Ɛzoanvolɛma Gyima ne 26:18 - BAEBOLO ANZƐƐ BULUKU NWUANZANWUANZA

¹⁸ Mesoa wɔ, amaa wɔahɔbuke bɛ nye na wɔahwe bɛ wɔavi awozinli nu nee Seetan tumi ne abo wɔara wienyi nu nee Nyamenle ɛkɛ, amaa ɔlua bɛ diedi mɔɔ wɔ me nu la azo bɛanyia ɛtanefakyɛ na bɛanyia ɛleka wɔ Nyamenle menli ne mɔɔ yekpa nu yeye bɛ la avinli.’

Ɛzoanvolɛma Gyima ne 26:18 ပူးပေါင်းရင်းမြစ်များ

Edwɛndolɛ Buluku ne 119:18

Buke me nye, amaa meanwu nwanwane ninyɛne mɔɔ wɔ wɔ mɛla ne anu la.

Edwɛndolɛ Buluku ne 146:8

ɔtukue mɔɔ anye ɛzi la anye. Ɛdɛnkɛma dwazo bɛdabɛ mɔɔ bɛgua aze la; ɔkulo bɛdabɛ mɔɔ bɛle tenlene la.

Ayezaya Buluku ne 29:18

Mekɛ ne anu anzondilirama bade buluku nu edwɛkɛ, na anyenzinlirama vi bɛ awozinli kabii ne anu anwu debie.

Ayezaya Buluku ne 32:3

Akee menli mɔɔ anye nwu debie la anye zo bade kpalɛ, yɛɛ bɛdabɛ mɔɔ bɛ nzo te edwɛkɛ la badie.

Ayezaya Buluku ne 35:5

Anyenzinlirama anye badukue, anzondilirama anzo badukue.

Ayezaya Buluku ne 42:16

“Mebahile anyenzinliravolɛma adenle, wɔ adenle mɔɔ bɛdabɛ bɛnze la anu, adenle mɔɔ bɛtɛfale zolɛ ɛlɛ la azo yɛɛ mebava bɛ mealua a. Mebamaa awozinli ne mɔɔ wɔ bɛ nyunlu la ayɛ wienyi, na ɛleka ahuhunduu ne mɔ ayɛ azɛlɛ sɛsɛ. Ninyɛne mɔɔ mebayɛ la ɛne, yɛɛ menrɛkpo bɛ.

Ayezaya Buluku ne 42:7

Ɛbadukuedukue mɔɔ anye ɛzi la anye, na wɔaye bɛdabɛ mɔɔ bɛhye bɛ nuokɛ bɛgua efiade anu awozinli nu la.

Ayezaya Buluku ne 43:8

Nyamenle se, “Bɛva menli ne mɔɔ lɛ ɛnyelɛ, noko bɛ nye ɛzi, bɛlɛ ɛnzonlɛ, noko bɛ nzo ɛdi la bɛrɛla.

Ayezaya Buluku ne 49:6

“Ɔnyɛ se kɛ ɛkɛyɛ me sonvolɛ, na ɛkɛva Yizilayɛma mɔɔ ɛha la ɛkɛzie bɛ gyinlabelɛ dɛba ne. Mebamaa wɔayɛ maanle maanle ne mɔ kɛnlaneɛ, amaa me ngoanelielɛ ne adwu ewiade ɛleka biala.”

Ayezaya Buluku ne 9:2

Menli ne mɔɔ luale awozinli nu la ɛnwu wienyi kpole bie; bɛdabɛ mɔɔ bɛdɛnlanle awozinli kabii azɛlɛ zo la, wienyi ɛda bɛ nwo zo.

Malakae Buluku ne 4:2

Na bɛmɛ mɔɔ bɛsulo me la, pɛlepɛle sɛnzɛne mɔɔ le ayile la badudu bɛ nwo zo. Na bɛbavinde wienyi nu na bɛawuluwulu kɛ nlankɛ mralɛ mɔɔ bɛye bɛ bɛvi tunli nu la.

Edwɛkpa ne kɛmɔ Mateyu hɛlɛle la 4:10

Gyisɛse buale kɛ, “Seetan, dwazo ɛkɛ ne kɔ! Ɔluakɛ bɛhɛlɛ kɛ, ‘Yeyɛ Awulae wɔ Nyamenle ne na sonle ɔdaye ɔ ngome ala!’ ”

Edwɛkpa ne kɛmɔ Mateyu hɛlɛle la 4:16

Bɛmɛ mɔɔ bɛde awozinli nu la, bɛbanwu wienyi kpole bie! Bɛmɛ mɔɔ bɛde ewule alubo nu la, wienyi bada bɛ nwo zo.”

Edwɛkpa ne kɛmɔ Luku hɛlɛle la 1:77

na wɔamaa ye menli ne anwu kɛ bɛbava bɛ ɛtane bɛahyɛ bɛ na bɛalie bɛ ngoane.

Edwɛkpa ne kɛmɔ Luku hɛlɛle la 1:79

ye wienyi ne bada bɛdabɛ mɔɔ bɛde awozinli nu nee bɛdabɛ mɔɔ bɛlɛkɔ ewule nu la anwo zo, na yealie yɛ yeava anzonudwolɛ adenle ne azo.”

Edwɛkpa ne kɛmɔ Luku hɛlɛle la 2:32

Ɔle wienyi mɔɔ baye wɔ ɛhulolɛdeɛ ne yeahile menli mɔɔ ɛnle Dwuuma la, na yeava anyunlunyia yearɛlɛ wɔ menli Yizilayɛma.”

Edwɛkpa ne kɛmɔ Luku hɛlɛle la 24:45

Akee ɔbukele bɛ adwenle ɔmanle bɛdele Nyamenle Edwɛkɛ ne abo,

Edwɛkpa ne kɛmɔ Luku hɛlɛle la 24:47

Akee bɛbɔ ɔ bo wɔ Gyɛlusalɛm ɛke bɛva me duma bɛbɔ anlubɛnwo nolo bɛhile maanle maanle kɔsɔɔti, na saa bɛdie bɛdi a, Nyamenle ava bɛ ɛtane ahyɛ bɛ.

Edwɛkpa ne kɛmɔ Luku hɛlɛle la 4:18

“Awulae Sunsum ne wɔ me nwo zo, ɔboalekɛ yekpa nu yeye me kɛ menva Edwɛkpa ne membɛlɛ ehyianvolɛma. Yezoa me kɛ membɔ fanwodi nwo nolo mengile bɛdabɛ mɔɔ bɛhye bɛ nuokɛ la, na memaa anyenzinliravolɛma ɛnwu debie. Menye bɛdabɛ mɔɔ bɛlɛsisi bɛ la menvi anwongyelelɛ nu,

Dw 17:17

Dua nɔhalɛ ne azo te bɛ nwo na fa bɛ yɛ wɔ ɛdeɛ; wɔ edwɛkɛ ne a le nɔhalɛ ne.

Dw 3:19

Kɛ ndɛnebualɛ ne de la ɛne: wienyi ne ɛra ewiade ye na bɛ ninyɛndane ti, menli kulo awozinli tɛla wienyi ne.

Dw 4:10

Gyisɛse buale kɛ, “Saa ɛze kɛ Nyamenle ahyɛlɛdeɛ ne si de, nee ahenle mɔɔ ɛlɛsɛlɛ wɔ nzule ne la a, anrɛɛ wɔbiza ye wɔmaa yemaa wɔ ngoane nzule.”

Dw 4:14

na mɔɔ kɛnlo nzule ne mɔɔ mebava meamaa ye la bie la, nzuhɔne ɛnrɛhu ye ɛlɛ. Nzule ne mɔɔ mebava meamaa ye la bahakyi nzubula wɔ ye nu mɔɔ bamaa ye ngoane nzule nee ngoane mɔɔ ɛnlɛ awieleɛ a.”

Dw 8:12

Gyisɛse dendɛle hilele Falasiima ne bieko kɛ, “Mame a mele ewiade wienyi ne a. Awie biala mɔɔ kɛdoa me bo zo la kɛnyia ngoane nu wienyi ne, ɔnrɛlua awozinli nu ɛlɛ.”

Dw 9:39

Na Gyisɛse zele ye kɛ, “Membale ewiade kɛ mebabua ndɛne, amaa bɛdabɛ mɔɔ bɛ nye ɛzi la anwu debie, na bɛdabɛ mɔɔ bɛnwu debie la anye azi.”

Dw 9:5

Mewɔ ewiade ye anu ala la, medame a mele ewiade ye wienyi ne a.”

Ɛzoanvolɛma Gyima ne 10:43

Nyamenle kpɔmanvolɛma amuala ka ɔ nwo edwɛkɛ kɛ awie biala mɔɔ kɛlie ye kɛli la, ɔlua ye duma ne tumi zo bɛkɛva ye ɛtane bɛkɛhyɛ ye.”

Ɛzoanvolɛma Gyima ne 13:47

Ɔluakɛ Awulae zele yɛ kɛ, ‘Meyɛ bɛ kɛ kɛnlaneɛ memaa bɛdabɛ mɔɔ bɛnle Dwuuma la, amaa aleɛabo amra amuala anyia ngoane.’ ”

Ɛzoanvolɛma Gyima ne 15:9

Yeangile kɛ asolo yɛmɛ nee bɛmɛ. Ɔluale bɛ diedi zo yɛɛ ɔvale bɛ ɛtane ɔhyɛle bɛ a.

Ɛzoanvolɛma Gyima ne 2:38

Pita zele bɛ kɛ, “Bɛnlu bɛ nwo na bɛgyakyi ɛtane ɛyɛlɛ, na bɛmaa bɛzɔne bɛ wɔ Gyisɛse Kelaese duma nu, amaa bɛava bɛ ɛtane bɛahyɛ bɛ na bɛanyia Nyamenle ahyɛlɛdeɛ ne, mɔɔ le Sunsum Nwuanzanwuanza ne.

Ɛzoanvolɛma Gyima ne 20:21

Mengakyele Dwuuma nee bɛdabɛ mɔɔ bɛnle Dwuuma la amuala kɛ bɛnlu bɛ nwo wɔ bɛ ɛtane ne mɔ mɔɔ bɛyɛ bɛtia Nyamenle la anwo na bɛlie yɛ Awulae Gyisɛse bɛli.

Ɛzoanvolɛma Gyima ne 20:32

“Kɛkala mefa bɛ mewula Nyamenle nee ye edwɛkɛ ne mɔɔ ɛlolɛ wɔ nu la asa anu. Ɔdo bɛ ngoane nu na ɔva ye nyilalɛ ne mɔɔ yeva yezie ye menli ne ɛkɛ ne la ɔmaa bɛ.

Ɛzoanvolɛma Gyima ne 26:19

“Ɛhye ati, Belemgbunli Agelepa, meanyɛ anzosesebɛ wɔ anwuma ɛnyelɛzodeɛnwunlɛ ɛhye anwo.

Ɛzoanvolɛma Gyima ne 26:23

Ɔwɔ kɛ Mɛzaya ne nwu amaneɛ na ɔyɛ sonla mɔɔ lumua mɔɔ badwazo avi mɔwuamra anu, na yeabɔ wienyi nwo nolo yeahile Dwuuma nee bɛdabɛ mɔɔ bɛnle Dwuuma la amuala.”

Ɛzoanvolɛma Gyima ne 3:19

Zɔhane ati bɛnlu bɛ nwo na bɛzia bɛrɛla Nyamenle ɛkɛ, amaa yeava bɛ ɛtane ne mɔ amuala yeahyɛ bɛ,

Ɛzoanvolɛma Gyima ne 5:31

Na yemɔ yɛɛ Nyamenle ɛmaa ye zo ɛzie ye ye fema zo ɛyɛ ye Adenlekilevolɛ nee Dievolɛ kɛ ɔhile Yizilayɛma adenle ɔmaa bɛnlu bɛ nwo na bɛanyia ɛtanefakyɛ a.

Wulo 8:17

Na saa yɛle ɔ mra a, ɛnee yɛdi agya, yɛɛ ye ɛlolɛ ne mɔɔ yeva yezie ɛkɛ yemaa ɔ mra la yɛbanyia bie, na yɛ nee Kelaese ava mɔɔ Nyamenle ɛva ɛzie ɛkɛ ɛmaa ye la, ɔluakɛ saa yɛ nee Kelaese di nyane a yɛ nee ye kɛnyia ye anyunlunyia ne.

1 Kɔl 1:2

ɛlɛkɛlɛ kɛlata ɛhye a. Yɛlɛ yɛkamaa Nyamenle menli ne mɔɔ wɔ Kɔlente, mɔɔ Kelaese Gyisɛse ati bɛdu bɛ bɛzie ɛkɛ ne, na bɛvɛlɛ bɛ nee bɛdabɛ mɔɔ bɛwɔ ɛleka muala, mɔɔ bɛbɔ yɛ Awulae Gyisɛse Kelaese duma la, kɛ bɛrayɛ Nyamenle menli la.

1 Kɔl 1:30

Nyamenle ɛva bɛ nee Kelaese Gyisɛse ɛbɔ nu, na yemaa Kelaese ɛrayɛ yɛ nrɛlɛbɛ. Ɔ nwo zo yɛɛ yɛlua a yɛsɔ Nyamenle anye, yɛ nwo te na yɛyɛ alehelɛ a.

2 Kɔl 4:4

Bɛnlie bɛnli, ɔluakɛ ɛtane ewiade ɛhye nyamenle ne ɛzi bɛ adwenle ne anye. Ɔmmaa bɛnnwu wienyi ne mɔɔ ɛlɛta fi Edwɛkpa ne mɔɔ fane Kelaese, mɔɔ le Nyamenle sɔhovolɛ kpalɛ ne anyunlunyia ne anwo la.

2 Kɔl 4:6

Nyamenle ne mɔɔ zele kɛ, “Wienyi vi awozinli nu ɛda” la a le Nyamenle ko ne ala mɔɔ manle ye wienyi ne dale yɛ ahonle nu la, amaa yɛanwu Nyamenle anyunlunyia ne mɔɔ ɛlɛta Kelaese anyunlu la.

2 Kɔl 6:14

Bɛ nee bɛdabɛ mɔɔ bɛnlie Kelaese bɛnli la mmatu. Kɛ ɔkɛyɛ na kpalɛ nee ɛtane adila agɔnwolɛ ɛ? Kɛ ɔkɛyɛ na wienyi nee awozinli abɔ nu adɛnla ɛ?

Pɔɔlo Kɛlata mɔɔ ɔhɛlɛle ɔhɔmanle Galeehyeama la 2:20

Me nee Kelaese a bɛhunle yɛ wɔ meanubaka ne azo a, yemɔti saa mede ngoane nu a ɛnee tɛ medame ɔ, na Kelaese mɔɔ de me nu la ɔ. Ngoane ɛhye mɔɔ mede nu la, mede ye kɛ medie Nyamenle Ara ne mɔɔ hulole me na ɔdole ye ngoane aze ɔmanle me la medi la ati ɔ.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:14

Bɛhendanle Kelaese wɔ baka zo wɔ yɛmɛ yɛ ti, amaa ɔlua ɔ nwo zo bɛdabɛ mɔɔ bɛnle Dwuuma la bɛanyia nyilalɛ ne mɔɔ Nyamenle vale bɔle Ebileham ɛwɔkɛ la bie, na kɛmɔ yɛdie Kelaese yɛdi la ati yɛ muala yɛ sa aha ye Sunsum ne mɔɔ ɔvale ɔbɔle yɛ ɛwɔkɛ la.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 3:2

Bɛha ko ɛhye bɛmaa mendie, asoo mɛla ne mɔɔ bɛlile zo la ati a Nyamenle vale ye Sunsum ne manle bɛ a, anzɛɛ bɛdiele Edwɛkpa ne na bɛliele bɛlile la ati ɔ?

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:11

Debie biala mɔɔ Nyamenle yɛ la gyi ɔdaye ye ngyehyɛlɛ nee ye kpɔkɛ mɔɔ yebɔ la azo, na kɛmɔ mɔlebɛbo ne ɔdaye ɔhyehyɛle la, yelua yɛ nee Kelaese yɛ koyɛlɛ ne azo yekpa nu yeye yɛ kɛ yɛle ye ɛdeɛ.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:14

Sunsum ne di agyinlanu kɛ yɛbanyia mɔɔ Nyamenle ɛva ɛbɔ ye menli ɛwɔkɛ la; eza ɔmaa yɛsi pi kɛ Nyamenle bamaa menli mɔɔ le ye ɛdeɛ la anyia bɛ ti bɔkɔɔ. Bɛmaa yɛye ye anyunlunyia ne ayɛlɛ!

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:18

Mesɛlɛ kɛ bɛ adwenle nu kɛbuke, amaa bɛanwu anyelazo ne mɔɔ yevɛlɛ bɛ wɔ nu, ye nwanwane nyilalɛ ne mɔ mɔɔ ɔfa ɔbɔ ye menli ɛwɔkɛ la anu anwonyia ne

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 1:7

Ɔluakɛ Kelaese ewule ne ati bɛva yɛ ɛtane ne mɔ bɛhyɛ yɛ na yɛnyia yɛ ti. Nyamenle ɛlolɛ ne

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 2:8

Ɔluakɛ Nyamenle ɛlolɛ zo yɛɛ bɛ diedi ti yelie bɛ ngoane a.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 4:18

Menli zɔhane mɔ adwenle nu le awozinli, bɛnlɛ ndelebɛbo yɛɛ bɛmboka ngoane ne mɔɔ Nyamenle fa maa la anwo, ɔluakɛ bɛnze ɛhwee yɛɛ eza bɛ nzo yɛ se.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:11

Bɛmmayɛ awozinli nu nyɛleɛ mgbane mgbane ne mɔ mɔɔ menli yɛ na nvasoɛ ɛnle zolɛ la bie. Bɛnwu bie a anrɛɛ bɛha bɛdo gua.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:14

ɔluakɛ debie biala mɔɔ kɛla ali la, ɛnee yeyɛ wienyi. Yemɔti a bɛha ye kɛ, “Wɔmɔ mɔɔ wɔlafe a, tunwue na ɛvi mɔwuamra anu dwazo! Na Kelaese wienyi ne kɛda ɛ nwo.”

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:8

Dɛba ne ɛnee bɛwɔ awozinli nu, na ɛnɛ bɛyɛ Awulae menli; ɛhye ati bɛwɔ wienyi nu. Ɔwɔ kɛ bɛbɔ bɛ ɛbɛla kɛ menli mɔɔ wɔ wienyi nu la.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 6:12

Ɔluakɛ, tɛ menli a yɛ nee bɛ ɛlɛko a; sunsum nu tumivolɛma, ewiade arelemgbunli anzɛɛ maanlebuvoma, ewiade amra mɔɔ sie ɛnɛ mekɛ ye awozinli nu amra, yɛɛ sunsum nu anwuma ɛlɔnema amumuyɛ yɛɛ yɛ nee bɛ ɛlɛko a.

2 Tem 2:26

Na saa bɛ nye zo tete bɛ a bɛanriandi bɛavi Abɔnsam mɔɔ hyele bɛ manle bɛkpole Nyamenle ɛhulolɛdeɛ ne la ɛhane ne anu.

Kɛlata mɔɔ bɛhɛlɛle bɛhɔmanle Hibuluma la 10:10

Ɔlua ɛhye ati, kɛmɔ Gyisɛse Kelaese yɛle mɔɔ Nyamenle kpondɛ la, ye azu ne mɔɔ ɔvale ɔ nwo ɔyɛle azubɔdeɛ ɔbɔle ye kokye ne ala la ɛde yɛ nwo bɔkɔɔ ɛvi ɛtane nwo.

Kɛlata mɔɔ bɛhɛlɛle bɛhɔmanle Hibuluma la 10:14

Ɔluakɛ yeva azubɔlɛ kokye yemaa bɛdabɛ mɔɔ yede bɛ nwo la ɛli munli dahuu.

Kɛlata mɔɔ bɛhɛlɛle bɛhɔmanle Hibuluma la 11:6

Ɔyɛ se kɛ awie mɔɔ ɛnlɛ diedi la kɛhola kɛzɔ Nyamenle anye. Ɔluakɛ ɔwɔ kɛ awie mɔɔ ba Nyamenle ɛkɛ ne la die di kɛ Nyamenle wɔ ɛkɛ na ɔyila bɛdabɛ mɔɔ bɛkpondɛ ɔ bo zo la.

Kɛlata mɔɔ bɛhɛlɛle bɛhɔmanle Hibuluma la 9:15

Ɛhye ati Kelaese a le sonla mɔɔ de ngyekyeleɛ fofolɛ ne abo a, amaa bɛdabɛ mɔɔ Nyamenle ɛvɛlɛ bɛ la anyia ye nyilalɛ ne mɔɔ ɛnlɛ awieleɛ mɔɔ ɔvale ɔbɔle ɛwɔkɛ la bie. Ɛhye kola yɛ zɔhane, ɔboalekɛ bɛha mogya bɛgua, bɛva bɛye menli kɔsɔɔti bɛvi bɛ ɛtane mɔɔ bɛyɛle wɔ mekɛ mɔɔ bɛwɔ alumua ngyekyeleɛ ne abo la anu.

Gyemise Kɛlata ne 2:5

Me mediema kulovolɛma, bɛdie! Bɛdabɛ mɔɔ bɛle ehyianvolɛma wɔ aleɛabo la, bɛmɛ a Nyamenle ɛkpa nu ɛye bɛ, ɛyɛ bɛ diedi nu sukoavolɛma na bɛnyia Nyamenle belemgbunlililɛ ne, mɔɔ yeva yebɔ ɛwɔkɛ yemaa bɛdabɛ mɔɔ bɛkulo ye la a.

1 Pit 1:4

Ɔlua zolɛ yɛ nye la nyilalɛ bebelebe ne mɔɔ Nyamenle ɛva ɛzie ye menli ne la azo. Bɛmɛ bɛ ti, yeva nyilalɛ ɛhye mɔɔ ɛmkpɔlɔ, ɔnzɛkye, yɛɛ ɔndu anzɛɛ ɔmkpa la yezie anwuma lɔ yemaa bɛ.

1 Pit 2:25

Ɛnee bɛle kɛ mboane mɔɔ ɛminli la, na kɛkala bɛva bɛ bɛzia bɛra kɛ bɛrali Mboaneneavolɛ ne nee bɛ ɛkɛla sinzavolɛ ne anzi.

1 Pit 2:9

Bɛmɛ a bɛle menli mɔɔ Nyamenle ɛkpa nu ɛye bɛ a. Bɛle Belemgbunli ne sɛlɛvolɛma, maanle nwuanzanwuanza, Nyamenle ɔdaye ye menli mɔɔ yeboɔboa yekpondɛ bɛ bo zo na yevɛlɛ bɛ kɛ bɛvi awozinli nu bɛrɛla ye wienyi ne anu na bɛbɔ ye nwanwane gyima ne nolo a.

1 Dw 1:9

Nyamenle di ye ɛwɔkɛ zo, ɔdi pɛlepɛle. Saa yɛka yɛ ɛtane ne mɔ yɛkile ye a, ɔkɛva ɔkɛhyɛ yɛ na ɔkɛde yɛ nwo ɔkɛvi nyɛleɛ mɔɔ ɛndenrɛ la amuala anwo.

1 Dw 2:12

Me mra ngakula, melɛkɛlɛ bɛ, ɔboalekɛ ɔlua Kelaese ati, Nyamenle ɛva bɛ ɛtane ne mɔ ɛhyɛ bɛ.

1 Dw 3:8

Na awie biala mɔɔ yɛ ɛtane la le Abɔnsam ɛdeɛ, ɔluakɛ mɔlebɛbo ne Abɔnsam a lumuale yɛle ɛtane a. Deɛ mɔɔ yemɔti Nyamenle Ara ne rale la a le kɛ ɔbazɛkye Abɔnsam gyima biala mɔɔ yeli la.

1 Dw 5:19

Saa bɔbɔ Abɔnsam di ɛtane ewiade ye azo belemgbunli a, yɛze kɛ yɛmɛ yɛle Nyamenle menli.

Dwuudu Kɛlata ne 1:1

Medame Dwuudu, mɔɔ mele Gyisɛse Kelaese sonvolɛ nee Gyemise adiema la yɛɛ melɛkɛlɛ kɛlata ɛhye a. Melɛ mekamaa bɛdabɛ mɔɔ Nyamenle ɛvɛlɛ bɛ, na bɛde Egya Nyamenle ne ɛhulolɛ nu na Gyisɛse Kelaese wowa bɛ la amuala.

Yekile 21:27

Na debie biala mɔɔ anwo ɛnde la ɛnrɛhɔ suakpole ne azo. Zɔhane ala yɛɛ mɔɔ bɔ anyiemgba ɛbɛla na ɔbɔ adalɛ la ɛnrɛhɔ ɛkɛ a. Bɛdabɛ mɔɔ bɛhɛlɛ bɛ aluma wɔ Boaneralɛ ne teasema buluku ne anu la angome a bahɔ suakpole ne azo a.