2 Edk 30:5 - BAEBOLO ANZƐƐ BULUKU NWUANZANWUANZA

⁵ Yemɔti bɛyɛle ye mɛla na bɛbɔle ye nolo wɔ Yizilayɛ amuala, ɔvi Biyɛhyiba mɔɔ kɔdwu Dan la, kɛ menli ne ɛrɛla ɛmaa bɛli Akpabɛnwo Ɛvoyia ne wɔ Gyɛlusalɛm, bɛwula Ɛdɛnkɛma, Yizilayɛ Nyamenle ne anyunlunyia. Ɔluakɛ ɛnee bɛtɛbale dɔɔnwo ɛlɛ kɛ bɛbali ɛvoyia ne, kɛmɔ bɛhɛlɛ bɛdo ɛkɛ ne la.

2 Edk 30:5 ပူးပေါင်းရင်းမြစ်များ

Mosisi Buluku ne mɔɔ lumua mɔɔ bɛfɛlɛ ye Mɔlebɛbo 21:14

Yemɔti Ebileham dwazole nwonlomɔ mangyee ne ala na ɔvale aleɛ nee nzule nwoma kodoku ko ɔmanle Heega vale dole ɔ kɔme zo, na ɔdole ye nee ɔ ra ne adenle zo. Heega hɔle na ɔhɔluoluale Biyɛhyiba fienemgbole ne anu.

2 Edk 24:9

Akee bɛbɔle nolo wɔ Gyɛlusalɛm nee Dwuda amuala kɛ awie biala ɛradua ye adwule ɛdeɛ ne ɛmaa Ɛdɛnkɛma, kɛmɔ Nyamenle sonvolɛ, Mosisi, hyehyɛle manle Yizilayɛma wɔ fienemgbole ne anu la.

2 Edk 30:4

Belemgbunli nee ye mgbanyima ne mɔ anye liele ngyehyɛlɛ ne anwo.

2 Edk 35:18

Sumunli Nyamenle kpɔmanvolɛ Samoɛle mekɛ zo, bɛtɛdile Akpabɛnwo Ɛvoyia ne zɛhae ɛlɛ. Arelemgbunli mɔɔ rale hɔle la, biala anli ɛvoyia ne, kɛmɔ Belemgbunli Dwosaya, sɛlɛvolɛma ne, Livaema, Dwudama nee Yizilayɛma mɔɔ rale, nee Gyɛlusalɛmma lile la.

2 Edk 36:22

Mɔɔ bɛvale Saelɛse bɛziele Pɛhyea Maanle Maanle Belemgbunli la, ɛvolɛ ne ala anu, Ɛdɛnkɛma manle ye edwɛkɛ ne mɔɔ ɔluale Gyɛlɛmaya anwo zo ɔhanle la yɛle zɔhane. Ɛdɛnkɛma hanle belemgbunli ne ahonle manle ɔbɔle nolo wɔ ye belemgbunli maanle maanle ne mɔ amuala anu na eza ɔhɛlɛle ɔhɔmanle bɛ kɛ:

Daneɛle Buluku ne 6:8

Nana, di mɛla ne fa ɛ sa wula ɔ bo kile kɛ bɛngakyi ye ɛlɛ, kɛmɔ Midiama, nee Pɛhyeama mɛla ne se la.”

Sɛlɛ 23:2

“Ka kile Yizilayɛma kɛ, Ɛdɛnkɛma ɛvoyia ne mɔ, mɔɔ le medame me ɛvoyia ne mɔ mɔɔ le nwuanzanwuanza la a le ɛhye mɔ.

Sɛlɛ 23:4

Akee Ɛdɛnkɛma ɛvoyia ne mɔ mɔɔ ɔwɔ kɛ bɛfa bɛsonle ye la ɛne, bɛ mekɛ dwu a ɔwɔ kɛ ɛbɔ ye nolo ɛkile bɛ.

1 Kɔl 11:2

Mekanvo bɛ, ɔluakɛ dahuu bɛkakye me na bɛdi me ngilehilelɛ zo.

Mɛla 12:32

“Bɛli mɔɔ meha mehile bɛ la azo kpalɛ. Bɛmmafa bie bɛboka nwolɛ yɛɛ bɛmmaye bie bɛfi nuhua.

Maanlebuvolɛma Buluku ne 20:1

Akee Yizilayɛma kɔsɔɔti, ɔvi Dan mɔɔ kɔ Biyɛhyiba nee Geleade la yɛle ko na bɛrayiale nu wɔ Mezepa wɔ Ɛdɛnkɛma duma nu.