2 Edk 34:4 - BAEBOLO ANZƐƐ BULUKU NWUANZANWUANZA

⁴ Ɔbubule bɛ bozonle Beeyale ne azukponle ne mɔ, ɔbubule ɛyɛlɛ azukponle ne mɔ mɔɔ gyigyi nwolɛ la, na ɔbubule bozonle raalɛ Ahyela ananze ne mɔ, nee ananze mɔɔ bɛze nee mɔɔ bɛgua la amuala. Ɔdinle bɛ ɔmanle bɛyɛle motomoto kɛ munlutu na ɔkpondenle ye wɔ menli mɔɔ zonlenle ninyɛne zɔhane mɔ na bɛwu la sɛka zo.

2 Edk 34:4 ပူးပေါင်းရင်းမြစ်များ

1 Arl 13:2

Na Nyamenle kpɔmanvolɛ ne luale Ɛdɛnkɛma anloa edwɛkɛ zo deanle azukponle ne na ɔzele kɛ, “O azukponle, wɔmɔ azukponle! Kɛ Ɛdɛnkɛma se la ɛne: Bɛbawo ralɛ nrenya wɔ Belemgbunli Devidi sua nu; bɛbavɛlɛ ye Dwosaya, na ɛ nwo zo yɛɛ ɔbahu ahɔmenle mɔɔ ɛkpu ɛyɛlɛ wɔ wɔ zo la, na yeayela menli mbowule wɔ zolɛ.”

2 Edk 14:5

Eza ɔbubule ɛleka ne mɔ mɔɔ menli mɔɔ ɛnze Nyamenle la sonle wɔ Dwuda azuamgbole ne mɔ azo la amuala na ɔbubule bɛ azukponle ne mɔ mɔɔ bɛkpu ɛyɛlɛ zolɛ la.

2 Edk 30:14

Bɛkpale bɛguale na bɛdudule azukponle dɔɔnwo ne mɔ mɔɔ wɔ Gyɛlusalɛm mɔɔ bɛyela ɛyɛlɛ zo la amuala na bɛhɔvuandinle bɛ bɛguale Kedelɔn bɔnza ne anu.

2 Edk 31:1

Mɔɔ ɛhye mɔ amuala wiele la, Yizilayɛma mɔɔ rale la hɔle Dwuda azuamgbole ne mɔ azo, bɛhɔbubule mpila ne mɔ mɔɔ bɛsisi, bɛ bozonle raalɛ Ahyela ne ananze ne mɔ, ɛleka ne mɔ mɔɔ menli mɔɔ ɛnze Nyamenle la sonle la, nee azukponle ne mɔ kɔsɔɔti mɔɔ wɔ Dwuda nee Bɛngyaman maanzinli ne mɔ anu, nee Yifelaem nee Manasɛ maanzinli ne mɔ anu la amuala. Akee awie biala hɔle ye sua zo.

2 Edk 33:22

Ɔyɛle ɛtane ɔtiale Ɛdɛnkɛma, kɛmɔ ɔ ze Manasɛ yɛle la. Emɔn bɔle azu manle ananze ne mɔ mɔɔ ɔ ze yɛle la amuala, na ɔzonlenle bɛ.

2 Edk 33:3

Ɔziale ɔsisile ɛleka ne mɔ mɔɔ menli mɔɔ ɛnze Nyamenle la sonle, mɔɔ ɔ ze Hɛzikaya gologolole bɛ guale la. Ɔsisile azukponle dɔɔnwo ɔmanle awozonle Beeyale ne mɔ, na ɔyɛle bozonle raalɛ Ahyela ne nee anwomanyunlu ninyɛne ananze ɔmanle bɛzonlenle bɛ.

2 Edk 34:33

Na Dwosaya yeyele munzule ninyɛne ne mɔ mɔɔ wɔ Yizilayɛ maanle ne anu la amuala guale, na ɔmanle menli ne zonlenle Ɛdɛnkɛma, bɛ Nyamenle ne. Wɔ ye mekɛ zo amuala menli ne angakyi bɛ nzi anzi bɛ ze mɔ Ɛdɛnkɛma Nyamenle ne, na bɛhɔle zolɛ bɛzonlenle ye dahuu.

2 Edk 34:7

Ɔbubule bɛ azukponle ne mɔ na ɔmanle bɛnlunle bɛ bozonle raalɛ Ahyela ananze ne mɔ nee mmonle ananze ne mɔ motomoto, na ɔbubule azukponle ne mɔ mɔɔ bɛyela ɛyɛlɛ wɔ zolɛ la, wɔ Yizilayɛ maanle ne amuala anu. Na akee ɔziale ɔhɔle Gyɛlusalɛm.

Edwɛndolɛ Buluku ne 18:42

Meti bɛ motomoto kɛ munlutu wɔ anwoma gye nu, mefuandi bɛ megua kɛ kpalɛzo ndɛtɛlɛ.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 23:24

bɛmmabɔ bɛ ti aze bɛmaa bɛ nyamenle ne mɔ yɛɛ bɛmmasonle bɛ, anzɛɛ bɛmmayɛ bɛ ɛzonlenlɛ ne mɔ bie. Bɛzɛkye bɛ na bɛbubu bɛ ɛzonlenlɛ mpila ne mɔ dwɔkɔdwɔkɔ.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 32:20

Ɔvale ɛnlankɛ ananze ne mɔɔ bɛyɛ la, ɔvale senle ɔholole, ɔdinle ɔmanle ɔyɛle motomoto kɛ munlutu, na ɔvale ɔguale nzule ne mɔɔ bɛno la anu ɔmanle Yizilayɛma nlonle.

Mosisi Buluku ne mɔɔ tɔ zo nwiɔ mɔɔ bɛfɛlɛ ye Adendulɛ 34:13

Bubu bɛ azukponle ne mɔ, tudu bɛ ɛzonlenlɛ mpila ne mɔ, na pepɛ bɛ bozonle raalɛ Ahyela sɛkɛlɛneɛ ne mɔ gua.

Ayezaya Buluku ne 27:9

Yemɔti debie mɔɔ Yizilayɛma yɛ a bɛkɛva bɛ ɛtane bɛkɛhyɛ bɛ la a le ɛhye: saa bɛbubu awozonle azukponle ne mɔ, bɛti bɛ motomoto kɛ munlutu, bɛbubu bɛ bozonle raalɛ Ahyela ne sɛkɛlɛneɛ anzɛɛ ɛyɛlɛ ɛkpunlɛ azukponle ne mɔ mɔɔ biala ɛnle ɛkɛ ne bieko la a, bɛkɛva bɛ ɛtane ne mɔ kɔsɔɔti bɛkɛhyɛ bɛ.

Sɛlɛ 26:30

Eza mebazɛkye bɛ ɛleka ne mɔ mɔɔ bɛkɔsonle la, na meabubu bɛ ɛyɛlɛ evuanlɛ azukponle ne mɔ, na meavuandi bɛdabɛ bɛ avunli meagua bɛ mmonle avunli ne mɔ azo, na meahyi bɛ bɔkɔɔ.

Maeka Buluku ne 1:5

Yizilayɛma mɛladonlɛ nee bɛ ɛtane ne mɔ ati yɛɛ ɛhye mɔ bazi a. Yizilayɛma mɛladonlɛ ne a le boni? Asoo tɛ Samɛlea ɔ? Dwudama ɛtane ne mɔ a le boni? Asoo tɛ Gyɛlusalɛm ɔ?

Mɛla 7:25

Bɛyela bɛ ananze ne mɔ mɔɔ bɛgua la kɔsɔɔti wɔ senle nu. Bɛmmamaa bɛ nye bolo ezukoa nvutuke anzɛɛ dwɛtɛ fufule ne mɔ mɔɔ bɛholo bɛgua nwolɛ la na anrɛɛ bɛkɛzua bɛ nwo ɛhane, ɔluakɛ bɛle Ɛdɛnkɛma bɛ Nyamenle ne kyibadeɛ.

Mɛla 7:5

Kɛ ɔwɔ kɛ bɛyɛ bɛ la ɛne: bɛbubu bɛ azukponle ne mɔ bɛgua, na bɛbubu bɛ mpila sɛkɛlɛneɛ ne mɔ, bɛpepɛ bɛ bozonle raalɛ Ahyela ne sɛkɛlɛneɛ mbaka ne mɔ bɛgua, na bɛyela ananze ne mɔ mɔɔ bɛbubu bɛgua la.

Mɛla 9:21

Akee menvale munzudeɛ ne, mɔɔ le ɛnlankɛ ralɛ ananze ne mɔɔ bɛyɛle la mendole senle nu menyelale ye, membubule nu na mendinle ye motomoto memanle ɔyɛle kɛ munlutu, na mendole menguale azule ekyi ne mɔɔ senze vi boka ne anu ba la anu.