Ɛzoanvolɛma Gyima ne 15:1 - BAEBOLO ANZƐƐ BULUKU NWUANZANWUANZA

¹ Menli bie vi Dwudiya rale Anteɔko na bɛbɔle ɔ bo kɛ bɛkilehile diedima ne kɛ, “Saa bɛanyɛ bɛ mrenyanu nzonlɛ, kɛmɔ Mosisi mɛla ne kile la a bɛnrɛnyia ngoane.”

Ɛzoanvolɛma Gyima ne 15:1 ပူးပေါင်းရင်းမြစ်များ

Sɛlɛ 12:3

Kenle mɔtwɛ ne azo bɛbayɛ kakula ne mrenyanu nzonlɛ.

Dw 7:22

Se Mosisi hanle kɛ bɛyɛ bɛ mra mrenyanu nzonlɛ la ati, (noko tɛ Mosisi bɔbɔ a bɔle ɔ bo a, bɛ nlenya mɔ a bɔle ɔ bo a) saa ɔdwu Ɛnwomenlelielɛ Kenle bɔbɔ a, bɛyɛ.

Ɛzoanvolɛma Gyima ne 1:15

Mekɛ ne anu diedima ne yiale nu. Bɛ nloa kɛyɛ ɛya ko abulanwiɔ. Pita dwazole zele bɛ kɛ,

Ɛzoanvolɛma Gyima ne 15:22

Ɛzoanvolɛma ne nee mgbanyima ne mɔ, nee asɔnema ne mɔ amuala akee bɔle kpɔkɛ kɛ bɛsoa menli bɛamaa bɛ nee Pɔɔlo nee Baanabase ahɔ Anteɔko. Bɛdule menli nwiɔ mɔɔ bɛbu bɛ kpalɛ la bɛmanle bɛ nee bɛ hɔle. Bɛmɛ a le Dwudase mɔɔ eza bɛfɛlɛ ye Baasabase la, yɛɛ Saelase.

Ɛzoanvolɛma Gyima ne 15:23

Na bɛvale kɛlata ɛhye bɛmanle bɛ kɛ bɛva bɛhɔ: “Yɛdayɛ bɛ mediema ɛzoanvolɛma nee asɔne mgbanyima, yɛlɛ mediema ɛhulolɛ yɛbiza mediema mɔɔ ɛnle Dwuuma mɔɔ wɔ Anteɔko, Selesea, yɛɛ Selea la amuala ahye.

Ɛzoanvolɛma Gyima ne 15:24

Yɛde kɛ yɛ bie mɔ mɔɔ yɛanzoa bɛ la ɛra bagyegye bɛ aha edwɛkɛ azɛkye bɛ adwenle.

Ɛzoanvolɛma Gyima ne 15:3

Asɔnema ne guale bɛ adenle, na bɛkɔ la bɛvale Fonehyea nee Samɛlea, na bɛhanle kɛ bɛdabɛ mɔɔ bɛnle Dwuuma la ɛzi ɛhakyi, na bɛlie Nyamenle bɛli la anwo edwɛkɛ bɛhilele bɛ. Na diedima ne lile nwolɛ fɛlɛko somaa.

Ɛzoanvolɛma Gyima ne 15:32

Dwudase nee Saelase, mɔɔ bɛdabɛ mumua ne bɛle Nyamenle kpɔmanvolɛma la dendɛle dɔɔnwo hilele bɛ manle bɛnyianle anwosesebɛ.

Ɛzoanvolɛma Gyima ne 15:5

Na diedima ne bie mɔ mɔɔ boka Falasii fane ne anwo la dwazole na bɛhanle kɛ, “Ɔwɔ kɛ bɛdabɛ mɔɔ bɛnle Dwuuma la yɛ bɛ mrenyanu nzonlɛ na eza bɛdi Mosisi mɛla ne azo.”

Ɛzoanvolɛma Gyima ne 21:20

Mɔɔ bɛdiele ye bɛwiele la, bɛyɛle Nyamenle mo na bɛzele Pɔɔlo kɛ, “Adiema Pɔɔlo, tie yɛ ɛ! Yɛlɛ Dwuuma apenle apenle mɔɔ ɛlie Edwɛkpa ne ɛli, noko bɛli Mosisi mɛla ne anzi kpalɛ kpalɛ a.

Ɛzoanvolɛma Gyima ne 6:14

Yɛdele kɛ ɔlɛka kɛ Gyisɛse ne mɔɔ vi Nazalɛte la barazɛkye Ɛzonlenlɛ Sua ye, na yeahakyi maamɛla biala mɔɔ Mosisi hyehyɛle manle yɛ la!”

Pɔɔlo Kɛlata mɔɔ ɔhɛlɛle ɔhɔmanle Galeehyeama la 2:1

Ɛvolɛ bulu nee nna pɛle nu la me nee Banabase yɛhɔle Gyɛlusalɛm bieko. Menvale Taetɛse membokale yɛ nwo yɛhɔle.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 5:6

Ɔluakɛ saa yɛ nee Kelaese Gyisɛse yɛ ko a, yɛyɛ yɛ mrenyanu nzonlɛ o, yɛanyɛ o, ɔngyia. Mɔɔ hyia la a le kɛ yɛkɛnyia diedi mɔɔ fa ɛhulolɛ yɛ gyima la.

Pɔɔlo Kɛlata mɔɔ ɔhɛlɛle ɔhɔmanle Galeehyeama la 6:12

Menli mɔɔ ɛlɛka ye ndinlizo kɛ bɛyɛ bɛ mrenyanu nzonlɛ la kulo kɛ bɛkile bɛ nwo ala kɛ bɛze amaamuo. Bɛyɛ bie zɔhane ala, amaa awie anyɛ bɛ kpɔdekpɔde kɛ bɛlɛka Kelaese ewule mɔɔ ɔwule meanubaka ne azo la anwo edwɛkɛ.

Kɔlɔ 2:16

Yemɔti bɛmmamaa awie bua bɛ ndɛne wɔ mɔɔ bɛdi nee mɔɔ bɛno, anzɛɛ ɛvoyialilɛ nwo, anzɛɛ Siane Fofolɛ nee Ɛnwomenlelielɛ Kenle nwo.

Kɔlɔ 2:8

Bɛnlea boɛ na awie anva mɛlɛbɛla nee adalɛ nrɛlɛbɛ mɔɔ bɛlua ewiade amaamuo zo bɛhyehyɛ, nee mɔɔ vi awozinli ewiade ye sunsum nu tumima ɛkɛ ne na ɔnvi Kelaese ɛkɛ ne la anyɛ bɛ ngɛkɛlɛ.