2 Tɛs 1:9 - BAEBOLO ANZƐƐ BULUKU NWUANZANWUANZA

⁹ Bɛbadea menli zɔhane mɔ na bɛaye bɛ bɛavi Awulae anye zo nee ye anyunlunyia tumi ne abo, na bɛazɛkye bɛ ɛzɛkyelɛ mɔɔ ɛnlɛ awieleɛ la.

2 Tɛs 1:9 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 3:8

Nzinlii mɔɔ aleɛ ne bɔle ɔ nloa aze la, bɛdele Ɛdɛnkɛma Nyamenle agyakɛ abo kɛ ɔlɛkpɔsa tola ne anu, na bɛnriandile bɛhɔveale tola ne anu mbaka ne mɔ anu, amaa yeannwu bɛ.

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 4:16

Akee Keen vile Ɛdɛnkɛma anyunlu na ɔhɔdɛnlanle Nɔɔdo wɔ Yidɛn tola ne aduduleɛ.

Dwobu Buluku ne 21:14

“Bɛka bɛkile Nyamenle kɛ, ‘Ɛvi yɛ nwo ɛke kɔ! Yɛmkpondɛ wɔ ɛzonlenlɛ nwo ngilehilelɛ biala.

Dwobu Buluku ne 22:17

Bɛzele Nyamenle kɛ, ‘Ɛvi yɛ nwo ɛke kɔ! Duzu yɛɛ Tumivolɛ ne kɛhola kɛyɛ kɛmaa yɛ a?’

Edwɛndolɛ Buluku ne 16:11

Ɛkile me ngoane adenle; anyelielɛ dɔɔnwo wɔ ɛ nwo ɛkɛ, fɛlɛkolilɛ wɔ ɛ sa fema zo dahuu.

Edwɛndolɛ Buluku ne 51:11

Mmafuandi me ɛto, yɛɛ mmaye wɔ Sunsum Nwuanzanwuanza ne ɛfi me nu.

Ayezaya Buluku ne 1:28

Bɛbazɛkye ɛtanema nee atuadelɛma, na bɛahu menli mɔɔ kpo Ɛdɛnkɛma la amuala.

Ayezaya Buluku ne 2:10

Bɛnriandi Ɛdɛnkɛma ɛya ɛzulolɛ ne nee ye belemgbunlililɛ anyunlunyia ne, na bɛhɔvea awolɛ nu nee azɛlɛ bo.

Ayezaya Buluku ne 2:19

Mekɛ mɔɔ Ɛdɛnkɛma kɛmaa ɔ nwo zo kɛ ɔ nee azɛlɛ ye azo amra di la, menli banriandi ahɔvea awolɛ mbɔne nu nee azɛlɛ bo ahuma nu, bɛavi ye ɛya kpole anu ɛzulolɛ ne nee ye belemgbunlililɛ anyunlunyia ne anwo.

Ayezaya Buluku ne 2:21

Mekɛ mɔɔ Ɛdɛnkɛma kɛmaa ɔ nwo zo kɛ ɔ nee azɛlɛ ye azo amra di la, menli banriandi ahɔvea awolɛ nee awoka adokule nu bɛavi ye ɛya kpole anu ɛzulolɛ ne nee ye belemgbunlililɛ anyunlunyia ne anwo.

Ayezaya Buluku ne 33:14

Ɛtanevolɛma mɔɔ wɔ Zayɔn la ahonle ɛdu, ɛzulolɛ kpole ɛha bɛdabɛ mɔɔ bɛnze Nyamenle la, bɛ nwo ɛlɛwozo bɛ. Bɛse, “Nwane bɔbɔ yɛɛ wɔ yɛ avinli mɔɔ kɛhola senle gbolamgbolam nu tɛnla a? Nwane a wɔ yɛ avinli mɔɔ kɛhola senle mɔɔ ɛnnu ɛlɛ la anu tɛnla a?”

Ayezaya Buluku ne 66:24

Na bɛbavinde bɛaranlea menli mɔɔ ɛde me nwo atua la avunli. Bɛ nwo azone ne mɔ ɛnrɛwu ɛlɛ, senle mɔɔ ɛlɛyela bɛ la ɛnrɛnlu ɛlɛ, na bɛbayɛ kyibadeɛ bɛamaa menli kɔsɔɔti.”

Daneɛle Buluku ne 12:2

Menli mɔɔ ɛwu la anu dɔɔnwo badwazo ara ngoane nu; bie mɔ banyia ngoane mɔɔ ɛnlɛ awieleɛ, bie mɔ dɔɔnwo noko babɔ anyiemgba mɔɔ ɛnlɛ awieleɛ.

Edwɛkpa ne kɛmɔ Mateyu hɛlɛle la 16:27

Ɔluakɛ ɔnrɛhyɛ biala na medame Sonla Ra me nee me anwuma soanvolɛma yɛara, wɔ Egya anyunlunyia nu, na yɛaradua awie biala kakɛ kɛmɔ ye gyima de la.

Edwɛkpa ne kɛmɔ Mateyu hɛlɛle la 22:13

Belemgbunli ne zele ye sonvolɛma ne kɛ, ‘Bɛkyekye ɔ sa nee ɔ gyakɛ, na bɛva ye bɛhɔdo alie nwo lɔ awozinli kpole ne anu. Ɛkɛ ne yɛɛ menli bazu na bɛadedɛ bɛ nwo bonrane nu a.’ ”

Edwɛkpa ne kɛmɔ Mateyu hɛlɛle la 24:30

Na akee medame Sonla Ra, me nwo sɛkɛlɛneɛ bavinde anwomanyunlu; menli muala mɔɔ wɔ aleɛabo la bali nyane wɔ mekɛ mɔɔ bɛkɛnwu medame Sonla Ra kɛ melua amungu nu na melɛ tumi nee anyunlunyia kpole melɛba la.

Edwɛkpa ne kɛmɔ Mateyu hɛlɛle la 25:41

“Akee mebaze bɛdabɛ mɔɔ bɛwɔ me sa bɛne zo la kɛ, ‘Bɛvi me nwo ɛke bɛhɔ, munzule menli! Bɛhɔ senle ne mɔɔ ɛnnu ɛlɛ, mɔɔ ɔvi ewiade abobɔlɛ bɛhua bɛmaa Abɔnsam nee ye soanvolɛma la anu!

Edwɛkpa ne kɛmɔ Mateyu hɛlɛle la 25:46

Na bɛkɛdea ɛhye mɔ ndeanlɛ mɔɔ ɛnlɛ awieleɛ a, na bɛava menli kpalɛ ne mɔ bɛahɔ ngoane mɔɔ ɛnlɛ awieleɛ la anu.”

Edwɛkpa ne kɛmɔ Mateyu hɛlɛle la 26:24

Na mame Sonla Ra, mebawu, kɛmɔ Nyamenle Edwɛkɛ ne se la, na ahenle mɔɔ ɔdua ɔ nwo zo bɛaye Sonla Ra ne bɛamaa la, ye gyakɔ! Ɔle kpalɛ kɛ anrɛɛ bɛanwo ye!”

Edwɛkpa ne kɛmɔ Mateyu hɛlɛle la 7:23

Na mebaze bɛ kɛ, ‘Menze bɛ. Bɛvi ɛkɛ ne bɛhɔ. Nindavoma!’

Edwɛkpa ne kɛmɔ Luku hɛlɛle la 13:27

Na ɔbaze bɛ bieko kɛ, ‘Menze ɛleka mɔɔ bɛvi a. Bɛvi ɛkɛ ne bɛhɔ, amumuyɛma!’

Dw 5:14

Nzinlii, Gyisɛse nwunle nrenya ne wɔ Ɛzonlenlɛ Sua ne anu na ɔzele ye kɛ, “Nea o, kɛkala wɔde kpɔkɛ. Gyakyi wɔ ɛtane ne mɔ anzi ɛlilɛ, anrɛɛ mɔɔ kɛzi ɛ nwo zo la kɛbo zolɛ.”

Mɛla 33:2

Ɛdɛnkɛma vi Saenae Boka rale, ɔdudule yɛ nwo zo wɔ Yidɔm kɛ sɛnzɛne. Ɔdale ɔvi Pɛlan Boka ɔguale yɛ nwo zo, ɔ nee nwuanzanwuanzama apenle bulu a lua a, ɔlɛ senle hulenyihulenyi ɔ sa fema nu.

Pɔɔlo Kɛlata mɔɔ ɔhɛlɛle ɔhɔmanle Felepaema la 3:19

Menli ɛhye mɔ, bɛ awieleɛ a le kɛ Nyamenle bazɛkye bɛ, ɔluakɛ bɛ nyamenle a le bɛ ko. Mɔɔ ɔwɔ kɛ bɛse nwolɛ nyiane la bɛfa bɛtu bɛ nwo, yɛɛ bɛ adwenle muala gyi ewiade ninyɛne zo.

1 Tɛs 5:3

Mekɛ mɔɔ menli kɛdwenle kɛ akee “Debie biala ɛla boɛ” la, mekɛ ne anu ala yɛɛ munzule ne bazi a. Biala ɛnrɛvi ɛsalɛ, ɔbayɛ arɛlevilɛ nu kɛ raalɛ mɔɔ ako ɛha ye la.

2 Tɛs 2:8

kolaa na akee Amumuyɛnli ne ara. Na saa Awulae Gyisɛse ba a, ɔbava ɔ nloa anu anwoma mgbane yeahu ye na yeava ɔ nyunlu ɛdalɛ wienyi kpole ne yeazɛkye ye bɔkɔɔ.

Pɔɔlo Kɛlata mɔɔ ɔhɛlɛle ɔhɔmanle Taetɛse la 2:13

yɛva yɛhendɛ saleɛ Kenle ne mɔɔ yɛ nye la ye adenle wɔ melɛ mɔɔ yɛ Nyamenle bedevinli ne nee Ngoanedievolɛ Gyisɛse Kelaese bɛ anyunlunyia ne kɛra la.

Kɛlata mɔɔ bɛhɛlɛle bɛhɔmanle Hibuluma la 10:29

Ɛnee ɛdawɔ fa ɛ nye to na nea sonla mɔɔ kɛkpo Nyamenle Ara ne, na yeambu mogya ne mɔɔ bɛlua zo a bɛ nwo te na Nyamenle vale zɔle ngyekyeleɛ ne anloa, na ɔkɛva Nyamenle ɛlolɛ Sunsum ne anyunlu ɔkɛkyikyi aze la ɛ? Ye ndeanlɛ mɔɔ ɔbanyia ye la le kpole kpalɛ.

2 Pit 2:17

Menli ɛhye mɔ le kɛ nzubula mɔɔ ɛsesa la, bɛle kɛ nzulemungu mɔɔ ahumu ɛlɛbɔ ye ahɔ la. Nyamenle ɛzie bɛ ɛleka wɔ awozinli kabikabi ne anu.

2 Pit 3:7

Nyamenle anloa edwɛkɛ ko ye ala azo a bɛlua bɛhua anwuma nee aze mɔɔ kɛkala wɔ ɛkɛ ne la anwo senle bɛzie ɛkɛ bɛlɛfa bɛahendɛ ndɛnebualɛ kenle ne nee menli mɔɔ ɛnze Nyamenle la ɛzɛkyelɛ a.

Dwuudu Kɛlata ne 1:13

Bɛle kɛ nyevile mɔɔ ɛzɛkye la azɛlɛkye, bɛ awubue da bɛ anyiemgba nyɛleɛ ne mɔ ali. Bɛle kɛ nwɔlɔra mɔɔ nwɔnla la. Nyamenle ɛva awozinli kabikabi ne mɔɔ ɛnde ɛlɛ la ɛzie ɛkɛ ɛmaa bɛ.

Yekile 20:11

Akee menwunle Belemgbunli ne nee ye belemgbunli ebia fufule ne mɔɔ ɔde zolɛ la. Anwuma nee azɛlɛ minliminlinle ɔ nyunlu ɛkɛ ne na bɛannwu bɛ bieko.

Yekile 20:14

Akee bɛvuandinle Ewule nee Ɛbolɔ bɛguale senle tandane ne anu. Senle ɛhye a le ewule ne mɔɔ tɔ zolɛ nwiɔ la.

Yekile 21:8

Na avoanvoanle, menli mɔɔ ɛnlɛ diedi, ngunzima, ahɔdiawu, adwɔmanema, nindavoma, awozonle ɛzonlenlɛma, nee adalɛma amuala, bɛ ɛleka a le tandane ne mɔɔ senle nee sɔlefa ɛlɛsɔ nu la anu. Senle tandane ɛhye a le ewule ne mɔɔ tɔ zolɛ nwiɔ la.”

Yekile 22:15

Wɔ suakpole ne kandiba lɔ, amumuyɛma, ahɔdiawu, ngonyiayelɛma, adwɔmanema, awozonle ɛzonlenlɛma, yɛɛ adalɛma wɔ nyɛleɛ nee ɛdendɛlɛ nu la a wɔ ɛkɛ ne a.