2 Kɔl 7:11 - BAEBOLO ANZƐƐ BULUKU NWUANZANWUANZA

¹¹ Bɛnlea gyima mɔɔ Nyamenle vale bɛ rɛle ne mɔɔ bɔle la lile a: bɛ nye bolole edwɛkɛ ne anwo manle bɛhilele kɛ bɛ nwo ɛnle nu! Nea bɛ ɛya mɔɔ bɛvale, ɛzulolɛ mɔɔ bɛnyianle ye bɛ nu, bɛ nwo mɔɔ dɔ me kɛ bɛ kunlu a anrɛɛ mewɔ lɔ, bɛ nwo mɔɔ bɛyelele kɛ bɛkɛbɔ ɛbɛla kpalɛ, nee kɛ bɛzile bɛdeanle bɛdabɛ mɔɔ bɛlile ɛtane la. Adenle biala anu bɛyɛle bɛhilele kɛ bɛnli fɔlɛ fee wɔ edwɛkɛ ne anwo.

2 Kɔl 7:11 ပူးပေါင်းရင်းမြစ်များ

Nihɛmaya Buluku ne 13:25

Mendwile bɛ nyunlu na menwale bɛ amonle. Membole bɛ nuhua bie mɔ na mendwewhenle bie mɔ ati enrinli mendudule ye. Memanle bɛhanle ndane kɛ kenle bie maanle nu, “Bɛnrɛva bɛ mra mraalɛ bɛnrɛmaa menli zɔhane mɔ amra mrenya agyalɛ, anzɛɛ bɛnrɛmaa bɛ mra mrenya ɛnrɛgya bɛ mra mraalɛ, yɛɛ bɛdabɛ mumua ne bɛnrɛgya menli zɔhane mɔ bie ɛlɛ.”

Dwobu Buluku ne 42:6

yemɔti mebɔ anyiemgba na menlu me nwo; mebɔ ndɛtɛlɛ nee nzonle.”

Edwɛndolɛ Buluku ne 119:139

Me nwo yelɛyela me kɛ senle, ɔboalekɛ me kpɔvolɛma arɛle fi wɔ edwɛkɛ ne.

Edwɛndolɛ Buluku ne 130:6

me ɛkɛla kendɛ Ɛdɛnkɛma tɛla sinzavolɛma mɔɔ kendɛ alehyenlɛ la, tɛla sinzavolɛma mɔɔ kendɛ alehyenlɛ la.

Edwɛndolɛ Buluku ne 145:19

Ɔmaa bɛdabɛ mɔɔ bɛsulo ye la nyia mɔɔ bɛkpondɛ la, eza ɔte bɛ ɛzunlɛ na ɔdie bɛ.

Edwɛndolɛ Buluku ne 2:11

Bɛva ɛzulolɛ bɛzonle Ɛdɛnkɛma, bɛva anwowozolɛ bɛdu bɛgua ɔ gyakɛ anu,

Edwɛndolɛ Buluku ne 35:13

Noko mame, mɔɔ bɛnde kpɔkɛ la, mengedale ɛrele, mengyele ɛhɔne, mengilele me nwo nyane. Membɔle me ti aze menzɛlɛle

Edwɛndolɛ Buluku ne 38:9

Awulae, ɛze me ngyianlɛ muala, me ɛkponlenlɛ ɛnvea wɔ.

Edwɛndolɛ Buluku ne 42:1

Kɛ weɛlɛ anwo si dɔ azule mɔɔ se la, O Nyamenle, zɔhane ala yɛɛ me nwo dɔ wɔ a.

Edwɛndolɛ Buluku ne 69:9

Ɔluakɛ wɔ Ɛzonlenlɛ Sua ne anwo ɛhulolɛ sɔ kɛ senle wɔ me nu, yɛɛ aholoba mɔɔ bɛbɔ wɔ la amuala gua me nwo zo.

Mrɛlɛbulɛ Buluku ne 14:16

Nrɛlɛbɛvolɛ nea boɛ na ɔtwe ɔ nwo ɔfi munzule nwo, na koasea ɛndwenle ɔ nwo, yɛɛ ɔle mgbaha.

Mrɛlɛbulɛ Buluku ne 28:14

Nyilalɛ ɛha sonla ne mɔɔ sulo Ɛdɛnkɛma dahuu la, na sonla mɔɔ le anzosesebɛ la badɔ munzule nu.

Sɔlɔmɔn Edwɛne 8:6

Fa me yɛ ɛyɛlɛ sɔ wɔ ahonle ne anloa yɛ me nzonlɛyɛdeɛ wɔ ɛ sa anwo. Ɔluakɛ ɛhulolɛ yɛ se kɛ ewule, yɛɛ nungule ati yɛ se kɛ funli kuma. Ɔpɛ fɛlɛ a ɔle senle, na ɔsɔ kɛ sendɔlɔra.

Ayezaya Buluku ne 26:8

Wɔ wɔ ndɛnebualɛ adenle nu yɛɛ yɛlɛkendɛ wɔ a, O Ɛdɛnkɛma; mɔɔ yɛkpondɛ la a le wɔ duma ne ɛhakyelɛ.

Ayezaya Buluku ne 66:2

Medame a meva me sa mebɔ ninyɛne kɔsɔɔti a, yemɔti debie biala le me ɛdeɛ, medame Ɛdɛnkɛma a mese a. Noko sonla mɔɔ me nye balie ɔ nwo la a le sonla ne mɔɔ le bɛlɛvo, ɔnu ɔ nwo, ɔsulo me na ɔdi me edwɛkɛ zo la.

Daneɛle Buluku ne 6:14

Belemgbunli dele edwɛkɛ ne la, ɔgyegyele ye adwenle dɔɔnwo. Ɛbɔ ye nwonlomɔ ne toonwo mɔɔ kɔdwu nɔsolɛ nu la ɛnee ɔlɛkpondɛ adenle yealua nu yealie Daneɛle.

Edwɛkpa ne kɛmɔ Maake hɛlɛle la 3:5

Gyisɛse vale ɛya na ɔnleanle bɛ nyunlu ɔyiale, noko eza ɔlile bɛ nwo nyane, ɔluakɛ bɛle menli mɔɔ ɛzua anyetele na bɛ ti yɛ se a. Yemɔti ɔzele nrenya ne kɛ, “Tenrɛ ɛ sa ne anu.” Nrenya ne denrɛle ɔ sa ne mɔɔ ɛdwe la anu, na ɔyɛle kpalɛ bieko.

Dw 2:17

Ye ɛdoavolɛma ne hakyele kɛ Nyamenle Edwɛkɛ ne ɛha ɛdo ɛkɛ ne kɛ, “Nyamenle, wɔ sua ne anwo ɛhulolɛ sɔ kɛ senle la wɔ me nu.”

Ɛzoanvolɛma Gyima ne 17:16

Mɔɔ Pɔɔlo ɛlɛkendɛ Saelase nee Temɔte wɔ Atɛnse la, ɔnwunle kɛ awozonle ɛzonlenlɛ ɛva sua ne, yemɔti ɔlile nyane dɔɔnwo.

Wulo 11:20

Ɔle nɔhalɛ bɔkɔɔ. Bɛpepɛle bɛ bɛguale, ɔluakɛ bɛanlie bɛanli, na bɛmɛ bɛlie bɛli yemɔti bɛgyi ye kpundii. Noko akee bɛmmafa bɛtu bɛ nwo; anrɛɛ bɛzulo Nyamenle.

Wulo 14:18

Awie biala mɔɔ sonle Kelaese wɔ zɛhae adenle zo la yɛɛ Nyamenle anye die ɔ nwo na ɔsɔ menli nye a.

Wulo 3:5

Saa yɛ nyɛleɛ ɛtane ɛtane ne mɔ maa yɛnwu Nyamenle pɛlepɛlelilɛ ne wienyi a, ɛnee kɛ yɛse ɛ? Saa yɛyɛ ɛtane na Nyamenle tea yɛ a, ɛnee Nyamenle ɔdaye yeyɛ ɛtane ɔ? (Melɛtendɛ kɛ sonla ala la.)

1 Kɔl 12:25

Zɔhane ati mgbakyemgbakye biala ɛnle sonlabaka ne anu, yɛɛ nvɛyeba ngakyile ne mɔ amuala dwenle maa bɛ nwo ngoko ngoko.

1 Kɔl 5:2

Ɛhye ɛnyɛ bɛ nyiane bɔbɔ? Bɛli nwolɛ nyane na bɛye sonla zɔhane mɔɔ ɛbɔ munzule ɛbɛla ɛhye la wɔ bɛ avinli.

2 Kɔl 13:7

Yɛsɛlɛ Nyamenle kɛ bɛnrɛyɛ ɛtane, tɛ kɛ amaa bɛanwu kɛ yɛho yɛdɔ zolɛ ɔ, na amaa yɛmɛ, saa ɔzɔho kɛ yɛkpo aze bɔbɔ a, bɛmɛ bɛayɛ mɔɔ le fɔɔnwo la.

2 Kɔl 2:6

Ɔle kpalɛ bɔkɔɔ ɔmaa sonla zɔhane kɛ bɛ nuhua dɔɔnwo ne ala ɛhwi ɔ nyunlu a.

2 Kɔl 6:4

Wɔ yɛ nyɛleɛ biala anu yɛfa abotane yɛgyinla ngyegyelɛ, anwongyelelɛ nee abodelɛ biala anloa, yɛkile kɛ yɛle Nyamenle sonvolɛma.

2 Kɔl 7:1

Ayi mɔ, ɛwɔkɛ mɔɔ Nyamenle ɛbɔ yɛ la ɛne. Yemɔti, bɛmaa yɛwowo debie biala mɔɔ wɔ yɛ nwo mɔɔ gua yɛ sonlabaka ye anzɛɛ yɛ ɛkɛla ne mɔ anwo evinli la yɛgua, yɛzulo Nyamenle, na yɛmaa yɛ ɛbɛlabɔlɛ nwo ɛde bɔkɔɔ.

2 Kɔl 7:7

yɛɛ tɛ ye ɛralɛ ne angome, na ye amaneɛ bɔbɔ mɔɔ ɔrabɔle mɔɔ fane kɛ bɛzile bɛkyekyele ɔ rɛle, bɛ nwo mɔɔ dɔ me, me nwo nyane mɔɔ bɛlɛdi, nee bɛ nye mɔɔ ɛbolo kɛ bɛpepɛ bɛalie me la ɛmaa kɛkala me nye ɛlie kpole kpalɛ.

2 Kɔl 7:9

Kɛkala ɛdeɛ, medi fɛlɛko, tɛ kɛ membɔle bɛ rɛle la ati ɔ, na kɛ bɛ rɛle ɛbɔlɛ ne manle bɛnlunle bɛ nwo. Nyamenle luale bɛ rɛle ɛbɔlɛ ne azo lile gyima, yemɔti yɛanyɛ bɛ ɛtane.

2 Kɔl 9:2

Meze kɛ bɛkulo kɛ bɛboa, yɛɛ meva bɛ medu me nloa anu mehile Masidoneama. Menganle kɛ, “Sumunli ɛkenle ɛvolɛ ne yɛɛ mediema mɔɔ wɔ Akaya (Giliki) maanzinli nu la boɔboale bɛ nwo kɛ bɛboa a.” Zɛhae mɔdenlebɔlɛ ne ɛmaa menli dɔɔnwo ne ala akee anye ɛbolo.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 4:26

Saa ɛfa ɛya a, mmamaa ɔfa wɔ ɔkɔ ɛtane nu; eza mmamaa sɛnzɛne ne tɔ wɔ ɛya zo.

Pɔɔlo Kɛlata mɔɔ ɔhɛlɛle ɔhɔmanle Ɛfɛsɛsema la 5:11

Bɛmmayɛ awozinli nu nyɛleɛ mgbane mgbane ne mɔ mɔɔ menli yɛ na nvasoɛ ɛnle zolɛ la bie. Bɛnwu bie a anrɛɛ bɛha bɛdo gua.

Pɔɔlo Kɛlata mɔɔ ɔhɛlɛle ɔhɔmanle Felepaema la 2:12

Zɔhane ati ayi mɔ, kɛmɔ bɛlile me edwɛkɛ zo wɔ mekɛ mɔɔ ɛnee me nee bɛ de la, ɔhyia ɛsesebɛ kɛ akee bɛkɛyɛ ye zɔhane kɛkala mɔɔ me nee bɛ ɛnde la. Bɛva ɛzulolɛ nee anwowozolɛ bɛli bɛ ngoanelielɛ ne anwo gyima bɛhɔ awieleɛ,

1 Tɛs 4:6

Wɔ ɛhye ɛyɛlɛ nu, ɔnle kɛ awie biala yɛ ɔ diema bie ɛtane anzɛɛ sisi ye. Yɛha ɛhye yɛhile bɛ ɛlɛ, yɛɛ yɛbɔ bɛ nwolɛ kɔkɔ, kɛ Nyamenle badea bɛdabɛ mɔɔ bɛyɛ zɔhane ɛtane ne la.

1 Tem 5:20

Twi bɛdabɛ mɔɔ ɛtane ala a bɛyɛ la anyunlu wɔ bagua nu, amaa menli mɔɔ ɛha la azulo.

2 Tem 2:15

Bɔ mɔdenle ɛsesebɛ kɛ ɛkɛzɔ Nyamenle anye, kɛ gyimayɛvolɛ mɔɔ ɛnze ye gyima nwo nyiane na ɔkilehile Nyamenle nɔhalɛ edwɛkɛ ne kpalɛ la.

Pɔɔlo Kɛlata mɔɔ ɔhɛlɛle ɔhɔmanle Taetɛse la 3:8

Edwɛkɛ ɛhye le nɔhalɛ. Mekulo kɛ ɛka edwɛkɛ ɛhye mɔ na ɛsi zo ɛsesebɛ, amaa bɛdabɛ mɔɔ bɛdie Nyamenle bɛdi la anlea zolɛ abɔ ɛbɛla kpalɛ dahuu. Ɔluakɛ ɛhye mɔ le kpalɛ na eza ɔhyia ɔmaa sonla biala.

Kɛlata mɔɔ bɛhɛlɛle bɛhɔmanle Hibuluma la 4:1

Kɛkala mɔɔ Nyamenle ɛwɔkɛ ne mɔɔ fane ɛnwomenlelielɛ nwo la tɛbɔ ɛkɛ ne la, bɛmaa yɛnlea boɛ na bɛanze yɛ bie mɔ kɛ bɛdɔ sinli na bɛnrɛdwu ɛnwomenlelielɛ ɛleka ne.

Gyemise Kɛlata ne 3:17

Nrɛlɛbɛ ne mɔɔ vi anwuma lɔ la anwo te, mɔɔ lumua la ɛne. Eza ɔle anzonudwolɛ, ɔka ɔ nwo aze, ɔlɛ ndelebɛbo; anwunvɔnezelɛ ɛyi ye tɛkɛɛ yɛɛ ɔso nyɛleɛ kpalɛ biala ma. Ɔndwenle adwenle ɛtane, yɛɛ ɔmbɔ adalɛ.

1 Pit 1:17

Bɛyɛ nzɛlɛlɛ a bɛfɛlɛ Nyamenle ne mɔɔ ɔnnea sonla nyunlu na ɔbua menli kɔsɔɔti ndɛne, kɛmɔ biala nyɛleɛ si de la bɛ Ze. Zɔhane ati, bɛva Nyamenlezulolɛ bɛbɔ bɛ ɛbɛla wɔ mekɛ mɔɔ bɛwɔ nlɔnu la.

1 Pit 2:2

Bɛyɛ bɛ nwo kɛ nlɔma mɔɔ sunsum nu nyɛfonzule ɛhɔne ɛlɛku bɛ la, amaa saa bɛnyia ye bɛno a bɛanyi na bɛanyia ngoane.

Dwuudu Kɛlata ne 1:23

Bɛhwe bie mɔ bɛvi sendɔlɔra ne anu, bɛlie bɛ ngoane. Bɛva ɛzulolɛ bɛze bie mɔ anwunvɔne, na bɛhyi bɛ adɛladeɛ ne mɔ mɔɔ bɛ ɛtane atiakunluwɔzo ɛheha nu la.

Yekile 3:19

Bɛdabɛ mɔɔ mekulo bɛ la, metwi bɛ nyunlu na metea bɛ. Zɔhane ati bɔ mɔdenle nu ɛ nwo na yɛ gyima ɛsesebɛ.