yigyibiti la bie rale bɛ nwo zo. Mengunle bɛ mgbavolɛ wɔ konle nu na mengyele bɛ mgbɔnwɔ ne mɔ nuokɛ. Memanle bɛ avunli kpɔlɔlera ne mɔ nvoanle bɔnlebɔnlenle bɛ bonyi nu wɔ bɛ azokoɛleɛ ɛkɛ ne, noko bɛanzia bɛamba me nwo ɛkɛ.

Emɔzo Buluku ne 4:10 ပူးပေါင်းရင်းမြစ်များ

2 Arl 10:32

Mekɛ ne anu Ɛdɛnkɛma bɔle ɔ bo kɛ ɔpɛ Yizilayɛ azɛlɛ ne foa ko yeagua. Selea Belemgbunli Hazeeyɛle honle vale Yizilayɛ maanle ne,

2 Arl 13:3

Ɛdɛnkɛma vale Yizilayɛma anwo ɛya, ɔlua zo ɔyele bɛ ɔmanle Selea Belemgbunli Hazeeyɛle nee ɔ ra Bɛneheedade manle bɛlile bɛ nwo zo konim wɔ mekɛ biala mɔɔ bɛkɛnyia konle la.

2 Arl 13:7

Ɛnee Gyɛhowahaze ɛnlɛ ɛlɔnema mɔɔ ko maa ye kɛ ɛlɔnema mɔɔ tɛnla mgbɔnwɔ zo ko la abulanlu, menli mɔɔ fa ehwili ko la bulu yɛɛ ɛlɔnema mɔɔ dua aze la apenle bulu ala. Ɔboalekɛ ɛnee Seleama ɛhu Yizilayɛ ɛlɔnema ne amuala; bɛdinle bɛ kɛ sianlɛ.

2 Arl 8:12

Na Hazeeyɛle bizale ye kɛ, “Duzu ati a me menle akee ɛlɛsu a?” Yilaehya buale kɛ, “Ɔboalekɛ menwu ɛtane mɔɔ ɛbali wɔamaa Yizilayɛma la. Ɛbado senle wɔ bɛ aranemgbole ne mɔ anu, wɔahuhu bɛ mgbavolɛ nee ngakula kɔsɔɔti, na wɔatulutulu mraalɛ mɔɔ ɛva ɛkolɛ la anyalɛ.”

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 10:27

Na Ɛdɛnkɛma manle belemgbunli ne ahonle yɛle se, yemɔti yeammaa bɛangɔ.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 10:3

Yemɔti Mosisi nee Aalɔn hɔle belemgbunli ne ɛkɛ hɔzele ye kɛ, “Kɛ Ɛdɛnkɛma, Hibuluma Nyamenle ne se la ɛne, ‘Kenlenzu yɛɛ ɛkɛkpo kɛ ɛnrɛmemaa ɛ nwo zo ɛnrɛhile me a? Maa me menli ne ɛhɔ, amaa bɛazonle me.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 14:4

Mebamaa belemgbunli ne ahonle ayɛ se, na yeadoa bɛ, na meanyia anyunlunyia wɔ belemgbunli ne nee ye ɛlɔnema ne kɔsɔɔti anyunlu, amaa Yigyibitima anwu kɛ medame a mele Ɛdɛnkɛma a.” Na Yizilayɛma yɛle mɔɔ bɛhanle bɛhilele bɛ la.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 15:26

Ɔzele bɛ kɛ, “Saa bɛtie medame Ɛdɛnkɛma, bɛ Nyamenle ne me ne, bɛyɛ debie mɔɔ sɔ me nye, bɛdi me mɛla nee me ngyehyɛlɛ ne mɔ azo a, ewule ngakyile mɔɔ memanle ɔrale Yigyibitima anwo zo la, menrɛmaa bie ɛnrɛra bɛ nwo zo; ɔluakɛ medame a mele Ɛdɛnkɛma mɔɔ metondo bɛ ewule a.”

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 8:19

Ngonyiama ne hanle hilele belemgbunli ne kɛ, “Nyamenle asa ɛrɛlɛsɛka ko bɔbɔ ɛhye o! Nyamenle a ɛyɛ ɛhye a.” Na belemgbunli ne zile ye ɛbolɛ na ɔyɛle dapele. Yeammaa menli ne angɔ, kɛmɔ Ɛdɛnkɛma hanle la.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 9:12

Na Ɛdɛnkɛma manle belemgbunli ne ahonle yɛle se, yeandie bɛ edwɛkɛ, kɛmɔ Ɛdɛnkɛma hanle hilele Mosisi ala la.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 9:17

Noko ɛtɛmemaa ɛ nwo zo ɛtɛkile me menli ne, ɛnrɛmaa bɛnrɛhɔ.

Ayezaya Buluku ne 34:3

Bɛbavuandi bɛ menli mɔɔ bɛhu bɛ la bɛagua, bɛnrɛzie bɛ; bɛ mogya bazonyi awoka ne mɔ azo na bɛ avunli ne mɔ abɔ nvoanvoa.

Ayezaya Buluku ne 50:11

Bɛdabɛ mɔɔ bɛwuda menli nzi senle, na bɛsɔ menli nwo tɛkɛ la, bɛnlea! Bɛlua bɛ senle ne mɔɔ bɛwuda, nee bɛ tɛkɛ ne mɔ wienyi ne anwo bɛhɔ! Debie mɔɔ bɛbanyia ye bɛavi me ɛkɛ ne la ɛne: nyane ala a baha bɛ a.

Ayezaya Buluku ne 9:12

Seleama mɔɔ vi aduduleɛ bara yɛɛ Filisitiama mɔɔ vi adɔleɛ bara la ɛbuke bɛ nloa anu wanaanwo kɛ bɛbahye Yizilayɛma bɛali. Ɛhye mɔ amuala anzi, Ɛdɛnkɛma ɛya ne ɛnrɛdwo; ɔbadenrɛ ɔ sa yeadea bɛ.

Ayezaya Buluku ne 9:13

Yizilayɛma annu bɛ nwo kɛ Tumivolɛ Ɛdɛnkɛma ɛdea bɛ a, yɛɛ bɛamkpondɛ ɔ bo zo.

Ayezaya Buluku ne 9:17

Zɔhane ati Awulae anye ɛnlie bɛ mgbavolɛ ne mɔ anwo, yɛɛ ɔnlɛ anwunvɔnezelɛ ɔmmaa bɛ ahunlanvolɛ mraalɛ nee bɛdabɛ mɔɔ bɛnlɛ bɛ ze mɔ la. Ɔluakɛ awie biala ɛnze Nyamenle na ɔbɔ munzule ɛbɛla, yɛɛ awie biala ka ɛtane. Ɔlua ɛhye mɔ ati Ɛdɛnkɛma ɛya ne ɛnrɛdwo, ɔbahɔ zolɛ yeadenrɛ ɔ sa yeadea bɛ.

Gyɛlɛmaya Buluku ne 11:22

Yemɔti Tumivolɛ Ɛdɛnkɛma se, “Mebadea bɛ! Bɛ mgbavolɛ badɔ konle nu; bɛ mra mrenya nee bɛ mra mraalɛ bawu ɛhɔne nu. Bɛ bo zo babɔ.

Gyɛlɛmaya Buluku ne 15:3

Mebamaa ninyɛne mgbole nna asisi bɛ nwo zo azɛkye bɛ, medame Ɛdɛnkɛma a mese a. Bɛbahu bɛ konle nu, ahwea batete bɛ avunli, nloma basuso bɛ nwonane, yɛɛ nanemgbole bali bɛ nwonane bɔkɔɔ.

Gyɛlɛmaya Buluku ne 16:4

Ewule ɛzulolɛ bie a bahu bɛ a. Bɛwu a bɛnrɛzu bɛ yɛɛ bɛnrɛzie bɛ; bɛ avunli bagua azɛlɛ ye azo mgbane mgbane akpɔlɔ. Bɛbahu bie mɔ konle nu, yɛɛ ɛhɔne ngome bahu bie mɔ; bɛ avunli bayɛ nloma nee nanemgbole aleɛ.

Gyɛlɛmaya Buluku ne 18:21

Zɔhane ati, Ɛdɛnkɛma, maa ɛhɔne ngome ɛhu bɛ mra; maa bɛwu dadeɛ nloa. Maa bɛ ye mɔ ɛyɛ mota na bɛyɛ ahunlanvolɛ. Maa anwonyane ɛbɔ mrenya ne mɔ ɛhu bɛ, na mgbavolɛ ne mɔ ɛwu konle nu.

Gyɛlɛmaya Buluku ne 48:15

Mɔɔ babɔ Mowabe nee ye azuamgbole la ɛra; bɛhu bɛ mgbavolɛ ngɛnlɛma ne mɔ. Medame Belemgbunli, mɔɔ me duma a le Tumivolɛ Ɛdɛnkɛma la a mese a.

Gyɛlɛmaya Buluku ne 49:26

Yemɔti ye mgbavolɛ mɔɔ wɔ zolɛ la badɔ amolɛ nu wɔ bɛ ɛleka kpatawienyi ne mɔ, yɛɛ bɛbahu ye ɛlɔnema ne amuala kenle ko ne. Medame Tumivolɛ Ɛdɛnkɛma a mese a.

Gyɛlɛmaya Buluku ne 5:3

O Ɛdɛnkɛma, wɔmɔ ɛkulo nɔhalɛ. Ɛdeanle bɛ, na yɛanyɛ bɛ nyane; ɛhanle bɛ senle, noko bɛangakyi. Bɛsolo bɔkɔɔ; bɛtɛnunle bɛ nwo.

Gyɛlɛmaya Buluku ne 6:11

Yemɔti ɛya mɔɔ wɔva ye bɛ nwo la ɛwolowolo me, Ɛdɛnkɛma. Mengola ye me kunlu di.” Nzinlii Ɛdɛnkɛma zele me kɛ, “Wola me ɛya ne gua ngakula mɔɔ wɔ guabile ne mɔ azo, nee mgbavolɛ mɔɔ ɛyia la anwo zo. Bɛbahye kunli nee yelɛ, mgbanyinli nee mrelera bɛahɔ.

Gyɛlɛmaya Buluku ne 9:22

Se bɛ kɛ, Ɛdɛnkɛma se: “Azɛlɛ ne azo bayɛ avunli ngome kɛ nyɛmoa ebinli mɔɔ ɛyɛ totɔɔ wɔ ɛya avule ne mɔ anu la, kɛ ma mɔɔ bɛde bɛkyekye bɛ avile bɛgua, na menli ɛnle ɛkɛ mɔɔ soa la.”

Hozia Buluku ne 11:5

“Bɛkpole kɛ bɛnrɛzia bɛnrɛra me nwo bieko, yemɔti bɛbazia bɛahɔ Yigyibiti, na Aselea bazie bɛ.

Dwowɛle Buluku ne 2:20

Mebavoa abɛbɛ ɛlɔne ne mɔɔ vi sɔlɔ rale la, mebavoa bie mɔ meahɔgua ɛsɛlɛ ne azo lɔ. Mebavoa bɛ ɛlɔne ne mɔɔ lumua la meahɔgua Nyevile Wulera ne anu, na meavoa mɔɔ li bɛ nzi la meahɔgua Mɛdetɛlenia Nyevile ne anu. Bɛ avunli ne mɔ babɔ, ɔluakɛ ninyɛndane mɔɔ bɛyɛ la le kpole.

Sɛlɛ 26:16

mɔɔ mebava meayɛ bɛ la ɛne: Mebamaa ɛzulolɛ kpole bie araheda bɛ nwo zo, meamaa ewule mɔɔ maa nwonane wie la, nee ebunlu fufule aha bɛ, azi bɛ nye na yeahu bɛ. Bɛbalua ma na bɛnrɛnyia bie, ɔluakɛ bɛ kpɔvolɛma barali.

Sɛlɛ 26:25

Mebamaa ɛlɔnema ara bɛ nwo zo na bɛahu bɛ bɛadua me ngyekyeleɛ ne mɔɔ bɛtulu ye la abo zo. Saa bɛnriandi bɛkɔfea bɛ azuamgbole zo a, mebava ewule meado bɛ nwo, meamaa bɛ kpɔvolɛma asa aha bɛ.

Emɔzo Buluku ne 4:6

Ɛdɛnkɛma se, “Medame a memanle ɛhɔne zile bɛ azuamgbole ne mɔ azo na aleɛ wiele bɛ azua nu a, noko bɛanzia bɛamba me ɛkɛ.

Emɔzo Buluku ne 8:3

Kenle zɔhane edwɛne mɔɔ bɛto wɔ suakunlu ɛkɛ ne la amuala bahakyi awolɛyelɛ. Ɛleka biala bayɛ avunli ngome, bɛbayɛ koonwu bɛavuandi bɛ bɛagua.”

Hagae Buluku ne 2:17

Menvale anwoma anu wuluwulu, adubue, yɛɛ ezuawolɛ menzɛkyele bɛ nee debie biala mɔɔ bɛyɛle la, noko bɛanzia bɛamba me nwo ɛkɛ.

Mɛla 28:21

Ɔbamaa ewule nee ewulenzane adɔ bɛ nwo kɔdwu kɛ bɛ muala bɛkɛwie wu wɔ azɛlɛ ne mɔɔ bɛlɛkɔ bɛahɔva bɛayɛ bɛ ɛdeɛ la azo.

Mɛla 28:22

Ɛdɛnkɛma bamaa avinli ewule adɔ bɛ nwo ahu bɛ. Ɔbamaa ebunlu ahye bɛ, bɛ nwo anwunwu. Ɔbavi ewia katekate yeadua ezule, na yeamaa ahumu kpole mɔɔ anu dɔ la ayela bɛ egyinli nu ninyɛne. Debie zɛhae bahɔ zolɛ toonwo yeahɔdwu kɛ ɔkɛzɛkye bɛ muala la.

Mɛla 28:60

Eza ɔbamaa ewule ngakyile ne mɔ mɔɔ wɔ Yigyibiti mɔɔ bɛsulo bɛ la ara bɛ nwo zo na yeaha bɛ nwo.

Mɛla 7:15

Ɛdɛnkɛma baye bɛ nwo ewule kɔsɔɔti ahɔ, Yigyibiti ewule ɛzulolɛ ne mɔ, mɔɔ bɛdabɛ bɛze la, ɔnrɛmaa bie ɛnrɛha bɛ, noko ɔbamaa bie aha menli mɔɔ kpɔ bɛ la.