Ɛzoanvolɛma Gyima ne 19:9 - BAEBOLO ANZƐƐ BULUKU NWUANZANWUANZA

⁹ Na kɛmɔ bie mɔ ahonle ɛsolo la ati, bɛ muala bɛanlie bɛanli. Bie mɔ dendɛle ɛtane tiale Awulae Adenle ne wɔ menli somaa ne anyunlu. Zɔhane ati Pɔɔlo gyakyile bɛ na ɔ nee diedima ne mɔ akee kɔtendɛ na ɔkilehile bɛ wɔ Taelanɛse sukulu sua ne anu alehyenlɛ biala.

Ɛzoanvolɛma Gyima ne 19:9 ပူးပေါင်းရင်းမြစ်များ

2 Arl 17:14

Noko bɛandie, yɛɛ bɛanli zolɛ. Bɛyɛle anzosesebɛ, kɛmɔ bɛ nlenya mɔ yɛle la; bɛanlie Ɛdɛnkɛma bɛ Nyamenle ne bɛanli.

2 Edk 30:8

Bɛmmayɛ anzosesebɛ kɛmɔ bɛ ze mɔ yɛle la. Bɛva bɛ nwo bɛmaa Ɛdɛnkɛma na bɛrɛla ye Ɛzonlenlɛ Sua ye mɔɔ yede nwolɛ wɔ melɛ mɔɔ ɛnlɛ awieleɛ la anu, na bɛrazonle Ɛdɛnkɛma bɛ Nyamenle ne, na ye ɛya kpole ne avi bɛ nwo zo.

2 Edk 36:16

Noko bɛhɔle zo bɛzile menli mɔɔ Nyamenle zoanle bɛ la amgbu, bɛkpole kɛ bɛnrɛdie bɛ edwɛkɛ ne, na bɛgolole Nyamenle kpɔmanvolɛma ne anwo toonwo bɛmanle Ɛdɛnkɛma vale ɛya kpole mɔɔ bɛyɛ ye ɛhwee a ɔnyɛ boɛ a.

Nihɛmaya Buluku ne 9:29

Ɛbɔle bɛ kɔkɔ kɛ bɛli wɔ ngilehilelɛ ne mɔ azo, na mgbanyizonle nu ala bɛkpole wɔ mɛla nee wɔ ngyehyɛlɛ ne mɔ; noko wɔ mɛla zo ɛlilɛ ne a le ngoane adenle ne a. Adubɛnwo nee anzosesebɛ nu, bɛkpole kɛ bɛnrɛli zolɛ.

Edwɛndolɛ Buluku ne 95:8

Bɛmmayɛ anzosesebɛ, kɛmɔ bɛyɛle wɔ Mɛleba, kɛmɔ mekɛ ne anu bɛyɛle wɔ Masa fienemgbole ne anu,

Mrɛlɛbulɛ Buluku ne 8:34

Sonla mɔɔ tie me ne, mɔɔ dahuu gyi me nlenkɛ mgbole nloa, na ɔkendɛ me wɔ me anuhɔlɛ la bali fɛlɛko.

Ayezaya Buluku ne 8:14

Na yemɔ yɛɛ ɔbayɛ ɛleka nwuanzanwuanza a. Ɔbayɛ bolɛ mɔɔ menli bava ɔ nwo ɛya, ɔbayɛ azekpolɛ bodane yeamaa Yizilayɛma nee Dwudama, yɛɛ ɔbayɛ ɛhane yeamaa Gyɛlusalɛmma.

Gyɛlɛmaya Buluku ne 19:15

“Tumivolɛ Ɛdɛnkɛma, Yizilayɛ Nyamenle ne se: Melɛfa munzule biala mɔɔ mezuzu kɛ mefa meadea suakpole ɛhye nee azua mɔɔ zuozua ye la amuala wɔ bɛ ɛtane ne mɔ ati la meara, ɔboalekɛ bɛbɔ kpɔkɛ kɛ bɛnrɛdie me edwɛkɛ.”

Gyɛlɛmaya Buluku ne 7:26

noko bɛandie me, anzɛɛ bɛangyea bɛ nzo bɔbɔ. Akee bɔbɔ bɛyɛle anzosesebɛ kpole kpalɛ bɛdɛlale bɛ ze mɔ.

Edwɛkpa ne kɛmɔ Mateyu hɛlɛle la 15:14

Bɛgyakyi bɛ! Bɛle mgbanyinli anyenzinliravolɛma mɔɔ kile anyenzinliravolɛma adenle a; anyenzinliravolɛ kile anyenzinliravolɛ adenle a, bɛ mu nwiɔ bɛgua kuma nu!”

Edwɛkpa ne kɛmɔ Mateyu hɛlɛle la 16:4

Adwuleso amra munzule mɔɔ ɛnze Nyamenle a! Bɛbiza me bɛanlea nwanwane sɛkɛlɛneɛ? Bɛnrɛnwu bie! Mɔɔ bɛkɛnwu ye la ala a le Dwona ɛdeɛ ne.” Na Gyisɛse vile bɛ nwo ɛkɛ ne hɔle.

Edwɛkpa ne kɛmɔ Mateyu hɛlɛle la 26:55

Akee Gyisɛse zele ɛlɔne ne kɛ, “Duzu ati a bɛdedɛ dadeɛ nee ahoholombaka bɛra bɛbahye me kɛ asɛɛ bɛdoa awule la ɛ? Dahuu mekilehile wɔ Ɛzonlenlɛ Sua ne anu, noko bɛangye me.

Dw 12:40

“Nyamenle ɛzi bɛ nye na yemaa bɛsolo, amaa bɛ nye annwu debie na bɛ nzo ade edwɛkɛ, na bɛahakyi bɛara me nwo kɛ menyɛ bɛ ayile.”

Ɛzoanvolɛma Gyima ne 11:26

Mɔɔ ɔnwunle ye la ɔ nee ye rale Anteɔko. Bɛ mu nwiɔ bɛ nee asɔnema ne dɛnlanle ɛvolɛ ko na bɛhilehilele bɛ. Na Anteɔko ɛkɛ yɛɛ bɛlumuale bɛvɛlɛle ɛdoavolɛma ne Keleseɛnema a.

Ɛzoanvolɛma Gyima ne 14:4

Na menli mɔɔ wɔ suakpole ne azo la anloa anzɛ bɛ nwo; foa ko hɔle Dwuuma anzi, yɛɛ foa ko hɔle ɛzoanvolɛma ne anzi.

Ɛzoanvolɛma Gyima ne 17:4

Bɛ nuhua bie mɔ liele lile na bɛhakyile bɛdoale Pɔɔlo nee Saelase; zɔhane ala yɛɛ Gilikima mɔɔ sonle Nyamenle nee mraalɛ mgbanyinli dɔɔnwo ne ala yɛle a.

Ɛzoanvolɛma Gyima ne 19:23

Mekɛ ɛhye anu ala Awulae Adenle ne ngilehilelɛ ne ati nzaka zile Ɛfɛsɛse.

Ɛzoanvolɛma Gyima ne 19:30

Pɔɔlo yɛle kɛ ɔkɔ bagua ne anu yeahɔdendɛ yeahile bɛ, na diedima ne mɔ amkponle ye.

Ɛzoanvolɛma Gyima ne 20:31

Yemɔti bɛnlea boɛ, na bɛhakye kɛ mendwinle monle ɛvolɛ nsa a mengilehilele bɛ wɔ nɔɔzo nee ewiazo a.

Ɛzoanvolɛma Gyima ne 22:4

Mengyele menli mɔɔ lua Adenle ɛhye azo la dɔɔnwo, mraalɛ nee mrenya, memanle bɛguale bɛ efiade na bɛhunle bɛ.

Ɛzoanvolɛma Gyima ne 24:21

Bɛannwu ɛhwee kɛ edwɛkɛ kpɔkɛ ko ne ala mɔɔ menganle wɔ mekɛ mɔɔ megyi bɛ nyunlu wɔ bagua ne anu la kɛ, ‘Bɛva me bɛra bɛ nyunlu ɛke, ɔluakɛ medie medi kɛ bɛbadwazo mɔwuamra bɛara ngoane nu bieko.’ ”

Ɛzoanvolɛma Gyima ne 28:22

Na yɛkulo kɛ yɛtie wɔ adwenle. Mɔɔ yɛze ye ɛke la a le kɛ, zɛhae fane ye mɔɔ ɛwɔ nu la, awie biala tendɛ tia ye.”

Ɛzoanvolɛma Gyima ne 7:51

Sitivin hɔle zolɛ zele bɛ kɛ, “Bɛdabɛ, bɛ nzo yɛ se kpalɛ! Bɛnlie Nyamenle bɛnli fee; bɛkpɔla bɛ nzo anzi wɔ Nyamenle edwɛkɛ ne anwo! Bɛva bɛ nlenya mɔ agyakɛ, dahuu bɛko bɛtia Sunsum Nwuanzanwuanza ne!

Ɛzoanvolɛma Gyima ne 9:2

na ɔhɔliele tumi ngɛlɛta kɛ ɔkɔ Dɛmasekɛse nyianu azua ne mɔ anu yeahɔhye bɛdabɛ mraalɛ nee mrenya mɔɔ bɛlua Awulae Adenle ne azo la, yeakyekye bɛ, ɔ nee bɛ ara Gyɛlusalɛm.

Wulo 11:7

Duzu bieko? Yizilayɛma annyia mɔɔ bɛkpondɛ la. Menli ekyi bie mɔɔ Nyamenle kpale nu yele bɛ la a nyianle ye a. Mɔɔ hale la yɛle anzosesebɛ.

Wulo 9:18

Yemɔti, Nyamenle ɔdaye ye ɛhulolɛdeɛ zo ɔse bie anwunvɔne yɛɛ ɔmaa bie noko yɛ anzosesebɛ.

1 Kɔl 16:9

Agbɔvolɛ zonle ɛke bɔbɔ ɛdeɛ, noko gyima bedevinli bie mɔɔ anwo hyia la anye ɛrala ɛkɛ ne ɛmaa me kɛ ɔwɔ kɛ medi.

1 Tem 6:5

Eza bɛ nee menli mɔɔ bɛ adwenle ɛzɛkye na nɔhalɛ ne ɛvi bɛ sa la su kpolera dahuu. Bɛ adwenle a le kɛ bɛdua nyamenlezonlenlɛ zo bɛanyia bɛ nwo.

2 Tem 1:15

Ɛze kɛ awie biala mɔɔ wɔ Ehyea maanzinli ne anu la ɛnriandi me; Fegyɛlɛse nee Hɛmɔgyɛnize bɛdabɛ bɛboka bɛ.

2 Tem 3:5

bɛbazɔ nyamenlezonlenlɛ nu, na bɛnrɛlie ye tumi kpalɛ ne bɛnrɛdo nu. Twe ɛ nwo fi menli zɛhae mɔ anwo.

2 Tem 4:2

Bɔ edwɛkɛ ne nolo na si zolɛ mɔɔ ɛndwenle mɔɔ kɛzi ɔ nzi a, kpalɛ o, ɛtane o! Di menli ne adwenle maa bɛlie Edwɛkpa ne bɛdo nu, twi bɛ nyunlu, tu bɛ folɛ na fa abotane kilehile bɛ.

Kɛlata mɔɔ bɛhɛlɛle bɛhɔmanle Hibuluma la 3:13

Zɔhane ati, amaa ɛtane ambɛlɛbɛla bɛ biala na yeakpunli ye ahonle la, bɛboa bɛ nwo ngoko alehyenlɛ biala, kɛmɔ “Ɛnɛ” gyi ɛkɛ ne maa yɛ alehyenlɛ biala mɔɔ kɛhye yɛ nyunlu la.

2 Pit 2:12

Menli ɛhye mɔ yɛ bɛ ninyɛne kɛ ɛbɔ nu nane mɔɔ bɛbɔle bɛ kɛ bɛhye bɛ bɛhu bɛ la. Bɛtendɛ ɛtane bɛtia debie biala mɔɔ bɛnze la, na bɛbazɛkye bɛ kɛ ɛbɔ nu nane.

2 Pit 2:2

Menli dɔɔnwo badoa bɛ alua bɛ ɛbɛla mgbane mgbane adenle ɛhye anu, na ɔlua bɛ nyɛleɛ ti menli adendɛ ɛtane atia nɔhalɛ Adenle ne.

Dwuudu Kɛlata ne 1:10

Menli ɛhye mɔ ka debie biala mɔɔ bɛnde ɔ bo la anwo edwɛkɛ ɛtane, yɛɛ ninyɛne mɔɔ bɛ nane adwenle ne maa bɛte ɔ bo la bɛmɛ a le ninyɛne mɔɔ sɛkye bɛ la.