2 Sam 19:8 - BAEBOLO ANZƐƐ BULUKU NWUANZANWUANZA

⁸ Belemgbunli ne dwazole na ɔhɔdendɛle suakpole ne anlenkɛ kpole ne anloa. Bɛhɔhanle bɛhilele menli ne mɔ kɛ, “Belemgbunli ne de anlenkɛ kpole ne anloa.” Na menli ne mɔ kɔsɔɔti hɔbɔle yiale ye. Yizilayɛma kɔsɔɔti ɛnriandi. Ko biala ɛhɔ ɔdaye ye sua zo.

2 Sam 19:8 ပူးပေါင်းရင်းမြစ်များ

2 Sam 15:2

Alehyenlɛ biala nwonlomɔ mangyee ne Abesalɛm kɔgyinla suakpole ne anlenkɛ kpole ne anloa. Na saa awie lɛ ye edwɛkɛ kamaa belemgbunli aziezie a ɛnee ɔbiza ye kɛ, “Ɛvi suakpole boni azo?” Na saa ɔka kɛ, “Wɔ sonvolɛ, mevi Yizilayɛ abusua ekpunli zɛhae anu” a,

2 Sam 18:17

Bɛyele Abesalɛm funli ne na bɛvuandinle ye bɛdole kuma kpole bie anu wɔ kpɔkɛ ne anu. Bɛhuohuanle awolɛ edukue kpole bie ɔ nwo zo. Na Yizilayɛma kɔsɔɔti guale ɛbɔ nu. Ko biala hɔle ɔdaye ye sua zo.

2 Sam 18:24

Ɛnee Devidi de suakpole ne anuhɔlɛ nlenkɛ mgbole nwiɔ ne mɔɔ ko wɔ ɔ kunlu, ko wɔ ɔ nzi la avinli. Sinzavolɛ ne luale bane ne anwo vole hɔle anuhɔlɛ ne ati zo. Na mɔɔ ɔmanle ɔ nye zo la, ɔnwunle kɛ nrenya ko lɛ ɛnriandilɛ ɛlɛba.

2 Sam 18:4

Belemgbunli ne zele kɛ, “Debie biala mɔɔ bɛdabɛ bɛdwenle nwo a ɔle kpalɛ la menwɔyɛ.” Akee belemgbunli ne gyinlanle suakpole ne anlenkɛ kpole ne foa ko wɔ mekɛ mɔɔ ye ɛlɔnema ne zile nu ekpunli ekpunli apenle apenle nee ɛya ɛya kɛ bɛkɔ la.

2 Sam 19:3

Ɛlɔnema ne ziale hɔle suakpole ne azo koonwu kɛ ɛlɔnema mɔɔ bɛli bɛ nwo zo konim na bɛva nyiane bɛlɛnriandi la.

1 Arl 22:36

Mɔɔ ɛnee asɛɛ sɛnzɛne ɛdɔ nzule nu la, Yizilayɛma deanle nuhua kɛ, “Awie biala ɛye ɔ nwo zo ɛhɔ ye sua zo; awie biala ɛhɔ ye maanle nu!”

2 Arl 14:12

Gyɛhowahye lile Dwudama anwo zo konim na Amazaya ɛlɔnema ne guale ɛbɔ nu; biala nriandile hɔle ye sua zo.

2 Arl 8:21

Yemɔti Gyɛhɔlam vale ye ɛlɔnema mɔɔ fa ehwili ko la hɔle Zeeyɛ na nɔe ne bɛdwazole bɛhanle Yidɔmma mɔɔ ɛnee ɛbɔ ɛyia bɛ la senle manle bɛnriandile bɛhɔle bɛ azua nu.

1 Sam 4:10

Na Filisitiama honle ɛsesebɛ lile Yizilayɛma anwo zo konim bɛmanle bɛguale ndwɛlɛ aze. Bɛbiale Yizilayɛma mogya takaa; bɛhunle Yizilayɛ ɛlɔnema ne anu apenle ngoko abulasa.